1-3. (a) Dicon Josue ta un bon ehempel pa nos? (b) Kico nos mester keda corda ora nos tin cu tuma decision?

“SCOGE” ta un palabra hopi importante. Ora un persona por scoge, esey ta indica cu e tin varios opcion y cu, te na cierto grado, e por controla e rumbo di su bida. Por ehempel, pensa riba un homber cu ta cana y diripiente e ta ripara cu e caminda ta split bay den dos direccion. Cua direccion lo e scoge? Si e homber tin un destinacion na mente, lo e scoge probablemente esun cu ta hib’e mas cerca di e caminda cu e kier bay, en bes di e otro cu lo hib’e mas leu for di eynan.

² Den Bijbel tin hopi ehempel di hende cu a haya nan den un situacion similar. Por ehempel, Cain tabatin cu dicidi si lo e controla su rabia of no. (Gen. 4:6, 7) Josue mester a scoge si lo e sigui sirbi e Dios berdadero of bay adora dios falso. (Jos. 24:15) Josue su meta tabata pa keda cerca di Jehova. Pues, el a scoge e caminda cu lo a hib’e den e direccion ey. Cain no tabatin e meta ey, pues el a scoge e caminda cu a aleh’e for di Jehova.

³ Tin biaha nos tambe tin cu scoge entre dos opcion. Den tal caso, corda kico ta bo destinacion of meta: Laga tur loke bo ta haci trece gloria pa Jehova y evita cualkier cos cu lo aleha bo for di dje. (Lesa Hebreonan 3:12.) Den e articulo aki y esun siguiente, nos lo analisa shete area di bida den cua nos no mester laga nada aleha nos for di Jehova.

TRABOU Y CARERA

4. Dicon ta importante pa nos traha pa nos pan di cada dia?

⁴ Cristiannan tin e obligacion di traha pa mantene nan mes y nan famia. Bijbel ta mustra cu si un hende no kier percura pa su hendenan di cas, e ta pio cu un persona sin fe. (2 Tes. 3:10; 1 Tim. 5:8) Pues, ta bisto cu trabou ta un parti importante di bida, pero si bo no tene cuidou, bo trabou y carera lo por aleha bo for di Jehova. Con asina?

5. Cua ta algun factor importante cu bo mester tene cuenta cu ne prome cu bo acepta un trabou?

⁵ Supone cu bo ta buscando trabou. Si bo ta biba den un pais caminda trabou ta scars, lo bo por sinti e tentacion pa acepta cualkier trabou cu nan ofrece bo. Pero kico si e tipo di trabou ey no ta cuadra cu principionan di Bijbel? Kico si e orario di trabou y e tempo cu bo ta tuma pa bay trabou y bin bek lo stroba bo di participa den actividadnan cristian of di pasa tempo cu bo famia? Lo bo mester tuma e trabou toch, pensando cu maske e no ta cumbini bo, e ta mihor cu nada? No lubida cu si bo scoge e caminda robes, esey por aleha bo for di Jehova. (Heb. 2:1) Sea cu bo ta buscando trabou of bo tin pensa di cambia di trabou, con bo por tuma un decision sabi?

6, 7. (a) Cu ki meta un persona lo por acepta un trabou? (b) Ki meta lo hiba bo mas cerca di Jehova, y dicon?

⁶ Manera nos a menciona anteriormente, semper corda kico ta bo destinacion of meta. Puntra bo mes: ‘Kico mi kier logra cu mi trabou of carera?’ Si bo ta considera bo trabou simplemente como un medio pa logra un meta, esta, pa mantene bo mes y bo famia den Jehova su sirbishi, Jehova lo bendiciona bo esfuerso. (Mat. 6:33) Jehova lo no keda tolondra, sin sa kico pa haci, si bo mester perde trabou of si diripiente e situacion economico bira malo. (Isa. 59:1) Bijbel ta bisa cu e “sa con pa libra hende devoto na dje for di prueba.”—2 Ped. 2:9.

⁷ Di otro banda, kico si bo ta traha cu e meta pa bira rico? Kisas lo bo logra esey. Pero hasta si bo logra, no lubida cu lo bo tin cu paga caro pa e “exito” ey; e tin un prijs cu bo no por afford. (Lesa 1 Timoteo 6:9, 10.) Si rikesa y trabou ta e cos di mas importante den bo bida, lo bo logra un cos so: aleha bo mes for di Jehova.

