E Buki di Revelacion—Kico Ta Su Mensahe?

E contesta cu Bijbel ta duna

E nomber Griego di e buki biblico di Revelacion ta Apocalipsis y ta nifica “descubri” of “revela.” Pesey mes e buki yama Revelacion. E ta saca na cla asuntonan cu tabata scondi y ta revela sucesonan cu lo tuma luga hopi tempo despues cu el a wordo skirbi. Hopi di su profecianan mester cumpli ainda.

Resumen di e buki di Revelacion

• Introduccion.—Revelacion 1:1-9.

• Mensahe di Hesus pa e shete congregacionnan.—Revelacion 1:10–3:22.

• Un vision di Dios riba su trono den cielo.—Revelacion 4:1-11.

• Un serie di vision; cada un ta hiba na e otro.

  • Shete seyo.—Revelacion 5:1–8:6.

  • Shete trompet; e ultimo tresnan ta introduci tres “ay”, of lamento.—Revelacion 8:7–14:20.

  • Shete comchi; cada un ta contene un plaga cu ta representa un huicio di Dios cu mester wordo basha riba Tera.—Revelacion 15:1–16:21.

  • Visionnan di e destruccion di e enemigonan di Dios.—Revelacion 17:1–20:10.

  • Visionnan di e bendicionnan di Dios pa cielo y Tera.—Revelacion 20:11–22:5.

• Conclusion.—Revelacion 22:6-21.

Cinco clave pa compronde e buki di Revelacion

1. Su mensahe ta positivo y no ta spanta hende cu ta sirbi Dios. Aunke hopi hende ta conecta e palabra “apocalipsis” cu desaster, tanto e comienso como e final di e buki di Revelacion ta bisa cu hende cu ta lesa su mensahe, comprond’e y aplic’e lo ta feliz.—Revelacion 1:3; 22:7.

2. Revelacion ta contene hopi “señal” of simbolo, cu nos no mester tuma literalmente.—Revelacion 1:1.

3. Hopi di e personahenan y simbolonan den e buki di Revelacion ta aparece den otro partinan di Bijbel:

   • Jehova—e “Dios [berdadero] ariba den cielo” y Creador di tur cos.—Deuteronomio 4:39, Beibel Santu; Salmo 103:19; Revelacion 4:11; 15:3.

   • Hesucristo—“e Lamchi di Dios.”—Juan 1:29; Revelacion 5:6; 14:1.

   • Satanas e Diabel—e enemigo di Dios.—Genesis 3:14, 15; Juan 8:44; Revelacion 12:9.

   • Babilonia e Grandi—mescos cu Babilonia, of Babel, di antiguedad, e ta un enemigo di Jehova Dios y di su pueblo y tambe un fuente di mentiranan religioso.—Genesis 11:2-9; Isaias 13:1, 11; Revelacion 17:4-6; 18:4, 20.

   • “Lama”—hende malbado cu ta bay contra Dios.—Isaias 57:20; Revelacion 13:1; 21:1.

   • Aspectonan di e antiguo tabernakel cu a ser uza den adoracion na Dios—e arca di pacto, e lama di glas (un baki pa laba curpa), lampi, ofrenda di sencia y un altar di sacrificio.—Exodo 25:10, 17, 18; 40:24-32; Revelacion 4:​5, 6; 5:8; 8:3; 11:19.

   • Bestia salbahe—nan ta simbolisa gobiernonan humano.—Daniel 7:​1-8, 17-​26; Revelacion 13:​2, 11; 17:3.

   • Numbernan uza na un manera simbolico.—Revelacion 1:​20; 8:​13; 13:18; 21:16.

4. E visionnan ta cumpli durante “e dia di Señor”, cu a cuminsa ora Dios a establece su Reino na 1914 y Hesus a cuminsa goberna como Rey. (Revelacion 1:10) Pesey, nos por spera cu gran parti di e profecianan di Revelacion lo cumpli den nos tempo.

5. Pa nos por compronde e buki di Revelacion, nos tin mester di e mesun cosnan cu ta yuda nos compronde e otro partinan di Bijbel; nos mester pidi Dios su sabiduria y busca yudansa cerca hende cu ta comprond’e caba.—Echonan 8:26-39; Santiago 1:5.