1. Kico ta Dios su proposito pa e tera?

DIOS su proposito pa e tera ta realmente maraviyoso. Yehova kier pa e tera yena cu hende felis y saludabel. Bijbel ta bisa cu ‘Dios a planta un hofi na Eden’ y cu el a laga “nace tur palo cu ta agradabel pa bista y bon pa cuminda.” Despues cu Dios a crea e prome homber y mohe, Adam cu Eva, El a pone nan den e luga bunita ei y a bisa nan: “Sea fructifero y multiplica, y yena e tera y haci esaki somete na bo.” (Genesis 1:28; 2:8, 9, 15) Pues Dios su proposito tawata pa hende haya yiu, transforma henter e tera den un paradijs y cuida e bestianan.

2. (a) Con nos por sa cu Dios su proposito pa e tera lo cumpli? (b) Segun Bijbel, ki clase di hende lo biba pa semper?

² Bo ta kere cu Yehova Dios su proposito pa hende biba den un paradijs riba tera lo wordo realisa algun dia? Dios ta declara: “Di berdad mi a papia . . . siguramente lo mi hacie.” (Isaias 46:9-11; 55:11) Si, Dios sigur lo cumpli cu su proposito! E ta bisa cu e “no a crea [e tera] pa e keda bashi”, ma “a form’e pa e wordo habita.” (Isaias 45:18) Ki clase di hende Dios kier pa biba riba tera? Y pa cuanto tempo e kier pa nan biba riba dje? Bijbel ta contesta: “E hustonan lo hereda e tera, y lo biba den dje pa semper.”—Salmo 37:29; Revelacion 21:3, 4.

3. Ki condicionnan tristo tin awe riba tera, y ki preguntanan esei ta lanta?

³ Ta bisto cu esaki no a tuma luga ainda. Awendia hende ta bira malo y ta muri; nan ta asta bringa y mata otro. Un cos a bai robes. Pero sigur no tawata Dios su proposito pa mundo ta manera nos ta mir’e awe! Kico a pasa? Dicon Dios su proposito no a cumpli? Ningun buki di historia cu hende a skirbi no por bisa nos pasobra e problema a cuminsa den shelo.

E ORIGEN DI UN ENEMIGO

4, 5. (a) Ken realmente a papia cu Eva pa medio di e colebra? (b) Con un persona cu un tempo tawata decente y honesto lo por para bira un ladron?

⁴ E prome buki di Bijbel ta conta nos cu den hofi di Eden a presenta un opositor, un persona cu a bai contra Dios. Bijbel ta describie como “e colebra”, pero e no tawata djis un bestia. E ultimo buki di Bijbel ta identific’e como esun “kende ta wordo yama Diabel y Satanas, kende ta gaña henter mundo.” Tambe Bijbel ta yam’e “e colebra di antiguedad.” (Genesis 3:1; Revelacion 12:9) E angel poderoso aki, of criatura spiritual invisibel, a uza un colebra pa papia cu Eva, mescos cu un persona habil por uza su stem pa laga parce cu ta un popchi banda di dje ta papia. E persona spiritual ei sin duda tawata presente ora cu Dios a prepara e tera pa hende.—Job 38:4, 7.

⁵ Sinembargo, siendo cu tur loke Yehova a crea ta perfecto, ta ken a traha e “Diabel”, e “Satanas”, aki? Simplemente bisa, un di e yiunan spiritual poderoso di Dios a comberti su mes den Diabel. Con esaki tawata posibel? Wel, awe un persona cu un tempo tawata decente y honesto por para bira un ladron. Con esei ta sosode? Kisas e persona ta permiti un mal deseo desaroya den su curason. Si e keda pensa riba dje, e mal deseo ei por bira hopi fuerte. Anto si e oportunidad presenta, lo e por actua di acuerdo cu e mal deseo cu e tawata pensa riba dje.—Santiago 1:13-15.

