PREGUNTA CU BIJBEL TA CONTESTA

Dicon nos mester haci oracion?

Jehova Dios kier pa nos sinti nos mes liber pa papia regularmente cu ne tocante nos preocupacionnan. (Lucas 18:1-7) E ta scucha nos pasobra e ta interesa den nos. Como cu nos Tata celestial ta invita nos bondadosamente pa haci oracion, bo no ta kere cu nos mester acepta su invitacion?—Lesa Filipensenan 4:6.

Oracion no ta djis un medio pa pidi yudansa. Mas bien, oracion ta yuda nos hala cerca Dios. (Salmo 8:3, 4) Ora nos expresa nos sintimentonan na Dios cu regularidad, nos ta crea un amistad mas cera cu ne.—Lesa Santiago 4:8.

Con nos mester haci oracion?

Ora nos ta haci oracion, Dios no kier pa nos uza palabra grandi of ripiti oracion for di cabes. Tampoco e no ta exigi pa nos ta den un posicion special. Jehova ta invita nos pa haci oracion di curason. (Mateo 6:7) Por ehempel, den Israel di antiguedad, Ana a haci oracion tocante un problema di famia cu a traha hopi riba dje. Despues, ora cu su angustia a cambia den goso, el a haci un oracion di curason pa gradici Dios.—Lesa 1 Samuel 1:10, 12, 13, 26, 27; 2:1.

Esta un privilegio maraviyoso nos tin! Nos por acerca nos Creador cu tur nos preocupacionnan. Tambe nos por alab’e y gradicie pa tur loke e ta haci pa nos. Laga nos probecha anto di e privilegio precioso aki.—Lesa Salmo 145:14-16.