Ta Tur “Cristian” Ta Cristian?

CUANTO cristian tin na mundo? Segun e buki na Ingles Atlas di Cristianismo Global, na aña 2010 tabatin casi 2.300 miyon cristian, pero dividi den mas cu 41.000 grupo religioso, cada un cu su propio doctrina- y normanan. Pues ta di compronde cu algun observador ta sinti nan confundi, asta decepciona, ora nan haya nan confronta cu tanto religion “cristian” asina. Kisas nan ta puntra nan mes: ‘Ta tur cu ta afirma di ta cristian realmente ta cristian?’

Awor, laga nos wak e asunto for di un otro angulo. Por ehempel, si un hende kier drenta un pais, e mester bisa e funcionario di inmigracion ta ken e ta y ki nacionalidad e tin. Pero esey so no ta basta. Tambe e tin cu presenta su paspoort of cualkier otro documento pa proba esey. Asina tambe, un cristian berdadero tin cu haci mas cu djis bisa cu e ta kere den Cristo. E mester por identifica su mes como tal. Laga nos wak con e por haci esey.

Un dies aña despues di e morto di Cristo, nan a cuminsa uza e nomber “cristian.” E historiado biblico Lucas a skirbi cu “tabata na Antiokia cu bou di guia di Dios nan a yama e discipelnan ‘cristian’ pa prome biaha.” (Echonan 11:26) Tuma nota cu ta e discipelnan di Cristo hende a yama cristian. Kico ser un discipel di Hesucristo ta encera? Segun un diccionario: “Sigui Hesus como un discipel ta nifica cu [un hende] ta sacrifica henter su bida incondicionalmente . . . pa resto di su bida.” (The New International Dictionary of New Testament Theology) Cu otro palabra, un berdadero cristian ta un persona cu ta sigui e siñansanan y instruccionnan di Hesus​—e Fundador di cristianismo​—na un manera total y incondicional.

Nos por haya hende asina awe entre e tantisimo religionnan cu ta bisa cu nan ta cristian? Kico Hesus mes a bisa cu lo identifica su berdadero siguidonan? Nos ta anima bo pa lesa e siguiente cinco articulonan pa bo por sa con Bijbel ta contesta e preguntanan ey. Cada articulo lo analisa un caracteristica cu, segun Hesus, ta identifica su siguidonan. Nos lo wak tambe con e cristiannan di prome siglo tabata un ehempel den esaki. Y despues nos lo trata di mira ken, entre e tantisimo religionnan cu ta bisa cu nan ta cristian, ta haci mescos cu nan.

“Keda Fiel na Mi Palabranan”

“Si boso keda fiel na mi palabranan, boso realmente ta mi discipelnan, y boso lo conoce e berdad, y e berdad lo haci boso liber.”​—JUAN 8:31, 32.

Kico Hesus Tabata Kiermen? Ora Hesus a bisa “mi palabranan”, el a referi na su siñansanan cu a bin di un fuente mas halto. E di: “Ta e Tata cu a manda mi a duna mi ordo tocante kico pa bisa y kico pa siña hende.” (Juan 12:49) Ademas, den oracion na su Tata selestial, Jehova Dios, el a reconoce: “Bo palabra ta e berdad.” Pesey tur ora e tabata cita e Palabra di Dios pa apoya su siñansanan. (Juan 17:17; Mateo 4:4, 7, 10) Pues, con cristiannan berdadero ta ‘keda fiel na su palabranan’? Nan ta acepta Bijbel, e Palabra di Dios, como “e berdad” y como e autoridad maximo di nan creencia- y practicanan.

E Ehempel di e Prome Cristiannan: Apostel Pablo, e cristian cu a skirbi mas carta di Bijbel, tabatin e mesun respet pa e Palabra di Dios cu Hesus tabatin. El a skirbi: “Henter e Scritura ta inspira di Dios y ta probechoso.” (2 Timoteo 3:16) Ademas, hombernan apunta pa siña otro cristian a haya e instruccion pa “tene duro na e Palabra di Dios cu ta sigur y confiabel.” (Tito 1:7, 9, The Amplified Bible) Y e cristiannan di prome siglo a haya e conseho pa rechasa “filosofia y engaño vano cu ta basa riba tradicion di hende, segun e cosnan basico di mundo y no segun e siñansanan di Cristo.”​—Colosensenan 2:8.

Ken Awe Ta Haci Mescos? E obra Constitucion Dogmatico Tocante Revelacion Divino​—aproba pa Vaticano na 1965 y cita den Catisashi di Iglesia Catolico​—ta bisa: “Iglesia [catolico] no ta saca su conviccion di tur loke a ser revela for di e Scritura Sagrado so. Pesey, tanto Tradicion Sagrado como Scritura Sagrado mester ser acepta y venera cu e mesun sentido di lealtad y respet profundo.” Un articulo den e revista Maclean’s a cita un pastoor muher di Toronto, Canada, cu a bisa: “Pakico nos tin mester di un bos ‘revolucionario’ di dos mil aña pasa pa guia nos? Nos mes tin masha idea fabuloso, pero constantemente nan ta ser debilita pasobra nan mester cuadra cu loke Hesus y e Scritura ta bisa.”

