Un Miembro Nobo di e Cuerpo Gobernante

Diaranson mainta, dia 5 di september 2012, e famia di Betel di Merca y Canada a haya e noticia cu e Cuerpo Gobernante di Testigonan di Jehova a haya un miembro nobo. Si, nan a haya sa cu desde 1 di september 2012, Mark Sanderson a cuminsa sirbi como miembro di e Cuerpo Gobernante.

Ruman Sanderson a lanta den e berdad hunto cu su famia na San Diego, California, Merca, y el a batisa dia 9 di februari 1975. Dia 1 di september 1983, el a cuminsa sirbi como pionero na Saskatchewan, Canada; na december 1990, el a gradua den e di shete klas di e Scol di Entrenamento Ministerial (cu awor yama Scol Biblico pa Ruman Homber Soltero) na Merca. Na april 1991, ruman Sanderson a ser nombra como pionero special pa sirbi riba e isla di Newfoundland, na Canada. Despues di a sirbi como superintendente di circuito substituto, na februari 1997 el a haya invitacion pa forma parti di e famia di Betel na Canada. Na november di aña 2000, el a haya asignacion pa bay traha na e sucursal di Merca. Eynan, el a traha den e departamento di Servicio di Informacion di Hospital y despues den e Departamento di Sirbishi.

Na september 2008, Ruman Sanderson a asisti na e Scol pa Miembro di Comite di Sucursal y, despues di esey, el a ser nombra como miembro di Comite di Sucursal na Filipinas. Na september 2010, el a haya invitacion pa bay Merca bek, unda el a sirbi como ayudante di e rumannan den e Comite di Sirbishi di e Cuerpo Gobernante.