Tuma e Profetanan Como Ehempel: Nahum
1. Kico nos ta siña for di e buki di Nahum?
1 E ruinanan di e stad di Ninive di antiguedad ta prueba palpabel cu Jehova ta tuma venganza contra su enemigonan, manera profeta Nahum a declara. Ni e adversarionan di mas cruel no por para banda di dje. (Nah. 1:2, 6) Si nos analisa e profecia di Nahum, nos lo saca algun les cu lo ta util pa nos sirbishi.
2. Kico nos por haci pa nos mensahe keda positivo?
2 Duna Consuelo y Speransa: Na prome instante, e buki di Nahum ta parce simplemente un profecia di huicio contra Ninive, e capital orguyoso di Asiria di antiguedad. (Nah. 1:1; 3:7) Sinembargo, e profecia aki tabata un bon noticia pa e pueblo di Jehova. Nahum, kende su nomber ta nifica “Consolador”, a sigura su paisanonan Hudiu cu pronto nan enemigo lo no t’ey mas. Ademas, Nahum a garantisa nan cu Jehova ta “un luga fortifica den e dia di angustia.” (Nah. 1:7) Ora nos ta predica, nos tambe ta comparti bon noticia y ta anima hende pa busca refugio den Jehova.—Nah. 1:15.
3. Con nos por imita Nahum uzando ehempel y ilustracion den sirbishi?
3 Uza Ehempel y Ilustracion: Jehova a inspira Nahum pa compara e fin di Ninive cu esun di e stad Egipcio Tebas (No-Amon), cu Asiria mes a destrui anteriormente. (Nah. 3:8-10) Ora nos ta papia cu otro hende tocante e fin di e mundo malbado aki, nos por hala atencion na profecianan di Bijbel cu ta mustra cu Jehova ta cumpli cu su palabra te den e detayenan di mas chikito. Por ehempel, ora Babilonia y Medo a uni forsa pa lansa un atake contra e stad di Ninive na aña 632 prome cu Cristo, awasero pisa a laga Riu Tigris pasa over y pone cu un parti grandi di e murayanan masivo di e stad aki a cay den otro. Nan a conkista Ninive masha lihe mes, net manera Jehova a profetisa.—Nah. 1:8; 2:6.
4. Con nos por papia na un manera cla y comprendibel den sirbishi?
4 Papia na un Manera Cla y Comprendibel: Nahum a skirbi su profecia na un manera descriptivo y emocionante. E puntonan cu el a trece dilanti tabata comprendibel. (Nah. 1:14; 3:1) Mescos tambe, nos kier uza palabra cu ta facil pa compronde. (1 Cor. 14:9) Asina cu bo cuminsa papia cu un persona, splic’e bon cla e motibo di bo bishita. Yuda bo studiantenan di Bijbel cultiva fe den Jehova y den su Palabra, y compronde con e informacion ta aplica na nan.—Rom. 10:14.
5. Ki garantia e profecia di Nahum ta duna nos?
5 Nahum tabatin pleno confianza cu Jehova su palabra lo a cumpli sin falta. Nos por mira esey bon cla den e buki di Bijbel cu ta carga su nomber. Segun cu e mundo di Satanas ta yega na su fin, nos ta haya consuelo den e declaracion cu Dios a duna: “Angustia lo no lanta dos biaha.”—Nah. 1:9.