8, 9. Kico mayornan mester puntra nan mes relaciona cu nan trabou of carera? Splica dicon.

⁸ Si bo ta un mayor, pensa riba e efecto cu bo ehempel lo tin riba bo yiunan. Kico nan ta mira cu ta e cos di mas importante pa bo? Bo carera of bo amistad cu Jehova? Si nan ta mira cu loke ta bin na prome luga den bo bida ta posicion, prestigio y rikesa, bo no ta kere cu nan lo imita bo y sigui e caminda desastroso ey? Of cu nan lo por perde respet pa bo como mayor? Un mucha muher cristian a bisa: “Te asina leu cu mi ta corda, semper mi tata tabata hopi ocupa cu su trabou. Na principio, a parce cu e tabata traha duro pasobra e tabata kier pa nos famia tin lo mihor. E tabata kier pa nos ta bon cuida. Pero den e ultimo añanan algo a cambia. Ta traha so e ta traha, anto ta cumpra cos di luho en bes di cos cu ta necesario. Como resultado, nos ta conoci como e famia cu tin hopi placa y no como e famia cu ta anima otronan pa alcansa metanan spiritual. Lo mi a prefera mil biaha cu mi tata tabata duna mi apoyo spiritual en bes di placa.”

⁹ Mayornan, no pone demasiado enfasis riba boso carera y asina aleha boso mes for di Jehova. Sea un ehempel pa boso yiunan. Mustra nan cu boso di berdad ta kere cu e rikesa di mas grandi cu nos por tin ta rikesa spiritual, esta, un bon relacion cu Jehova, y no placa of cos material.—Mat. 5:3.

10. Riba kico un hoben mester pensa prome cu e scoge un carera of e tipo di trabou cu lo e bay haci?

¹⁰ Si bo ta un hoben cu ta pensando riba un carera of e tipo di trabou cu lo bo kier haci ora bo bira grandi, con bo por scoge e caminda corecto? Manera nos a considera caba, bo tin cu sa prome kico bo kier haci cu bo bida. E estudio y trabou cu bo kier scoge lo duna bo oportunidad pa participa mas plenamente den actividadnan di Reino, of lo e aleha bo for di Jehova? (2 Tim. 4:10) Bo meta ta pa imita e estilo di bida di e hendenan di mundo kende nan felicidad ta depende di e cantidad di placa cu nan tin na banco of di e situacion di e mercado financiero? Of lo bo scoge pa imita e confianza cu David tabatin den Jehova? David a skirbi: “Mi tabata jong, y awor mi ta bieu; ma nunca mi no a mira e husto desampara, ni su descendientenan ta pidi pan.” (Sal. 37:25) Corda: Un caminda lo aleha bo for di Jehova, mientras cu e otro lo hiba bo na e mihor bida cu lo bo por tin. (Lesa Proverbionan 10:22; Malakias 3:10.) Cua lo bo scoge?a

RECREO Y DIBERTICION

11. Kico Bijbel ta reconoce tocante recreo y diberticion, pero kico nos mester keda corda?

¹¹ Bijbel no ta contra pa hende diberti, ni e no ta bisa cu recreo y diberticion ta perdemento di tempo. Pablo a bisa Timoteo: “Entrenamento fisico ta yuda cu algo.” (1 Tim. 4:8) Bijbel ta hasta bisa cu tin “un tempo pa hari” y “un tempo pa balia”, y e ta anima hende pa pone suficiente tempo pa sosega. (Ecl. 3:4; 4:6) Pero si bo no tene cuidou, recreo y diberticion por aleha bo for di Jehova. Con asina? E peliger ta depende principalmente di dos aspecto: Ki tipo di recreo y diberticion bo ta scoge y cuanto tempo bo ta dedica na nan.

