Esposa di Lot A Wak Atras

LOT y su famia tabata biba hunto cu Abraham na e tera di Canaan. Un dia Abraham a bisa Lot: ‘No tin suficiente tera pa tur nos bestianan. Por fabor, laga nos separa. Si bo bai den un direccion, ami ta bai den un otro.’

Lot a tira bista riba e tera. El a mira un parti masha bunita di e tera cu tabatin awa y hopi bon yerba pa su bestianan. Esei tabata e districto di Jordan. P’esei Lot y su famia y bestianan a bai biba ei. Finalmente nan a establece nan mes na e stad Sodoma.

Hende di Sodoma tabata masha mal hende. Esei a molestia Lot, pasobra Lot tabata un bon hende. Esei a molestia Dios tambe. Finalmente, Dios a manda dos angel pa spierta Lot, bisando cu Dios ta bai destrui Sodoma y e stad bisiña Gomora debi na nan maldad.

E angelnan a bisa Lot: ‘Pura! Tuma bo esposa y bo dos yiu muhernan y bai for di aki!’ Lot y su famia a tarda un poco pa bai, y p’esei e angelnan a cohe nan na man y a hiba nan pafo di e stad. Anto un angel a bisa: ‘Core pa boso bida! No wak atras. Core te na e seronan, pa boso no wordo mata.’

Lot y su dos yiu muhernan a obedece y a core bai for di Sodoma. Nan no a para ni un momento, y nan no a wak atras. Pero e esposa di Lot a desobedece. Despues cu nan a yega na un distancia for di Sodoma, el a para y a wak atras. E ora ei e esposa di Lot a bira un pilar di salo. Bo ta mir’e riba e plachi?

Nos por siña un bon les for di esei. Esei ta mustra nos cu Dios ta salba hende cu ta obedec’e, pero hende cu no ta obedec’e ta perde nan bida.