Nos Caha di Herment Spiritual
1. Den ki sentido un predicador cristian ta manera un artesano?
1 Artesanonan ta uza un variedad di herment. Algun herment nan ta uza solamente pa tareanan special, y tin herment cu nan ta uza regularmente. Artesanonan cu experencia semper ta cana cu nan hermentnan basico, esta, e hermentnan cu nan ta uza mas tanto den nan caha di herment. Bijbel ta anima nos pa ta diligente den sirbishi y pa ta “un trahador cu no tin nada di tene berguensa di dje.” (2 Tim. 2:15) Cua ta nos herment di mas importante? Sin duda, esey ta Bijbel, e herment principal cu nos ta uza pa haci discipel. (Mat. 28:19, 20) Pesey, nos mester haci tur nos esfuerso pa “maneha e palabra di e berdad corectamente.” Sinembargo, tin otro hermentnan basico den nos caha di herment spiritual cu tur cristian mester siña uza bon pa nan por siña hende e berdad.—Prov. 22:29.
2. Cua ta nos hermentnan basico pa siña hende e berdad?
2 Nos Hermentnan Basico pa Siña Hende e Berdad: Ademas di Bijbel cua otro herment nos ta uza ? E herment principal cu nos ta uza pa siña hende e berdad di Bijbel ta e buki Kico Bijbel Ta Siña Realmente? Despues cu nos caba e buki aki cu e studiante, nos ta uza “Keda den e Amor di Dios” pa siñ’e aplica principionan di Bijbel den su bida. Pesey, nos mester sa bon con pa uza e dos publicacionnan aki. Den nos caha di herment spiritual, nos mester tin algun foyeto tambe. Por ehempel, e foyeto Dios Tin Bon Noticia pa Nos! ta practico pa cuminsa estudio di Bijbel. Si den nos teritorio tin hende cu no por lesa bon of cu ta papia un idioma den cua tin poco of niun publicacion, nos por uza e foyetonan Scucha Dios y Scucha Dios y Biba pa Semper. Un di e hermentnan basico cu ta yuda nos dirigi e studiantenan na e organisacion ta: Ken Awe Ta Haci e Boluntad di Jehova? Y videonan, manera Dicon Analisa Loke Bijbel Ta Bisa?, Kico Ta Sosode na un Salon di Reino? y Dios Tin un Nòmber? tambe ta yuda nos haci discipel y nos mester siña bon con pa uza nan.
3. Con Nos Ministerio di Reino lo yuda nos den futuro?
3 Den futuro, Nos Ministerio di Reino lo yuda nos bira mas habil den uza e publicacionnan basico, of hermentnan, cu nos tin pa siña hende e berdad. Segun cu nos ta haci esfuerso pa uza e hermentnan aki adecuadamente, nos lo cumpli cu e conseho inspira: “Presta atencion constantemente na bo mes y na e siñansa cu bo ta duna. Persevera den e cosnan aki, pasobra haciendo esey lo bo salba bo mes y tambe esnan cu ta scucha bo.”—1 Tim. 4:16.