12. Ki factornan bo mester tene cuenta cu ne relaciona cu e tipo di recreo y diberticion cu bo ta scoge?

¹² Prome, laga nos analisa e tipo di recreo y diberticion cu nos mester scoge. Un cos ta sigur, bo por haya formanan sano di recreo y diberticion. Pero ta berdad tambe cu gran parti di loke ta disponibel den mundo ta glorifica cosnan cu Dios ta odia, entre otro, violencia, spiritismo y relacion sexual inmoral. Pues, bo tin cu tene cuidou ki tipo di recreo y diberticion bo ta scoge. Pensa riba e preguntanan aki: Ki efecto e tin riba mi? E ta stimula un spirito violento, competitivo of nacionalista? (Prov. 3:31) E ta costa mi mucho placa? E por pone hende trompica? (Rom. 14:21) Cu ki tipo di hende e ta pone mi anda? (Prov. 13:20) E ta duna mi gana di haci malo?—Sant. 1:14, 15.

13, 14. Kico bo mester tene cuenta cu ne relaciona cu e cantidad di tempo cu bo ta dedica na actividadnan di recreo?

¹³ Pensa tambe riba e cantidad di tempo cu bo ta dedica na recreo y diberticion. Puntra bo mes: ‘Mi ta dedica asina tanto tempo na actividadnan di recreo cu casi mi no ta resta tempo pa actividadnan spiritual?’ Si bo ta dedica mucho tempo na recreo y diberticion, lo bo ripara cu toch bo no ta disfruta dje tanto ey di nan manera mester ta. En realidad, hende cu ta tene diberticion na e debido luga ta disfruta mas di dje. Dicon? Pasobra nan sa cu nan a atende “e cosnan mas importante” prome, pues nan no tin nodo di sinti nan culpabel ora nan ta diberti.—Lesa Filipensenan 1:10, 11.

¹⁴ Aunke ta parce dushi si bo por dedica hopi tempo na actividadnan di recreo, e caminda ey lo por aleha bo for di Jehova. Kim, un ruman muher di 20 aña, a siña esey di experencia. El a conta con e tabata bay tur fiesta cu tin. Tur weekend tabatin un cos special: diabierna, diasabra y diadomingo. Pero awor e ta mira cu tin asina tanto cos di haci cu ta hopi mas importante. E di: “Por ehempel, como pionero, mi ta lanta 6 or di mainta pa bay sirbishi di veld, pues mi no por keda cerca mi amigonan te 1 or of 2 or di marduga. Mi sa cu no ta tur actividad social ta malo, pero nan por kita tur bo atencion for di loke ta mas importante. Mescos cu tur otro cos, mester tene nan na e debido luga.”

15. Con mayornan por yuda nan yiunan disfruta di recreo refrescante?

¹⁵ Mayornan tin e responsabilidad di percura pa nan mes y pa nan yiunan den sentido material, spiritual y emocional. Esey ta encera percura pa nan por distrai nan mente. Si bo ta un mayor, no sea un aguafiestas cu ta considera tur recreo como algo malo. Pero na mes momento, bo tin cu keda alerta pa influencianan perhudicial. (1 Cor. 5:6) Cu bon planeamento, bo por haya recreo y diberticion cu di berdad ta refresca bo famia.b Di e manera ey, abo cu bo yiunan lo scoge e caminda cu lo hiba boso mas cerca di Jehova.

RELACION DI FAMIA

16, 17. Ki situacion doloroso hopi mayor ta enfrenta, y dicon nos sa cu Jehova ta compronde nan dolor?

¹⁶ E laso entre mayor y yiu ta asina fuerte cu Jehova ta uza e relacion ey pa ilustra e amor cu e tin pa su pueblo. (Isa. 49:15) Pues, ta normal pa sinti un tristeza profundo ora un miembro di famia bandona Jehova. Un ruman muher, kende su yiu muher a ser expulsa, a conta: “Mi a keda hopi kibra. Mi tabata blo puntra mi mes, ‘Dicon el a bandona Jehova?’ Mi tabata sinti cu ta mi culpa.”

¹⁷ Si bo ta pasando den un situacion asina, Jehova ta compronde bo dolor. E mes tambe “tabata tristo den su curason” ora cu e prome miembro di su famia humano, y despues mayoria di hende cu a biba prome cu Diluvio, a rebela contra dje. (Gen. 6:5, 6) Kisas ta dificil pa un hende cu nunca a pasa den e situacion ey compronde ki teribel esey por ta. Sinembargo, lo no ta sabi pa laga e mal conducta di un miembro di famia expulsa pone abo aleha for di Jehova. Pues, con bo por persevera a pesar di e tristeza profundo cu bo ta sinti ora un miembro di famia bandona Jehova?

