Nos ta bibando den “temponan critico, dificil pa trata cu ne.” (2 Timoteo 3:1) Hopi hende ta luchando pa motibo di crisis financiero, kibramento di famia, guera, epidemia, desasternan natural y otro calamidadnan cu hende ta causa. Ademas, hende tin hopi otro preocupacion: E pipita cu mi tin ta cancer? Con mundo lo ta ora mi nietonan bira grandi?

No ta tur tipo di preocupacion y stress ta malo. Ta normal cu nos ta haya stress prome cu nos haci un test medico, examen, presentacion of prome cu nos bay un entrevista pa trabou. Un temor saludabel por yuda nos evita peliger. Pero si nos ta preocupa constantemente pa tur cos, esey ta perhudica nos. Algun estudio haci recientemente cu mas cu 68.000 adulto a mustra cu hasta un tiki ansiedad por aumenta e riesgo di morto prematuro. Pues, cu rason Hesus a puntra: “Cua di boso, ni maske cuanto e ansha, por rek su bida un crenchi?” En berdad, preocupacion no ta alarga bida di niun hende. Pesey, Hesus a conseha: “Stop di ... ansha.” (Mateo 6:25, 27) Bo ta kere cu esey ta posibel?

Si, pa nos stop di worry of ansha, nos mester di tres cos: Nos mester uza sabiduria na un manera practico, nos mester di berdadero fe den Dios y nos mester un speransa confiabel. Hasta si awor nos no ta enfrenta situacionnan dificil, esaki por cambia den futuro. Pesey, laga nos wak con sabiduria, fe y speransa a yuda Paul, Janet y Alona.

Paul, kende ta un esposo y tata di dos yiu, a bisa: “Despues cu inflacion severo a afecta nos pais, cuminda a bira hopi caro y scars. Nos tabata para den rij pa oranan largo, pero hopi biaha cuminda tabata caba prome cu nos yega na beurt. Hende tabata bira flaco flaco pa motibo di hamber y algun tabata cay flauw riba caya. Prijs di cosnan basico a subi asina hopi cu bo tabatin mester di miyones, despues biyones pa por cumpra e cosnan aki. Finalmente, nos placa a perde tur su balor. Mi a perde mi pension, seguro y tur mi placa na banco.”

Paul tabata consciente cu e mester a uza “sabiduria” pa su famia sobrevivi. (Proverbionan 3:21) El a splica: “Mi tabata un electricien, pero mi a acepta cualkier trabou cu mi por a haya, maske nan tabata paga mi hopi menos. Tin hende tabata paga mi cu cuminda of articulonan pa cas. Si nan a paga mi cu cuater habon, mi tabata uza dos y bende dos. Asina mi a logra haya 40 puyito. Ora nan a crece, mi a bende nan y a cumpra 300 mas. Despues, mi a cambia 50 galiña pa dos saco di hariña di funchi di 50 kilogram, y asina mi famia y otro famianan tabatin cuminda pa hopi tempo.”

Ademas, Paul tabata sa cu e mihor cos cu un hende por haci ta confia den Dios. Ora nos haci loke Dios ta bisa, e ta yuda nos. Encuanto e necesidadnan basico di bida, Hesus a bisa: “Stop di ta demasiado preocupa, pasobra ... boso Tata sa cu boso tin mester di e cosnan aki.”—Lucas 12:29-31.

Lamentablemente, e enemigo mas grandi di Dios, esta Satanas, ta pone hende rond mundo kere cu cos material ta loke ta mas importante. Hende ta desespera pa cosnan cu realmente ta necesario, pero tambe pa cosnan cu no ta echt necesario, y nan ta mata nan bichi pa haya cosnan cu eigenlijk nan no tin mester. Hopi hende ta hinca nan mes den debe y ta siña cu “e fiado ta bira esclavo di esun cu ta fi’e.”—Proverbionan 22:7.

Tin hende ta tuma decisionnan cu por causa daño. Por ehempel, Paul a conta: “Hopi di mi bisiñanan a laga nan famia y amigonan pa busca un mihor porvenir den exterior. Tin di nan a bay sin cu nan papelnan di inmigracion tabata na ordo y nan no por a haya trabou. Hopi biaha nan mester a sconde pa polis y drumi riba caya. Nan no a duna Dios oportunidad pa yuda nan. Pero anos si tabata determina pa enfrenta problema financiero hunto como famia y pa laga Dios yuda nos.”