6. Con un yiu spiritual poderoso di Dios a bira Satanas e Diabel?

⁶ Esaki a sosode den caso di Satanas e Diabel. Aparentemente el a tende Dios bisa Adam cu Eva pa nan haya yiu y yena e tera cu nan yiunan. (Genesis 1:27, 28) Satanas a pensa evidentemente: ‘Hombro, tur e hendenan aki lo por adora ami en bes di Dios!’ Pues un mal deseo a desaroya den su curason. Cu tempo, el a dal paso pa gaña Eva door di cont’e mentira tocante Dios. (Genesis 3:1-5) Asina el a bira un “Diabel”, locual ta nifica “Calumniado.” Alabes el a bira “Satanas”, locual ta nifica “Opositor.”

7. (a) Dicon Adam cu Eva a muri? (b) Dicon tur yiu di Adam ta bira bieu y ta muri?

⁷ Door di uza mentira y triki, Satanas e Diabel a pone Adam cu Eva desobedece Dios. (Genesis 2:17; 3:6) Como resultado, nan a muri despues di tempo, manera Dios a bisa lo a pasa si nan desobedece. (Genesis 3:17-19) Como cu Adam a bira imperfecto ora el a peca, tur su yiunan a hereda pica for di dje. (Romanonan 5:12) Nos lo por compara e situacion aki cu un forma pa traha pan of bolo. Si e forma tin un deuk aden, kico ta pasa cu tur pan of bolo cu bo traha den dje? Tur lo sali cu un deuk of imperfeccion. Di mesun manera, tur hende a hereda un “deuk” di imperfeccion for di Adam. Ta pesei tur hende ta bira bieu y ta muri.—Romanonan 3:23.

8, 9. (a) Ki desafio Satanas evidentemente a presenta? (b) Dicon Dios no a destrui e rebeldenan mesora?

⁸ Ora cu Satanas a pone Adam cu Eva peca contra Dios, Satanas eigenlijk a encabesa un rebelion. El a desafia of reta Yehova su manera di goberna. Eigenlijk, Satanas a bisa: ‘Dios ta un mal gobernante. E ta papia mentira y ta sconde cos bon for di su subditonan. Hende no tin mester di Dios pa goberna riba nan. Nan por dicidi pa nan mes loke ta bon y loke ta malo. Y lo bai nan mas mihor bou di mi gobernacion.’ Con Dios lo a atende un acusacion ofensivo asina? Tin hende ta pensa cu Dios simplemente mester a mata e rebeldenan ei. Pero esei lo a contesta Satanas su desafio? Esei lo a proba cu Dios su manera di goberna ta corecto?

⁹ Yehova su sentido perfecto di husticia no a permitie mata e rebeldenan mesora. El a dicidi cu mester di tempo pa contesta Satanas su desafio na un manera satisfactorio y pa demostra cu Diabel ta un mentiroso. Pues, Dios a dicidi cu lo e permiti hende goberna nan mes pa un tempo bou di e influencia di Satanas. Den Capitulo 11 di e buki aki nos lo considera dicon Yehova a haci esei y dicon el a permiti asina tanto tempo pasa prome cu e resolve e cuestionnan aki. Pero ta bon pa nos pensa awor riba esaki: Adam cu Eva tawatin rason pa kere Satanas, kende nunca no a haci nada bon pa nan? Tawata corecto pa nan kere cu Yehova—kende a duna nan tur cos cu nan tawatin—ta un mentiroso cruel? Kico abo lo a haci?

10. Con bo por apoya e banda di Yehova como contesta riba e desafio di Satanas?

¹⁰ Ta bon pa pensa riba e preguntanan aki pasobra cada un di nos ta confronta cuestionnan similar awe. Si, abo tin e oportunidad di apoya e banda di Yehova como contesta riba e desafio di Satanas. Bo por acepta Yehova como bo Gobernante y yuda mustra cu Satanas ta un mentiroso. (Salmo 73:28; Proverbionan 27:11) Lamentablemente, ta masha poco hende entre e miles di miyones di hendenan cu tin riba e mundo aki ta scohe pa haci esei. Esaki ta lanta un pregunta importante, Bijbel realmente ta siña cu ta Satanas ta goberna e mundo aki?

KEN TA GOBERNA E MUNDO AKI?

11, 12. (a) Con un tentacion cu Hesus a haya ta revela cu ta Satanas ta e gobernante di e mundo aki? (b) Kico mas ta duna prueba cu Satanas ta e gobernante di e mundo aki?

