Watchtower BIBLIOTHEEK ONLINE
Watchtower
BIBLIOTHEEK ONLINE
Papiamento (Aruba)
  • BIJBEL
  • PUBLICACION
  • REUNION
  • w14 15/6 pag. 8-11
  • Con Nos Por Yuda un Ruman Cu A Divorcia?

No tin video disponibel pa loke bo a scoge.

Sorry, nos no por a play e video.

  • Con Nos Por Yuda un Ruman Cu A Divorcia?
  • E Toren di Vigilancia Anunciando e Reino di Jehova Dios 2014
  • Subtema
  • Articulonan Similar
  • UN OLA DI EMOCION NEGATIVO
  • E LUCHA PA RECOBRA STABILIDAD EMOCIONAL
  • SINTIMENTO DI SOLEDAD Y RECHASO
  • Despues di Divorcio, Bida No A Caba
    E Toren di Vigilancia Anunciando e Reino di Jehova Dios 2013
  • Diborcio Ta e Solucion?
    Spierta! 2004
E Toren di Vigilancia Anunciando e Reino di Jehova Dios 2014
w14 15/6 pag. 8-11

Con Nos Por Yuda un Ruman Cu A Divorcia?

Un hende muher ta consola un ruman cristian divorcia

Casi sigur bo conoce un of mas hende divorcia, pasobra divorcio a bira algo hopi comun. Por ehempel, un estudio cu nan a haci na Polonia a revela cu hende di mas o menos 30 aña di edad cu tin entre tres pa seis aña casa ta esnan cu tin mas chens di divorcia. Pero no ta hende di e edadnan ey so ta divorcia.

De echo, na Aruba, segun Oficina Central di Estadistica (CBS), entre 2004 pa 2011, como promedio, pa cada 100 matrimonio cu a tuma luga tabatin 82 divorcio. Y mescos ta tumando luga den hopi otro pais.

UN OLA DI EMOCION NEGATIVO

Kico divorcio ta trece cu ne? Un consehero versa riba tereno di matrimonio na Oost Europa a bisa: “Divorcio ta oficialisa loke a tuma luga caba: kiebra di un relacion y e separacion cu esey ta trece cu ne, algo cu ta causa hopi dolor emocional.” El a agrega: “Hopi biaha, [divorcio] ta lanta un ola di emocion fuerte manera rabia, duele, decepcion, desesperacion y berguensa.” Hasta e por pone e hendenan afecta pensa di comete suicidio. “Na momento cu hues duna e veredicto di divorcio, e siguiente fase ta cuminsa. Ora un persona divorcia ta lucha cu sintimentonan di soledad y ta sinti un bashi den su bida, e por cuminsa puntra su mes: ‘Awor cu mi a divorcia, ken mi ta realmente? Ki sentido mi bida tin?’”

Ewaa ta corda con el a sinti su mes algun aña pasa: “Despues di mi divorcio, mi tabata sinti masha berguensa ora mi bisiña- y coleganan di trabou tabata yama mi ‘un muher divorcia.’ Mi tabata hopi rabia. Mi a keda mi so cu dos yiu chikito; mi mes tabata mama y tata alabes.” Adam, kende tabata un anciano respeta den congregacion pa 12 aña largo, a bisa: “Mi a perde asina tanto respet propio cu tin biaha mi ta yena di rabia y ta haya gana di aleha mi mes for di tur hende.”

E LUCHA PA RECOBRA STABILIDAD EMOCIONAL

Varios hende divorcia ta preocupa tocante nan futuro y kisas ta lucha añanan largo pa recobra nan stabilidad emocional despues di nan divorcio. Talbes nan ta pensa cu niun otro hende no ta interesa den nan. Un periodista specialisa riba e tereno di divorcio a bisa cu awor nan tin cu “cambia nan custumbernan y siña con pa trata cu nan problemanan nan so.”