E New Catholic Encyclopedia ta bisa di Testigonan di Jehova: “Nan ta considera Bijbel como nan unico fuente di creencia y di norma di conducta.” Recientemente, un homber na Canada a interumpi un Testigo di Jehova cu tabata introduciendo su mes y a bis’e: “Mi sa caba ken bo ta”, y mustrando riba e Bijbel den man di e Testigo, “e buki ey ta reda bo.”

“Nan No Ta Parti di Mundo”

“Mundo a odia nan, pasobra nan no ta parti di mundo.”​—JUAN 17:14.

Kico Hesus Tabata Kiermen? Como cu e no tabata parti di mundo, el a keda neutral den e conflictonan social y politico di su tempo. El a splica: “Si mi reino tabata parti di e mundo aki, mi sirbidornan lo a bringa pa mi no ser entrega den man di e Hudiunan. Ma echo ta cu mi reino no ta djaki.” (Juan 18:36) Ademas, el a urgi su siguidonan pa rechasa actitud, manera di papia y comportacion cu Bijbel ta condena.​—Mateo 20:25-27.

E Ehempel di e Prome Cristiannan: Segun e escritor religioso Jonathan Dymond, e prome cristiannan “a nenga di participa den [guera]; nan no a worry cu e consecuencianan, sea esey tabata berguensa, encarcelacion of morto.” En bes di actua contra nan posicion neutral, nan a prefera di sufri. Nan normanan moral halto tambe a haci nan diferente. Un apostel a bisa nan: “Nan ta keda straño cu boso no ta sigui anda cu nan den nan bagamunderia, y pesey nan ta papia malo di boso.” (1 Pedro 4:4) Manera historiado Will Durant a splica, e cristiannan, “cu nan devocion y decencia, tabata molestia consenshi di e mundo pagano loco pa placer.”

Ken Awe Ta Haci Mescos? Relaciona cu neutralidad cristian, New Catholic Encyclopedia a declara cu ‘for di e punto di bista moral, no tin ningun hustificacion pa nenga di carga arma pa motibo di consenshi.’ Di otro banda, basa riba un informe di e organisacion di derecho humano African Rights, e corant Suiso Reformierte Presse a confirma cu tur iglesia a participa den e genocidio na Ruanda na 1994, “cu excepcion di Testigonan di Jehova.”

Tratando e tema di e Holocaust Nazi, un maestro di scol secundario a lamenta cu “ningun grupo of organisacion di ciudadano no a denuncia e cantidad di mentira, e trato cruel y, mas despues, e atrocidadnan cu a tuma luga. Despues di consulta cu e Museo pa Conmemora Holocaust na Merca, el a skirbi: “Awor mi sa cu no tabata manera mi a pensa.” El a haya sa cu Testigonan di Jehova a para firme den nan creencianan a pesar di e trato teribel cu nan a ricibi.

Kico di moralidad cristian? Segun e revista U.S. Catholic, “mayoria di hoben adulto catolico no ta di acuerdo cu e siñansanan di Iglesia relaciona cu asuntonan manera bibamento hunto [y] sex prome cu casa.” E revista a cita un diacono cu a bisa: “Un porcentahe grandi di persona cu mi ta guia​—mi ta calcula cu ta mas cu 50 porciento​—ta biba hunto caba ora nan bin pa casa.” The New Encyclopædia Britannica a comenta cu Testigonan di Jehova “ta tene duro na normanan moral halto di conducta personal.”

“Boso . . . Stima Otro”

“Mi ta duna boso un mandamento nobo: stima otro; mescos cu ami a stima boso, boso tambe stima otro. Na esaki tur hende lo sa cu boso ta mi discipelnan, esta, si boso ta stima otro.”​—JUAN 13:34, 35.

Kico Hesus Tabata Kiermen? El a bisa su siguidonan pa nan stima otro mescos cu el a stima nan. Con el a stima nan? Su amor no a ser influencia pa e prehuicio cu tabata reina den su tempo contra hende di otro nacion of contra hende muher. (Juan 4:7-10) Amor a motiva Hesus pa sacrifica su tempo, energia y comodidad personal pa yuda otro hende. (Marco 6:30-34) Y Cristo a demostra amor na e manera di mas sublime ora el a entrega su bida. Manera el a bisa: “Ami ta e bon wardado; e bon wardado ta entrega su alma pa e carnenan.”​—Juan 10:11.

