Reunion pa Sirbishi di Veld Cu Ta Logra Su Meta

1. Kico ta e meta di e reunion pa sirbishi di veld?

¹ Na un ocasion, Hesus a reuni cu 70 di su discipelnan prome cu nan a sali bay predica. (Luc. 10:1-11) Como animacion el a recorda nan cu nan no tabata nan so, Jehova, e “Doño di e cosecha” tabata esun cu lo a guia nan. Tambe el a duna nan instruccion cu a yuda nan haci e trabou, y el a organisa nan di manera cu nan a traha “dos dos.” Awe, e reunion cu nos ta tene prome cu nos sali den sirbishi tin e mesun meta, esta pa anima nos, instrui nos y organisa nos.

2. Cuminsando na april, con largo un reunion pa sirbishi di veld lo dura?

² Aworaki, e reunionnan pa sirbishi di veld ta dura 10 pa 15 minuut. Den e par di minuutnan ey ta organisa e grupo, parti e teritorio y haci oracion. Pero cuminsando na april, reunion pa sirbishi di veld lo dura cinco pa shete minuut. Si tene e reunion aki despues di un otro reunion di congregacion, lo e dura menos, ya cu e publicadornan cu ta asisti ya a disfruta di un programa spiritual. Ora e reunion pa sirbishi di veld ta mas cortico, esey lo permiti e publicadornan traha mas largo den sirbishi. Ademas, pionero- of publicadornan cu a cuminsa predica prome cu e reunion pa sirbishi di veld lo interumpi nan sirbishi pa un rato so.

3. Con ancianonan por organisa e reunionnan pa sirbishi di veld?

³ E ancianonan mester organisa e reunionnan pa sirbishi di veld di tal manera cu nan ta practico pa e publicadornan. Hopi congregacion a mira cu ta bon pa cada grupo di sirbishi di veld reuni na un luga diferente. Esaki ta haci cu ta mas facil pa e publicadornan yega na e reunion pa sirbishi di veld y e teritorio. E superintendente di grupo por organisa e publicadornan lihe y ta mas facil p’e duna atencion na esnan cu tin mester di esey. E cuerpo di anciano ta dicidi kico ta mihor pa e congregacion teniendo cuenta cu e situacion local. Prome cu cera e reunion cu un oracion cortico, tur publicador mester sa unda y cu ken nan ta traha.

4. Dicon e reunionnan pa sirbishi di veld ta mes importante cu e otro reunionnan?

⁴ Reunion pa Sirbishi di Veld Ta Mes Importante Cu Tur Otro Reunion di Congregacion: Reunionnan pa sirbishi di veld ta pa publicadornan cu ta bay sali den sirbishi, pesey kisas no ta henter e congregacion ta asisti. Pero esey no ta nifica cu e reunion aki ta menos importante cu otro reunionnan. Mescos cu tur otro reunion, e reunion pa sirbishi di veld ta un provision di Jehova cu ta yuda nos stimula otro pa mustra amor y haci bon obra. (Heb. 10:24, 25) Pesey, e ruman cu ta dirigi mester prepara bon pa asina e reunion honra Jehova y beneficia tur publicador presente. Te caminda cu ta posibel, tur publicador cu ta sali den sirbishi mester haci nan maximo esfuerso pa asisti na e reunion.

Reunionnan pa sirbishi di veld ta mes importante cu tur otro reunion di congregacion

5. (a) Ki papel e superintendente di sirbishi tin den organisa reunion pa sirbishi di veld? (b) Con un ruman muher mester dirigi un reunion pa sirbishi di veld? (Wak cuadro na pagina 6.)

⁵ Con e Ruman Cu Ta Dirigi e Reunion Mester Prepara pa Esaki?: Pa un ruman por prepara bon pa un parti, e mester hay’e adelanta. Esaki ta conta tambe pa reunion di sirbishi di veld. Ora gruponan di sirbishi di veld ta reuni na diferente luga, e superintendente di grupo of su assistent ta dirigi e reunion. Sinembargo, ora tur e gruponan ta reuni hunto pa sali den sirbishi, e superintendente di sirbishi lo asigna un ruman pa dirigi. Algun superintendente di sirbishi ta duna tur ruman asigna un programa y ta pone un copia di esaki riba e borchi di informacion. Como cu e calidad di e reunion ta depende di e habilidad di siña y di organisa di e ruman cu lo dirigi, e superintendente di sirbishi mester uza sano huicio ora di asigna un ruman. Si riba cierto dia no por tin un anciano, sirbidor ministerial of ruman homber batisa capacita pa dirigi e reunion, e superintendente por asigna un ruman muher cu experencia pa haci esey.—Wak e articulo “Si un Ruman Muher Tin cu Dirigi.”

