LOKE HOBENNAN SA PUNTRA

Kico Mi Por Haci si Mi A Kibra un Regla di Cas?

Casi tur famia tin regla. Por ehempel, ki ora pa yega cas, cuanto tempo mag uza telefon of tablet y con pa trata hende bon.

Kico pa haci si bo a faya cu un di e reglanan aki? Bo no por cambia loke a pasa, pero si bo por zorg pa cos no bira pio. Ban wak algun bon conseho.

Loke bo no mester haci

Si bo mayornan no sa cu bo a kibra un regla, lo bo por pensa pa sconde cos pa nan.
Si nan sa cu bo a kibra un regla, lo bo por pensa pa bin cu excuus of culpa otro hende.

Ningun di esakinan no ta bon pa haci. Dicon no? Pasobra sconde cos of bin cu excuus ta un falta di madurez, y bo ta mustra bo mayornan cu bo tin hopi di siña ainda.

“Nunca no ta bon pa gaña, pasobra e berdad semper ta sali na cla. Y e ora ey, lo bo por haya mas straf cu si bo a bisa nan e berdad di biaha.”—Diana.

Loke ta mas mihor pa bo haci

Djis bisa loke b’a haci. Bijbel ta bisa: “Un hende cu ta sconde su picanan lo no tin exito.” (Proverbionan 28:13) Bo mayornan sa cu bo no ta perfecto, pero nan kier pa bo ta honesto si.

“Si bo bisa bo mayornan e berdad, nan lo tene mas compasion cu bo y nan lo haya mas confianza den bo.”—Olivia.
Pidi despensa. Bijbel ta bisa: “Bisti humildad.” (1 Pedro 5:5) Bo mester ta humilde pa bisa sorry y pa no bin cu yen di excuus.

“Hende cu tin custumber di pone excuus ora nan haci algo malo, ta daña nan consenshi tiki tiki, y cu tempo nan consenshi lo no molestia nan mas.”—Heather.
Acepta cu tin consecuencia. Bijbel ta bisa: “Haci caso ora boso haya disciplina.” (Proverbionan 8:33, wak e nota.) Acepta cualkier straf cu bo haya sin keha.

“Mas bo keha, mas pio cos ta bira. Lo ta mas mihor pa bo acepta e straf, y no focus riba loke bo no gusta di bo straf.”—Jason.
Gana confianza di bo mayornan bek. Bijbel ta bisa: “Boso mester kita e personalidad bieu, cu ta di acuerdo cu boso comportacion di antes.” (Efesionan 4:22) Si bo mayornan mira cu bo ta haci bo best pa tuma bon decision, nan lo confia bo atrobe.

“Si bo zorg pa tuma bon decision y mustra bo mayornan cu bo no ta haci e mesun fout mas, cu tempo nan lo confia bo atrobe.”—Karen.

TIP: Haci hasta mas di loke nan ta pidi di bo pa mustra cu nan por confia bo. Por ehempel, e siguiente biaha cu bo sali cu bo amigonan, laga bo mayornan sa ora bo ta na caminda pa cas, hasta si bo no ta laat. Esaki lo yuda nan compronde cu bo kier pa nan confia bo atrobe.