Con Jehova Ta Mira Mi?
1. Den ki sentido Bijbel ta manera un spiel?
1 Abo sa wak den spiel? Mayoria di nos ta haci esey tur dia, ya cu e ta yuda nos mira si tin algo pa drecha na nos apariencia. Bijbel den un sentido ta manera un spiel. Ora nos lesa e Palabra di Dios, nos ta mira loke nos ta di paden, e persona cu nos ta den bista di Jehova. (1 Sam. 16:7; Sant. 1:22-24) E Palabra di Dios por “saca pensamento y intencion di curason na cla.” (Heb. 4:12) Con lesamento di Bijbel y meditacion riba un base diario por yuda nos mira den ki areanan nos tin cu mehora pa por haya mihor resultado den e trabou di predica e bon noticia?—Sal. 1:1-3.
2. Con Bijbel por yuda nos samina nos mes?
2 Uza Bijbel Como Bo Spiel: E relatonan biblico di fiel sirbidornan di Jehova ta siña nos ki cualidadnan ta bunita den su bista. Por ehempel, David a demostra celo pa e nomber di Dios. (1 Sam. 17:45, 46) Cu curashi Isaias a ofrece su mes pa predica den teritorio dificil. (Isa. 6:8, 9) E gran amor cu Hesus tin pa su tata celestial a lag’e mira su sirbishi como algo refrescante y agradabel y no como un carga pisa. (Juan 4:34) E cristiannan di prome siglo a predica cu celo, nan a depende riba Jehova y tabata dicidido pa no entrega. (Echo. 5:41, 42; 2 Cor. 4:1; 2 Tim. 4:17) Ora nos medita riba e ehempelnan aki, nan lo yuda nos samina nos mes cu e meta di mehora e calidad di nos sirbishi sagrado.
3. Dicon nos no mester tarda pa haci cambionan necesario?
3 Corigi Defectonan: Ta claro cu nos no ta gana nada si nos ta wak den spiel y ta ignora cualkier defecto cu nos tin. Nos por pidi Jehova pa yuda nos mira nos mes na un manera realistico y yuda nos haci e cambionan necesario. (Sal. 139:23, 24; Luc. 11:13) Nos no mester tarda pa haci e cambionan aki ya cu no a keda mucho tempo mas y tanto nos bida como esun di e hendenan den teritorio por ta na peliger.—1 Cor. 7:29; 1 Tim. 4:16.
4. Kico ta pasa cu e hende cu ta wak cuidadosamente den e Palabra di Dios y ta corigi e defectonan cu el a mira?
4 Loke nos ta di paden, esta, e persona cu nos ta den bista di Jehova, ta mas importante cu loke nos ta di pafo. (1 Ped. 3:3, 4) Kico ta pasa cu e hende cu ta wak cuidadosamente den e Palabra di Dios anto despues ta corigi e defectonan cu el a mira? E “ta bira, no un hende cu ta tende y lubida, sino un hende cu ta cumpli cu e obra, y lo e ta feliz haciendo esey.” (Sant. 1:25) Si, nos lo ta predicadornan feliz y capaz pasobra nos “ta refleha manera spiel e gloria di Jehova.”—2 Cor. 3:18.