¹¹ Hesus nunca a duda cu ta Satanas ta gobernante di e mundo aki. Den un manera milagroso, Satanas un biaha a mustra Hesus “tur e reinonan di mundo y nan gloria.” Anto Satanas a priminti Hesus: “Tur e cosnan aki lo mi duna bo, si bo tira bo curpa abou y adora mi.” (Mateo 4:8, 9; Lucas 4:5, 6) Pensa un rato riba esaki. E oferta ei lo tawata un tentacion pa Hesus si Satanas no tawata e gobernante di e reinonan aki? Hesus no a nenga cu tur e gobiernonan aki di mundo tawata di Satanas. Hesus sigur lo a haci esei si Satanas no tawata e poder cu a dirigi nan.

¹² Naturalmente, Yehova ta e Dios Todopoderoso, Creador di e maraviyoso universo. (Revelacion 4:11) Sinembargo, ningun caminda Bijbel ta bisa cu sea Yehova Dios of Hesucristo ta gobernante di e mundo aki. De echo, Hesus spesificamente a referi na Satanas como e gobernante of “e prins di e mundo aki.” (Huan 12:31; 14:30; 16:11) Bijbel ta asta referi na Satanas e Diabel como “e dios di e mundo aki.” (2 Corintionan 4:3, 4) Apostel cristian Huan a skirbi tocante e opositor, of Satanas, aki: “Henter mundo ta bou di control di e malbado.”—1 Huan 5:19.

CON LO ELIMINA E MUNDO DI SATANAS

13. Dicon nos tin mester di un mundo nobo?

¹³ Cada aña cu pasa, mundo ta bira mas y mas peligroso. E ta pesta cu ehersitonan den guera, politiconan deshonesto, lidernan religioso hipocrita y criminalnan sin heful. Ta imposibel pa reforma henter mundo. Bijbel ta revela cu e tempo pa Dios elimina e mundo malbado aki durante su guera di Armagedon ta serca. Esaki lo habri caminda pa un husto mundo nobo.—Revelacion 16:14-16.

14. Ken Dios a scohe pa ta Gobernante di Su Reino, y con Bijbel a predeci esaki?

¹⁴ Yehova Dios a scohe Hesucristo pa ta Gobernante di Yehova su gobierno of Reino celestial. Hopi tempo pasa Bijbel a predeci: “Un yiu a nace pa nos, un yiu homber ta duna na nos, y e gobernacion lo ta riba su scouder. Su nomber lo ta . . . Prins di Pas. Lo no tin fin na e aumento di su gobernacion y di pas.” (Isaias 9:6, 7) Relaciona cu e gobierno aki, Hesus a siña su siguidonan pa pidi den oracion: “Cu bo reino bin. Cu bo boluntad sosode na tera mescos cu den shelo.” (Mateo 6:10) Manera nos lo mira mas despues den e buki aki, e Reino di Dios pronto lo kita tur e gobiernonan di e mundo aki, y e mes lo tuma nan luga. (Daniel 2:44) E ora ei e Reino di Dios lo trece un paradijs riba tera.

UN MUNDO NOBO TA SERCA!

15. Kico e “tera nobo” ta?

¹⁵ Bijbel ta sigura nos: “Segun [Dios] su promesa nos ta sperando shelonan nobo y un tera nobo, den cual ta biba husticia.” (2 Pedro 3:13; Isaias 65:17) Tin biaha ora Bijbel ta papia di e “tera”, e kiermen e hendenan cu ta biba riba tera. (Genesis 11:1) Pues, e husto “tera nobo” ta un sosiedad di hende cu ta haya Dios su aprobacion.

16. Menciona un regalo masha precioso cu Dios lo duna e hendenan cu e ta aproba, y kico nos tin cu haci pa hay’e?

¹⁶ Hesus a priminti cu den e benidero mundo nobo, e hendenan aproba pa Dios lo haya e regalo di “bida eterno.” (Marco 10:30) Sea asina bon di habri bo Bijbel na Huan 3:16 y 17:3, y lesa loke Hesus a bisa cu nos tin cu haci pa haya bida eterno. E hendenan cu ta bin na remarca pa e maraviyoso regalo ei di Dios den e benidero Paradijs riba tera lo gosa di hopi bendicion. Ban wak awor den Bijbel kico e bendicionnan ei lo ta.

