Kico Bijbel Ta Bisa Tocante Dunamento?
Loke Bijbel ta bisa
Bijbel ta anima nos pa duna di curason y cu e motivacion corecto. Ora nos ta haci esey, tanto e persona cu ta duna y e persona cu ta ricibi ta beneficia. (Proverbionan 11:25; Lucas 6:38) Hesus a bisa: “Tin mas felicidad den duna cu den ricibi.”—Echonan 20:35.
Ki ora dunamento ta haci Dios contento?
Dios ta keda contento ora nos ta duna di curason. Bijbel ta bisa: “Laga cada hende haci manera el a dicidi den su curason, no di mala gana, ni forsa, pasobra Dios ta stima hende cu ta duna cu alegria.”—2 Corintionan 9:7.
“E forma di adoracion” cu Dios ta aproba ta ora nos ta duna di curason. (Santiago 1:27) Ora nos yuda hende den necesidad na un manera generoso, nos ta traha hunto cu Dios, kende ta mira nos generosidad como un debe haci na dje. (Proverbionan 19:17) Bijbel ta bisa cu Dios mes lo recompensa nos.—Lucas 14:12-14.
Ki ora dunamento no ta haci Dios contento?
Ora nos ta duna cu motibo egoista. Por ehempel:
Pa impresiona hende.—Mateo 6:2.
Pa haya algo bek.—Lucas 14:12-14.
Pa cumpra salbacion.—Salmo 49:6, 7.
Ora nos ta apoya practica of custumber cu Dios ta desaproba. Por ehempel, ta robes pa duna hende cen pa wega di placa, droga of bebemento. (1 Corintionan 6:9, 10; 2 Corintionan 7:1) Lo no ta bon tampoco pa duna placa na un hende cu por traha, pero cu ta nenga di haci esey.—2 Tesalonicensenan 3:10.
Ora dunamento ta stroba nos di cumpli cu nos responsabilidad di famia. Bijbel ta bisa cu e cabes di famia mester percura pa e necesidadnan di su famia. (1 Timoteo 5:8) Lo no ta bon pa un cabes di famia duna otro hende asina tanto cu e ta perhudica su propio famia. Por ehempel, den tempo di Hesus tabatin hende cu a nenga di percura pa nan mayornan di edad uzando e excuus cu tur loke nan tin tabata “un ofrenda dedica na Dios.” Hesus a condena esey.—Marco 7:9-13.