“Su Cualidadnan Invisibel ... Ta Ser Mira Bon Cla”

Bo ta kere den Dios? Si esey ta e caso, bo por proba cu e ta existi? Wel, tur rond di nos tin evidencia cu tin un Creador sabi, poderoso y amoroso. Kico ta duna prueba di esey? Nan ta convencente? Pa nos haya contesta, laga nos wak kico apostel Pablo a skirbi den su carta na e cristiannan na Roma.

Pablo a bisa: “[Dios] su cualidadnan invisibel, esta, su poder eterno y Divinidad, ta ser mira bon cla for di creacion di mundo padilanti, ya cu nan ta bisto den e cosnan traha, di manera cu e hendenan ey no tin excuus.” (Romanonan 1:20) Manera Pablo a mustra, creacion ta duna prueba cu mester tin un Creador. Awor, laga nos analisa e palabranan di Pablo un poco mas.

Segun Pablo, Dios su cualidadnan por ser mira “for di creacion di mundo padilanti.” Den e contexto aki, e palabra Griego traduci como “mundo” no ta referi na planeta Tera. Mas bien, e ta referi na humanidad.a Pesey, Pablo a mustra cu for di e momento cu Dios a crea hende, nan por a mira Dios su cualidadnan den creacion.

Nos tin evidencia di esey tur rond di nos. Esaki no ta algo scondi den naturaleza, sino ta algo cu por “ser mira bon cla.” For di e cos di mas chikito te na e cos di mas grandi, creacion ta duna prueba no solamente cu ta existi un Creador pero tambe cu e tin cualidadnan maraviyoso. E diseño cu nos ta mira den naturaleza no ta indica cu e ta un Dios sabi? E cielo yen di strea y e olanan grandi cu ta dal contra baranca no ta duna prueba cu Dios ta poderoso? E variedad di cuminda delicioso cu nos ta disfruta di dje y e impresionante subida of bahada di solo no ta mustra cu Dios ta stima hende?—Salmo 104:24; Isaias 40:26.

E evidencia ta asina cla cu esnan cu no ta mir’e y cu no kier kere den Dios “no tin excuus.” Un comentarista di Bijbel a uza e siguiente ilustracion: Imagina bo un chauffeur ta topa un borchi di trafico cu ta bisa: “Cambio di Ruta—Bay Links”, pero e no ta haci caso di esaki. Un polis ta par’e y ta dun’e un boet. E chauffeur ta bisa e polis cu e no a mira e borchi. Pero e no ta convence e polis, pasobra tur hende por mira e borchi bon cla y e chauffeur no tin problema cu su bista. Ademas, ta e chauffeur tin e responsabilidad di wak borchi y di sigui nan instruccion. Asina tambe, e cosnan cu nos ta mira den naturaleza ta duna prueba cu Dios ta existi. E prueba ta bon cla. Como sernan inteligente, nos tur por mira esakinan. Pues, nos no tin ningun excuus pa ignora nan.

Si, creacion ta siña nos masha hopi cos tocante nos Creador. Pero tin un buki, esta, Bijbel cu ta siña nos hopi mas cos tocante e Creador. Cu yudansa di Bijbel, nos por haya contesta riba e pregunta importante aki: Kico ta Dios su proposito pa e tera y pa su habitantenan? E contesta riba e pregunta ey por yuda nos hala mas cerca Dios, kende “su cualidadnan invisibel ... ta ser mira bon cla” den tur cos rond di nos.