18. Dicon mayornan no mester culpa nan mes ora un yiu bandona Jehova?

¹⁸ No culpa bo mes pa loke a pasa. Jehova a pone dilanti di cada persona e opcion di scoge, di tuma nan propio decision, y cada miembro di famia dedica y batisa tin cu “carga su propio carga di responsabilidad.” (Gal. 6:5) Na final di cuenta, Jehova ta tene e pecador—no abo—responsabel pa loke el a scoge. (Eze. 18:20) No culpa otro hende tampoco. Respeta e manera cu Jehova ta disciplina su pueblo. Tuma bo posicion contra Diabel, no contra e wardadornan cu ta tuma medida pa proteha e congregacion.—1 Ped. 5:8, 9.

19, 20. (a) Con mayornan di yiunan expulsa por trata cu nan tristeza? (b) Ki speransa e mayornan ey por carga?

¹⁹ Di otro banda, kico lo pasa si bo rabia cu Jehova pa loke a pasa cu bo yiu? Esey lo aleha bo for di Jehova. Pero loke en realidad bo ser keri mester mira ta cu bo ta firmemente determina pa pone Jehova prome cu tur cos, incluso prome cu laso di famia. Pues pa trata cu e situacion, percura pa conserva bo spiritualidad. No isola bo mes for di bo fiel rumannan cristian. (Prov. 18:1) Desahoga bo mes cu Jehova den oracion. (Sal. 62:7, 8) No busca excuus pa asocia cu un miembro di famia expulsa, por ehempel, via sms, telefon of e-mail. (1 Cor. 5:11) Keda ocupa cu actividadnan spiritual. (1 Cor. 15:58) E ruman muher cita anteriormente a bisa: “Mi sa cu mi mester keda ocupa den e sirbishi di Jehova y mantene mi mes spiritualmente fuerte, ya ora mi yiu muher bin bek cerca Jehova lo mi ta den e posicion pa yud’e.”

²⁰ Bijbel ta bisa cu amor ta “spera tur cos.” (1 Cor. 13:4, 7) Pues, no tin nada malo den carga speransa cu bo ser keri lo bin bek cerca Jehova. Tur aña, hopi persona expulsa ta arepenti y bin bek na Jehova su organisacion. Jehova no ta keda rabia cu nan despues cu nan arepenti. Al contrario, e ta “cla pa pordona.”—Sal. 86:5.

SCOGE SABI

21, 22. Con lo bo uza bo libertad di scoge?

²¹ Jehova a crea hende cu libertad di scoge, esta, cu boluntad liber. (Lesa Deuteronomio 30:19, 20.) Pero e libertad ey ta nifica cu nos tin un responsabilidad serio. Cada cristian mester puntra su mes: ‘Riba cua caminda mi ta? Mi a laga trabou y carera, recreo y diberticion of laso di famia aleha mi for di Jehova?’

²² Jehova nunca ta stop di stima su pueblo. E unico cos cu lo por aleha nos for di Jehova ta si nos scoge pa sigui un mal caminda. (Rom. 8:38, 39) Pero esey no tin nodi sosode! Sea determina pa no laga nada aleha bo for di Jehova. E siguiente articulo lo trata cuater area di bida mas den cua bo por demostra e determinacion ey.

1, 2. (a) Ki ‘triki’ Satanas ta uza? (b) Kico lo yuda nos hala cerca Dios?

JEHOVA DIOS a crea hende cu e necesidad di tin un amistad intimo cu ne. Pero Satanas kier pa nos pensa mescos cu e ta pensa, esta, cu nos no tin mester di Jehova. Esey ta un mentira cu Satanas a uza for di tempo cu el a gaña Eva den hofi di Eden. (Gen. 3:4-6) A traves di historia, gran parti di humanidad a comete e mesun fayo cu Eva y ta pensa cu nan no tin mester di Dios.

