Tin hende ta haya cu ta dificil pa stima Dios. Pa nan, e ta un ser misterioso, indiferente y hasta cruel. Wak kico algun di nan a bisa:

• “Mi tabata resa pidi Dios p’e yuda mi, pero na mes momento mi tabata sinti cu e ta masha leu for di mi, casi imposibel pa yega na dje. Pa ami, Dios tabata un ser desconoci y sin sintimento.”—Marco, Italia.

• “Aunke di curason mi kier a sirbi Dios, e tabata parce masha leu for di mi. Mi a mir’e como un Dios severo cu ta cla pa castiga hende. Pa ami, e no tabatin sintimento.”—Rosa, Guatemala.

• “Tempo mi tabata chikito, semper mi a kere cu Dios ta wak nos foutnan pa e castiga nos. Pero despues mi a bin mir’e como un Dios indiferente, manera un prome minister cu ta atende asuntonan di su pueblo, pero cu no ta interesa mes den nan.”—Raymonde, Canada.

Kico abo ta pensa? Hende por stima Dios? Pa siglonan caba cristiannan ta haci e pregunta ey. Durante Edad Medio mayoria di hende no tabata ni resa mas na e Dios Todopoderoso. Dicon no? Pasobra hende tabatin miedo di dje. Historiador Will Durant a bisa: “Con un simpel pecador por tribi di dirigi su oracion na un trono cu ta asina cruel y leu for di hende?”

Kico a pone hende mira Dios como un ser “cruel y leu for di hende”? Kico Bijbel ta siña realmente tocante Dios? Si bo siña e berdad tocante Dios, esaki lo yuda bo stim’e?

LOKE HOPI HENDE TA KERE

“Nos no a yega na ningun acuerdo encuanto si Dios tin un nomber. Y si e tin un nomber mes, nos no sa kico e nomber ey lo ta.”—Profesor David Cunningham, Estudio Teologico.

LOKE BIJBEL TA BISA

Dios a declara: “Ami ta [Jehova, NW], esey ta mi nomber.” (Isaias 42:8) Jehova ta un nomber Hebreo cu ta nifica “E Ta Causa pa Bira.”

Jehova kier pa nos uza su nomber. Bijbel ta bisa: “Invoca su nomber. Haci su echonan conoci entre e pueblonan; haci nan corda cu su nomber ta halsa.”—Isaias 12:4.

Hesus mes a uza e nomber di Dios. Hesus a bisa su tata den oracion: “Mi a haci bo nomber conoci na nan [Hesus su discipelnan] y lo mi sigui hacie conoci.” Dicon Hesus a siña su discipelnan e nomber di Dios? El a sigui bisa: “Pa nan por demostra e amor cu bo [Dios] a stima mi cu ne y pa mi por ta den union cu nan.”—Juan 17:26.

DICON ESEY MESTER INTERESA BO

E teologo Walter Lowrie a skirbi: “Un hende cu no conoce Dios pa nomber no conoc’e como persona, ni e no por stim’e si e conoc’e solamente como un forsa sin personalidad.”

Un homber cu yama Victor tabata bay misa tur siman, pero e no tabata sinti cu e conoce Dios. El a bisa: “Ora mi a siña cu Dios su nomber ta Jehova, ta comosifuera el a cera conoci cu mi oficialmente. Mi a sinti cu porfin mi a conoce e Persona cu mi a tende asina hopi di dje. El a bira un Persona real pa mi, y mi a cuminsa mir’e como mi amigo.”

Jehova, di su banda, ta hala cerca di hende cu ta uza su nomber. E ta priminti esnan cu conoce su nomber cu lo e no bandona nan tanten cu nan ta busc’e. (Salmo 9:10) Tambe Dios ta bendiciona esnan cu ta invoca su nomber. Bijbel ta bisa: “Tur hende cu invoca e nomber di Jehova lo ser salba.”—Romanonan 10:13.

