E Nacionnan Por Coopera cu Otro pa Asina Evita Calamidad pa Motibo di Cambio di Clima?—Kico Bijbel Ta Bisa?

Diadomingo, 20 di november 2022, e Conferencia di Nacionnan Uni Tocante Cambio di Clima (COP27) a termina. E nacionnan a cera un acuerdo importante, esta, pa duna yudansa financiero na e paisnan mas pober cu lo no por trata cu e calamidadnan cu ta surgi pa motibo di cambio di clima. Pero hopi hende no ta kere cu esey lo soluciona e problema di cambio di clima.

Dia 19 di november 2022, Antonio Guterres, Secretario General di Nacionnan Uni, a bisa: “Mi ta contento cu nos ta pone placa un banda pa yuda e paisnan cu ta ser afecta pa motibo di cambio di clima, pero nos sa cu esey lo no ta suficiente ... Ta manera nos planeta keto bay ta den sala di emergencia.”
Dia 20 di november 2022, Mary Robinson, ex-presidente di Irlanda y ex-Comisario pa Derechonan Humano di Nacionnan Uni, a bisa: “E chens ta grandi cu mundo lo experencia cambio dramatico den clima. Esey lo tin consecuencia serio pa tur hende.”

Specialmente, e hobennan ta preocupa tocante futuro di nos planeta. Sinembargo, e pregunta ta: E nacionnan lo por coopera cu otro y asina cumpli cu nan promesa di soluciona e problemanan di cambio di clima? Kico Bijbel ta bisa?

E nacionnan lo por coopera cu otro pa trece cambio?

Bijbel ta bisa cu a pesar di trabou duro y esfuerso sincero cu algun hende ta haci, cualkier progreso cu e nacionnan haci pa combati e crisis climatologico lo ta limita. Tin dos motibo dicon:

“Bo no por haci stret loke ta troci.”—Eclesiastes 1:15.

Kico esey ta encera? E gobiernonan no por haci tur loke nan ta desea di haci pasobra Dios no a crea hende pa dirigi nan mes. (Jeremias 10:23) Hasta si e nacionnan logra traha hunto, toch nan lo no por resolve e problemanan di mundo, ni cuanto esfuerso nan haci.
“Pasobra hende lo stima nan mes, stima placa, ... nan lo no ta dispuesto pa cera ningun acuerdo.”—2 Timoteo 3:2, 3.

Kico esey ta encera? Bijbel ta bisa bon cla cu hopi hende den nos tempo lo ta egoista. Nan lo no ta dispuesto pa traha hunto pa mehora bida di tur hende.

Nos por carga speransa

Futuro di nos planeta no ta depende di e promesanan cu e gobiernonan ta haci. Dios a percura pa mundo tin un bon Gobernante, Hesucristo. Esaki ta loke Bijbel ta bisa tocante Hesus:

“E gobernacion lo ta riba su schouder. Su nomber lo ta Consehero Maraviyoso, Dios Poderoso, Tata Eterno, Prins di Paz.”—Isaias 9:6.

Hesus ta Rey di e Reino di Dios, of gobierno den cielo. (Mateo 6:10) E tin poder, sabiduria y e deseo pa cuida nos planeta y tur su habitantenan. (Salmo 72:12, 16) Bou di Hesus su guia, e gobierno celestial aki lo stop tur hende di “destrui e Tera” y drecha Tera su medioambiente atrobe.—Revelacion 11:18, Beibel Santu; Isaias 35:1, 7.

Pa mas informacion tocante e solucion permanente pa e cambio di clima destructivo, lesa e articulo: “Kico Bijbel Ta Bisa Tocante Cambio di Clima y Nos Futuro?”