Sirbi Dios Ta Su Remedi!

Dos pionero a keda hopi sorprendi ora nan a drenta un cas na Kenia y a mira un homber chikito drumi riba cama. Tanto e parti ariba di su curpa como su brasanan ta masha cortico. Ora nos rumannan a cont’e di Dios su promesa cu tin na Isaias 35:6, cu ta mustra cu algun dia “e cohonan lo bula manera bina”, el a smile di horea pa horea.

E pioneronan a haya sa cu Onesmus a nace cu osteogenesis imperfecta, un maleza cu ta pone hende su wesonan bira bros. Su wesonan ta masha fragil; nan ta asina fragil cu, hasta ora bo dun’e man pa cumind’e, nan por kibra. Y como cu no tin cura of tratamento pa su maleza, Onesmus tabata pensa cu lo e mester a pasa e resto di su bida cu dolor y den rolstoel.

Onesmus a acepta un estudio di Bijbel. Pero su mama no tabata kier pa e bay reunion pasobra e tabatin miedo cu Onesmus lo lastima su curpa y haya mas dolor. Pesey, e rumannan tabata graba e reunionnan, y Onesmus tabata scucha esakinan na cas. Despues cu Onesmus tabatin cinco luna ta studia, el a dicidi cu e ta bay e reunionnan a pesar di e riesgonan.

El a haya mas dolor ora el a bay reunion? No, al contrario. El a bisa: “Ta comosifuera cu e dolornan cu mi ta sinti constantemente ta bira menos ora mi ta na reunion.” Onesmus ta kere cu ta e speransa nobo cu el a haya ta pon’e sintie mihor. Onesmus su mama a ripara cu Onesmus su actitud a cambia y e tabata asina contento cu e tambe a cuminsa studia Bijbel. E tabata bisa: “Sirbi Dios ta mi yiu su remedi.”

No a dura hopi cu Onesmus a bira publicador no batisa. Cu tempo, el a batisa y awor e ta sirbi como sirbidor ministerial. Aunke Onesmus no por uza un di su brasanan ni su pianan, e tabata kier haci tur loke e por pa sirbi Jehova. E kier a traha pionero auxiliar, pero e tabata vacila pa aplica. Dicon? Pasobra e tabata sa cu lo e mester depende riba otro hende pa pusha su rolstoel. Pero ora el a expresa su preocupacion na su rumannan den fe, nan a primintie cu nan lo sosten’e. Y esey ta precies loke nan a haci; nan a yuda Onesmus traha pionero auxiliar.

Despues, Onesmus tabata kier a cuminsa traha pionero regular, pero atrobe el a vacila pa e mesun motibo. Pero na dado momento, e texto di dia a dun’e e animacion cu e tabatin mester. Tabata e texto di Salmo 34:8, cu ta bisa: “O purba y mira cu [Jehova] ta bon.” Despues di a medita riba e texto, Onesmus a tuma su decision y a bira pionero regular. Awor e ta predica cuater dia pa siman y tin varios studiante di Bijbel cu ta progresa bon den e berdad. Na 2010, Onesmus a asisti na e Scol di Sirbishi di Pionero. El a keda contento ora el a haya sa cu un di e instructornan tabata un di e dos rumannan cu a predica na dje na prome instante.

Awor Onesmus tin casi 40 aña di edad; tur su dos mayornan a muri, pero e rumannan di congregacion ta sigui percura pa su necesidadnan. E ta hopi agradecido pa e bendicionnan cu e ta disfruta di dje awe y ta anhela pa e dia yega cu “ningun habitante lo no bisa: ‘Mi ta malo.’”—Isa. 33:24.