Bo a yega di sinti mescos cu e hendenan cu nos a caba di menciona? Kisas bo kier lesa Bijbel, pero tin algo ta stroba bo. Pa hopi hende, e idea di lesa Bijbel ta parce algo dificil. Pero kico si bo haya sa cu Bijbel por yuda bo haya mas felicidad y satisfaccion den bida? Anto kico si bo haya sa cu tin algun cos cu bo por haci pa bo lesamento di Bijbel bira mas interesante? Lo bo ta dispuesto pa wak kico Bijbel por ofrece bo?

Ban wak kico algun hende cu a saca beneficio for di nan lesamento di Bijbel a bisa.

Ezekiel, kende tin 20 y pico aña, a bisa: “Den pasado, mi tabata manera un hende cu ta stuur auto sin un destinacion specifico. Pero ora mi a cuminsa lesa Bijbel, mi bida a haya un proposito. E ta contene conseho practico cu mi por uza tur dia.”

Frieda, kende tambe tin 20 y pico aña, ta conta: “Mi tabata un hende cu ta rabia hopi lihe. Pero lesamento di Bijbel a yuda mi domina mi mes. Esey a drecha mi caracter, y awor mi tin mas amistad.”

Eunice, un señora di 50 y pico aña, ta bisa tocante Bijbel: “E ta yuda mi bira un mihor persona y ta yuda mi cambia mi mal habitonan.”

E hendenan aki y miyones di otro hende a siña cu lesamento di Bijbel por yuda bo disfruta mas di bida. (Isaias 48:17, 18) Entre otro, e por yuda bo (1) tuma bon decision, (2) haya bon amigo, (3) deal cu stress y (4) mas importante ainda, yuda bo siña e berdad tocante Dios. E consehonan den Bijbel ta bin di Dios; pues si bo aplica nan, cos no por bay robes. Dios nunca no ta duna mal conseho.

E cos principal ta pa bo cuminsa lesa Bijbel. Ki sugerencianan practico por yuda bo cuminsa lesa Bijbel y disfruta di dje?

Kico por yuda bo disfruta di bo lesamento di Bijbel y saca mayor probecho for di dje? Tuma nota di cinco sugerencia cu a yuda hopi hende.

Lesa den un ambiente agradabel. Busca un luga keto. Evita cosnan cu por kita bo atencion y stroba bo di concentra riba loke bo ta lesa. Lesa caminda tin suficiente luz y bon ventilacion pa bo por concentra bon.

Lesa cu un mente habri. Ya cu Bijbel ta bin di nos Tata celestial, lo bo saca mas beneficio si bo tin e actitud di un mucha cu ta cla pa siña di su tata cu ta stim’e. Pone cualkier prehuicio of pensamento negativo cu bo por tin tocante Bijbel un banda pa asina Dios por siña bo.—Salmo 25:4.

Haci oracion prome cu bo cuminsa lesa. Bijbel ta contene e pensamentonan di Dios, pues ta logico cu nos mester di su yudansa pa compronde su Palabra. Dios ta priminti cu e ta duna “spirito santo na esnan cu pidie.” (Lucas 11:13) E spirito santo ey por yuda bo compronde e pensamentonan di Dios. Cu tempo, spirito santo lo habri bo mente pa bo compronde “hasta e cosnan profundo di Dios.”—1 Corintionan 2:10.

Lesa di un manera cu bo ta compronde. No djis lesa aribariba. Pensa profundamente riba loke bo ta lesa. Haci bo mes preguntanan manera: Ki cualidad mi ta mira den e persona cu mi a lesa tocante dje? Con mi por aplica loke mi a lesa?

Pone metanan specifico. Pa bo por beneficia di bo lesamento di Bijbel, haci esfuerso pa siña algo cu por mehora bo bida. Bo por pone meta pa, por ehempel, siña mas tocante Dios, bira un mihor persona of bira un mihor casa. Despues, scoge algun porcion di Bijbel cu por yuda bo logra e metanan ey.a

E cinco sugerencianan aki lo yuda bo cuminsa lesa Bijbel. Pero con bo por haci bo lesamento di Bijbel aun mas interesante? E siguiente articulo lo duna bo algun sugerencia.

Kico bo ta pensa di lesamento di Bijbel? Esaki ta algo laf of placentero? Hopi ta depende di e manera cu bo ta lesa. Ban wak con bo por haci bo lesamento di Bijbel mas interesante y placentero.

Scoge un traduccion di Bijbel moderno y confiabel. Si bo ta lesa un traduccion cu ta contene varios palabra dificil of anticua cu bo no conoce, probablemente lo bo no disfruta dje hopi ey di bo lesamento. Pesey, scoge un traduccion cu ta uza palabranan cu ta facil pa compronde y cu ta touch bo curason. Pero na mes momento, e mester ta un traduccion cu ta exacto y confiabel.a

Uza tecnologia moderno. Awendia, Bijbel ta disponibel no solamente como un buki imprimi sino tambe den formato digital. Bo por lesa Bijbel online of download e riba bo computer, tablet of celular. Algun version di Bijbel ta contene herment adicional cu por yuda bo wak varios texto cu tin di haber cu un cierto tema, of hasta compara e textonan ey cu diferente otro traduccion. Anto si bo ta prefera di scucha Bijbel en bes di les’e, bo por scucha grabacion di e lesamento cu ta disponibel den diferente idioma. Hopi hende ta gusta scucha lesamento di Bijbel ora nan ta den bus, ta laba paña of ta haci otro actividad cu no ta stroba nan di scucha. Dicon no purba un metodo cu ta cumbini abo?

