“Ken Realmente Ta e Esclavo Fiel y Prudente?”

1, 2. Ken Hesus ta uza awe pa alimenta nos, y dicon ta importante pa sa ken e esclavo ey ta?

‘RUMANNAN, boso no por imagina cuanto biaha boso a percura pa mi ricibi net e articulo cu mi tabatin mester y na e momento cu mas mi tabatin mester di esaki.’ Cu e palabranan aki, un ruman muher a expresa su aprecio den un carta cu el a manda pa e rumannan cu ta traha na nos sede mundial. Abo tambe sa sinti asina? Hopi di nos sa sinti asina. Acaso esaki mester sorprende nos? Claro cu no.

² E echo cu nos ta haya cuminda spiritual na e momento cu nos mester di esaki ta duna prueba cu Hesus, e Cabes di e congregacion cristian, ta cumpliendo cu loke el a priminti, esta, cu lo e percura pa nos ser alimenta. Awor, ta ken Hesus ta uza pa alimenta nos? Wel, ora Hesus tabata papia cu su discipelnan tocante kico lo ta e señal di su presencia, el a bisa cu lo e uza “e esclavo fiel y prudente” pa duna su sirbidornan di cas “cuminda na e debido tempo.”a (Lesa Mateo 24:45-47.) Ta mediante e esclavo fiel ey Hesus ta alimenta su berdadero siguidornan durante e tempo di fin aki. Pues, ta sumamente importante pa sa ta ken e esclavo ey ta, pasobra nos salud spiritual y nos amistad cu Dios ta depende di dje.—Mat. 4:4; Juan 17:3.

3. Con nos publicacionnan tabata splica e ilustracion tocante e esclavo fiel?

³ Awor, con nos mester compronde Hesus su ilustracion tocante e esclavo fiel y prudente? Antes, nos publicacionnan tabata splica cu ta na Pentecoste di aña 33 di nos era, Hesus a nombra e esclavo fiel riba su sirbidornan di cas. Y cu desde e aña ey, e esclavo ta simbolisa tur cristian ungi riba tera como grupo, durante cualkier periodo. Pero cu individualmente e mesun personanan aki ta e sirbidornan di cas. Nos literatura tabata splica tambe cu, ta na aña 1919, Hesus a nombra e esclavo fiel “riba tur su pertenencianan”—esta, tur loke ta ser uza aki riba tera pa promove e trabou di predica e Reino. Sinembargo, despues di a bolbe analisa e ilustracion aki cuidadosamente y haci oracion tocante e asunto y medita riba dje, nos a realisa cu mester corigi nos comprondemento encuanto Hesus su ilustracion tocante e esclavo fiel y prudente. (Prov. 4:18) Pesey, laga nos analisa e ilustracion y wak ki efecto e tin riba nos, sea cu nos tin e speransa di biba den cielo of riba tera.

NA KI TEMPO E ILUSTRACION A CUMINSA HAYA SU CUMPLIMENTO?

4-6. Dicon nos por conclui cu Hesus su ilustracion tocante e esclavo fiel a cuminsa cumpli despues di 1914?

⁴ Otro versiculonan di Mateo capitulo 24 ta yuda nos compronde cu e ilustracion tocante e esclavo fiel y prudente no a cuminsa cumpli na Pentecoste di aña 33 di nos era, pero den e tempo di fin aki. Laga nos wak con e Scritura ta yuda nos yega na e conclusion aki.

⁵ E ilustracion tocante e esclavo fiel ta un parti di Hesus su profecia encuanto “e señal di [su] presencia y di conclusion di e era aki.” (Mat. 24:3) E prome parti di Hesus su profecia, cu ta registra na Mateo 24:4-22, tin dos cumplimento: e prome tabata di aña 33 di nos era pa aña 70, y e di dos, e mayor cumplimento, ta den nos tempo. Acaso esaki ta nifica cu Hesus su ilustracion tocante e esclavo fiel tambe tin dos cumplimento? No.

⁶ Si nos cuminsa lesa for di Mateo 24:29, nos ta ripara cu Hesus a enfoca principalmente riba sucesonan cu lo tuma luga den nos tempo. (Lesa Mateo 24:30, 42, 44.) Ora e tabata papia tocante e sucesonan cu lo tuma luga durante e tribulacion grandi, el a bisa cu hende “lo mira e Yiu di hende bin riba e nubianan di cielo.” Despues, el a referi na esnan cu lo biba den e ultimo dianan y a urgi nan pa keda vigila, bisando: “Boso no sa ki dia boso Señor ta bin”, pasobra “e Yiu di hende ta bin na un ora cu boso no ta pensa.”b Ta den e contexto aki—esta, ora e tabata papiando tocante e sucesonan cu lo tuma luga durante e ultimo dianan—Hesus a conta e ilustracion tocante e esclavo fiel. Pesey, nos por conclui cu e palabranan di Hesus tocante e esclavo fiel a cuminsa cumpli despues di 1914, despues cu e ultimo dianan a cuminsa. Y e conclusion aki ta logico. Dicon?