E Ehempel di e Prome Cristiannan: Den prome siglo, e cristiannan tabata yama otro “ruman.” (Filemon 1, 2) Hende di tur nacion tabata bonbini den e congregacion cristian, pasobra pa nan ‘no tabatin distincion entre Hudiu ni Griego, ya cu ta e mesun Señor tabatin riba nan tur.’ (Romanonan 10:11, 12) Despues di e fiesta di Pentecoste di aña 33, e discipelnan na Jerusalem a “bende nan propiedadnan y parti e placa entre nan tur, segun e necesidad di cada un.” Dicon nan a haci esey? Pa e rumannan recien batisa por a keda Jerusalem y “sigui presta atencion na siñansa di e apostelnan.” (Echonan 2:41-45) Kico a motiva nan pa actua asina? Menos cu 200 aña despues di morto di e apostelnan, Tertuliano a revela esey ora el a cita loke otro hende tabata bisa di e cristiannan: “Wak con nan ta stima otro . . . y con nan ta cla pa asta muri pa otro.”

Ken Awe Ta Haci Mescos? E buki Historia di e Decadencia y Ruina di e Imperio Romano a comenta cu a traves di siglonan hende cu a bisa cu nan ta cristian “a comete hopi mas crueldad contra otro cu loke nan a sufri debi na e fanatismo di [hende no creyente].” Recientemente, un estudio na Merca a saca afo cu hopi hende religioso​—di cua mayoria ta bisa cu nan ta cristian​—tin prehuicio contra hende di otro rasa. Hopi biaha, baido di misa den un pais no tin nada di haber cu esnan di e mesun grupo religioso den un otro pais. Pesey nan no por of no ta dispuesto pa yuda nan compañeronan di creencia ora surgi un necesidad.

Na aña 2004, cuater horcan a asota Florida den dos luna di tempo. Despues, e presidente di e comite di trabounan di emergencia di e region ey a bay controla si e hendenan tabata haci bon uzo di e suministronan cu nan a manda. El a ripara cu ningun otro grupo no tabata asina bon organisa manera e Testigonan di Jehova y a ofrece pa duna nan tur loke nan tabatin mester. Mas prome, na aña 1997, un grupo di Testigo di Jehova a bay Republica Democratico di Congo pa yuda nan rumannan cristian den necesidad. Nan a bay cu remedi, cuminda y paña cu Testigonan di Europa a contribui, na balor di un miyon dollar Mericano.

“Mi A Haci Bo Nomber Conoci”

“Mi a haci bo nomber conoci na e hendenan cu tabata den mundo y cu bo a duna mi . . . Mi a haci bo nomber conoci na nan y lo mi sigui hacie conoci.”​—JUAN 17:6, 26.

Kico Hesus Tabata Kiermen? El a uza e nomber di Dios den su sirbishi y asina a hacie conoci. Sin duda, el a pronuncia Dios su nomber personal ora e tabata lesa for di e Scritura, locual el a haci cu frecuencia. (Lucas 4:16-21) El a siña su siguidonan pa nan pidi den oracion: “Tata, laga bo nomber sea santifica.”​—Lucas 11:2.

E Ehempel di e Prome Cristiannan: Apostel Pedro a conta e ancianonan na Jerusalem cu Dios a saca for di e nacionnan “un pueblo pa carga su nomber.” (Echonan 15:14) Ademas, e apostelnan y otro cristiannan a predica e mensahe cu “tur hende cu invoca e nomber di Jehova lo ser salba.” (Echonan 2:21; Romanonan 10:13) Tambe nan a inclui e nomber di Dios den e obranan cu nan a skirbi. Un coleccion di ley Hudiu cu nan a completa rond di aña 300 di nos era, conoci como e Tosefta, a papia tocante e kimamento di buki cristian na man di opositor. E obra aki a bisa: “No mester scapa e bukinan di e escritornan di Evangelio ni di minim [probablemente cristiannan Hudiu]. Laga nan kima caminda nan ta, . . . nan cu e nomber di Dios cu nan ta contene.”

Ken Awe Ta Haci Mescos? E Bijbel Revised Standard Version​—edicion autorisa pa e Conseho Nacional di Iglesianan di Cristo na Merca​—ta bisa den su prologo: “E uzo di cualkier nomber propio pa e unico Dios cu tin, comosifuera ta existi otro dios for di cua lo mester distinguie, a ser descontinua den hudaismo prome cu e era cristian y ta completamente inapropia pa e fe universal di e Iglesia Cristian.” Pesey, e traduccion ey a reemplasa e nomber di Dios cu e titulo “SEÑOR.” Recientemente, Vaticano a instrui su obisponan: “No mester uza ni pronuncia e nomber di Dios den forma di e tetragramaton YHWH den cantica ni den oracion.”a