LOKE HOPI HENDE TA KERE

“E tres religionnan cristian di mas grandi, esta, religion catolico, ortodox y protestant, ta kere den un Dios cu ta consisti di tres Persona: Dios Tata, Dios Yiu y Dios Spirito Santo. Di acuerdo cu teologia cristian, esaki no ta nifica cu nan ta kere den tres dios, sino cu e tres personanan aki ta basicamente un dios.”—The New Encyclopædia Britannica.

LOKE BIJBEL TA BISA

Hesus, e Yiu di Dios, nunca a pretende di ta igual of di e mesun substancia cu su Tata. Mas bien, el a bisa: “Mi ta bay cerca e Tata, pasobra e Tata ta mas cu mi.” (Juan 14:28) Tambe el a bisa un di su siguidornan: “Mi ta subi bay cerca mi Tata, cu ta boso Tata tambe, y cerca mi Dios, cu ta boso Dios tambe.”—Juan 20:17.

Spirito santo no ta un persona. E cristiannan di prome siglo “a yena cu spirito santo”, y Jehova a bisa: “Lo mi drama un poco di mi spirito riba tur sorto di hende.” (Echonan 2:1-4, 17) Spirito santo no ta parti di un Trinidad. Mas bien, e ta Dios su poder den accion.

DICON ESEY MESTER INTERESA BO

Segun e teologonan catolico Karl Rahner y Herbert Vorgrimler, ‘hende no por compronde Trinidad sin revelacion, y ni despues di un revelacion nan lo no por comprond’e completamente tampoco.’ Bo por realmente stima un persona cu bo no por conoce ni compronde? Pesey e doctrina di Trinidad ta stroba hende di conoce y stima Dios.

Marco, menciona den e prome articulo, a mira Trinidad como un barera entre e y Dios. El a bisa: “Mi a haya cu Dios tabata sconde su mes pa mi y esey a hacie mas misterioso y dificil pa acerca.” Sinembargo, “Dios no ta un Dios di confusion.” (1 Corintionan 14:33, BS) E no a sconde su identidad pa nos. E kier pa nos conoc’e. Hesus a bisa: “Nos ta adora loke nos conoce.”—Juan 4:22.

Marco a bisa: “Ora mi a siña cu Dios no ta parti di un Trinidad, finalmente mi por a cuminsa forma un relacion personal cu ne.” Si nos mira Jehova como un persona real y no como un persona desconoci y misterioso, ta bira mucho mas facil pa stim’e. Bijbel ta bisa: “Ken cu no ta stima no a siña conoce Dios, pasobra Dios ta amor.”—1 Juan 4:8.

LOKE HOPI HENDE TA KERE

“E almanan cu ta muri den estado di pica mortal ta baha na fierno inmediatamente despues di morto y ey nan ta sufri pena di fierno, ‘e candela eterno.’” (Catisashi di Iglesia Catolico) Algun lider religioso ta bisa cu fierno ta un condicion di separacion completo for di Dios.

LOKE BIJBEL TA BISA

“E alma cu peca lo muri.” (Ezekiel 18:4) “E mortonan no sa nada.” (Eclesiastes 9:5) Pues, si e alma ta muri y e mortonan no ta consciente di nada, con un hende por sufri den “candela eterno” of sinti e dolor di ta pa semper separa for di Dios?

Den Bijbel, e palabranan Griego y Hebreo traduci hopi biaha como “fierno” en realidad ta referi na e graf comun di humanidad. Por ehempel, Bijbel ta referi na un profecia tocante Hesus: “Lo bo no laga mi alma den graf [“fierno”, E Testament Nobo].” (Echonan 2:27) Ta bisto cu Hesus no tabata den un luga di tormento of aleha for di Dios, sino den graf.

DICON ESEY MESTER INTERESA BO

Hende cu ta haya cu Dios ta cruel no ta sinti nan atrai na dje. Rocío, cu ta biba na Mexico, a bisa: “For di tempo mi tabata chikito nan a siña mi di un fierno di candela. Mi tabatin asina tanto miedo di Dios cu mi no a kere cu e tin bon cualidad. M’a pensa cu semper e ta rabia y cu e no ta tolera nada.”