7. Ki pregunta importante a surgi ora e tempo di cosecha a cuminsa, y dicon?

⁷ Para keto un rato y pensa riba e pregunta: “Ken realmente ta e esclavo fiel y prudente?” Den prome siglo, no tabatin ningun motibo pa haci e pregunta aki. Dicon no? Pasobra, manera nos a mira den e articulo anterior, e apostelnan por a haci milager y nan por a hasta pasa donnan milagroso pa otro hende. Pues, tabata bisto cu ta e apostelnan tabatin apoyo di Dios. (Echo. 5:12) Pesey, hende di e tempo ey no mester a puntra ken realmente Cristo a nombra pa dirigi e congregacion cristian. Pero na 1914, e situacion tabata completamente diferente. E aña ey, e tempo di cosecha a cuminsa y tabata tempo pa separa mal yerba for di e trigo. (Mat. 13:36-43) Ora e tempo di cosecha ey a cuminsa, tabatin hopi supuesto cristian cu tabata pretende cu nan ta berdadero siguidor di Cristo. Pesey a lanta e pregunta: Con hende por a reconoce e trigo, esta, identifica e cristiannan ungi? E ilustracion tocante e esclavo fiel ta contesta e pregunta ey. Con asina? Wel, e ta mustra cu Cristo su siguidornan ungi mester ta hende cu ta ser bon alimenta den sentido spiritual.

KEN TA E ESCLAVO FIEL Y PRUDENTE?

8. Dicon e esclavo fiel mester ta consisti di cristian ungi?

⁸ E esclavo fiel mester ta consisti di cristian ungi cu ta riba tera. Bijbel ta yama e unginan ‘sacerdotenan cu lo sirbi como rey’ y nan a haya e asignacion pa “proclama tur caminda e cualidadnan excelente di esun cu a yama [nan] for di scuridad na su luz maraviyoso.” (1 Ped. 2:9) Pues, ta logico cu ta esnan cu ta forma parti di e reino di sacerdote ta esnan cu lo mester siña e berdad na nan rumannan den fe.—Mal. 2:7; Rev. 12:17.

9. Ta tur cristian ungi cu ta riba tera ta forma e esclavo fiel? Splica.

⁹ Awor, ta tur cristian ungi cu ta riba tera ta forma e esclavo fiel? No, pasobra no ta tur ruman ungi ta percura cuminda spiritual pa nan rumannan rond mundo. Ta berdad cu entre e trigo tin ruman ungi cu ta sirbi como sirbidor ministerial of anciano den congregacion. Nan ta predica di cas pa cas y ta siña otronan den congregacion. Y nan ta sigui guia di e sede mundial fielmente. Pero nan no ta percura cuminda spiritual pa e hermandad mundial. Ademas, tin ruman muher tambe cu ta ungi, pero e rumannan humilde aki nunca lo purba di asumi e papel di siña otronan den congregacion.—1 Cor. 11:3; 14:34.

10. Ken ta e esclavo fiel y prudente?

¹⁰ Ken anto ta e esclavo fiel y prudente? Corda cu den prome siglo, Hesus a uza un par di hende so pa alimenta multitud di hende. Di igual manera, e esclavo fiel y prudente ta consisti di un grupo chikito di ruman homber ungi cu ta directamente envolvi den e trabou di prepara y distribui cuminda spiritual durante Cristo su presencia. Y durante e ultimo dianan aki, semper e ruman hombernan ungi aki cu ta forma e esclavo fiel a sirbi hunto na e sede mundial di Testigonan di Jehova. E esclavo fiel aki ta ser identifica como e Cuerpo Gobernante di Testigonan di Jehova. Bo a ripara cu Hesus a uza e palabra “esclavo” den su forma singular? Si, el a referi na un solo esclavo aunke esaki ta consisti di mas cu un persona. Esaki ta indica cu e miembronan di e Cuerpo Gobernante ta tuma decision hunto.

KEN TA E SIRBIDORNAN DI CAS?

11, 12. (a) Menciona e dos asignacionnan cu e esclavo fiel y prudente ta ricibi. (b) Na ki tempo Hesus a nombra e esclavo fiel riba su sirbidornan di cas, y ken el a scoge pa sirbi como e esclavo ey?

