Loke Ta Bon y Loke Ta Malo: Riba Kico Hende Sa Basa Nan Decision?

Tin algun cos cu casi tur hende ta di acuerdo cu ta bon, y algun cos cu casi tur hende ta di acuerdo cu ta malo. Por ehempel, casi tur hende ta di acuerdo cu asesinato, violacion y abuso sexual di mucha ta malo. Anto hopi hende ta pensa cu ta bon ora un persona ta husto y amabel y ta mustra empatia. Pero, kico di decision manera ken pa tene relacion sexual cu ne, si nos lo ta honesto of no of con pa lanta yiu? Hopi hende ta pensa cu no tin un bon of mal decision ora ta trata di e cosnan aki. Nan ta pensa cu casi tur decision relaciona cu e cosnan aki ta aceptabel. Hopi bes, hende ta tuma decision a base di con nan ta sinti y con hende rond di nan ta sinti tocante un asunto. Esey semper ta un bon idea?

E MANERA CU NOS TA SINTI

Hopi bes nos ta tuma decision basa riba nos consenshi, esta loke nos ta sinti cu ta bon of malo. (Romanonan 2:​14, 15) Hasta mucha chikito por ripara ora algo ta inhusto, y nan ta sinti nan culpabel ora nan haci algo malo. Segun cu nos ta crece, nos consenshi por ser influencia pa loke nos ta siña for di nos famia, amigonan, maestronan, comunidad, religion y cultura. Ora nos tuma decision, nos consenshi ta laga nos sa si nos decision ta di acuerdo cu loke nos a siña cu ta bon of malo.

Loke nos ta pensa cu ta bon of malo por motiva nos pa mustra empatia, gratitud y compasion na hende y pa trata nan na un manera husto. Ademas, e por yuda nos pa no haci cos cu lo hurt hende cu nos ta stima of pa haci cos cu lo pone nos pasa berguensa of sinti nos culpabel.

E manera cu nos ta sinti semper ta un bon guia? Ora Garrick tabata jong, el a scoge pa biba manera e tabata kier. El a bisa: “Mi por a haci loke sea mi tabata kier.” Sinembargo, el a realisa cu haci loke e tabata sinti cu tabata bon no a duna bon resultado. El a hiba un bida cu despues el a describi como “un bida infeliz, pasobra su bida tabata draai rond di inmoralidad, droga, bebemento di mas y violencia.”

E MANERA CU OTRO HENDE TA SINTI

Hopi bes nos decisionnan no ta basa riba nos mes sintimento so sino tambe riba con otro hende ta sinti tocante nos decisionnan. Ora nos ta tene cuenta cu loke otro hende ta pensa, nos ta beneficia di nan experencia y sabiduria. Nos ta gana respet di nos famia, amigonan y di hende den nos comunidad ora nos haci loke nan ta pensa ta bon.

E manera cu otro hende ta sinti semper ta un bon guia? Como hoben, Priscila a haci loke su amiganan tabata haci, y e tabata tene relacion sexual sin ta casa. Pero, el a bin realisa cu aunke e tabata haci loke otro hende tabata pensa cu ta bon, e no tabata feliz. El a bisa: “Ora mi tabata haci loke tur otro hende tabata haci, mi no tabata sinti mi bon. Esey a pone mi haci cos cu no tabata sabi, y mi a tuma yen di risico.”

UN MIHOR MANERA PA TUMA DECISION

Ora nos tin cu dicidi loke ta bon y loke ta malo, nos mes sintimento y sintimento di otro hende ta importante. Pero, esey riba su mes no semper lo duna bon resultado. Tin biaha, nos decisionnan por causa daño na nos mes of na otro hende pasobra nos no ta mira kico lo ta e consecuencianan di nos decisionnan. (Proverbionan 14:12) Anto hasta ora nos y otro hende ta pensa cu algo ta bon, toch e por causa daño of hende su opinion por cambia. De echo, algun cos cu antes hende tabata mira como malo awor ta ser acepta, y cos cu antes hende tabata acepta awor ta ser mira como algo malo.

Tin un mihor guia cu por yuda nos dicidi loke ta bon y loke ta malo? Tin un guia awe cu por yuda nos tuma decision cu nos lo no lamenta despues?

Nos tin un guia confiabel cu por yuda nos tuma decision cu ta funciona pa tur hende tur caminda. E siguiente articulo lo yuda nos mira unda nos por haya un guia confiabel cu por yuda nos dicidi loke ta bon y loke ta malo.