Nan A Para Firme Durante “Prueba”

ORA Prome Guera Mundial a cuminsa na aña 1914, hopi hende a realisa cu e Studiantenan di Bijbel no ta participa den guera. (Isa. 2:2-4; Juan 18:36; Efe. 6:12) Con a bay cu sirbidornan di Dios na Gran Britania?

Na aña 1916, Gran Britania a pasa un ley cu ta obliga tur hende homber soltero entre 18 y 40 aña di edad pa bay guera. E ley aki a duna dispensacion solamente na esnan cu no kier a bay guera pa motibo di “religion of principionan moral.” Anto e gobierno a establece tribunalnan pa determina ken lo a haya dispensacion y te na ki grado nan lo a haya esey.

No obstante, no a dura masha cu un 40 Studiante di Bijbel a ser encarcela den prizon militar, y 8 a ser manda campo di bataya na Francia. E acto inhusto aki a pone cu e rumannan na Gran Britania a manda un carta di protesta pa Prome Minister Herbert Asquith; hunto cu e carta, nan a manda un carta di peticion cu 5.500 persona a firma.

Despues, e rumannan a haya sa cu e 8 Studiantenan di Bijbel na Francia a ser sentencia na morto pasobra nan a nenga di bringa den guera. Pero ora nan tabata para den fila pa ser tira, autoridadnan a cambia nan sentencia pa dies aña di prizon. Nan a manda nan Inglatera bek pa sinta nan castigo den un prizon civil.

Segun cu e guera a sigui, nan a exigi pa hombernan casa tambe bay guera. Den un caso experimental na Manchester, Inglatera, e acusado tabata Henry Hudson, un dokter y Studiante di Bijbel. Dia 3 di augustus 1916, corte a mustra cu Hudson a falta cu ley, a dun’e un boet y a entreg’e na e militarnan. Na mes momento, nan a entama un caso similar contra James Frederick Scott, un colporteur (pionero) di 25 aña di edad na Edinburgh, Escocia. Pero el a ser declara inocente. Ministerio publico a apela e sentencia, pero despues nan a legomay e caso ey pa atende un otro caso similar na London. Esey tabata e caso contra nos ruman Herbert Kipps. Pero e si nan a declara culpabel; el a haya un boet y a ser entrega na e militarnan.

Pa september di aña 1916, un total di 264 ruman a pidi dispensacion di servicio militar. Solamente 5 di nan a haya dispensacion, mientras cu 154 a ser obliga pa haci trabou duro manera construccion di caminda, 23 a haya tarea militar cu no a encera participa den guera y 82 a ser entrega na e cuerpo militar di cua algun a ser husga y encarcela. Pero hopi hende a protesta contra e trato cruel cu e hombernan aki tabata haya den prizon. Y esey a pone cu gobierno a transferi nan di prizon militar pa campo civil, unda nan mester a traha.

Edgar Clay y Pryce Hughes, kendenan a sirbi despues como superintendente di sucursal, mester a traha riba un dam na Wales. Herbert Senior, un di e ocho rumannan cu a bin bek for di Francia, a ser manda e prizon di Wakefield na Yorkshire. Otronan a sinta nan castigo den prizon di Dartmoor, unda nan mester a traha duro den condicionnan masha dificil. Eynan, e Studiantenan di Bijbel tabata e grupo di mas grandi di hende cu a nenga di drenta servicio militar pa motibo di nan consenshi.

Frank Platt, un Studiante di Bijbel cu a bay di acuerdo pa haci tarea cu no tabatin di haber cu bringamento, a ser persigui cruelmente pa hopi tempo pa motibo cu el a nenga di bringa ora nan a mand’e bay guera. Pa e mesun motibo, Atkinson Padgett, kende a haya e berdad poco despues cu el a drenta servicio militar, a ser maltrata severamente na man di oficialnan militar.

Aunke e tempo ey nos rumannan no tabata compronde bon kico neutralidad cristian a encera, nan a haci nan best pa agrada Jehova Dios. Esnan menciona den e relato aki a pone un excelente ehempel di neutralidad durante “e ora di prueba” masha dificil cu nan a pasa den. (Rev. 3:10)​—For di nos archivo na Gran Britania.