Stanisław ta corda: “Ora nos a divorcia, mi ex esposa no tabata kier pa mi wak mi dos yiu muhernan chikito. Esey a pone mi cuminsa sinti cu niun hende no tabata interesa mas den mi y cu hasta Jehova a bandona mi. Mi a perde tur gana di biba. Cu tempo mi a realisa con ekiboca mi tabata.” Wanda, un ruman divorcia cu tambe tabata sinti su mes insigur tocante su futuro, a bisa: “Mi tabata convenci cu lo a yega un dia cu niun otro hende, ni mi rumannan cristian, lo no a mustra interes mas den mi of den mi yiunan. Sinembargo, awor mi ta mira cuanto e rumannan a yuda nos y a apoya mi den mi esfuersonan pa lanta mi yiunan den e berdad.”

E comentarionan aki ta mustra cu algun hende divorcia ta keda afecta pa un ola di emocion negativo. Kisas nan ta perde nan balor propio y pensa cu nan no merece atencion di otro hende. Y nan por cuminsa enfoca mucho riba fout di otro hende. Como resultado, nan por cuminsa haya nan congregacion friu y indiferente. No obstante, experencianan manera di Stanisław y Wanda ta mustra cu personanan divorcia cu tempo ta realisa cu nan rumannan den fe realmente ta interesa den nan. En realidad, den hopi caso e rumannan a resulta di ta un gran yudansa aunke esey no tabata bisto na principio.

SINTIMENTO DI SOLEDAD Y RECHASO

Maske cuanto nos haci nos best, nos tin cu corda cu un ruman divorcia por sintie su so de bes en cuando. Specialmente ruman muhernan divorcia por kere cu casi niun hende no ta interesa den nan. Alicja ta admiti: “Ya mi tin ocho aña divorcia. Pero te ainda mi ta sinti tin biaha cu mi no ta bal nada. Na momentonan asina mi ta haya gana di isola mi mes y sinta yora den un huki.”

Aunke e sintimentonan aki ta normal pa un persona divorcia, Bijbel ta conseha nos pa no isola nos mes. Si nos bay contra e conseho aki, nos lo ta rechasando “sabiduria [practico].” (Prov. 18:1) Sinembargo, un persona cu ta lucha cu sintimentonan di soledad mester compronde si cu no ta sabi pa constantemente e busca conseho of consuelo cerca un persona di e sexo opuesto. Si e ta haci esey, sintimentonan romantico inapropia por cuminsa desaroya entre nan dos.

Nos rumannan divorcia por haya nan cu un lama di emocion negativo, manera miedo pa cu futuro, sintimento di soledad of hasta rechaso. Mirando cu e sintimentonan aki ta normal y na mes momento dificil pa supera, laga nos imita Jehova y duna e rumannan aki tur nos sosten. (Sal. 55:22; 1 Ped. 5:6, 7) Nos por ta sigur cu nan lo keda contento cu cualkier yudansa cu nos por duna nan. Nan lo mira cu den e congregacion cristian nan por conta cu berdadero amigo!—Prov. 17:17; 18:24.

a A cambia algun nomber.

Un Punto di Bista Balansa di Divorcio

Sirbidornan di Jehova ta mira matrimonio como un asunto hopi serio, pasobra nos ta basa nos mes riba loke e Scritura ta bisa. Por ehempel, na Malakias 2:16, Dios ta bisa bon cla cu e “ta odia divorcio.” E unico base biblico pa divorcio ta inmoralidad sexual. Lo ta un eror grave anto pa pensa di divorcia sin base biblico, kisas cu e intencion di casa cu un otro persona.—Gen. 2:22-24; Deu. 5:21; Mat. 19:4-6, 9.

Pero ora un ruman divorcia pasobra su casa a bira infiel, e rumannan di congregacion lo dun’e nan sosten. Nan ta imita Jehova haciendo tur loke nan por pa yuda “e hustonan”, cu pa un tempo tin un “curason kibra.”—Sal. 34:15, 18; Isa. 41:10.

CON BO POR YUDA?

Kico bo por haci pa yuda un ruman cu tin e sintimentonan manera esnan menciona den e articulo aki? Wel, laga nos wak kico Bijbel ta bisa y mira con cristiannan leal a duna yudansa practico.