Ken awe ta uza e nomber personal di Dios y hacie conoci? Un hoben cu yama Sergey a haya sa ta ken. Tempo e tabata teenager na Kirghizstan, el a wak un pelicula cu a identifica e nomber di Dios como Jehova. Dies aña largo e no a tende e nomber ey mas. Entretanto, el a bay biba na Merca, y dos Testigo di Jehova a bishit’e na cas y a mustr’e e nomber di Dios den Bijbel. Sergey a keda masha contento cu el a haya un grupo cu ta uza e nomber Jehova. Un diccionario Ingles ta defini “Jehova Dios” como “un dios supremo reconoci y e unico Dios cu Testigonan di Jehova ta adora.” (Webster’s Third New International Dictionary)

[Nota]

“E Bon Noticia Aki di e Reino Lo Ser Predica”

“E bon noticia aki di e Reino lo ser predica den henter e tera habita, como testimonio pa tur nacion, anto e fin lo yega.”​—MATEO 24:14.

Kico Hesus Tabata Kiermen? Segun e Evangelio di Lucas, Hesus a “biaha di stad pa stad y di pueblito pa pueblito, predicando y anunciando e bon noticia di e Reino di Dios.” (Lucas 8:1) Hesus mes a bisa: “Mi tin cu declara e bon noticia di e Reino di Dios na e otro stadnan tambe, pasobra ta pa esaki Dios a manda mi.” (Lucas 4:43) Na cuminsamento, el a manda su discipelnan bay predica e bon noticia den e stadnan y pueblitonan cu tabata keda cerca, pero mas despues el a bisa nan: “Boso lo ta mi testigonan . . . te na e parti mas leu di tera.”​—Echonan 1:8; Lucas 10:1.

E Ehempel di e Prome Cristiannan: E discipelnan di Hesus no a perde pa gana y mesora a haci loke Hesus a manda: “Tur dia, sin stop, den tempel y di cas pa cas, nan a sigui siña hende y declara e bon noticia tocante Hesus.” (Echonan 5:42) Y no ta un grupo chikito special so tabata predica, sino nan tur. Historiado Neander a bisa cu “Celso, un di e prome escritornan cu a critica cristianismo, a haci bofon di e echo cu esnan cu ta traha cu lana, sapate, curtido di cuero, si, e hendenan mas comun y sin educacion, tabata predicador celoso di e evangelio.” Jean Bernardi a splica den su buki na Frances, E Prome Siglonan di Iglesia, cu cristiannan mester a bay “papia na tur parti y cu tur hende. Riba caminda y den stad, na plasa publico y den cas. Sea cu nan tabata bonbini of no. . . . Te na punta di mas leu di e tera.”

Ken Awe Ta Haci Mescos? E pastoor anglicano David Watson a skirbi: “Un di e motibonan di e malestar spiritual cu ta reina awe ta cu Iglesia no a interesa den e trabou di predica y di siña hende.” Den e buki na Spaño Dicon Catoliconan Ta Bay? José Luis Pérez Guadalupe a skirbi cu Testigonan di Jehova “ta bay di cas pa cas sistematicamente.” Y el a agrega cu evangeliconan, adventistanan y otro gruponan religioso “no ta bay di cas pa cas.”

Den un informe di e Instituto Cato, nos ta haya un comentario interesante y realistico di Jonathan Turley: “Si bo menciona e nomber Testigonan di Jehova, mayoria di hende ta pensa di biaha riba e predicadornan cu ta yama na nos porta na mal ora. Testigonan di Jehova no ta mira buscamento di hende di cas pa cas pa comberti hende como un manera pa promove nan creencia, sino como un parti fundamental di nan fe.” (Cato Supreme Court Review, 2001-2002)

[Cuadro na pagina 9]

Bo A Saca Afo Ta Ken?

Den e serie di articulo aki nos a analisa varios caracteristica cu segun Bijbel ta identifica cristiannan berdadero. Bo a logra identifica nan? Ta berdad cu tin miles di grupo y denominacion religioso cu ta afirma di ta cristian. Pero corda kico Hesus a bisa su siguidonan: “No ta tur hende cu bisa mi: ‘Señor, Señor’, lo drenta e Reino di cielo, sino esun cu ta haci e boluntad di mi Tata cu ta den cielo.” (Mateo 7:21) Pues, pa disfruta di bendicion eterno bou di gobernacion di e Reino di Dios, bo tin cu identifica esnan cu ta haciendo e boluntad di e Tata​—esnan cu tin tur e caracteristicanan di cristianismo berdadero​—y forma parti di e grupo ey. Lo bo kier sa mas tocante e Reino di Dios y e bendicionnan cu lo e trece? Wel, nos ta anima bo pa papia cu esnan cu a duna bo e revista aki, esta, Testigonan di Jehova.​—Lucas 4:43.