Christopher, Hannah y Gina no ta e uniconan cu ta sinti asina. Hopi hende rond mundo ta convenci cu Dios ta considera nan como amigo. Kico di abo? Bo ta sinti cu bo tin un amistad cu Dios? Lo bo kier tin un mihor relacion cu ne? Kisas bo ta puntra bo mes: Un simpel ser humano manera ami por ta amigo di e Dios Todopoderoso? Con esey ta posibel?

UN BON AMISTAD CU DIOS TA POSIBEL

Segun Bijbel, nos por tin un amistad intimo cu Dios. Por ehempel, Isaias 41:8 ta bisa cu Dios a yama Abraham, e patriarca Hebreo, “mi amigo.” Ademas, nos ta haya e siguiente invitacion caluroso na Santiago 4:8: “Hala cerca Dios, y lo e hala cerca boso.” Pues, ta bisto cu un bon relacion cu Dios ta posibel. Si, nos por ta amigo di Dios. Pero con nos por “hala cerca” dje si e ta invisibel?

Pa contesta e pregunta aki, pensa un rato riba con dos hende ta cera amistad cu otro. Normalmente, ora bo cera conoci cu un otro persona pa prome biaha, bo ta bis’e bo nomber. Despues, segun cu boso ta papia riba loke boso ta sinti y pensa, boso amistad ta crece. Anto ora boso ta haci cos pa otro, boso amistad ta bira mas mihor ainda. Tur esaki ta conta tambe si nos kier tin un bon amistad cu Dios. Ban wak con esey ta posibel.

Acaso un hende por tin un bon amigo anto e no sa su nomber? Imposibel toch? Pesey mes Irina di Bulgaria a bisa: “Ta imposibel pa bo ta amigo di Dios anto bo no sa su nomber.” Pero manera nos a mira den e articulo anterior, Dios kier pa nos hala cerca dje. Pesey, el a cera conoci cu nos, na moda di papia, ora el a introduci su mes den Bijbel, bisando: “Ami ta Jehova, esey ta mi nomber.”—Isaias 42:8, NW.

Pero di berdad Jehova ta haya cu ta importante pa nos sa su nomber y pa nos uz’e? Pensa riba esaki: E nomber di Dios—skirbi cu cuater letter Hebreo conoci como e Tetragramaton—ta aparece casi 7.000 biaha den e manuscritonan original di e Scritura Hebreo. Su nomber ta ser menciona mas cu cualkier otro nomber den Bijbel. Esaki ta mustra bon cla cu Jehova realmente kier pa nos sa su nomber y pa nos uz’e.a

Debi cu Dios ta santo y todopoderoso, algun hende ta pensa cu ta un falta di respet pa uza su nomber. Mescos cu lo bo no haci mal uzo di e nomber di un bon amigo, asina tambe lo no ta corecto pa trata e nomber di Dios cu falta di respet. Pero si bo ta uz’e bon, no tin nada malo den esey, pasobra Jehova mes kier pa tur hende cu ta stim’e honra su nomber y pa nan yuda otro hende conoce e nomber ey. (Salmo 69:30, 31; 96:2, 8) Corda tambe cu Hesus a siña su siguidornan pa pidi den oracion: “Nos Tata cu ta den cielo, bo nomber sea santifica.” Con nos por yuda santifica Dios su nomber? Door di yuda otro hende conoce su nomber. Esaki ta yuda nos hala mas cerca Dios.—Mateo 6:9.

Bijbel ta mustra cu Dios ta scucha hende “cu ta honra su nomber” cu extra atencion. (Malakias 3:16) Jehova Dios ta priminti e persona cu ta haci esey: “Lo mi proteh’e, pasobra e conoce mi nomber. E lo sclama na mi, y ami lo contest’e; lo mi ta cu ne den angustia; lo mi rescat’e y honr’e.” (Salmo 91:14, 15) Pues, si nos kier ta amigo di Dios, ta importante pa nos sa su nomber y pa nos uz’e.

Bon amigonan ta comunica cu otro mas tanto posibel, sea ta personalmente, via telefon, e-mail, webcam of carta. Pues, pa nos por ta amigo di Dios, nos tin cu comunica cu ne regularmente. Pero con nos por haci esey?

Nos por papia cu Jehova door di haci oracion. Pero papia cu Dios no ta mescos cu combersa cu cualkier persona. Nos tin cu realisa cu ora nos ta haci oracion, nos ta papiando cu e persona di mas importante di nos universo, nos Creador. Esaki mester motiva nos pa resa na dje cu un respet profundo. Ademas, pa Dios scucha nos oracionnan, nos tin cu cumpli cu cierto rekisito. Laga nos considera tres di e rekisitonan aki.

Na prome luga, nos mester dirigi nos oracionnan exclusivamente na Jehova Dios; no na Hesus, ni na un imagen of un supuesto santo. (Exodo 20:4, 5) Bijbel ta bisa bon cla: “Den tur cos, pa medio di oracion y suplica hunto cu gradicimento, laga Dios sa kico ta boso peticionnan.” (Filipensenan 4:6) Na di dos luga, nos mester haci oracion den nomber di e Yiu di Dios, Hesucristo. Hesus mes a bisa: “Ningun hende no ta yega cerca e Tata si no ta pa medio di mi.” (Juan 14:6) Na di tres luga, nos oracionnan mester ta na harmonia cu Dios su boluntad. Bijbel ta bisa: “Kico cu nos pidie cu ta di acuerdo cu su boluntad, e ta tende nos.”a—1 Juan 5:14.