¹¹ Ta bon pa nos tuma nota cu e esclavo fiel y prudente den Hesus su ilustracion ta haya dos nombramento, of asignacion. Esun di prome ta pa percura pa e sirbidornan di cas di su Doño, y esun di dos ta pa percura pa tur e Doño su pertenencianan. Y como cu e ilustracion aki ta cumpli solamente durante e tempo di fin aki, ta logico cu ta despues di 1914, tempo cu Hesus a bira Rey, e esclavo ta haya ambos asignacion.

¹² Awor, ta na ki tempo Hesus a nombra e esclavo fiel riba su sirbidornan di cas? Pa contesta e pregunta aki, nos mester bay bek na 1914, ora e tempo di cosecha a cuminsa. Manera nos a mira caba, e tempo ey tabatin hopi grupo cu tabata pretende di ta cristian. Awor, for di cua grupo Hesus lo a scoge y nombra e esclavo fiel? E pregunta ey a haya contesta despues di e periodo di 1914 pa cuminsamento di 1919; durante e periodo ey, Hesus y su Tata a bin inspecciona e tempel spiritual, esta, e sistema cu Dios a establece pa hende por rindi adoracion aceptabel na dje.c (Mal. 3:1) Nan a keda masha contento ora nan a haya un grupo chikito di fiel Studiante di Bijbel cu tabata demostra cu nan realmente ta stima Jehova y su Palabra. Claro cu e Studiantenan aki mester a ser purifica den algun aspecto, y humildemente nan a acepta coreccion durante un periodo cortico di prueba y refinacion. (Mal. 3:2-4) E Studiantenan fiel aki di Bijbel tabata e trigo, esta, e cristiannan berdadero, cu Hesus a papia di dje den su ilustracion. Na 1919, Hesus a scoge algun ruman homber ungi y cualifica for di entre e Studiantenan di Bijbel aki pa bira e esclavo fiel y prudente y a nombra nan riba su sirbidornan di cas.

13. Ken ta e sirbidornan di cas, y dicon?

¹³ Ken ta e sirbidornan di cas? Simplemente bisa, nan ta esnan cu ta ser alimenta spiritualmente. Na cuminsamento di e ultimo dianan, tur e sirbidornan aki tabata cristian ungi. Pero despues, un multitud grandi di otro carne tambe a bira parti di e sirbidornan di cas. Actualmente, den e “tou” di Cristo tin hopi mas otro carne cu cristian ungi. (Juan 10:16) Pero ambos grupo ta beneficia di e mesun cuminda spiritual cu e esclavo fiel ta percura na e debido tempo. Awor, kico di e miembronan di e Cuerpo Gobernante kendenan ta forma e esclavo fiel y prudente awe? E ruman hombernan aki tambe mester ser alimenta den sentido spiritual. Pesey, nan ta reconoce humildemente cu individualmente nan tambe ta sirbidor di cas mescos cu tur otro berdadero siguidor di Cristo.

14. (a) Ki responsabilidad serio e esclavo fiel a haya, y kico esaki ta encera? (b) Ki spiertamento Hesus a duna e esclavo fiel y prudente? (Wak e cuadro “Si un Dia e Esclavo Ey Comete Maldad ...”)

¹⁴ Hesus a duna e esclavo fiel y prudente un responsabilidad sumamente serio. Den tempo biblico, un esclavo di confianza, of mayordomo, tabata encarga cu maneho di cas di su doño. (Luc. 12:42, wak nota den Bijbel.) Asina tambe, e esclavo fiel y prudente tin e responsabilidad di percura pa e sirbidornan di cas. Ademas, e tin cu supervisa propiedadnan y uzo di placa di su Doño, e trabou di predica, e tin cu prepara programanan pa asamblea y congreso y produci literatura basa riba Bijbel pa cristiannan por uza pa nan mes, den sirbishi di veld y durante reunionnan di congregacion. Si, e sirbidornan di cas ta depende completamente di e esclavo fiel pa nan cuminda spiritual.

NA KI TEMPO HESUS TA NOMBRA E ESCLAVO RIBA TUR SU PERTENENCIANAN?

15, 16. Na ki tempo Hesus lo nombra e esclavo fiel riba tur su pertenencianan?