Loke Bijbel ta bisa realmente tocante e huicionan di Dios y e condicion di e mortonan a yuda Rocío haya un otro impresion di Dios. El a bisa: “Mi a sinti un alivio—comosifuera un peso grandi a kita for di mi lomba. Mi a cuminsa kere cu Dios kier lo mihor pa nos, cu e stima nos y cu ami tambe por stim’e. E ta manera un tata cu ta tene man di su yiunan y kier lo mihor pa nan.”—Isaias 41:13.

Miedo di fierno di candela a pone hopi hende trata na hiba un bida devoto, pero Dios no kier pa nos sirbie pa motibo di miedo. Hesus mes a bisa: “Bo tin cu stima Jehova bo Dios.” (Marco 12:29, 30) Ademas, ora nos realisa cu Dios no ta inhusto, nos por confia tambe den su huicionan di futuro. Si, mescos cu Eliu, amigo di Job, nos tambe lo por bisa cu tur confianza: “Leu sea di Dios di haci maldad, y di e Todopoderoso di comete inikidad.”—Job 34:10.

Un dia, ora Hesus tabata na Jerusalem, el a papia di su Tata, Jehova, y a saca na cla e hipocresia di e lidernan religioso di e tempo ey. (Juan 8:12-30) Loke el a bisa eynan ta siña nos a base di kico nos mester analisa loke hende ta kere tocante Dios. El a bisa: “Si boso keda fiel na mi palabranan, boso realmente ta mi discipelnan, y boso lo conoce e berdad, y e berdad lo haci boso liber.”—Juan 8:31, 32.

Ora Hesus a bisa “si boso keda fiel na mi palabranan”, el a duna nos e clave pa determina si un siñansa religioso ta “berdad” of no. Pues, ora un hende bisa bo algo di Dios, puntra bo mes: ‘E ta cuadra cu loke Hesus a bisa y cu otro partinan di e Santo Scritura?’ Imita esnan cu a tende apostel Pablo papia y cu ‘tabata analisa e Scritura tur dia pa wak si e cosnan cu nan tabata siña tabata berdad.’—Echonan 17:11.

Esey ta loke Marco, Rosa y Raymonde, menciona den e prome articulo di e serie aki, a haci. Nan a analisa nan creencianan a base di nan estudio di Bijbel cu Testigonan di Jehova. Con loke nan a siña a beneficia nan?

Marco: “E Testigo cu a siña nos tocante Bijbel a uza e Scritura pa contesta tur e preguntanan cu ami cu mi esposa tabatin. Nos amor pa Jehova a crece y nos relacion cu otro como esposo y esposa a bira mas fuerte.”

Rosa: “Na principio, mi a kere cu Bijbel ta simplemente un buki di filosofia cu ta purba di splica pa medio di conceptonan humano ken Dios ta. Ma cu tempo mi a bin haya contesta pa mi preguntanan den Bijbel. Awor, Jehova ta un persona real pa mi, uno cu mi por confia.”

Raymonde: “Mi a resa pidi Dios pa e yuda mi siña conoc’e. Un poco tempo despues ami cu mi esposo a cuminsa studia Bijbel. Porfin nos a siña e berdad tocante Jehova! Nos a bira masha contento ora nos a haya sa ki clase di Dios e ta.”

Bijbel ta bay hopi mas leu cu simplemente saca e mentiranan tocante Dios na cla; tambe e ta papia di su bunita cualidadnan. E ta su Palabra inspira y ta yuda ‘nos compronde e cosnan cu Dios bondadosamente a duna nos’, esta, un mihor comprondemento di e berdad y e proposito di Dios. (1 Corintionan 2:12) Pakico no comproba pa bo mes con Bijbel ta contesta e preguntanan cu hende sa haci encuanto Dios, e proposito di bida y nos futuro? Bo por lesa algun di e contestanan aki riba jw.org bou di “Loke Bijbel Ta Siña > Pregunta Cu Bijbel Ta Contesta.” Tambe bo por pidi un estudio di Bijbel riba e website of cerca un Testigo di Jehova. Nos ta sigur cu si bo haci esey, lo bo ripara cu ta posibel pa stima Dios.