17, 18. Con nos por ta sigur cu lo tin pas y siguridad tur caminda riba tera?

¹⁷ Maldad, guera, crimen y violencia lo no t’ei mas. “E malbado lo no t’ei mas . . . Ma e humildenan lo hereda e tera.” (Salmo 37:10, 11) Lo tin pas pasobra ‘Dios lo haci gueranan stop te na e fin di tera.’ (Salmo 46:9; Isaias 2:4) E ora ei ‘e husto lo florece, y lo tin abundancia di pas te ora cu no tin luna mas’, y esei ta nifica pas pa semper!—Salmo 72:7.

¹⁸ Adoradonan di Yehova lo biba den siguridad. Tanten cu e Israelitanan den tempo biblico a obedece Dios, nan a biba den siguridad. (Levitico 25:18, 19) Lo ta un cos maraviyoso di por disfruta di un siguridad similar den Paradijs!—Isaias 32:18; Mikeas 4:4.

19. Dicon nos sa cu lo tin cuminda na abundancia den Dios su mundo nobo?

¹⁹ Lo no tin scarsedad di cuminda. E salmista a canta: “Lo tin abundancia di maishi den e tera, riba cabes di e seronan.” (Salmo 72:16) Yehova Dios lo bendiciona su sirbidonan husto, y ‘tera lo duna su fruta.’—Salmo 67:6.

20. Dicon nos por tin sigur cu henter e tera lo bira un paradijs?

²⁰ Henter e tera lo bira un paradijs. Lo tin casnan nobo y hofinan bunita riba terenonan cu un tempo hende pecaminoso a destrui. (Isaias 65:21-24; Revelacion 11:18) Segun cu tempo ta pasa, partinan di tera cu ya hende a domina lo sigui expande te ora cu henter e planeta ta mes bunita y productivo cu hofi di Eden. Y Dios sigur lo ‘habri su man, y satisface e deseo di tur ser bibo.’—Salmo 145:16.

21. Kico ta mustra cu lo tin pas entre hende cu bestia?

²¹ Lo tin pas entre hende cu bestia. Bestianan salbahe y domestico lo come hunto. Asta un mucha chikito lo no tin miedo di bestianan cu awor ta peligroso.—Isaias 11:6-9; 65:25.

22. Kico lo pasa cu malesa?

²² Malesa lo disparce. Como Gobernante di Dios su Reino celestial, Hesus lo cura hende na un escala hopi mas grandi cu tempo e tawata riba tera. (Mateo 9:35; Marco 1:40-42; Huan 5:5-9) E ora ei “ningun habitante lo no bisa: ‘Mi ta malo.’”—Isaias 33:24; 35:5, 6.

23. Dicon e resureccion lo alegra nos curason?

²³ Sernan keri morto lo resusita cu e speransa di no muri nunca. Tur e mortonan cu ta den Dios su memoria lo ser resusita. De echo, “lo tin un resureccion di tanto e hustonan como e malbadonan.”—Echonan 24:15; Huan 5:28, 29.

24. Kico bo ta pensa di biba den Paradijs riba tera?

²⁴ Ki un futuro maraviyoso ta spera e hendenan cu scohe pa siña tocante nos Magnifico Creador, Yehova Dios, y sirbie! Ta na e benidero Paradijs Hesus a referi ora cu el a priminti e malechor cu a muri banda di dje: “Lo bo ta serca mi den Paraiso.” (Lucas 23:43) Ta masha importante anto pa nos siña mas tocante Hesucristo, pa medio di ken tur e bendicionnan aki lo bira posibel.

1. Cua oracion famoso nos lo bai analisa?

MIYONES di persona rond mundo conoce e oracion cu hopi hende ta yama e Oracion di Nos Tata. E expresion aki ta referi na un oracion famoso cu Hesucristo mes a duna como un modelo of ehempel. E ta un oracion yen di nificacion, y un consideracion di su tres prome peticionnan lo yuda bo sa mas tocante loke Bijbel ta siña realmente.