Busca mas informacion. Tin varios publicacion y material cu por yuda bo beneficia mas di bo lesamento di Bijbel. Por ehempel, tin mapa di teranan biblico cu lo yuda bo haya sa unda un luga ta situa y compronde e secuencia di e sucesonan menciona den un relato particular. Ademas, algun articulo, manera esnan den e revista aki of den e seccion “Loke Bijbel Ta Siña” riba e website jw.org, por yuda bo compronde hopi parti di Bijbel.

Uza diferente metodo. Si bo no ta haya cu lesamento di Bijbel di kaft pa kaft ta dje interesante ey, ta mihor bo cuminsa lesa un parti cu ta interesa abo mas. Si bo kier haya sa mas tocante hende bon conoci den Bijbel, lo ta bon pa bo lesa informacion adicional tocante cada persona. Den e cuadro “Siña Mas Tocante Hende Cu Bijbel Ta Menciona” bo por haya ehempel di e metodo aki di lesa Bijbel. Of kisas bo por lesa Bijbel a base di topico of segun e orden den cua sucesonan a tuma luga. Pakico no purba un di e metodonan aki.

Bijbel no ta un simpel buki. E ta contene conseho di nos Creador. (2 Timoteo 3:16) E mensahe di Bijbel por tin un gran influencia riba nos. Pesey, Bijbel ta bisa: “E palabra di Dios ta bibo y poderoso.” (Hebreonan 4:12) E tin poder pa mehora nos bida den dos manera clave. E ta duna nos guia pa nos bida di tur dia y ta yuda nos conoce Dios y su promesanan.—1 Timoteo 4:8; Santiago 4:8.

Bijbel por yuda bo mehora bo bida awor. E por yuda cu asuntonan hopi personal. E ta duna conseho practico tocante lo siguiente:

• Relacion cu otro hende.—Efesionan 4:31, 32; 5:22, 25, 28, 33.

• Salud emocional y fisico.—Salmo 37:8; Proverbionan 17:22.

• Norma- y balornan moral.—1 Corintionan 6:9, 10.

• Con pa percura pa e necesidadnan material di bo famia.—Proverbionan 10:4; 28:19; Efesionan 4:28.a

Un pareha jong na Asia a balora e consehonan di Bijbel masha hopi. Mescos cu hopi pareha recien casa, nan tabatin problema pa ahusta na otro su personalidad y pa papia habri cu otro. Pero nan a cuminsa aplica loke nan tabata lesa den Bijbel. Cu ki resultado? E esposo, Vicent, a bisa: “Loke mi tabata lesa den Bijbel a yuda mi deal cu e retonan den nos matrimonio cu amor. Aplicacion di e principionan di Bijbel a haci nos bida como pareha feliz.” Su esposa, Annalou, a confirma esey, bisando: “E ehempelnan di Bijbel a yuda nos masha hopi mes. Awor mi ta sinti mi contento cu nos matrimonio y nos metanan den bida.”

Bijbel por yuda bo siña conoce Dios. Ademas di loke Vicent a bisa tocante matrimonio, el a bisa tambe: “Awor mas cu nunca, ora mi lesa Bijbel, mi ta sinti mi hopi mas cerca di Jehova.” Loke Vicent a bisa ta resalta un punto importante: Bijbel por yuda bo siña conoce Dios. Ora bo haci esaki, lo bo beneficia di su conseho pero lo bo haya sa tambe cu bo por conoc’e y bira su amigo. Y lo bo haya sa cu e ta revela detayenan tocante un mihor futuro, esta, un tempo ora cu lo bo por disfruta di bida pa semper, “loke realmente ta bida.” (1 Timoteo 6:19) Esey ta algo cu ningun otro buki no por ofrece nos.

Si bo pone meta pa lesa Bijbel y cumpli cu bo meta, bo tambe por haya e beneficionan ey. Bo por mehora bo bida awor y siña conoce Dios. Pero, ora bo lesa Bijbel, kisas varios pregunta ta lanta. Y ora esey sosode, tene na mente e bon ehempel di un oficial di Etiopia cu a biba mas o menos 2.000 aña pasa. E tabatin hopi pregunta tocante Bijbel. Ora Felipe, a puntr’e si el a compronde loke e tabata lesa, el a contesta: “Con mi por compronde si ningun hende no guia mi?”b Anto di biaha el a acepta yudansa di Felipe, un di e prome discipelnan di Hesus, kende ya tabata un maestro cualifica pa siña hende tocante Bijbel. (Echonan 8:30, 31, 34) Mescos tambe, si bo kier sa mas tocante Bijbel, nos ta invita bo pa yena e formulario pa pidi un curso di Bijbel riba www.jw.org of scoge un adres menciona den e revista aki y manda bo peticion. Ademas, bo por tuma contacto cu testigonan di Jehova of bishita un Salon di Reino den bo area. Pues, dicon no cuminsa lesa Bijbel awe y lag’e guia bo y yuda bo mehora bo bida?