El A Yega Net na Ora y Tabata “Inolvidabel”

“INOLVIDABEL!” Asina hopi hende a describi e “Drama di Creacion.” El a yega net na ora y a haci un impacto grandi riba hende cu a wak e. Si, e “Drama di Creacion” a duna gloria na Jehova y un gran testimonio un poco prome cu Hitler a cuminsa su persecucion feroz contra Testigonan di Jehova na Europa. Pero kico e “Drama di Creacion” tabata?

Na 1914, e sede mundial di Testigonan di Jehova na Brooklyn, New York, Merca, a presenta un “Foto-Drama di Creacion.” E tabata un produccion di ocho ora largo cu a consisti di slides y pelicula. E tabatin zonido y tabata completamente na color. Miyones di hende rond mundo a wak e “Foto-Drama” aki. Na 1914 nan a presenta tambe un version mas cortico di e drama aki titula “Drama Eureka.” Pero den e decada di 1920, nan no por a sigui pasa e drama mas pasobra tanto e slidesnan, e sinta di e peliculanan como e ekipo di proyeccion a bira bieu. Pero tabatin hopi hende cu kier a wak e “Foto-Drama.” Por ehempel, algun hende cu tabata biba na Ludwigsburg, Alemania, a puntra: “Ki dia nos por wak e ‘Foto-Drama’ atrobe?” Kico e rumannan por a haci?

Pa complace e hendenan di e tempo ey, representantenan di e famia di Betel na Magdeburg, Alemania, a cumpra algun pelicula for di un agencia di noticia na Paris, Francia, y slides for di algun compania di arte grafico na Leipzig y Dresden. Nan a hinca esakinan den otro hunto cu algun slides bieu di e “Foto-Drama” cu ainda tabata uzabel.

Ruman Erich Frost, un musico talentoso, a compone musica pa e pelicula- y slidesnan. Y for di e buki di Creacion nan a nara algun relato pa incorpora den e drama. Pesey, e version revisa aki di e “Foto-Drama” a haya e nomber nobo “Drama di Creacion.”

E produccion nobo aki tabatin un duracion di ocho ora, mescos cu e “Foto-Drama” original. Nan a parti e produccion aki den seccion y a pasa esakinan durante varios anochi tras di otro. E drama aki tabata contene detayenan fascinante tocante creacion, algun historia biblico, historia en general y a mustra con religion falso a gaña humanidad. Nan a presenta e “Drama di Creacion” na Alemania, Austria, Luxemburg, Suisa y na otro luganan caminda hende tabata papia Aleman.

Erich Frost a bisa: “Na cada presentacion di e Drama, mi tabata anima mi coleganan, specialmente e integrantenan di e orkesta, pa den pauze nan pasa cerca tur e hendenan den auditorio y ofrece nos buki- y tratadonan. Di e manera aki, nos a laga mas literatura cu nos por a laga di cas pa cas.” Johannes Rauthe, kende a organisa e presentacionnan na Polonia y na e pais cu awe ta Republica Checo, ta corda cu e hendenan den auditorio tabata laga nan adres pa bishita nan despues. Como resultado, nos a haya rebishitanan exitoso.

Den e decada di 1930, salanan tabata yen di hende cu tabata disfruta di e “Drama di Creacion”, y tur caminda hende tabata papia di e Testigonan di Jehova. Pa aña 1933, casi un miyon hende a asisti na e presentacionnan cu e sucursal na Alemania a organisa. Käthe Krauss ta corda: “Pa nos por a wak e Drama tur e cinco dianan cu nan a present’e, nos a cana 10 kilometer pa bay y bin; nos a pasa door di mondi, subi y baha sero y pasa den vayenan.” Else Billharz a bisa: “Ta e ‘Drama di Creacion’ a lanta mi amor pa e berdad.”

Alfred Almendinger a conta cu despues cu su mama a wak e Drama, el a keda asina emociona cu el a cumpra un Bijbel pa wak si e palabra purgatorio ta den Bijbel. Ora cu e no a hay’e, el a stop di bay misa y a batisa como Testigo di Jehova. Erich Frost a bisa: “Hopi hende a drenta e berdad pa motibo di e ‘Drama di Creacion.’”—3 Juan 1-3.

Mientras cu e “Drama di Creacion” tabata haya hopi acogida, nazismo tambe tabata haya mas y mas apoyo y tabata causa hopi disturbio. E actividadnan di e Testigonan na Alemania a ser prohibi na cuminsamento di aña 1933. Di e tempo ey padilanti, te na fin di Segundo Guera Mundial na aña 1945, Testigonan di Jehova na Europa a ser persigui severamente. Erich Frost a pasa ocho aña den prizon, pero el a sobrevivi. Despues, el a sirbi na Betel na Wiesbaden, Alemania. No tin duda, e “Drama di Creacion” tabata inolvidabel y a yega net na ora pa encurasha e rumannan cu tabata a punto di confronta pruebanan severo durante Segundo Guera Mundial.—For di nos archivo na Alemania.