² Felizmente, nos no tin nodo di cay den e trampa ey di Satanas, ya cu “su trikinan no ta desconoci pa nos.” (2 Cor. 2:11) Satanas ta purba di pone nos tuma mal decision cu lo aleha nos for di Jehova. Pero manera e articulo anterior a mustra, nos por haci e escogencia corecto pa loke ta trata trabou, recreo y asuntonan di famia. Den e articulo aki nos lo bay mira cu si nos tene tecnologia, salud, placa y orguyo na e debido luga, nos lo “hala cerca Dios.”—Sant. 4:8.

TECNOLOGIA

3. Duna algun ehempel cu ta mustra con hende por uza tecnologia pa haci loke ta bon of loke ta malo.

³ Rond mundo, computer y otro aparatonan electronico sofistica a bira parti di bida diario. Si nos uza nan na e manera corecto, nan por ta hermentnan util. Si nos haci mal uzo di nan, nan por stroba nos relacion cu nos Tata celestial. Laga nos tuma por ehempel computer. Ta cu yudansa di computer a skirbi y publica e revista cu bo ta lesando aki. Un computer por ta un herment util pa haci investigacion y pa comunicacion, y tin biaha, hasta pa diberticion refrescante. Pero nos por bira obsesiona tambe cu tecnologia di computer. Propagandanan ingenioso ta convence hende cu nan mester tin e model di mas nobo. Un mucha homber tabatin asina tanto gana di haya un cierto marca di tablet cu sin bisa ningun hende nada el a bay bende un di su niernan pa e por a cumpr’e! Bo no ta haya ta tristo?

4. Kico un ruman a haci pa e por a stop di dedica demasiado tempo na computer?

⁴ Ta mas tristo ainda si nos sacrifica nos amistad intimo cu Jehova pa motibo di tecnologia, sea pasobra nos ta dedica demasiado tempo na dje of ta haci mal uzo di dje. Jon,a un ruman homber di casi 30 aña di edad, a bisa: “Mi sa cu Bijbel ta bisa cu nos mester ‘cumpra e tempo stipula’ pa asuntonan spiritual. Pero ora ta trata di computer, ta mi mes ta mi pio enemigo.” Hopi biaha Jon tabata keda te anochi laat riba Internet. El a sigui conta: “Mas cansa mi tabata, mas duro tabata pa mi stop di chat of di wak videonan cortico, tin biaha video cu no tabata ni sano.” Pa Jon por a kibra cu e mal custumber aki, el a programa su computer pa paga di su mes na momento cu tabata ora pa e bay drumi.—Lesa Efesionan 5:15, 16.

5, 6. (a) Ki responsabilidad mayornan tin pa cu nan yiunan? (b) Con mayornan por haci sigur cu nan yiunan tin bon asociacion?

⁵ Mayornan, boso no tin nodo di controla delaster un cos cu boso yiunan ta haci, pero loke si boso tin cu supervisa ta nan uzo di computer. No laga nan pa nan cuenta te cu nan por subi websitenan caminda tin inmoralidad, video game violento, spiritismo y mal asociacion, djis pa tene nan ocupa, ya nan no ta molestia boso. Si boso haci esey, boso yiunan lo por pensa: ‘Ata Papi cu Mami no ta worry, kiermen no tin nada malo den esaki.’ Como mayor, boso tin e responsabilidad di proteha boso yiunan—incluso esnan teenager—contra cualkier cos cu lo por aleha nan for di Jehova. Hasta bestia ta proteha nan yiunan contra peliger. Djis imagina kico un mama beer lo haci si un hende ta forma un menasa pa su yiunan!—Compara cu Oseas 13:8.

⁶ Yuda boso yiunan busca asociacion cu otro rumannan cristian ehemplar di tur edad. Y no lubida cu e cos cu mas boso yiunan tin mester di dje ta di pasa tempo cu boso! Pues, traha tempo pa hari, hunga, traha y “hala cerca Dios” hunto cu boso yiunan.b

SALUD

7. Dicon nos tur kier tin un bon salud?

⁷ “Con ta bay cu e salud?” E pregunta comun ey ta refleha un realidad tristo: Nos tur ta bira malo, ya cu nos prome mayornan a permiti Satanas aleha nan for di Jehova. Maleza ta sirbi e proposito di Satanas, pasobra ora nos ta malo, ta mas dificil pa nos sirbi Jehova. Anto si nos muri, nos no por sirbie mes. (Sal. 115:17) Ta natural anto cu nos kier haci loke nos por pa por tin un bon salud.c Ademas, nos mester ta interesa den e salud y bienestar di nos rumannan.

