Dios mes a splica e nificacion di su nomber na su fiel sirbido Moises. Ora Moises a puntra tocante e nomber di Dios, Yehova a contesta: “Lo mi resulta di ta loke lo mi resulta di ta.” (Exodo 3:14, NW) E traduccion di Rotherham ta bis’e asin’aki: “Lo Mi Bira loke sea mi kier.” Pues Yehova por bira loke sea ta necesario pa por cumpli cu su proposito.

Supone cu bo por a bira loke sea bo kier bira. Kico lo bo a haci pa bo amigonan? Si un di nan a bira hopi malo, lo bo por a bira un bon docter y cur’e. Si un otro a sufri un perdida financiero, lo bo por a bira un sponsor rico y yud’e cu su problema. Pero berdad ta, cu bo ta limita den loke bo por bira. Nos tur ta limita. Ma segun cu bo ta studia Bijbel, lo bo keda sorprendi pa mira con Yehova ta bira loke sea ta necesario pa por cumpli cu su promesanan. Y gustosamente e ta uza su poder na fabor di hende cu ta stim’e. (2 Cronicanan 16:9) Hende cu no conoce e nomber di Yehova no ta ripara e bunita fasetanan aki di Yehova su personalidad.

Ta bisto anto cu e nomber Yehova mester ta den Bijbel. Conoce su nificacion y uz’e libremente den nos adoracion ta dos yudansa grandi pa nos por hala mas serca di nos Tata celestial, Yehova.a

PROFETA Daniel a biba mas cu 500 aña prome cu Hesus a nace. Sinembargo, Yehova a revela na Daniel informacion cu lo a haci posibel pa señala e tempo cu lo a ungi, of nombra, Hesus como e Mesias of Cristo. Un angel a bisa Daniel: “Sabi anto y compronde cu for di e momento cu e ordo a wordo duna pa restaura y reconstrui Herusalem te na e Mesias, e Prins, lo tin shete siman y sesentidos siman.”—Daniel 9:25.

Pa determina e tempo di e yegada di e Mesias, nos tin cu sa prome ki tempo e periodo cu ta hiba na e Mesias a cuminsa. Segun e profecia, esei ta “for di e momento cu e ordo a wordo duna pa restaura y reconstrui Herusalem.” Ki tempo “e ordo a wordo duna”? Segun e escritor biblico Nehemias, “den e di binti aña di Rei Artaherhes” a duna e ordo pa reconstrui e murayanan rond di Herusalem. (Nehemias 2:1, 5-8) Historiadonan ta confirma cu aña 474 prome cu nos era (P.E.C.) tawata Artaherhes su prome aña completo como gobernante. Pues anto e di 20 aña di su reinado tawata aña 455 P.E.C. Awor nos sa ki tempo Daniel su profecia Mesianico a cuminsa cumpli, esta, na aña 455 P.E.C.

Daniel ta indica tambe con largo e periodo di tempo cu a hiba na yegada di e “Mesias, e Prins” lo a dura. E profecia ta menciona “shete siman y sesentidos siman”, un total di 69 siman. Con largo e periodo di tempo aki ta? Varios traduccion di Bijbel ta menciona cu e simannan aki no ta siman di shete dia, sino siman di aña. Es decir, cada siman ta representa shete aña. E Hudiunan di antiguedad tawata conoci cu e concepto aki di siman di aña, of seccionnan di shete aña. Por ehempel, cada shete aña nan a warda un aña di sabat. (Exodo 23:10, 11) Pesei e 69 simannan profetico ta suma 69 seccion di 7 aña cada un, of un total di 483 aña.

Tur loke nos tin cu haci awor ta conta. Si nos cuminsa conta for di aña 455 P.E.C., 483 aña despues ta hiba nos na aña 29 di nos era (E.C.). Esei ta precis e aña cu Hesus a batisa y bira e Mesias!a (Lucas 3:1, 2, 21, 22) Esaki no ta un cumplimento remarcabel di profecia biblico?

PA YUDA nos identifica e Mesias, Yehova Dios a inspira hopi profeta di Bijbel pa duna detayenan tocante e nacemento, ministerio y morto di e Libertador priminti. Tur e profecianan biblico aki a cumpli den Hesucristo. Nan ta asombrosamente exacto y detaya. Pa ilustra esaki, laga nos considera algun profecia cu a predeci susesonan relaciona cu e nacemento y infancia di e Mesias.

Profeta Isaias a predeci cu e Mesias lo tawata un desendiente di Rei David. (Isaias 9:7) Hesus en berdad a nace den e liña di desendencia di David.—Mateo 1:1, 6-17.

Mikeas, un otro profeta di Dios, a predeci cu e yiu aki cu tempo lo a bira un gobernante y cu lo el a nace na “Betlehem Efrata.” (Mikeas 5:2) Tempo cu Hesus a nace tawatin dos stad den Israel cu yama Betlehem. Uno tawata situa serca di Nazaret den e parti nort di e pais, y e otro tawata serca di Herusalem den Huda. E Betlehem serca di Herusalem tawata esun cu antes nan a yama Efrata. Hesus a nace den e stad ei, precis manera e profecia a predeci!—Mateo 2:1.

Un otro profecia biblico a predeci cu e Yiu di Dios lo a ser yama “for di Egipto.” Na mucha, Hesus a ser hiba Egipto, y nan a trec’e bek despues cu Herodes a muri. Pues, asina e profecia a cumpli.—Oseas 11:1; Mateo 2:15.

Den e tabel “Profecianan Tocante e Mesias”, e textonan biblico bou di e encabesamento “Profecia” ta contene detayenan tocante e Mesias. Sea asina bon di compara esakinan cu e textonan biblico bou di e encabesamento “Cumplimento.” Si bo haci esaki, bo fe cu e Palabra di Dios ta berdad lo bira mas fuerte ainda.

Segun cu bo ta examina e textonan biblico aki, tene na mente cu esnan di un caracter profetico tawata skirbi cientos di aña prome cu Hesus a nace. Hesus a declara: “Tur cos cu ta para skirbi tocante di mi den e Lei di Moises y e Profetanan y e Salmonan mester wordo cumpli.” (Lucas 24:44) Manera bo por confirma den bo propio Bijbel, nan a cumpli, anto den delaster un detaye!

HENDE cu ta kere den e siñansa di Trinidad ta bisa cu Dios ta consisti di tres persona: e Tata, e Yiu y e Spirito Santo. Nan ta bisa cu cada un di e tres personanan aki ta igual cu otro, todopoderoso y sin un principio. Pues segun e doctrina di Trinidad, e Tata ta Dios, e Yiu ta Dios y e Spirito Santo ta Dios, sinembargo ta un solo Dios tin.