Yuda Hende Ciego Siña Tocante Jehova

1. Con Hesus a demostra compasion na dos hende ciego?

¹ Hesus tabata sa cu e tabatin solamente un par di dia mas di bida. Mientras cu e tabata sali for di e stad di Jerico dos limosnero ciego a grit’e: “Señor, ... tene misericordia di nos!” Aunke cu Hesus lo tabata preocupa pa motibo di e pruebanan cu e lo a bay enfrenta, el a para, yama e dos hombernan y cura nan. (Mat. 20:29-34) Con nos por imita Hesus y demostra compasion na hende ciego?

2. Con nos por duna testimonio na un hende ciego?

² Ofrece Yudansa: Si bo topa un hende ciego, introduci bo mes y puntr’e si bo por yud’e. Kisas na prome instante e no ta confia nos debi cu hopi biaha hende sa probecha di nan. Sinembargo, si bo ta amabel y ta mustra berdadero interes kisas esey por trankilis’e. Tene na mente, tambe, cu tin diferente grado di cieguedad y no ta tur hende ciego mester e mesun yudansa. Despues cu bo yud’e, bo por bis’e cu bo gusta papia cu hende tocante Bijbel. Puntr’e si bo por lesa un texto di Bijbel p’e, manera Salmo 146:8 of Isaias 35:5 y 6. Si e por lesa Braille, puntr’e si lo e kier un publicacion na Braille cu ta bay tocante Bijbel. Tambe bo por yud’e baha filenan audio for di jw.org. Si e tin un computer cu tin un programa cu por lesa e palabranan cu ta aparece riba pantaya, kisas e por beneficia tanto di e articulonan como di e publicacionnan cu e por download for di jw.org den formato RTF (Rich Text Format).—Wak e cuadro “Ora Bo Ta Yuda un Hende Ciego ...”

3. Con nos por busca hende ciego den nos teritorio?

³ Busca Hende Ciego den Bo Teritorio: Casi nunca nos no ta topa hende ciego ora nos ta predica di cas pa cas. Dicon? Pasobra mayoria di nan no ta sinti nan comodo pa papia cu hende straño. Pesey, nos mester haci hopi esfuerso pa “busca” nan y duna nan testimonio. (Mat. 10:11) Bo tin un colega di trabou of un compañero di scol cu ta ciego? Awel, papia cu ne tocante e berdad. Si den bo teritorio tin scol pa hende ciego of pa hende cu tin problema serio cu bista, ofrece pa trece algun di nos publicacionnan na Braille pa e bibliotheek. Bo conoce hende cu tin miembro di famia ciego? Den bo teritorio tin institucion cu ta yuda hende ciego of luganan di cuido caminda tin hende ciego ta biba? Splica e miembro di famia, e recepcionista of e director cu testigonan di Jehova ta desea di yuda hende ciego, y despues ofrece pa trece grabacionnan audio of literatura na Braille. Cont’e di e promesa den Bijbel cu Dios pronto lo caba cu cieguedad pa semper. Tambe bo por mustr’e e video titula “Without It, I Would Feel Lost” riba jw.org/en. Den e video ey un ruman homber ciego ta conta con contento e ta di tin un Bijbel na Braille. Pues, ora bo splica e motibo di bo bishita, kisas un caminda por habri pa bo drenta den contacto cu hende ciego.

4. Kico nos ta siña for di e experencia di Janet?

⁴ Janet, un ruman muher ciego, a bishita un institucion caminda tin hende ciego ta biba. El a cuminsa combersa cu un señora jong cu ta ciego. Janet a bis’e: “Hesus a cura hende ciego pa demostra loke e lo bay haci den futuro pa tur hende ciego.” Nan a trata Revelacion 21:3 y 4 hunto, y Janet a splic’e con e Reino di Dios lo cumpli cu e promesa aki. E señora a keda keto y despues el a bisa: “Nunca mi a scucha esaki for di boca di un hende ciego. Mayoria di hende cu por mira ta kere cu un hende ta ciego debi cu e of su antepasadonan a haci algo malo.” Janet a mand’e un e-mail cu e link pa e buki Bijbel Ta Siña, y awor nan ta studia Bijbel dos biaha pa siman.

5. Aunke nos no por cura hende ciego manera Hesus a haci, ki bendicion nos lo haya ora nos mustra compasion na nan?

⁵ Claro cu nos no por cura hende ciego manera Hesus a haci. Pero tin algo cu si nos por haci. E dios di e mundo aki a ciega mente di hopi hende, incluso esnan cu ta ciego literalmente. Nos por yuda nan compronde e berdad cu tin den e Palabra di Dios. (2 Cor. 4:4) Hesus a cura e dos hombernan cerca di Jerico pasobra el “a haya duele di nan.” (Mat. 20:34) Si nos tambe mustra compasion na hende ciego, nos por disfruta di e privilegio di yuda nan siña tocante Jehova, kende lo kita cieguedad pa semper.