2. Menciona tres cos cu Hesus a siña su disipelnan pidi p’e den oracion.

² Na comienso di e oracion modelo aki, Hesus a instrui su oyentenan: “Pues, haci oracion anto asin’aki: ‘Nos Tata cu ta den shelo, bo nomber sea santifica. Cu bo reino bin. Cu bo boluntad sosode na tera mescos cu den shelo.’” (Mateo 6:9-13) Kico ta e importancia di e tres peticionnan aki?

3. Kico nos tin cu sa tocante e Reino di Dios?

³ Nos a siña hopi cos caba tocante e nomber di Dios, Yehova. Y te na cierto grado nos a considera Dios su boluntad, esta, loke el a haci caba y loke ainda lo e bai haci pa humanidad. Pero ta na kico Hesus tawata referi ora cu el a bisa nos pidi: “Cu bo reino bin”? Kico e Reino di Dios ta? Con su binida lo santifica e nomber di Dios, es decir, hacie santo? Y con e binida di e Reino ta relaciona cu e hacimento di Dios su boluntad?

LOKE E REINO DI DIOS TA

4. Kico e Reino di Dios ta, y ken ta su Rei?

⁴ E Reino di Dios ta un gobierno estableci door di Yehova Dios cu tin un Rei cu Dios a scohe. Ken ta e Rei di e Reino di Dios? Hesucristo. Como Rei, Hesus ta mas grandi cu tur gobernante humano y Bijbel ta yam’e “Señor di señornan y Rei di reinan.” (Revelacion 17:14) E tin e poder pa haci hopi mas bon pa humanidad cu cualkier gobernante humano, asta compara cu esun di mas mihor entre nan.

5. For di unda e Reino di Dios ta goberna, y riba kico?

⁵ For di unda e Reino di Dios lo goberna? Wel, na unda Hesus ta? Sigur bo ta corda cu bo a siña cu nan a mat’e na un staca di tormento, y cu despues Dios a resusit’e. Poco despues di esei, el a subi na shelo. (Echonan 2:33) Pues, ta einan e Reino di Dios ta—den shelo. Ta pesei Bijbel ta yam’e un “reino celestial.” (2 Timoteo 4:18) Aunke e Reino di Dios ta den shelo, lo e goberna e tera.—Revelacion 11:15.

6, 7. Kico ta haci Hesus un Rei extraordinario?

⁶ Kico ta haci Hesus un Rei extraordinario? Pa cuminsa, lo e no muri nunca. Comparando Hesus cu reinan humano, Bijbel ta bisa cu e tin “bida indestructibel.” (Hebreonan 7:16) Esaki ta nifica cu tur e bon cu Hesus haci lo dura. Y nos tin sigur cu lo e haci cosnan grandi y bon.

⁷ Considera e profecia biblico aki tocante Hesus: “E spirito di SEÑOR lo keda riba dje, e spirito di sabiduria y comprondemento, e spirito di conseho y poder, e spirito di conocemento y temor di SEÑOR. Y e lo tin delicia den e temor di SEÑOR, y e lo no husga segun loke su wowo ta mira, ni haci decision segun loke su horea ta tende; ma cu husticia e lo husga e pobernan, y dicidi cu honestidad pa e afliginan di e tera.” (Isaias 11:2-4) E palabranan ei ta mustra cu Hesus lo tawata un Rei husto y compasivo durante su gobernacion riba hende na mundo. Abo lo kier tin un gobernante asina?

8. Ken lo goberna hunto cu Hesus?

⁸ At’aki un otro berdad tocante e Reino di Dios: Hesus lo no goberna su so. Lo e tin cogobernante, esta, mas persona cu ta goberna hunto cu ne. Por ehempel, apostel Pablo a bisa Timoteo: “Si nos persevera, nos lo reina tambe cu ne.” (2 Timoteo 2:12) Si, Pablo, Timoteo y otro personanan fiel cu Dios a scohe, lo goberna hunto cu Hesus den e Reino celestial. Cuanto persona lo tin e privilegio ei?

