Bo A Perde Trabou? Algun Principio di Bijbel Cu Por Yuda Bo

No ta nada facil ora bo perde trabou. Esey por afecta bo den sentido financiero. Pero no esey so, bo bida di famia y bo estado emocional y mental tambe por ser afecta. Wak con e siguiente sugerencianan aki por yuda bo. Nan ta basa riba principio di Bijbel cu ta practico pa nos tempo tambe.

• Papia cu otro hende tocante con bo ta sinti bo.

  Loke Bijbel ta bisa: “Un amigo ta stima tur ora bay.”—Proverbionan 17:17.

  Ora bo perde trabou, ta normal cu bo por sinti bo tristo of rabia. Tambe bo por sinti cu bo no sa mas kico pa haci of cu bo ta un fracaso. Ora bo conta bo famianan y bo bon amigonan con bo ta sinti bo, nan por duna bo e sosten (emocional) cu bo mester y asina yuda bo sinti mihor. Ademas, nan por duna bo conseho practico cu por yuda bo busca otro trabou.

• No sea demasiado ansha.

  Loke Bijbel ta bisa: “No sea nunca ansha pa e dia di mañan, pasobra e dia di mañan lo tin su mes inkietudnan.”—Mateo 6:34.

  Bijbel ta mustra cu ta bon pa nos plania adelanta. (Proverbionan 21:5) Pero, Bijbel ta conseha nos tambe pa nos no ta ansha of demasiado preocupa pa futuro. Hopi biaha nos ta preocupa tocante cos cu kisas nunca lo sosode. Pesey, ta mihor nos enfoca riba cada dia y no preocupa mucho pa mañan.

  Ademas, Bijbel por duna bo conseho practico cu por yuda bo trata cu stress. Pa haya mas informacion, lesa e articulo: “Con pa Deal cu Stress.”

• Ahusta bo budget.

  Loke Bijbel ta bisa: “Mi a siña e secreto di keda contento ... sea cu mi tin abundancia of mi no tin nada.”—Filipensenan 4:12.

  Adapta bo mes na bo circunstancia nobo. Esey ta encera cu bo tin cu baha man na gasto pa asina bo no gasta mas di loke bo tin. Anto tene cuidou pa bo no hinca bo mes den debe innecesario.—Proverbionan 22:7.

  Pa haya mas sugerencia tocante con pa adapta na bo circunstancia nobo, wak e articulo: “Siña Kon pa Biba ku Ménos Sèn.”

• Haci bon uzo di bo tempo.

  Loke Bijbel ta bisa: “Sigui cana den sabiduria ... y uza boso tempo di e mihor manera.”—Colosensenan 4:5.

  Aunke bo no tin ora fiho di trabou mas, ta bon pa bo plania bo dia y haci bon uzo di bo tempo. Esey lo yuda bo mantene un bon rutina di bida y lo bo sinti bo bon y mas sigur di bo mes.

• Sea flexibel.

  Loke Bijbel ta bisa: “Den tur trabou tin ganashi.”—Proverbionan 14:23.

  Sea dispuesto pa haci trabou cu ta otro for di loke bo a custumbra cu ne. No nenga un trabou djis pasobra e ta parce menos importante of ta paga menos cu bo trabou anterior.

• No entrega.

  Loke Bijbel ta bisa: “Sembra bo simia mainta, y no keda sin haci nada atardi; pasobra bo no sa si sembramento di mainta of di atardi lo tin exito.”—Eclesiastes 11:6.

  Sigui busca trabou. Laga otro hende sa cu bo ta buscando trabou. Por ehempel, bo por papia cu famia, conoci, ex-colega di trabou y bisiña. Bo por acudi na agencia di empleo y subi website caminda sa ofrece trabou. Tambe bo por bishita website di varios compania pa wak si nan tin vacatura. Tene cuenta cu kisas bo mester bay hopi entrevista y skirbi hopi carta di solicitud prome cu bo haya trabou.