8, 9. (a) Con nos por evita di bay den extremo den asuntonan di salud? (b) Kico ta e beneficionan di cultiva goso?

⁸ Pero ta importante pa nos evita di bay den extremo. Tin ruman ta promove cierto dieta, tratamento pa salud of producto di beyesa cu masha entusiasmo mes, hasta cu mas entusiasmo cu nan ta predica e bon noticia di e Reino di Dios. Podise nan ta kere sinceramente cu nan ta yudando otro hende. Hasta si ta asina, no ta apropia pa nos promove producto- of tratamentonan pa salud of di beyesa prome of despues di reunion na Salon di Reino, asamblea of congreso. Dicon no?

⁹ Pasobra nos ta reuni hunto pa considera asuntonan spiritual y pa haya mas goso, cu ta fruta di Dios su spirito santo. (Gal. 5:22) Si nos ta uza ocasionnan asina pa ofrece conseho y producto pa salud—sea cu hende a pidi nos of no—esey por stroba nos di enfoca riba e proposito spiritual di e reunion y pone otro ruman perde nan goso. (Rom. 14:17) Ta keda na cada hende pa dicidi con e ta atende su asuntonan di salud. Ademas, ningun hende no tin un cura pa tur maleza. Hasta e mihor dokternan ta bira bieu, bira malo y cu tempo ta muri. Y demasiado preocupacion cu salud no ta hiba na un bida mas largo. (Luc. 12:25) Di otro banda, Bijbel ta bisa cu “un curason contento ta un bon remedi.”—Prov. 17:22.

10. (a) Kico ta haci un hende bunita den bista di Jehova? (b) Na ki tempo nos lo ta completamente bon di salud?

¹⁰ Asina tambe, ta na su luga pa nos ta interesa den nos apariencia. Pero nos no tin nodo di haci cosnan extremo pa elimina tur señal di biehes. E señalnan ey por ta prueba di madurez, dignidad y beyesa interno. Por ehempel, Bijbel ta bisa cu “cabey blanco ta un corona di gloria; den e caminda di husticia e ta wordo haya.” (Prov. 16:31) Asina Jehova ta mira nos, y nos mester purba di mira nos mes manera e ta mira nos. (Lesa 1 Pedro 3:3, 4.) En bista di esey, lo ta sabi pa nos risca haci un operacion of tratamento medico innecesario y kisas peligroso djis pa haci nos mes fisicamente mas atractivo? No ta importa cuanto aña nos tin of con bon nos salud ta; ta ‘e goso di Jehova’ ta e fuente di berdadero beyesa cu ta briya sali for di e persona cu nos ta di paden. (Neh. 8:10) Ta te den e mundo nobo nos lo ta completamente bon di salud y nos lo recobra nos beyesa di hubentud. (Job 33:25; Isa. 33:24) Mientrastanto, nos tin cu tuma decision sabi y demostra fe den e promesanan di Jehova. Esaki lo yuda nos keda cerca di Jehova y disfruta di nos bida actual te caminda nos circunstancianan ta permiti.—1 Tim. 4:8.

PLACA

11. Con placa por bira un trampa?

¹¹ Placa no ta malo riba su mes, y no tin nada malo den haci negoshi honesto. (Ecl. 7:12; Luc. 19:12, 13) Pero si nos cultiva un “amor pa placa”, tardi of trempan esey lo aleha nos for di Jehova. (1 Tim. 6:9, 10) “E inkietud di e era aki”, esta, demasiado preocupacion pa cubri e necesidadnan di bida, por stik nos spiritualmente. Mescos ta e caso cu “e poder engañoso di rikesa”, esta, e idea incorecto cu rikesa ta trece felicidad y siguridad duradero. (Mat. 13:22) Hesus a splica bon cla cu “ningun hende” no por tin exito si e kier sirbi Dios y rikesa pareu.—Mat. 6:24.