9. Cuanto persona lo goberna cu Hesus, y na ki tempo Dios a cuminsa scohe nan?

⁹ Manera a bin padilanti den Capitulo 7 di e buki aki, apostel Huan a haya un vision den cua el a mira cu “e Lamchi [Hesucristo] tawata para riba Sero Sion [su posicion di rei den shelo], y hunto cu ne 144.000 cu tawatin su nomber y e nomber di su Tata skirbi na nan frenta.” Ken e 144.000 aki ta? Huan mes ta conta nos: “Esakinan ta esnan cu ta sigui e Lamchi unda cu e bai. Esakinan a wordo cumpra for di entre hende como e prome frutanan pa Dios y pa e Lamchi.” (Revelacion 14:1, 4) Si, nan ta fiel siguidonan di Hesucristo, scohi specialmente pa goberna den shelo hunto cu ne. Despues cu resusita nan for di morto pa bida den shelo, “nan lo reina riba tera” hunto cu Hesus. (Revelacion 5:10) For di tempo di e apostelnan, Dios ta scohiendo cristiannan fiel pa por completa e cantidad di 144.000.

10. Dicon e areglo pa Hesus y e 144.000 goberna riba humanidad ta un areglo amoroso?

¹⁰ E areglo pa laga Hesus y e 144.000 goberna humanidad ta algo masha amoroso. Un motibo ta cu Hesus sa kico kiermen ser hende y sufri. Papiando di Hesus, Pablo a bisa “nos no tin un sumo sacerdote cu no por compadece di nos debilidadnan, sino un cu a wordo tenta den tur cos mescos cu nos, ma toch sin pica.” (Hebreonan 4:15; 5:8) Hesus su cogobernantenan tambe a sufri y persevera como hende. Ademas, nan a lucha cu imperfeccion y mester a trata cu tur clase di enfermedad. Un cos ta sigur, nan lo compronde e problemanan cu hende ta confronta!

KICO E REINO DI DIOS LO HACI?

11. Dicon Hesus a bisa cu su disipelnan mester pidi pa Dios su boluntad sosode den shelo?

¹¹ Ora Hesus a bisa cu su disipelnan mester pidi den oracion pa e Reino di Dios bin, el a bisa tambe cu nan mester pidi pa Dios su boluntad sosode “na tera mescos cu den shelo.” Dios ta den shelo, y angelnan fiel semper a haci su boluntad einan. Sinembargo, den Capitulo 3 di e buki aki nos a siña cu un angel malbado a stop di haci Dios su boluntad y a pone Adam cu Eva peca. Den Capitulo 10, nos lo haya sa mas tocante loke Bijbel ta siña relaciona cu e angel malbado ei cu nos conoce como Satanas e Diabel. Dios a permiti Satanas y e criaturanan spiritual angelical cu a scohe pa siguie—yama demoño—keda den shelo pa un tempo. Pues, no ta tur persona den shelo tawata haci e boluntad di Dios e tempo ei. E situacion ei lo a cambia ora cu e Reino di Dios cuminsa goberna. E Rei resien entronisa, Hesucristo, lo a bringa contra Satanas.—Revelacion 12:7-9.

12. Cua dos suseso importante Revelacion 12:10 ta describi?

¹² E siguiente palabranan profetico ta describi kico lo a tuma luga: “Mi a tende un bos duro den shelo, bisando: ‘Awor e salbacion y e poder y e reino di nos Dios y e autoridad di su Cristo a yega, pasobra e acusado di nos rumannan [Satanas], cu ta acusa nan di dia y anochi dilanti di nos Dios, a wordo tira abou.’” (Revelacion 12:10) Bo a tuma nota di dos suseso masha importante cu a wordo describi den e versiculo ei di Bijbel? Na prome luga, e Reino di Dios den man di Hesucristo ta cuminsa goberna. Na di dos luga, Satanas ta ser saca for di shelo y tira abou riba tera.