¹⁵ Awor, na ki tempo e esclavo lo haya su di dos asignacion, esta, ser nombra riba ‘tur e pertenencianan di su Doño’? Hesus a bisa: “Feliz e esclavo ey ta si ora su Doño yega, e hay’e ta haci esey. Di berdad mi ta bisa boso: Lo e nombr’e riba tur su pertenencianan.” (Mat. 24:46, 47) Bo a ripara ki ora Hesus lo nombra e esclavo fiel riba tur su pertenencianan? Si, despues cu e yega y haya e esclavo ta ‘haciendo esey’, esta, percurando cuminda spiritual fielmente. Pues, lo tin un lapso di tempo entre e dos asignacionnan cu e esclavo ta ricibi. Pesey, pa nos por sa awor den ki sentido y na ki tempo Hesus lo nombra e esclavo riba tur su pertenencianan, nos mester sa dos cos: na ki tempo Hesus ta yega y kico su pertenencianan ta encera.

¹⁶ Ki dia, of na ki tempo, Hesus ta yega, of bin? Nos ta haya e contesta den Mateo capitulo 24 mes. No lubida cu ora e versiculonan prome cu versiculo 46 ta papia di Hesus su ‘binida’, nan ta referi na e tempo cu Hesus ta bin pa dicta sentencia y ehecuta huicio na fin di e era malbado aki.d (Mat. 24:30, 42, 44) Pues, Hesus su ‘yegada’, of ‘binida’, cu e ilustracion tocante e esclavo fiel ta papia di dje lo tuma luga durante e tribulacion grandi.

17. Kico Hesus su pertenencianan ta encera?

¹⁷ Kico Hesus “su pertenencianan” ta encera? Ora Hesus a uza e palabra “tur”, e no tabata referi solamente na su pertenencianan riba tera. De echo, Hesus tin pertenencia den cielo tambe. Hesus mes a bisa: “Mi a ricibi tur autoridad den cielo y riba tera.” (Mat. 28:18; Efe. 1:20-23) Por ehempel, aworaki e Reino Mesianico tambe ta Hesus su pertenencia. Esaki ta asina desde 1914 y den futuro lo e comparti esaki cu su siguidornan ungi.—Rev. 11:15.

18. Dicon Hesus lo ta contento pa nombra e esclavo fiel riba tur su pertenencianan?

¹⁸ En bista di loke nos a caba di analisa, na ki conclusion nos por yega? Ora Hesus bin pa ehecuta huicio durante e tribulacion grandi, lo e bin haya e esclavo fiel ta cumpli fielmente cu su asignacion, percurando cuminda spiritual na e debido tempo pa e sirbidornan di cas. E ora ey, Hesus lo ta contento pa nombra e esclavo ey riba tur su pertenencianan. Si, e cristiannan ungi cu ta forma e esclavo fiel lo haya nan di dos nombramento, of asignacion, ora nan bay cielo y bira co-gobernante cu Cristo.

19. E esclavo fiel lo ricibi un mihor recompensa den cielo cu e resto di ruman ungi? Splica.

¹⁹ Acaso e esclavo fiel lo haya un mihor recompensa den cielo cu e resto di ruman ungi? No. E situacion aki ta similar na un caso den cua un persona na un cierto momento ta priminti un grupo chikito un cierto recompensa cu otronan tambe ta haya despues. Con asina? Tuma como ehempel e promesa cu Hesus a haci na su 11 fiel apostelnan e anochi prome cu el a muri. (Lesa Lucas 22:28-30.) Hesus a priminti e grupo chikito ey un maraviyoso recompensa debi na nan fieldad: Nan lo reina hunto cu ne den cielo. Pero añanan despues, Hesus a indica cu ta tur e 144.000 rumannan ungi lo sinta riba trono y reina hunto cu ne den cielo. (Rev. 1:1; 3:21) Di igual manera, segun Mateo 24:47, Hesus a priminti cu ta un grupo chikito—e ruman hombernan ungi cu ta forma e esclavo fiel—lo ser nombra riba tur su pertenencianan. Pero en realidad, ta tur e 144.000 rumannan ungi lo tin autoridad riba Cristo su pertenencianan.—Rev. 20:4, 6.

20. Cu ki proposito Hesus a nombra e esclavo fiel, y kico abo ta determina pa haci?

²⁰ Awe, Hesus ta sigui e mesun sistema cu el a establece den prome siglo: E ta uza un par di hende—su esclavo fiel y prudente—pa alimenta multitud di hende. Hesus a nombra e esclavo fiel aki pa haci sigur cu su berdadero siguidornan, sea cu nan ta ungi of no, ta haya suficiente cuminda spiritual, na e momento oportuno, durante e ultimo dianan aki. Pesey, laga nos ta determina pa mustra nos aprecio pa esaki. Con nos por haci esey? Cooperando plenamente cu e rumannan ungi cu ta forma e esclavo fiel y prudente.—Heb. 13:7, 17.