Nos Tin Shen Aña Ta Anuncia e Reino!
1. Ki animacion e pueblo di Jehova a haya casi shen aña pasa?
1 Casi shen aña pasa Ruman Rutherford a declara na e pueblo di Jehova: “Tende! E Rey ta reina! Boso ta su agentenan di publicidad. Pesey, anuncia, anuncia, anuncia e Rey y su reino.” E palabranan ey a anima nan pa anuncia e mensahe di e Reino rond mundo. Y esaki ta loke nos a haci! Mescos cu e prome cristiannan, nos ta predica e bon noticia di e Reino “na henter e creacion bou di cielo.” (Col. 1:23) Con nos a haci esey durante e siglo pasa? Con nos por sigui anuncia e Reino awor cu e tin casi 100 aña ta existi?
2. Con nos literatura ta anuncia e Reino di Dios?
2 Reflexionando Riba Pasado: Pa decadanan, nos literatura a anuncia e Reino di Dios. For di 1939 nos revista principal tin e titulo: E Toren di Vigilancia Anunciando e Reino di Jehova Dios. Regularmente e revista aki tin articulonan cu ta papia tocante e Reino y kico e lo logra. ¡Despertad! tambe ta enfatisa cu e Reino di Dios ta e unico speransa pa humanidad. No ta nada straño anto cu e dos revistanan aki ta e revistanan mas traduci y distribui na mundo.—Rev. 14:6.
3. Ki metodonan nos a uza pa anuncia e Reino, y con nos ta haciendo esey awor?
3 E pueblo di Jehova ta uzando diferente metodo pa anuncia e Reino. Antes nos tabata uza auto cu ekipo di zonido, programanan na radio y tocadisco portatil. E metodonan ey a yuda nos alcansa hopi hende cu e bon noticia, aunke no tabatin hopi predicador di Reino. (Sal. 19:4) Pa un par di aña caba nos ta uzando jw.org pa anuncia e Reino na miyones di hende, hasta na esnan cu ta biba na paisnan caminda nos trabou ta prohibi.
4. Ki maneranan special pa predica e pueblo di Jehova a bin cu ne?
4 E pueblo di Jehova a bin tambe cu maneranan special pa anuncia e mensahe di Reino. Pa duna mas empuhe na nos trabou di predica, desde 1996 nos a cuminsa haci esfuerso pa predica den negoshi, parke publico y na luga di parkeer. Poco tempo pasa, nos a cuminsa cu un manera special pa predica den area publico den stadnan grandi rond mundo. Fuera di esey, hopi congregacion ta uza mesa y stand di literatura pa predica na luganan publico den nan mes teritorio. Claro cu e trabou di cas pa cas ta keda nos metodo principal di predica e Reino.—Echo. 20:20.
5. Ki oportunidadnan hopi di nos lo tin den e aña di sirbishi nobo?
5 Pensando Riba Futuro: Na comienso di e aña di sirbishi nobo na september hopi ruman lo cuminsa traha pionero regular. Abo lo ta un di nan? Of lo bo por traha pionero auxiliar de bes en cuando? Sea cu bo por traha pionero of no, Jehova sigur lo bendiciona bo pa cualkier sacrificio cu bo ta haci pa participa plenamente den e obra di anuncia e Reino.—Mal. 3:10.
6. Dicon october 2014 lo ta un luna special?
6 Na october 2014 ta cumpli net 100 aña cu e Reino a ser estableci. Pesey den e luna ey, e edicion pa publico di E Toren di Vigilancia lo pone extra atencion na e Reino di Dios. Laga nos haci tur nos esfuerso pa mas tanto hende posibel haya un ehemplar di e edicion aki den nan man. Ademas, laga cada un di nos sigui “declara e bon noticia tocante e Reino di Dios” na tur hende cu kier scucha.—Echo. 8:12.