HESUS SU CONSEHO A YUDA NOS

Paul a sigui conta: “Hesus a bisa: ‘Nunca ansha pa e dia di mañan, pasobra e dia di mañan lo tin su mes inkietudnan. Cada dia tin su mes problemanan.’ Pues tur dia mi tabata pidi Dios pa ‘duna nos awe nos pan di cada dia’ pa nos por sobrevivi. Y el a yuda nos precies manera Hesus a priminti. No ta semper nos a haya loke nos tabata gusta. Un biaha, mi tabata para den rij pa cumpra cuminda sin sa kico nan tabatin. Ora mi tabata casi yega na beurt, mi a mira cu nan tabatin yoghurt. Mi no gusta yoghurt. Pero e anochi ey nos mester a com’e pasobra esey so tabatin. Mi ta gradici Dios cu durante tur e tempo ey, mi famia nunca a bay drumi cu hamber.a

Awor nos situacion financiero a mehora. Pero e crisis economico cu nos a enfrenta a siña nos cu e cos di mas importante ta pa pone confianza den Dios, asina nos lo preocupa menos. Jehovab semper lo yuda nos si nos sigui haci su boluntad. Nos a wak cu e palabranan na Salmo 34:8 ta berdad: ‘Purba y mira cu SEÑOR ta bon; bendiciona ta e hende cu ta tuma refugio den dje!’ Como resultado, nos no tin miedo di bolbe enfrenta un situacion economico dificil.

Nos ta compronde bon awor cu loke un hende tin mester pa sobrevivi no ta trabou ni placa, sino cuminda. Nos ta warda ansiosamente pa e cumplimento di Dios su promesa: ‘Lo tin abundancia di maishi [riba] e Tera.’ Mientrastanto, ‘si nos tin cuminda, paña y un dak riba nos cabes, nos lo keda contento cu e cosnan aki.’ Y e siguiente palabranan di Bijbel tambe ta fortalece nos: ‘Laga boso manera di biba ta liber di amor pa placa, y keda contento cu loke boso tin. Pasobra Dios a bisa: “Hamas lo mi bandona bo, y hamas lo mi laga bo desampara.” Pesey nos por ta yen di animo y bisa: “Jehova ta mi ayudante; lo mi no tin miedo.”’”c

Si un hende kier “cana cu Dios” mescos cu Paul y su famia, e mester tin berdadero fe. (Genesis 6:9) Sea cu nos ta enfrentando un crisis financiero awor of si nos enfrenta uno den futuro, e fe y sabiduria cu Paul a demostra ta siña nos varios les importante.

Pero kico nos por haci si ta problema di famia ta pone nos preocupa?

Janet a bisa: “Un poco tempo despues cu mi tata a fayece, mi esposo a bisa mi cu e tin un otro muher. No a tarda mucho cu el a paketa su maleta y a bay laga ami cu nos yiunan sin bisa ayo.” Aunke Janet a haya un trabou, su salario no tabata yega pa nan por a keda cu nan cas. Pero no ta preocupacion financiero so e tabatin. El a sigui bisa: “Tur e responsabilidadnan nobo cu awor mi so tabatin cu carga tabata pone mi sinti hopi ansha. Mi tabata sinti mi culpabel cu mi no por a duna mi yiunan loke otro mayornan tabata duna nan yiunan. Y te ainda mi ta worry kico otro hende ta pensa di ami cu mi yiunan. Acaso nan ta puntra nan mes si mi a haci tur loke mi tabata por pa salba mi matrimonio?”

Kico ta yuda Janet? Oracion ta yud’e domina su sintimentonan y mehora su relacion cu Dios. Janet a bisa: “Anochi ta e momento di mas dificil pasobra ta keto keto y mi no por stop di preocupa. Oracion y lesamento di Bijbel ta yuda mi pega soño. Un di mi textonan faborito ta Filipensenan 4:6 y 7: ‘No sea ansha tocante nada; mas bien, den tur cos, pa medio di oracion y suplica hunto cu gradicimento, laga Dios sa kico ta boso peticionnan; y e paz di Dios cu ta surpasa tur comprondemento lo proteha boso curason y boso mente.’ Mi a pasa hopi anochi haciendo oracion, y Jehova su paz a trankilisa mi.”

Hesus su palabranan consolador tocante oracion den e Sermon Riba Sero ta aplica na tur tipo di ansiedad: “Boso Tata, sa kico boso tin mester hasta prome cu boso pidie.” (Mateo 6:8) Y ta hopi importante pa nos haci esey, pasobra oracion ta e manera principal cu bo por “hala cerca Dios.” Kico lo ta e resultado? “E lo hala cerca [bo].”—Santiago 4:8, BS.