13. Kico tawata e resultado di e echo cu a saca Satanas for di shelo?

¹³ Manera nos lo mira mas despues, e dos susesonan ei a tuma luga caba. Kico tawata e resultado? Relaciona cu loke a sosode den shelo, nos ta lesa: “Pa e motibo aki, regociha, o shelonan y boso cu ta biba den nan.” (Revelacion 12:12) Si, e angelnan fiel den shelo ta alegra pasobra, awor cu Satanas y su demoñonan a bai, tur persona den shelo ta fiel na Yehova Dios. Ta reina pas y harmonia completo y permanente einan. Awor Dios su boluntad ta sosode den shelo.

14. Kico a sosode pasobra a tira Satanas abou riba tera?

¹⁴ Pero kico di e tera? Bijbel ta bisa: “Ai di tera y lama, pasobra Diabel a baha bin serca boso cu gran furia, sabiendo cu ta ked’e solamente un poco tempo mas.” (Revelacion 12:12) Satanas ta rabia pasobra a sac’e for di shelo y e tin solamente un poco tempo mas. Den su rabia e ta causa gran sufrimento, of “ai”, riba tera. Den e siguiente capitulo nos lo siña mas tocante e “ai” ei. Pero cu esei na mente, nos lo por puntra: Con e Reino lo laga Dios su boluntad sosode na tera?

15. Kico ta Dios su boluntad pa e tera?

¹⁵ Wel, corda kico ta Dios su boluntad pa e tera. Bo a siña tocante esei den Capitulo 3. Den Eden, Dios a mustra cu su boluntad ta pa e tera aki ta un paradijs yena cu un rasa humano husto cu ta biba pa eternidad. Satanas a pone Adam cu Eva peca, y esei a afecta—pero no a cambia—cumplimento di Dios su boluntad pa e tera. Te ainda Yehova su proposito ta cu “e hustonan lo hereda e tera, y lo biba den dje pa semper.” (Salmo 37:29) Anto ta e Reino di Dios lo efectua esei. Den ki manera?

16, 17. Kico Daniel 2:44 ta bisa nos tocante e Reino di Dios?

¹⁶ Considera e profecia na Daniel 2:44. Einan nos ta lesa: “Den e dianan di e reinan ei e Dios di shelo lo lanta un reino cu nunca lo no wordo destrui, y e reino ei lo no pasa pa ningun otro pueblo; e lo garna y pone un fin na tur e reinonan aki, ma e mes lo dura pa semper.” Kico esaki ta bisa nos di e Reino di Dios?

¹⁷ Na prome luga, e ta bisa nos cu e Reino di Dios lo a keda estableci “den e dianan di e reinan ei”, esta, mientras cu otro reinonan tawata existi ainda. Na di dos luga, e ta bisa nos cu e Reino lo dura pa semper. Ningun otro gobierno lo conkist’e ni remplas’e. Na di tres luga, nos ta mira cu lo tin un guera entre e Reino di Dios y e reinonan di e mundo aki. E Reino di Dios lo ta esun victorioso. Al final, lo e ta e unico gobierno cu lo tin riba humanidad. E ora ei hende lo gosa di e mihor gobernacion cu nan a yega di conoce.

18. Con yama e guera decisivo entre e Reino di Dios y e gobiernonan di e mundo aki?

¹⁸ Bijbel tin hopi cos di bisa tocante e guera decisivo entre e Reino di Dios y e gobiernonan di e mundo aki. Por ehempel, Bijbel ta siña nos cu segun cu e tempo pa e guera ei ta yega serca, spiritonan malbado lo plama mentira pa gaña “e reinan di henter mundo.” Cu ki proposito? “Pa reuni nan [e reinan] pa e guera di e gran dia di Dios Todopoderoso.” E reinan di mundo lo ser reuni na “e luga cu na lenga Hebreo yama Armagedon.” (Revelacion 16:14, 16) Debi na loke e dos versiculonan ei ta bisa, e conflicto final entre gobiernonan humano y e Reino di Dios ta ser yama e guera di Armagedon.

19, 20. Kico ta stroba Dios su boluntad di sosode na tera aworaki?

