Dicon Testigonan di Jehova Ta Celebra e Cena di Señor Diferente for di Otro Religion?

Nos ta sigui fielmente loke Bijbel ta bisa ora nos ta celebra e “Cena di Señor”, cu ta conoci tambe como e Ultimo Cena y e Conmemoracion di Hesus su morto. (1 Corintionan 11:20) Pero hopi otro religion no ta conmemora e cena aki segun loke Bijbel ta bisa.

Proposito di e Cena di Señor

E proposito di e Cena di Señor ta pa recorda Hesus y pa mustra aprecio pa e sacrificio cu el a haci pa nos. (Mateo 20:28; 1 Corintionan 11:24) Algun hende ta pensa cu nan lo haya pordon pa nan picanan si nan come di e pan y bebe di e biña na e Cena di Señor. Pero Bijbel no ta bisa esey. Bijbel ta siña cu nos ta haya pordon pa nos picanan ora nos pone fe den Hesus y no pa medio di un rito of ceremonia religioso.​—Romanonan 3:25; 1 Juan 2:​1, 2.

Cuanto biaha mester celebra e Cena di Señor?

Hesus a bisa su discipelnan pa conmemora e Cena di Señor, pero e no a bisa nan specificamente cu ki frecuencia of cuanto biaha nan mester haci esey. (Lucas 22:19) Tin hende ta haya cu nan mester conmemor’e tur luna, mientras cu otro hende ta haya cu nan mester conmemor’e tur siman, tur dia, varios bes pa dia of ki ora cu ta cu nan ta sinti ta necesario. Sinembargo, tin algun cos cu nos tin cu tene cuenta cu ne.

Hesus a tene e prome Cena di Señor riba e mesun fecha cu e Pasco Hudiu, y mas laat riba e mesun dia, el a muri. (Mateo 26:​1, 2) Esey no tabata un coincidencia. Bijbel ta compara Hesus su sacrificio cu e lamchi cu tabata ser sacrifica na e Pasco Hudiu. (1 Corintionan 5:​7, 8) E Israelitanan tabata tene e Pasco Hudiu un biaha pa aña. (Exodo 12:​1-6; Levitico 23:5) Di mes manera, e cristiannan di prome siglo tabata conmemora Hesus su morto un biaha pa aña,a y testigonan di Jehova ta sigui nan ehempel manera ta para den Bijbel.

Fecha y orario di e Cena di Señor

Loke Hesus a haci durante e prome Cena di Señor ta sirbi como ehempel pa nos. Anto e ta yuda nos sa cuanto biaha pa aña nos mester celebra e Cena di Señor y tambe ki dia y ki ora nos mester haci esey. Hesus a tene e prome Cena di Señor despues cu solo a baha riba e di 14 dia di e luna cu yama nisan. (Mateo 26:18-20, 26) Mescos cu e cristiannan di prome siglo, nos como testigonan di Jehova ta sigui conmemora Hesus su morto riba e mesun fecha tur aña.b

Aunke 14 di nisan di aña 33 despues di Cristo a cay riba un diabierna, esey no kiermen cu e aniversario di e fecha ey lo cay riba e mesun dia di siman tur aña. Tur aña nos ta determina e fecha riba cua 14 di nisan ta cay uzando e mesun metodo cu nan tabata uza den tempo di Hesus. Esey ta diferente for di e metodo cu ta ser uza awe pa calcula e fecha pa e kalender Hudiu moderno.c

E pan y e biña cu nos ta uza na e Cena di Señor

Ora Hesus a mustra nos con pa celebra e Cena di Señor, el a uza pan sin zuurdeeg y biña cora cu a resta for di e cena di Pasco Hudiu. (Mateo 26:26-28) Nos ta sigui Hesus su ehempel, y pesey nos ta uza pan sin zuurdeeg y sin niun otro ingrediente adicional. Ademas, nos ta uza biña cora puro sin nada agrega na dje manera specerij of sucu. Nos no ta uza juice di druif tampoco.

