Ken Lo Salba Nos Planeta Tera?

Hopi hende ta preocupa pa e daño cu hende ta causa na nos planeta Tera y na e bida cu tin riba dje. Algun experto riba tereno di medioambiente ta bisa cu loke hende ta haci ta causa hopi daño na varios forma di bida. Loke hende ta haci por hasta caba cu un gran cantidad di mata y bestia.

Hende lo destrui Tera? Of lo yega e dia cu nan lo logra biba na un manera cu no ta haci daño na naturaleza?

Esfuerso di hende lo tin exito?

Hopi experto ta pensa cu hende por proteha Tera y biba na un manera cu no ta haci daño na naturaleza. Pero, algun investigador ta bisa cu pa hende por logra esey nan mester haci hopi cambio. Algun di e cambionan aki ta:

• Mehora e manera cu ta cuida tera, mondi, muras y lama.

• Uza varios metodo di agricultura y fuente di energia.

• Cambia e sistema di produccion y di distribucion di alimento pa cuminda basa principalmente riba berdura. Esey ta encera come menos carni y pisca. E bentaha di esey ta cu ta baha e cantidad di cuminda cu nos ta come y dispidi.

• Reconoce cu e echo cu un persona tin hopi cos material no ta nifica cu e tin un bon bida.

Kico bo ta pensa? Ta realistico pa kere cu gobierno, compania y persona individual lo coopera cu otro pa logra haci e cambionan aki? Of bo ta kere cu esey no ta posibel debi cu algun hende ta golos, egoista y nan no ta worry cu futuro?—2 Timoteo 3:1-5.

Tin speransa

Bijbel ta garantisa cu futuro di nos planeta ta sigur. E ta splica dicon esfuerso di hende no ta suficiente pa salba Tera, y e ta mustra ki cambio mester haci pa salba Tera. Ademas, e ta bisa con e cambionan aki lo tuma luga.

Dicon hende no por salba Tera? Jehovaa Dios a crea Tera, y el a duna hende e tarea di cuida Tera. (Genesis 1:28; 2:15) Si nan a sigui e guia di nan Creador y si nan a obedece su instruccionnan nan lo tabatin exito. (Proverbionan 20:24) En bes di esey, nan a rechasa Jehova y nan a tuma decision riba nan mes. (Eclesiastes 7:29) Hende no tin e capacidad pa cuida Tera, y e resultadonan di nan esfuersonan semper lo ta limita.—Proverbionan 21:30; Jeremias 10:23.

E cambionan cu mester tuma luga. Dios lo no permiti hende destrui Tera. (Revelacion 11:18) Dios lo no drecha e gobiernonan ni sociedad humano, mas bien, lo e reemplasa nan. (Revelacion 21:1) Pesey, Jehova ta bisa: “Tende! Mi ta traha tur cos nobo.”—Revelacion 21:5.

Con e cambionan ey lo tuma luga? Jehova lo reemplasa gobierno humano pa un gobierno den cielo cu yama e Reino di Dios. E gobierno ey, bou di guia di Hesucristo, lo goberna Tera.—Daniel 2:44; Mateo 6:10.

E Reino di Dios lo siña hende pa nan biba segun e normanan husto di Dios. Ora hende reconoce autoridad di nan Creador y acepta su guia, nan lo por biba na harmonia cu naturaleza. (Isaias 11:9) Bijbel ta mustra cu e gobierno di Dios lo percura pa su ciudadanonan tin un bon bida, sin haci daño na Tera. E gobierno ey lo haci lo siguiente:

• Percura cuminda pa tur hende.—Salmo 72:16.

• Restaura e recursonan natural.—Isaias 35:1, 2, 6, 7.

• Garantisa cu hende y bestia ta biba na paz cu otro.—Isaias 11:6-8; Oseas 2:18.

• Preveni desaster natural.—Marco 4:37-41.

Bo por ta sigur cu pronto e Reino di Dios lo trece e cambionan aki. Si bo kier sa mas, lesa e articulo: “Na Ki Tempo e Reino di Dios Lo Goberna Mundo?”