Tabata rasonabel pa David spera cu Dios ta corda riba dje? Dios ta corda riba bo? Hopi hende tin dificultad pa kere cu un Dios todopoderoso ta interesa den nan. Dicon?

Un motibo ta cu Dios ta un ser mucho mas grandi y supremo cu un simpel ser humano. For di su posicion superior tur e nacionnan “ta manera un gota for di un hemchi, ... manera stof riba balansa.” (Isaias 40:15) Un escritor di nos tempo, cu no ta kere den Dios, a yega asina leu di conclui cu “pa un hende kere cu ta existi un ser supremo cu ta interesa den nos y den loke nos ta haci, e mester ta basta arogante.”

Di otro banda, tin hende ta sinti cu pa motibo di nan comportacion, nan no merece Dios su atencion. Por ehempel, un homber cu yama Jim ta relata: “Constantemente mi tabata pidi Dios p’e duna mi paz y dominio propio. Pero toch semper mi rabia tabata bin bek. Finalmente, mi a conclui cu mi tabata asina mal hende cu ni Dios no por a yuda mi.”

Ta asina leu Dios ta for di hende cu e no sa mes cu nos ta existi? Kico Dios ta pensa di su criaturanan imperfecto? Si Dios lo no a laga nos sa ken e ta, niun ser humano lo no por contesta e preguntanan aki p’e. Pero Bijbel, Dios su Palabra inspira, ta sigura nos cu e no ta un ser misterioso y cu e ta interesa den nos. Bijbel ta bisa: “E no ta masha leu for di cada un di nos.” (Echonan 17:27) Den e siguiente cuater articulonan nos lo considera kico Dios ta bisa tocante su interes den cada un di nos y con e ta demostra esaki.

DICON TIN HENDE TA DUDA: Di acuerdo cu estudionan haci recientemente, nos galaxia so ta contene por lo menos 100 mil miyon planeta. En bista di e inmenso tamaño di universo, un hende por puntra su mes: ‘Dicon e Creador todopoderoso lo tin gana di mira loke hende insignificante ta haci riba e planeta chikito aki?’

LOKE BIJBEL TA SIÑA: Dios no a djis duna nos su Palabra skirbi y laga nos pa nos cuenta. Mas bien, Dios, kende su nomber ta Jehova, ta sigura nos: “Lo mi conseha bo; mi wowo ta riba bo.”—Salmo 32:8.

Laga nos wak e ehempel di Hagar, un muher Egipcio di siglo 20 prome cu Cristo. Hagar, e cria di Sarai, a falt’e respet. Pesey Sarai a humili’e y Hagar a huy bay den desierto. Awor cu Hagar a faya, acaso Dios a perde interes den dje? Bijbel ta bisa: “E angel di SEÑOR a hay’e.” E angel ey a sigura Hagar: “SEÑOR a tende bo afliccion.” E ora ey Hagar a bisa Jehova: “Bo ta un Dios cu ta mira.”—Genesis 16:4-13.

E “Dios cu ta mira” tin bista riba abo tambe. Por ehempel: Un mama amoroso ta specialmente atento cu su yiunan chikito, ya cu mas chikito un yiu ta, mas atencion e mester haya di su mayornan. Mescos tambe, Dios tin bista riba nos specialmente ora nos ta kibra di curason y debil. E ta bisa: “Mi ta biba den un luga halto y santo y tambe hunto cu esnan humilde y di spirito kibra, pa rebiba spirito di e hende kibra y pa rebiba curason di e humilde.”—Isaias 57:15.

Asina mes, kisas bo ta pensa: ‘Con Dios ta wak mi? E ta husga mi a base di mi apariencia of e ta wak mas profundo y ta compronde realmente ken mi ta?’

DICON TIN HENDE TA DUDA: Hopi persona ta sinti cu Dios ta mira hende solamente como pecador, impuro y indigno di su atencion. Kendra, kende tabata sufri di depresion, tabata sinti su mes sumamente culpabel pasobra e no por a cumpli cu tur loke Dios ta exigi di dje. Pesey, el a bisa: “Mi a stop di haci oracion.”

LOKE BIJBEL TA SIÑA: Jehova ta wak mas aya di bo imperfeccionnan y ta compronde ken bo ta realmente. Bijbel ta bisa: “E sa di kico nos ta traha; e ta corda cu ta stof nos ta.” Ademas, Jehova no ta trata cu nos “segun nos picanan”, pero si nos arepenti, e ta tene misericordia di nos y ta pordona nos.—Salmo 103:10, 14.

Laga nos wak e ehempel di David, e Rey Israelita menciona den e prome articulo di e serie aki. David a bisa den oracion: “Bo wowonan a mira mi substancia sin forma; ... tur tabata skirbi den bo buki ... Scudriña mi, o Dios, y conoce mi curason.” (Salmo 139:16, 23) Si, David tabata convenci cu aunke el a peca, algun biaha gravemente, toch Jehova por a wak den su curason cu e tabata arepenti.