6. Dicon ta importante pa e ruman cu ta dirigi prepara bon?

⁶ Ora nos haya un parti den e Scol di Ministerio Teocratico of Reunion di Sirbishi, nos ta tum’e na serio y ta prepara bon. Ta masha poco di nos lo warda te ora nos ta riba caminda pa reunion pa bay pensa kico nos lo bisa. Si nos tin cu dirigi un reunion pa sirbishi di veld, nos tin cu haci mescos. Awor cu e reunion lo ta mas cortico, ta masha importante pa prepara bon pa asina e ta instructivo y caba na tempo. Bon preparacion ta encera tambe haya e teritorio di antemano.

7. Kico ta algun cos cu e ruman cu ta dirigi por trata? (Wak cuadro na pagina 6.)

⁷ Loke Cu Por Trata: Como cu circunstancianan ta varia di un luga pa otro, e esclavo fiel no a prepara un boskeho pa cada reunion pa sirbishi di veld. E cuadro “Loke Por Trata Durante un Reunion pa Sirbishi di Veld” ta duna algun sugerencia. Generalmente, ta tene e reunion di manera cu tur publicador presente por participa. Tin biaha, por inclui tambe un demostracion bon prepara of un video for di jw.org relaciona cu sirbishi. Ora e ruman cu ta dirigi ta prepara pa e reunion, e mester pensa kico lo por anima y yuda e rumannan cu ta bay den sirbishi e dia ey.

Ora e ruman cu ta dirigi ta prepara pa e reunion, e mester pensa kico por anima y yuda e rumannan cu ta bay sirbishi e dia ey

8. Kico lo ta bon pa trata durante e reunionnan pa sirbishi di veld den weekend?

⁸ Riba diasabra, mayoria di publicador ta ofrece E Toren di Vigilancia y ¡Despertad! Hopi di esnan cu ta sali den sirbishi diasabra no por sali den siman, pesey kisas nan no ta corda bon bon e presentacion cu nan a prepara durante nan Adoracion Como Famia. Pesey, lo ta bon pa e ruman cu ta dirigi e reunion repasa un di e sugerencianan cu tin parti patras di Nos Ministerio di Reino. Un otro opcion ta di purba di inclui un noticia local, un suceso of dia di fiesta den nos presentacion di revista. Of con nos por prepara pa rebishita un persona cu a acepta e revistanan. Si tin algun publicador na e reunion cu a ofrece e revistanan di e luna ey caba, e ruman cu ta dirigi por pidie duna algun sugerencia breve of conta algun experencia animante. Riba diadomingo por haci algo similar cu e oferta di luna. Tur ora por ofrece publicacionnan di estudio, manera e foyetonan Bon Noticia y Scucha Dios y e buki Bijbel Ta Siña. Pues e ruman cu ta dirigi por papia brevemente tocante con pa ofrece nan.

9. Ora tin un campaña special, kico por trata den e reunion pa sirbishi di veld?

⁹ Ora e congregacion ta participa den un campaña special den weekend, e ruman cu ta dirigi por trata con pa ofrece e revistanan hunto cu e invitacion of tratado, y kico nos tin cu haci si un persona mustra interes. Un otro opcion ta di conta experencianan cu ta mustra e importancia di e campaña.

10, 11. Dicon ta importante pa publicadornan prepara bon pa reunion di sirbishi di veld?

¹⁰ Con Publicadornan Por Prepara pa e Reunion?: Pa e reunion logra su meta ta depende tambe di e publicadornan. Si nan prepara di antemano pa sirbishi, kisas durante nan Adoracion Como Famia, nan por participa durante e reunion. Bon preparacion ta encera tambe tin e publicacionnan cu nos mester pa sirbishi prome cu e reunion cuminsa. Esey ta evita cu nos ta tarda pa yega teritorio.

¹¹ Ta importante tambe pa nos haci esfuerso pa yega e reunion un par di minuut prome cu e cuminsa, manera nos ta haci pa e otro reunionnan di congregacion. Si nos yega laat, fuera di stroba, nos ta bruha e areglonan cu ya a ser haci. Con asina? E ruman cu ta dirigi ta tene cuenta cu varios factor prome cu e organisa e grupo. Por ehempel, si tin poco publicador presente, e por opta pa traha un teritorio cu a keda na mitar. Si e teritorio ta mucho leu, kisas e ta laga publicadornan cu no tin auto traha cu esnan cu si tin. Of si ta bay predica den un teritorio cu ta un tiki peligroso, e por pidi algun ruman homber traha hunto cu un grupo di ruman muher of no mucho leu for di nan. Si tin publicador cu tin problema di salud, kisas e ta laga nan predica caminda ta plat of na casnan cu no tin hopi trapi. E por pidi e publicadornan cu mas experencia traha cu esnan nobo. Pero si nos yega laat, e ruman ta hay’e ta haci cambio pa nos por haya un ruman pa traha cu ne. Claro, cu por sosode cu nos tin un motibo valido pakico nos a yega laat. Sinembargo, si nos tin custumber di ta laat, kisas nos tin cu puntra nos mes si ta debi cu nos no tin aprecio pa e reunion pa sirbishi di veld of si ta debi cu nos no ta organisa nos cosnan bon.