¹⁹ Kico e Reino di Dios lo logra pa medio di e guera di Armagedon? Pensa un biaha mas riba kico ta Dios su boluntad pa e tera. Yehova Dios su proposito tawata pa yena e tera cu un rasa humano husto y perfecto cu lo a sirbie den Paradijs. Kico ta stroba esei di sosode aworaki? Na prome luga, nos ta pecaminoso, y nos ta bira malo y muri. Sinembargo, nos a siña den Capitulo 5 cu Hesus a muri pa nos di manera cu nos por biba pa semper. Probablemente bo ta corda e palabranan cu ta para den e Evangelio di Huan: “Dios a stima mundo asina tanto, cu el a duna su Yiu unigenito, pa ken cu kere den dje no bai perdi, ma tin bida eterno.”—Huan 3:16.

²⁰ Un otro problema ta cu hopi hende ta haci maldad. Nan ta gaña, horta y comete inmoralidad. Nan no kier haci e boluntad di Dios. Hende cu ta haci maldad lo ser destrui durante Dios su guera di Armagedon. (Salmo 37:10) Un motibo mas pakico Dios su boluntad no ta sosode na tera ta cu gobiernonan no ta anima hende pa haci Dios su boluntad. Hopi gobierno tawata debil, cruel of corupto. Bijbel ta bisa francamente: “Hende a eherce autoridad riba un otro hende pa su daño.”—Eclesiastes 8:9.

21. Con e Reino lo percura pa Dios su boluntad sosode na tera?

²¹ Despues di Armagedon, humanidad lo ta bou di un solo gobierno, e Reino di Dios. E Reino ei lo haci Dios su boluntad y trece bendicionnan maraviyoso. Por ehempel, lo e kita Satanas y su demoñonan. (Revelacion 20:1-3) E poder di Hesus su sacrificio lo keda aplica di manera cu hende fiel lo no bira malo mas y muri. Al contrario, bou di gobernacion di e Reino nan lo por biba pa semper. (Revelacion 22:1-3) Tera lo wordo transforma den un paradijs. Pues, e Reino lo percura pa Dios su boluntad sosode na tera y lo santifica Dios su nomber. Kico esaki ta nifica? E ta nifica cu bou di e Reino di Dios cu tempo tur hende na bida lo honra e nomber di Yehova.

KI DIA E REINO DI DIOS LO ACTUA?

22. Dicon nos sa cu e Reino di Dios no a bin ora cu Hesus tawata riba tera ni net despues cu el a ser resusita?

²² Ora Hesus a bisa su siguidonan pa pidi den oracion: “Cu bo reino bin”, tawata bisto cu e Reino no a bin e tempo ei. Acaso el a bin ora cu Hesus a subi na shelo? No, pasobra tanto Pedro como Pablo a bisa cu despues cu Hesus a ser resusita, e profecia na Salmo 110:1 a cumpli riba dje: “[Yehova] ta bisa mi Señor: ‘Sinta na mi man drechi, te ora mi haci bo enemigonan un banki pa bo pianan.’” (Echonan 2:32-35; Hebreonan 10:12, 13) Tawatin un periodo di espera.

23. (a) Na ki tempo e Reino di Dios a cuminsa goberna? (b) Kico nos lo considera den e siguiente capitulo?

²³ Pa cuanto tempo lo e mester a spera? Durante siglo 19, studiantenan di Bijbel sinsero a calcula cu e periodo di espera lo a termina na aña 1914. (Relaciona cu e fecha aki, wak e articulo di Apendix, “1914—Un Aña Significativo den Profecia Biblico.”) Susesonan mundial cu a cuminsa na 1914 ta confirma cu e calculacion di e studiantenan di Bijbel sinsero aki tawata corecto. Cumplimento di profecia biblico ta mustra cu na 1914, Cristo a bira Rei y Dios su Reino celestial a cuminsa goberna. Pues anto, nos ta bibando den e “poco tempo” cu a keda Satanas. (Revelacion 12:12; Salmo 110:2) Nos por bisa tambe cu siguransa cu pronto e Reino di Dios lo actua pa percura cu e boluntad di Dios ta sosode na tera. Bo ta haya esaki un noticia maraviyoso? Bo ta kere cu e ta berdad? E siguiente capitulo lo yuda bo mira cu Bijbel realmente ta siña e cosnan aki.