Ken Ta e Arcangel Miguel?

E contesta cu Bijbel ta duna

Miguel, kende otro religion ta referi na dje como “San Miguel”, evidentemente ta un nomber cu a ser duna na Hesus prome y despues di su bida riba Tera.a Miguel a discuti cu Satanas despues di e morto di Moises, y a yuda un angel duna profeta Daniel un mensahe di Dios. (Daniel 10:13, 21; Judas 9) Miguel ta defende e autoridad di Jehova pa goberna y ta bringa contra e enemigonan di Dios. Pesey e ta digno pa carga e nomber ey cu ta nifica: Ken Ta Manera Dios?​—Daniel 12:1; Revelacion 12:7.

Laga nos wak dicon ta logico pa yega na e conclusion cu Hesus ta e Arcangel Miguel.

• Miguel ta “e arcangel.” (Judas 9) E titulo “arcangel”, cu ta nifica “hefe di e angelnan”, ta aparece solamente den dos texto di Bijbel. Den tur dos caso, e palabra ta den forma singular, mustrando asina cu ta solamente un angel tin e titulo ey. Un di e versiculonan ey ta mustra cu Señor Hesus resucita “lo baha for di cielo cu un yamada di autoridad, cu stem di arcangel.” (1 Tesalonicensenan 4:16) Hesus tin “stem di arcangel” pasobra e ta e arcangel, Miguel.

• Miguel ta lider di un ehercito di angel. “Miguel cu su angelnan a bringa contra e dragon”, esta, Satanas. (Revelacion 12:7) Miguel tin hopi autoridad den cielo pasobra e ta ser yama “un di e prinsnan principal” y “e gran prins.” (Daniel 10:13, 21; 12:1, Beibel Santu) Segun David E. Aune, un experto di e Testament Nobo, e titulonan aki ta identifica Miguel como e “comandante di e ehercito celestial di angel.”

  Bijbel ta menciona solamente un nomber mas di un persona cu tin autoridad riba un ehercito di angel. E ta describi cu “Señor Hesus [lo] keda revela for di cielo hunto cu su angelnan poderoso den un vlam di candela. Na e tempo ey lo e trece venganza.” (2 Tesalonicensenan 1:7, 8; Mateo 16:27) Hesus “a bay cielo y awor e ta na man drechi di Dios, kende a somete angel, autoridad y poder na dje.” (1 Pedro 3:21, 22) No tabatin sentido pa Dios nombra Hesus y Miguel como comandantenan rival di e angelnan santo. Mas bien, ta mas logico pa conclui cu e nombernan Hesus y Miguel ta referi na e mesun persona.

• Miguel “lo lanta” durante “un tempo di angustia” sin precedente. (Daniel 12:1, Beibel Santu) Den e buki di Daniel, e expresion “lo lanta” ta referi na un Rey cu ta tuma un accion special. (Daniel 11:2-4, 21) Hesucristo, yama e “Palabra di Dios”, lo tuma accion como “Rey di reynan” pa destrui tur e enemigonan di Dios y proteha su pueblo. (Revelacion 19:11-16) E lo haci esey durante un “tribulacion grandi manera no a yega di sosode nunca.”—Mateo 24:21, 42.