PREGUNTA CU BIJBEL TA CONTESTA
Di berdad Hesus a lanta hende for di morto?
Hesus a lanta Lazaro for di morto, kende tabatin cuater dia morto caba
Bijbel ta bisa bon cla cu Hesus a lanta hende for di morto. E relatonan ey ta real pasobra nan a sosode na luganan cu ta existi y na temponan specifico; nan no ta mito. Por ehempel, durante e zomer di aña 31 di prome siglo, un gran cantidad di hende a biaha di Capernaum pa Nain hunto cu Hesus. Ora nan a yega eynan, nan a topa un otro grupo basta grandi di hende cu tabata bay dera un mucha homber di e stad, y Hesus a resucit’e. Nos por confia cu di berdad e resureccion aki a tuma luga, no solamente pasobra e ta skirbi den Bijbel, sino tambe pasobra el a tuma luga dilanti di tur e hendenan presente.—Lesa Lucas 7:11-15.
Tambe Hesus a lanta su amigo Lazaro, kende tabatin cuater dia morto caba. Bo por kere e relato di loke Hesus a haci e dia ey pasobra esaki tambe a sosode dilanti di hopi hende.—Lesa Juan 11:39-45.
Dicon Hesus a lanta hende for di morto?
Compasion a conmove Hesus pa lanta hende for di morto. El a haci esaki tambe pa mustra cu su Tata, e Creador di bida, a dun’e poder riba morto.—Lesa Juan 5:21, 28, 29.
E resureccionnan cu Hesus a haci ta duna nos e confianza cu den futuro tur su promesanan lo cumpli. Lo e lanta masha hopi hende for di morto, hasta hende inhusto cu no tabata sa nada di e Dios berdadero. Nan lo haya un chens pa siña conoce Jehova Dios y stim’e.—Lesa Echonan 24:15.