Algun Cientifico A Move Man di e Holoshi di Huicio Final Dilanti—Kico Bijbel Ta Bisa?

Dia 24 di januari 2023, algun cientifico a move man di e Holoshi di Huicio Finala (Doomsday Clock) un tiki mas cerca di meyanochi. Supuestamente, si e holoshi yega meyanochi, esey ta nifica fin di mundo.

“E ‘Holoshi di Huicio Final’ ta indica cu humanidad ta bay enfrenta catastrofe. Diamars ultimo, e holoshi ey tabata mas cerca di meyanochi cu nunca prome pa motibo di e guera na Ucrania, e riesgo di un atake nuclear y e crisis di clima.”—AFP International Text Wire.
“Algun cientifico a laga sa riba diamars cu a move man di e ‘Holoshi di Huicio Final’ na 90 seconde prome cu meyanochi. Nunca prome humanidad tabata asina cerca di Armagedon.”—ABC News.
“Un grupo di cientifico internacional a spierta mundo cu mas cu nunca humanidad su existencia ta na peliger.”—The Guardian.

Di berdad fin di humanidad y di nos planeta ta cerca? Nos mester tin miedo di loke ta bay pasa den futuro? Kico Bijbel ta bisa?

Kico ta bay pasa den futuro?

Segun Bijbel, “Tera lo existi pa semper”, y lo tin hende “cu lo biba riba dje pa semper.” (Eclesiastes 1:4; Salmo 37:29) Pues, hende lo no destrui Tera ni nan lo no causa asina tanto daño na nos planeta cu ta bira imposibel pa hende keda biba riba dje.

Pero Bijbel ta papia di un fin. Por ehempel, Bijbel ta bisa cu “mundo ta pasa bay.”—1 Juan 2:17.

Pa haya sa kico Bijbel kiermen ora e ta papia di fin di mundo, lesa e articulo: “Fin di Mundo Ta Cerca? Kico Ta Apocalipsis?”
Pa haya sa mas di loke Bijbel ta bisa tocante e sucesonan cu lo bay tuma luga pronto, lesa e articulo: “Ki Dia Mundo Ta Caba?”

Con bo por keda positivo?

Bijbel por yuda nos keda positivo a pesar di e problemanan cu ta tuma luga rond mundo. Con e por yuda nos?

Bijbel ta duna nos bon conseho. (2 Timoteo 3:16, 17) Pa algun ehempel di esey, lesa e articulo: “Kico Por Yuda Nos Trata cu Preocupacion?” Lo bo mira con Bijbel por yuda nos keda positivo a pesar di e dificultadnan cu nos ta pasa aden.
Bijbel ta duna nos un speransa sigur pa futuro. (Romanonan 15:4) Bijbel ta splica precies loke nos por spera aworaki y den futuro. Esey ta yuda nos keda trankil y sin miedo a pesar di loke ta pasando den mundo.

Pa bo por beneficia mas di Bijbel, nos ta invita bo pa wak con un curso di Bijbel gratis ta bay. Bo por haci esey awe mes.

a “E Holoshi di Huicio Final ta un holoshi simbolico cu hende a traha pa spierta humanidad. E ta mustra con cerca nos ta di destrui nos planeta cu tecnologia peligroso cu nos mes a traha. E ta algo cu ta corda nos riba e problemanan cu nos mester soluciona si nos kier sigui biba riba e planeta aki.”—Bulletin of the Atomic Scientists.