12. Si bo tin custumber di traha cu e mesun rumannan, ki ahuste bo por haci?

¹² Publicadornan por palabra di antemano pa traha hunto den sirbishi of nan por laga e ruman cu ta dirigi asigna nan un publicador pa traha cu nan. Pero si bo tin e custumber di traha cu e mesun rumannan, pakico no “hancha [bo] mes” y predica cu otro publicador? (2 Cor. 6:11-13, nota.) Lo bo por traha de bes en cuando cu un publicador nobo y yud’e bira un bon maestro? (1 Cor. 10:24; 1 Tim. 4:13, 15) Durante e reunion, presta atencion na tur instruccion cu e ruman cu ta dirigi ta duna, specialmente encuanto unda bo tin cu cuminsa predica. Despues di e reunion, evita di cambia loke a ser palabra y sali bay teritorio di biaha.

13. Si nos tur duna di nos parti, con e reunion pa sirbishi di veld lo beneficia nos?

¹³ E grupo di 70 discipel cu Hesus a manda bay predica “a bin bek contento.” (Luc. 10:17) Sin duda, e reunion cu Hesus a tene cu nan prome cu nan a cuminsa predica a yuda cu esey. Awe, e reunion pa sirbishi di veld tin e mesun meta. Si nos tur duna di nos parti, e reunionnan aki lo anima nos, instrui nos y organisa nos pa cumpli cu nos encargo di duna un “testimonio [na] tur nacion.”—Mat. 24:14.

Si un Ruman Muher Tin cu Dirigi

E ruman muher mester tapa su cabes ora e ta dirigi e reunion y, generalmente, e ta sinta. E por trata e mesun informacion cu un ruman homber cu ta dirigi lo a trata. E mester evita di crea e impresion cu e ta instrui e publicadornan; e por analisa un tema hunto cu esnan presente. Si e pidi un otro ruman muher batisa haci oracion, e ruman muher aki tambe mester tapa su cabes. Si sosode cu un ruman homber batisa yega na e reunion, e ruman muher lo pidi e ruman homber pa tuma over. E superintendente di sirbishi mester purba di anticipa situacionnan incomodo cu por presenta y duna instruccion con pa evita esakinan. Por ehempel, por sosode cu un hobencito batisa ta presente riba un dia cu a asigna un ruman muher pa dirigi e reunion pa sirbishi di veld. Si e ancianonan ta opina cu e ruman homber aki no ta cla pa dirigi un reunion pero ta capacita si pa haci oracion, e superintendente di sirbishi ta palabra adelanta pa e ruman muher dirigi e reunion y e ruman homber haci oracion. Of por sosode cu tin un ruman homber batisa pero cu no mag di dirigi e reunion of haci oracion pa motibonan conoci pa e ancianonan. Sin duna detaye confidencial, e ancianonan mester notifica e ruman muher cu e ta encarga pa dirigi y haci oracion aunke e ruman homber ey ta presente. E ancianonan mester notifica e ruman homber ey di e dianan cu lo tin ruman muher ta dirigi e reunion pa sirbishi di veld.

Loke Por Trata Durante un Reunion pa Sirbishi di Veld:

Algun presentacion for di Nos Ministerio di Reino.
Un video for di jw.org relaciona cu sirbishi.
Un parti cu ta splica con pa prepara un bon introduccion of con nos mester prepara pa haci rebishita.
Un texto di Bijbel cu ta anima of siña nos algo relaciona cu sirbishi.
Un experencia local of cu a sali den nos publicacionnan.
Puntonan for di un articulo di Nos Ministerio di Reino.
Un tema cu a trata recientemente na e Reunion di Sirbishi.
Un articulo di E Toren di Vigilancia cu tin di haber cu sirbishi.
Informacion basa riba bukinan manera Skol di Ministerio y “Bin, Sigui Mi.”
Con pa uza jw.org den sirbishi.
E Appendix of e seccion “Temanan Biblico pa Combersacion” di e Tradukshon di Mundu Nobo di e Skritura Griego Kristian. Informacion for di e foyeto Kico Nos Por Siña for di e Palabra di Dios?
Con pa cuminsa un combersacion cu un ateo, evolucionista, hindu of budista.
Con pa vence obstaculo cu por para combersacion.
Con pa yuda bo compañero den sirbishi.
Instruccion tocante kico nos tin cu haci ora nos haya un persona di otro idioma.
Con pa busca hende di otro idioma, predica via telefon, na luganan publico, haci rebishita of dirigi estudio di Bijbel.
Recordatorio encuanto nos siguridad, ser flexibel y positivo, mustra bon manera, etcetera.