Jehova ta compronde bo mihor cu cualkier hende. Bijbel ta bisa: “Hende ta wak apariencia di pafo, ma SEÑOR ta wak curason.” (1 Samuel 16:7) Dios sa dicon bo ta haci loke bo ta haci. E conoce e manera cu bo a ser lanta, bo ambiente, bo personalidad y tur loke ta forma bo como persona. Jehova ta mira y ta balora e persona cu bo ta haci esfuerso pa bira, aunke bo faya.

Con anto Dios ta uza su comprondemento profundo di ‘ken bo ta realmente’ pa consola bo?

DICON TIN HENDE TA DUDA: Algun hende ta sinti cu ta egoista di nan parti pa pidi Dios pa yuda nan trata cu nan problemanan hasta ora nan mester di consuelo desesperadamente. Un señora cu yama Raquel a bisa: “Ora mi pensa riba e cantidad inmenso di hende na mundo cu ta confronta problemanan serio, mi problemanan ta mustra asina chikito cu mi ta duda si mi tin cu pidi Dios yudansa.”

LOKE BIJBEL TA SIÑA: Dios ya caba a yuda y consola hende na un manera masha remarcabel. Nos tur a nace den pica, pues ningun di nos no por cumpli cu tur Dios su rekisitonan. Pero, Dios “a stima nos y a manda su Yiu [Hesucristo] como un ofrenda pa haci paz cu Dios.” (1 Juan 4:10; wak nota den Tradukshon di Mundu Nobo di e Skritura Griego Kristian.) Mediante Hesus su sacrificio di rescate, Dios ta haci posibel pa nos haya pordon pa nos picanan, pa nos por tin un consenshi limpi y e speransa di bida eterno den un mundo nobo pacifico.a Pero e sacrificio aki ta unicamente pa humanidad en general of e ta refleha Dios su interes den bo personalmente?

Laga nos wak e ehempel di Pablo. E echo cu Hesus a sacrifica su bida pa humanidad a conmov’e asina tanto cu el a skirbi: ‘Mi ta biba pa medio di fe den e Yiu di Dios, kende a stima mi y a entrega su mes pa mi.’ (Galationan 2:20) Ta berdad cu Hesus a muri prome cu Pablo a bira un cristian. Pero Pablo a considera e sacrificio aki como un regalo cu Dios a dun’e personalmente.

Hesus su sacrificio di rescate ta Dios su regalo personal pa abo tambe. E regalo ey ta mustra con precioso bo ta pa Dios. E por duna bo ‘consuelo eterno y un speransa maraviyoso.’ Pues e por ‘consola bo y fortalece bo den tur bon obra y bon palabra.’—2 Tesalonicensenan 2:16, 17.

Pero Hesus a ofrece su bida como sacrificio casi 2.000 aña pasa. Kico ta mustra cu Dios kier tin un relacion cu bo awe?

DICON TIN HENDE TA DUDA: Hopi hende cu ta kere den Dios ta sinti cu e ta leu for di nan. Christina, un señora di Irlanda cu tabata bay misa tur siman, ta bisa: “Mi tabata mira Dios simplemente como esun cu a crea tur cos. Pero mi no tabata conoc’e. Nunca e no a atrae mi.”

LOKE BIJBEL TA SIÑA: Jehova no ta laga nos pa nos cuenta ora nos sinti nos mes desampara. Hesus a mustra cuanto interes Dios tin den nos: “Si un hende tin 100 carne y un di nan dwaal, lo e no laga e 99 carnenan riba sero y bay busca esun cu a dwaal?” Kico esaki ta siña nos? “Asina tambe mi Tata cu ta den cielo no ta desea pa ni un di e chikitonan aki bay perdi.”—Mateo 18:12-14.

Cada “un di e chikitonan aki” ta precioso den bista di Dios. Con Dios ta “bay busca esun cu a dwaal?” E texto cita na cuminsamento di e articulo aki ta mustra cu Jehova ta hala hende cerca di dje.

Laga nos wak con Dios a tuma iniciativa pa hala hende di curason sincero cerca dje. Den prome siglo, Dios a manda e discipel Felipe pa bay cerca un oficial di Etiopia cu tabata lesando un profecia di Bijbel pa splic’e su nificacion. (Echonan 8:26-39) Mas despues, Dios a dirigi apostel Pedro pa bay bishita un oficial Romano cu yama Cornelio, kende tabata haci oracion y tabata haci esfuerso pa adora Dios. (Echonan 10:1-48) Tambe Dios a guia apostel Pablo y su compañeronan na un riu pafo di e stad di Filipo. Ey nan a topa Lidia, un señora cu tabata “temeroso di Dios.” Anto, “Jehova a habri su curason completamente pa e acepta” e cosnan cu nan a papia cu ne.—Echonan 16:9-15.

Den cada un di e casonan aki, Jehova a haci sigur cu esnan cu tabata busc’e a haya e oportunidad pa conoc’e. Ken ta esnan cu awe ta bishita hende na cas y den areanan publico pa comparti e mensahe di Bijbel tocante Dios? Hopi hende lo contesta cu ta e testigonan di Jehova. Puntra bo mes: ‘Acaso Dios ta uza nan pa hala mi cerca dje?’ Nos ta anima bo pa bo pidi Dios p’e yuda bo acepta su invitacion pa hala cerca dje.a