Claro cu un amistad no ta bay dura largo si ta un di nan dos so ta papia tur ora. Nan mester sa ki ora pa papia y ki ora pa scucha. Asina tambe nos mester siña scucha Dios ora e ta papia cu nos. Con Dios ta papia cu nos?

Awe, Jehova ta papia cu nos mediante Bijbel. (2 Timoteo 3:16, 17) Dicon nos ta bisa esey? Laga nos wak e siguiente comparacion: Supone cu bo a haya un carta di un bon amigo. Despues cu bo caba di lesa e carta, kisas bo lo bisa, mi a caba di tende di mi amigo. Pero no ta papia bo amigo a papia cu bo, ta skirbi el a skirbi bo. Pues, di mes manera, ora bo lesa Bijbel, bo ta laga Jehova papia cu bo. Pesey, Gina, menciona den e prome articulo, a bisa: “Mi ta kere cu si mi kier pa Dios considera mi como su amiga, mi mester analisa e ‘carta’ cu el a manda pa nos, esta, Bijbel.” Gina a sigui bisa: “Mi ta lesa Bijbel tur dia, y esey a yuda mi hala mas cerca Dios.” Abo ta lesa Bijbel tur dia? Si bo haci esey, lo bo tin un bon relacion cu Dios.

“Si bo mester di algo, laga mi sa. Kico cu bo pidi mi, lo mi haci cu mil amor.” Probablemente lo bo no bisa e palabranan aki na un hende cu bo no conoce of na cualkier conoci. Di otro banda, lo bo no tin ningun problema pa bisa esey na un amigo stima. Nos tur ta dispuesto pa yuda nos amigonan ora nan pidi nos pa haci algo pa nan.

Bijbel ta mustra cu Jehova tin custumber di haci cosnan cu e sa lo laga su sirbidornan disfruta mas di bida. Por ehempel, Rey David, cu tabata un bon amigo di Dios, a bisa: ‘O Jehova mi Dios, hopi ta e maraviyanan cu bo a haci y bo pensamentonan pa cu nos; nan ta mucho hopi pa conta.’ (Salmo 40:5) Y no esey so, Jehova ta hasta haci cos bon pa hende cu ni sikiera conoc’e. E ta ‘laga nan haya cuminda na abundancia y ta yena nan curason cu alegria.’—Echonan 14:17.

Jehova gusta haci otro hende contento. Pesey, ta logico cu esnan cu kier bira amigo di Dios tambe lo kier haci cosnan cu ta haci su “curason contento.” (Proverbionan 27:11) Pero kico precies bo por haci pa agrada Dios? Bijbel ta contesta: “No lubida di haci bon y di comparti loke boso tin cu otro hende, pasobra e tipo di sacrificionan ey ta agrada Dios.” (Hebreonan 13:16) Pero, esey kiermen cu pa agrada Jehova nos tin cu djis haci bon y ser generoso?

No, esey no ta suficiente. Bijbel ta bisa: “Sin fe ta imposibel pa agrada Dios.” (Hebreonan 11:6) Tuma nota cu ta despues cu “Abraham a pone fe den Jehova”, el a ser yama “amigo di Jehova.” (Santiago 2:23) Hesucristo tambe a mustra bon cla cu ta importante pa “pone fe den Dios” si nos kier ricibi Dios su bendicion. (Juan 14:1) Kico bo tin cu haci pa bo haya e clase di fe cu Dios ta busca den su amigonan? Prome cos cu bo tin cu haci ta studia Bijbel regularmente. Asina lo bo haya “conocemento exacto di su boluntad” y lo bo haya sa con pa agrad’e den tur loke bo ta haci. Segun cu bo ta haya mas conocemento exacto di Jehova y ta siña tocante su normanan husto, bo fe den dje lo crece y e lo hala mas cerca di bo.—Colosensenan 1:9, 10.

Kico bo por haci pa bo bira amigo di Dios? Ya nos a trata e pasonan cu bo mester dal pa bo por tin un bon amistad cu Dios:

1. Conoce y uza e nomber di Dios, Jehova.

2. Papia regularmente cu Dios door di haci oracion na dje y door di studia Bijbel.

3. Semper haci loke e ta pidi nos.

Bo ta haya cu bo ta tumando e pasonan necesario aki pa hala cerca Dios? Of bo ta sinti cu bo tin cu traha riba algun di e pasonan aki? Ta di compronde cu esaki ta exigi esfuerso, pero pensa riba e beneficionan cu lo bo haya.

Jennifer, di Merca, a bisa: “Tur esfuerso cu nos haci pa mehora nos relacion cu Dios ta bale la pena. E amistad aki ta trece hopi bendicion: Nos lo haya mas confianza den Dios, nos lo compronde su personalidad mihor, y mas cu tur cos, nos lo stim’e mas. No tin nada mihor cu e amistad aki!”

Si bo kier tin un bon relacion cu Dios, testigonan di Jehova gustosamente lo yuda bo. Nan ta duna bo les di Bijbel gratis. Tambe bo ta bonbini na nan reunionnan semanal na e Salon di Reino mas cerca di bo cas. Eynan bo por disfruta di asociacion cu personanan cu ta considera nan amistad cu Dios como algo hopi valioso.a Si bo haci tur e cosnan aki, cu tempo bo tambe lo por bisa mescos cu e salmista: “Pa loke ta ami, ta bon pa mi keda cerca di Dios.”—Salmo 73:28.