Diferente Opinion Tocante Oracion

Pa María, Raúl, Arne y hopi otro hende, oracion ta un regalo masha special. Nan ta sinti cu ora nan haci oracion, nan por papia cu Dios, gradicie y pidie pa yudansa. Nan ta convenci di loke e siguiente texto di Bijbel ta bisa: “Esaki ta e confianza cu nos tin den Dios: kico cu nos pidie cu ta di acuerdo cu su boluntad, e ta tende nos.”—1 Juan 5:14.

Pero tin hopi otro hende cu no ta kere loke Bijbel ta bisa tocante oracion. Steve a conta kico e tabata pensa di oracion: “Ora mi a haci 17 aña, un amiga y dos amigo di mi a muri. Un a muri den un accidente di auto, y e otro dosnan a hoga na lama.” Kico Steve a haci? “Mi a puntra Dios den oracion ta dicon tur esey a sosode, pero mi no a haya contesta. Pesey mi a puntra mi mes: Pakico mi tin cu haci oracion?” Hopi hende ta sinti cu nan no a haya contesta pa nan oracionnan, pesey nan ta puntra nan mes si ta bale la pena pa sigui haci oracion.

Y tin hende cu tin otro motibo pakico nan ta pensa cu no ta bale la pena pa haci oracion. Nan ta bisa cu Dios sa caba kico tur nos tin mester y ki problema nos tin, pesey nos no tin nod’i bisa Dios tur e cosnan ey.

Otronan ta kere cu Dios no kier scucha nan oracionnan debi na picanan cu nan a haci den pasado. Jenny a bisa: “Mi problema di mas grandi ta cu mi ta sinti cu mi no tin balor. Mi a haci cosnan masha malo, y mi a convence mi mes cu mi no ta merece pa Dios scucha mi.”

Kico bo ta pensa di oracion? Si abo tin preocupacion- y dudanan similar tocante oracion, ta bon pa sa cu Bijbel por duna bo contesta satisfactorio pa bo preguntanan. Nos por confia loke Bijbel ta bisa tocante oracion;a e por yuda bo haya contesta pa e siguiente preguntanan:

• Di berdad Dios ta scucha bo oracion?

• Dicon Dios no ta contesta tur oracion?

• Con bo tin cu haci oracion pa Dios scucha bo?

• Con oracion por yuda bo?