Algun religion ta uza pan cu zuurdeeg of yeast, pero zuurdeeg hopi bes ta ser uza den Bijbel pa representa pica y corupcion. (Lucas 12:1; 1 Corintionan 5:​6-8; Galationan 5:​7-9) Pues ta solamente pan cu no tin zuurdeeg ni nada otro agrega na dje por representa Cristo su curpa sin pica. (1 Pedro 2:22) Ademas, algun religion ta siña cu ta un pica pa bebe alcohol aunke cu Bijbel no ta bisa esey. Pues, nan ta uza juice di druif en bes di biña, aunke cu esey no ta basa riba Bijbel.​—1 Timoteo 5:23.

E pan y biña na e Cena di Señor no ta literalmente carni y sanger

E pan sin zuurdeeg y biña cora cu ta ser uza na e Conmemoracion di Hesus su morto ta representa Hesus su curpa y sanger. Nan no ta cambia milagrosamente bira su sanger y carni literal manera algun hende ta pensa. Laga nos wak kico Bijbel ta bisa cu por yuda nos compronde esaki.

• Si di berdad Hesus a manda su discipelnan pa bebe su sanger, lo e tabata bisando nan pa kibra Dios su ley tocante sanger. (Genesis 9:4; Echonan 15:28, 29) Pero esey no por ta e caso, pasobra Hesus nunca lo no manda hende kibra Dios su ley tocante sanger cu ta algo masha sagrado pa Dios.​—Juan 8:​28, 29.

• Ora e apostelnan tabata bebe e biña, Hesus a bisa cu su sanger lo ser drama indicando cu su sacrificio no a tuma luga ainda. Pues, nan no por tabata bebiendo Hesus su sanger literal.​—Mateo 26:28.

• E sacrificio di Hesus a tuma luga “un biaha so.” (Hebreonan 9:​25, 26) Sinembargo, si e pan y e biña ta cambia den Hesus su curpa y sanger cada bes cu hende celebra e Cena di Señor, e ora ey esnan cu ta come di e pan y bebe di e biña lo ta ripitiendo e sacrificio ey cada bes.

• Hesus a bisa: “Sigui haci esaki na mi memoria”, e no a bisa “sigui haci e sacrificio aki.”​—1 Corintionan 11:24.

Hende cu ta kere cu e pan y e biña ta cambia literalmente den Hesus su curpa y sanger ta basa e doctrina ey riba e palabranan cu ta ser uza den algun texto di Bijbel. Por ehempel, den hopi traduccion di Bijbel e palabranan di Hesus a ser traduci como: “Esaki ta mi sanger.” (Mateo 26:28) Sinembargo, Hesus su palabranan por ser traduci tambe como: “Esaki ta nifica mi sanger” of “Esaki ta representa mi sanger.”d Mescos cu Hesus a yega di haci varios biaha prome, el a uza un comparacion pa siña hende.​—Mateo 13:34, 35.

Ken ta come di e pan y bebe di e biña na e Cena di Señor?

Ora testigonan di Jehova ta celebra e Cena di Señor, ta un grupo chikito di Testigonan so ta come di e pan y bebe di e biña. Dicon?

Ora Hesus a drama su sanger, el a establece “un pacto nobo” cu a reemplasa e pacto cu tabatin entre Jehova Dios y e nacion di Israel di antiguedad. (Hebreonan 8:​10-13) Esnan cu ta forma parti di e pacto nobo so ta come di e pan y bebe di e biña na e Cena di Señor. No ta tur cristian ta forma parti di e pacto nobo, sino solamente “esnan cu a ser yama” na un manera special pa Dios. (Hebreonan 9:15; Lucas 22:20) E hendenan ey lo goberna den cielo hunto cu Cristo, y Bijbel ta bisa cu ta solamente 144.000 hende lo ricibi e privilegio ey.​—Lucas 22:28-30; Revelacion 5:​9, 10; 14:​1, 3.

Na contraste cu e “tou chikito” cu a ser yama pa goberna hunto cu Cristo, e gran mayoria di nos tin e speransa pa forma parti di “un multitud grandi” cu lo haya bida eterno riba Tera. (Lucas 12:32; Revelacion 7:​9, 10) Aunke nos cu tin e speransa pa biba riba Tera no ta come di e pan ni bebe di e biña, nos ta asisti na e Conmemoracion di Hesus su morto pa mustra cu nos ta agradecido pa e sacrificio cu el a haci pa nos.​—1 Juan 2:2.