Scucha cu atencion. (Prov. 16:20, 23)

Ta comprendibel cu un ruman kisas lo no tin masha gana di papia tocante e detayenan cu a hiba na su divorcio. Y hasta ora un hende saca tur su frustracion, esey kisas lo no alivia su ansiedad ni yud’e cu nada. (Prov. 12:25; Rom. 12:15) Michał, kende a duna Adam sosten, menciona anteriormente, ta di acuerdo cu bo por scucha cu compasion y discernimento sin tin nodo di sa tur detaye. El a bisa: “Mi a purba di yuda Adam compronde cu den un momento di debilidad, domina pa su emocionnan negativo, lo e por conta mi algo, sin cu e tabata kier, cu despues e ta lamenta.” Asina Michał a laga Adam mira cu e no tabata busca pa sa tur detaye. Toch el a scucha como un berdadero amigo. Algo cu por yuda un ruman cu a divorcia ta un saludo simpel, sea prome of despues di reunion, manera por ehempel: “Con ta bayendo cu bo? Mi ta imagina cu no ta facil. Bo por conta cu mi.”

Mustra interes. (Flp. 2:4)

Mirosław ta bisa: “Ami cu mi esposa tabata saca tempo pa yuda un ruman muher cu a divorcia. Por ehempel, nos a drecha slot di su porta di cas y tambe nos a hib’e dokter.” Ta cosnan cu por parce chikito, pero nan tabata practico y di gran yudansa. Cu yudansa di e pareha aki, pocopoco pero sigur e ruman muher a recobra su stabilidad emocional. Mas despues, el a hasta cuminsa traha pionero y su yiu muher di 11 aña a batisa.

Un pareha ta mustra interes personal den un ruman cristian divorcia

Sigur’e cu Jehova ta compronde su situacion.

Si un persona ta sinti cu e no ta bal nada, bo por sigur’e cu Dios ta balora tur Su sirbidornan. Sin duda, nos ta “bal mas cu hopi mofi”; den su bista, nos ta unico y di gran balor. (Mat. 10:29-31) Jehova “ta sondea curason” y por compronde pa rumannan divorcia. Lo e no bira lomba pa niun di su fiel sirbidornan. (Prov. 17:3; Sal. 145:18; Heb. 13:5) Pesey, ora bo ta mustra interes den bo ruman, lag’e compronde cu Dios ta aprecia su amor pa e berdad y su esfuersonan pa apoya adoracion berdadero.—Flp. 2:29.

Anim’e p’e pega na e congregacion.

Algun ruman tin problema pa asisti na reunion ora nan no por controla nan emocionnan. Pero ta net e reunionnan aki ta “edifica,” fortalece y anima nan. (1 Cor. 14:26; Sal. 122:1) Pesey, ta masha importante pa ancianonan ta pendiente di e rumannan aki. Wanda, menciona anteriormente, a bisa: “Ainda nos ta corda e cariño cu nan tabatin pa nos.”

Anim’e p’e fortalece su relacion cu Dios mediante oracion, estudio personal y meditacion. (Sant. 4:8)

Aunke Jehova ta todopoderoso y ta biba den cielo, e ta presta atencion na hende ‘cu ta humilde y cu tin un spirito kibra’ y cu ta mustra respet pa su Palabra. Corda e ruman divorcia di e gran berdad aki y enfatisa con cada un di nos ta haya yudansa ora nos hala mas cerca Dios mediante oracion y estudio personal.—Isa. 66:2.

Invit’e pa sali cu bo den sirbishi di veld of pa prepara hunto pa e reunionnan.

Dos ruman cristian ta traha hunto den e trabou di predica

Esaki lo yuda e ruman divorcia haya mas confianza segun cu e ta sigui padilanti den bida. Marta, kende a yuda un ruman muher fiel cu a keda hopi kibra despues di su divorcio, a bisa: “Regularmente nos ta traha hunto den sirbishi. Ora nos logra nos metanan, nos ta sinti nos contento. Tin biaha nos ta prepara hunto pa reunion y despues cushina algo dushi pa come.”

    Publicacion na Papiamento (Aruba) (2002-2024)
    Log Out
    Log In
    • Papiamento (Aruba)
    • Comparti
    • Preferencianan
    • Copyright © 2025 Watch Tower Bible and Tract Society of Pennsylvania
    • Condicionnan di Uzo
    • Maneho di Privacidad
    • Configuracion di Privacidad
    • JW.ORG
    • Log In
    Comparti