12. Cua ta algun trampa financiero cu ta comun awe, y con nos por evita nan?

¹² Un punto di bista robes di placa por pone nos haci cos robes. (Prov. 28:20) E speransa di gana placa lihe y facil a pone algun ruman cay den e tentacion di cumpra catochi of briyechi. Otronan ta participa den negoshinan estilo di piramid (yama multilevel marketing) cu supuestamente ta laga nan gana hopi placa den corto tempo, y hasta nan ta priminti otro miembronan di congregacion cu nan tambe por gana hopi placa di e manera ey. Tin ruman a laga hende engaña nan cu ofertanan irealista cu a priminti ganashi exorbitante riba nan inversion. No laga golosidad pone hende estafa bo. Uza sano huicio. Si un oferta ta parce mucho bon pa ta berdad, probablemente ta asina mes e ta.

13. Con Jehova su punto di bista di placa ta diferente for di mundo su punto di bista di placa?

¹³ Ora nos ta pone “e Reino y e husticia di Dios” prome, Jehova ta bendiciona nos si nos ta traha di un manera balansa pa haya e necesidadnan di bida. (Mat. 6:33; Efe. 4:28) E no kier pa nos pega soño durante reunion pasobra nos ta traha mucho duro ni sinta preocupa tocante placa den Salon di Reino. Sinembargo, hopi hende den mundo ta kere cu solamente si nan dedica nan mes na gana placa, nan lo por tin un futuro sigur y un bida mas trankil despues. Hopi biaha nan ta pone presion riba nan yiunan pa nan tin e mesun meta materialista ey. Hesus a mustra cu e manera di pensa ey no ta rasonabel. (Lesa Lucas 12:15-21.) Esaki kisas ta pone nos corda riba Gehazi, kende a pensa cu e por a satisface su ambicion pa cos material y na mes momento conserva su amistad cu Jehova.—2 Rey. 5:20-27.

14, 15. Dicon nos no mester pone confianza den e sistema financiero di e mundo aki pa siguridad? Duna un ehempel.

¹⁴ Hende a yega di mira aguila hoga pasobra nan a coge pisca mucho pisa pa nan bula bay cu ne, pero toch no kier a laga e pisca los for di nan gara. Acaso algo similar lo por pasa cu un cristian? Un anciano cu yama Alex a splica kico a pasa cu ne. El a conta cu normalmente e ta un persona masha economico y prudente cu su placa. “Si mi basha mucho shampoo den mi man, mi tabata pone un poco bek den e boter.” Sinembargo, Alex a pensa cu si e gana un poco placa riba e bolsa di balor, lo e por kita for di trabou y bay traha pionero. Pues, el a cuminsa studia e ofertanan y noticianan di e mercado di balor y a envolve su mes completamente den esey. El a uza tur e placa cu e tabatin gespaar, y hasta a fia placa cerca intermediarionan, pa cumpra accionnan cu segun analistanan lo a subi rapidamente di balor. Pero kico a sosode? Tur e accionnan ey a perde nan balor drasticamente. Alex a sigui conta: “Mi tabata determina pa haya mi placa bek. Mi a pensa cu si mi djis warda un poco mas, e accionnan lo a bolbe subi di balor.”

¹⁵ Pa lunanan largo, Alex no por a pensa riba nada otro. E tabatin problema pa concentra riba asuntonan spiritual, y e no por a drumi bon. Pero, balor di e accionnan no a subi mas. Alex a perde tur su placa, y e mester a bende su cas. El a admiti: “Mi a causa mi famia hopi dolor.” Pero el a siña un les importante: “Awor mi sa cu ken cu pone confianza den e sistema di Satanas lo keda sumamente decepciona.” (Prov. 11:28) Esaki ta berdad, pasobra si nos pone confianza den e placa cu nos a spaar, den nos inversionnan of den nos habilidad di gana placa den e sistema aki, esey ta mescos cu pone nos confianza den “e dios di e mundo aki”, Satanas. (2 Cor. 4:4; 1 Tim. 6:17) Entretanto, Alex a simplifica su bida “pa motibo di e bon noticia” di e Reino. E ta bisa cu esey a haci tanto e como su famia mas feliz y a hala nan mas cerca di Jehova.—Lesa Marco 10:29, 30.

