BUKI, pelicula y video-game ta pesta cu personahenan sobrenaturala manera por ehempel mago jong y bieu, heks seductivo y vampiro atractivo. Dicon nan ta asina popular?

Profesor Claude Fischer, un sociologo, a skirbi: “Durante e ultimo decadanan, cada bes mas y mas Mericano a cuminsa kere den spirito: Antes tabata un di cada dies, pero awor ta un di cada tres. Ademas, mas o menos dos biaha mas tanto mucha jong a bisa cu nan a consulta psikico, ta kere den spirito y ta kere den cas cu tin spirito compara cu hende grandi.”

Pues, no ta nada straño cu storianan tocante hende posei pa spirito malo a lanta cabes na un manera alarmante. Michael Calia a skirbi den The Wall Street Journal: “Hende posei pa demoño a bira popular atrobe debi cu zombi, homber lobo y vampiro tabata popular den e decada cu a pasa.”

Un informe ta bisa cu “nan ta calcula cu entre 25 pa 50 porciento di hende rond mundo ta kere den spirito. Y den casi tur cultura bo ta haya literatura den cua spiritismo ta hunga un rol importante.” Un encuesta cu profesor di sociologia Christopher Bader y Carson Mencken a haci na Merca “ta indica cu pa straño cu ta parce un 70 pa 80 porciento di Mericano ta kere firmemente den por lo menos un cos paranormal.”

Pero ta algo malo pa lesa buki, wak pelicula of hunga video-game cu tin cosnan sobrenatural?

HOPI hende no ta kere den cosnan sobrenatural. Nan ta bisa cu ocultismo ta un invento di escritornan di guion di pelicula. Pero Bijbel tin un otro punto di bista. Bijbel su spiertamento tocante ocultismo ta cla y raspa. Por ehempel, Deuteronomio 18:10 pa 13 ta bisa: “Entre boso no mag wordo haya ... ningun hende cu ta practica adivinacion of cu ta practica bruheria, of cu ta pronostica, of cu ta practica magia, ni ningun hende cu ta plega hende, of cu ta montado of spiritista, of cu ta consulta cu e mortonan.” Dicon no? E texto ta sigui bisa: “Ken cu haci e cosnan aki ta un abominacion na SEÑOR ... Bo mester ta perfecto dilanti di SEÑOR bo Dios.”

Dicon Bijbel ta condena categoricamente tur forma di ocultismo?

UN ORIGEN HOPI MALO

Bijbel ta bisa nos cu hopi tempo prome cu Dios a crea Tera, el a crea miyones di criatura spiritual, esta angel. (Job 38:4, 7; Revelacion 5:11) El a duna cada angel boluntad liber: e habilidad pa scoge entre bon y malo. Algun di nan a scoge pa rebeldia contra Dios y nan a bandona cielo pa trece problema riba Tera. Como consecuencia, Tera “tabata yen di violencia.”—Genesis 6:2-5, 11; Judas 6.

Bijbel ta bisa cu e angelnan malbado ey tin hopi influencia riba hende y cu nan ta confundi miyones di hende. (Revelacion 12:9) Nan ta hasta probecha di e echo cu di naturaleza hende ta curioso pa haya sa kico lo sosode den futuro.—1 Samuel 28:5, 7; 1 Timoteo 4:1.

Ta berdad cu tin hende sa haya e impresion cu algun poder sobrenatural ta yuda. (2 Corintionan 11:14) Pero e realidad ta cu angelnan malbado ta purba ciega mente di hende pa nan no haya sa e berdad tocante Dios.—2 Corintionan 4:4.

Pesey, segun Bijbel, contacto cu spirito malbado no ta recreo inofensivo sino algo peligroso. Pa e motibo ey, con algun hende cu kier a bira discipel di Hesus a reacciona ora nan a haya sa e berdad tocante spiritonan malbado? Wel, Bijbel ta bisa cu “esnan cu tabata practica magia a trece nan bukinan hunto y a kima nan”, maske esey a nifica cu nan a perde hopi placa.—Echonan 19:19.

Awe tambe, hopi hende a dicidi cu nan no kier tin nada di haci cu actividadnan of entretenimento cu tin di haber cu ocultismo. Por ehempel, tempo Mariaa tabatin 12 aña, tabata parce cu e por a predeci cierto peliger of cosnan cu ta bay pasa. E tabata lesa carta pa e muchanan na scol, y como cu tur loke e tabata bisa a sosode, el a bira sumamente interesa den ocultismo.

Maria a pensa cu Dios a dun’e un don pa yuda hende. “Pero algo tabata preocupa mi”, el a admiti. “Pasobra mi tabata por a lesa carta pa otro hende pero no pa mi mes, maske mi tabatin gana di sa mi mes futuro.”

Maria tabata tur confundi pasobra e no por a haya contesta pa e tantisimo preguntanan cu e tabatin, y pesey el a resa na Dios. Despues el a drenta den contacto cu testigonan di Jehova y el a cuminsa studia Bijbel cu nan. Anto el a siña for di Bijbel cu no ta Dios a dun’e e habilidad pa pronostica futuro. Tambe el a siña cu esnan cu kier tin un amistad cu Dios mester deshaci di tur obheto cu tin di haber cu ocultismo. (1 Corintionan 10:21) Kico tabata e resultado? Maria a tira tur su obhetonan y bukinan cu tin di haber cu ocultismo afo. Awor, e ta comparti e berdadnan cu el a siña for di Bijbel cu otro hende.

Tempo Michael tabata teenager, e tabata gusta lesa buki cu tin storia tocante hende cu tin poder sobrenatural. El a bisa: “Mi tabata gusta identifica mi mes cu e heroenan di mi edad cu tabata explora mundonan imaginario.” Pocopoco Michael a cuminsa lesa buki tocante magia y ritonan satanico. El a admiti: “Mi tabata curioso, y esey a pone cu mi kier a lesa buki y wak pelicula cu tabatin di haber cu e cosnan ey.”

Sinembargo, loke Michael a siña den su estudio di Bijbel a yud’e mira con importante ta pa wak bon kico e ta lesa. El a bisa: “Mi a traha un lista di tur e cosnan cu tin di haber cu ocultismo cu mi tabatin y mi a tira nan tur afo. Mi a siña un les importante. Na 1 Corintionan 10:31 Bijbel ta bisa cu nos mester ‘haci tur cos pa e gloria di Dios.’ Pues, e pregunta cu mi ta haci mi mes tur ora ta si loke mi ta lesa ta algo cu Dios ta considera como malo. Si ta asina, esaki no ta pa e gloria di Dios y mi ta evit’e.”

Pues ta na su luga cu Bijbel ta ser compara cu un lampi. E ta e unico fuente di luz cu ta desenmascara spiritismo y ocultismo. (Salmo 119:105) Pero Bijbel no ta haci esey so. E tin un promesa maraviyoso. Kico esey ta? Wel, cu pronto lo tin un mundo liber di e poder di spirito malbado. Esta un bon influencia esey lo tin riba humanidad! Por ehempel, Salmo 37:10 y 11 ta bisa: “Aki poco tempo e malbado lo no t’ey mas; maske cuanto bo busca su luga, e lo no t’ey. Ma e humildenan lo hereda e Tera, y lo deleita nan mes den paz abundante.”