ORGUYO

16. Kico ta e diferencia entre orguyo cu ta bon y orguyo cu ta malo?

¹⁶ Tin cos cu ta bon pa nos ta orguyoso di dje. Por ehempel, semper nos mester ta orguyoso di ta un Testigo di Jehova. (Jer. 9:24) Un grado sano di autoestima, of balor propio, ta yuda nos tuma bon decision y ta evita cu nos ta baha nos normanan moral. Pero si nos ta duna demasiado balor na nos propio punto di bista of na nos posicion, esey por aleha nos for di Jehova.—Sal. 138:6; Rom. 12:3.

17, 18. (a) Menciona algun ehempel biblico di personanan humilde y di personanan orguyoso. (b) Kico un ruman homber a haci pa no laga orguyo aleh’e for di Jehova?

¹⁷ Bijbel ta conta nos di personanan orguyoso y tambe di personanan humilde. Rey David a busca e guia di Jehova cu un actitud humilde, y Jehova a bendicion’e. (Sal. 131:1-3) Pero Jehova a humilia Rey Nabucodonosor y Rey Belsasar pasobra nan tabata orguyoso. (Dan. 4:30-37; 5:22-30) Awe tambe por surgi situacionnan cu ta pone nos humildad na prueba. Por ehempel, Ryan, un sirbidor ministerial di 32 aña, a muda pa un congregacion nobo. Ryan a conta: “Mi a spera cu den poco tempo nan lo a recomenda mi como anciano, pero un aña a pasa y nada no a sosode.” Con Ryan a reacciona? Acaso el a rabia, bira amarga, pensando cu e ancianonan no a mustr’e e debido respet? El a stop di bay reunion, y laga orguyo aleh’e for di Jehova y Su pueblo? Kico abo lo a haci?

¹⁸ Ryan a sigui conta: “Mi a lesa tur loke mi por a haya den nos publicacionnan tocante speransa cu no ser realisa.” (Prov. 13:12) “Mi a ripara cu mi mester a siña cultiva pasenshi y humildad. Mi mester a laga Jehova entrena mi.” Ryan a stop di pensa riba su mes y a cuminsa concentra riba sirbi otro hende, tanto den congregacion como den sirbishi di veld. Den poco tempo e tabata dirigi varios estudio di Bijbel progresivo. El a bisa: “Ora m’a ser nombra como anciano un aña y mei despues, esey tabata un sorpresa pa mi. Mi tabata disfruta asina tanto di sirbishi cu mi a stop di preocupa tocante e asunto ey.”—Lesa Salmo 37:3, 4.

KEDA CERCA DI JEHOVA

19, 20. (a) Con nos por haci sigur cu ningun di nos actividadnan di bida diario ta aleha nos for di Jehova? (b) Menciona algun ehempel cu nos por imita di personanan cu a keda cerca di Jehova.

¹⁹ Tur e asuntonan cu nos a trata den e articulo aki y esun anterior tin nan debido luga den nos bida. Nos ta orguyoso di por ta sirbidor di Jehova. Un famia feliz y bon di salud ta entre e regalonan di mas grandi cu nos a haya cerca Jehova. Nos ta compronde cu nos trabou y placa ta yuda nos cubri nos necesidadnan. Nos sa cu recreo por refresca nos y cu tecnologia por ta util. Pero si nos ta ocupa nos mes cu e cosnan aki na e momento robes, na un grado exagera of ta laga nan stroba nos den nos adoracion, nos ta core e peliger di aleha for di Jehova.

²⁰ Claro cu ta esey ta loke Satanas lo kier pa pasa cu bo. Pero bo por evita e calamidad ey tanto pa bo mes como pa bo famia! (Prov. 22:3) Hala cerca Jehova, y keda cerca di dje. Nos tin hopi ehempel den Bijbel di personanan cu a haci esey. Enok y Noe a “cana cu Dios.” (Gen. 5:22; 6:9) Moises “a sigui firme comosifuera el a mira Esun cu ta invisibel.” (Heb. 11:27) Hesus tabatin e apoyo continuo di Dios, pasobra semper el a haci loke tabata agrada su Tata celestial. (Juan 8:29) Imita e ehempelnan ey. “Sea semper contento. Haci oracion constantemente. Gradici Dios pa tur cos.” (1 Tes. 5:16-18) Y no laga nada aleha bo for di Jehova!