Si, oracion no solamente ta yuda nos sinti mihor pasobra nos ta desahoga nos mes, sino tambe Jehova, kende “ta scucha oracion”, ta actua na fabor di tur esnan cu tin fe den dje. (Salmo 65:2) Ta pesey Hesus a siña su siguidornan pa “haci oracion sin entrega.” (Lucas 18:1) Nos mester sigui pidi Dios pa su guia y yudansa, cu e confianza cu lo e recompensa nos. Nunca nos no mester duda cu e kier y por actua. Ora nos ta “haci oracion constantemente” cu e confianza aki, nos ta demostra cu nos tin berdadero fe.—1 Tesalonicensenan 5:17.

KICO FE REALMENTE TA ENCERA?

Fe ta encera “siña conoce” Dios como persona. (Juan 17:3) Con nos por haya berdadero fe? Wel, nos tin cu siña conoce Dios su manera di pensa mediante Bijbel. Ora nos haci esey, nos ta siña cu e ta mira cada un di nos y kier yuda nos. Pero, no ta suficiente pa djis siña un poco tocante Dios, nos mester tin un bon relacion cu ne tambe. Pero mescos cu nos no por forma un amistad cu un hende di un dia pa otro, nos no por forma un amistad cu Dios di awe pa mañan. Cu tempo nos “fe ta sigui crece” segun cu nos ta siña mas tocante dje, “ta haci loke ta agrad’e” y segun cu nos ta experencia su yudansa. (2 Corintionan 10:15; Juan 8:29) E tipo di fe aki ta loke ta yuda Janet.

Janet a sigui conta: “Loke realmente a haci mi fe mas fuerte ta ora mi a mira con Jehova tabata yuda mi constantemente. Hopi biaha nos ta enfrenta inhusticia cu ta parce imposibel pa soporta. Pero semper Jehova a percura un salida pa nos cu ami nunca lo por a pensa riba dje. Ora mi gradicie, mi ta corda cuanto cos el a haci pa mi. Semper el a yuda nos net na ora. Y el a duna mi berdadero amigo cu ta sirbie fielmente. Semper nan ta cla pa yuda mi y ta un bon ehempel pa mi dos yiunan.a

Mi sa pakico Jehova ta bisa na Malakias 2:16: ‘Mi ta odia divorcio.’ Pasobra esaki ta un traicion sumamente grandi pa e casa fiel. Aunke mi casa a bay laga mi hopi aña pasa, ainda mi sa sinti mi mi so y cu mi no ta bal nada. Ora mi sinti asina, mi ta purba di haci algo pa yuda un otro persona, y esey semper ta pone mi sinti mihor.” Pues, door di aplica e principio biblico pa no isola su mes, Janet ta preocupa menos.b—Proverbionan 18:1.

Janet a bisa: “Loke mas ta consola mi ta e echo cu mi sa cu Dios ta un tata di werfano y ‘un defensor di muhénan ku a pèrdè nan esposo.’ E lo no haci loke mi esposo a haci, nunca lo e bandona nos.” (Salmo 68:5, BPK) Janet sa cu Dios no ta pone nos na prueba “cu cos malo.” Al contrario, “generosamente” e ta duna sabiduria na “tur hende” y ta duna nos “poder supremo” pa yuda nos trata cu nos ansiedadnan.—Santiago 1:5, 13; 2 Corintionan 4:7, BPK.

Pero kico si nos ta preocupa pa cosnan cu por pone nos bida na peliger?

Alona a bisa: “Ora e alarma cuminsa zona, mi curason ta cuminsa bati duro duro y mi ta core bay na un shelter bou tera. Y maske mi ta den e shelter, toch mi ta keda ansha. Pero ora mi no tin caminda di sconde, mi ta ansha mas ainda. Un biaha, mientras mi tabata cana riba caya, mi a cuminsa yora y mi no por a hala rosea. A dura varios ora pa mi calma. Despues e alarma a cuminsa zona atrobe.”

No ta guera so ta causa peliger pa bida di hende. Por ehempel, si bo haya e noticia cu abo of un ser keri tin un maleza cu por ta mortal, esey por cay manera un bom. Y pa otro hende miedo di loke por pasa den futuro por causa ansiedad. Nan ta preocupa y ta puntra nan mes: Nos yiunan of yiu di nos yiunan lo tin cu biba den un mundo caminda tin guera, crimen, contaminacion, cambio di clima y epidemia? Kico por yuda nos cu e tipo di ansiedadnan ey?

Un cos malo por sosode, pesey “un hende prudente ta mira maldad y ta sconde.” (Proverbionan 27:12) Mescos cu nos ta purba di proteha nos salud fisico, nos por tuma paso pa proteha nos salud mental y emocional. Por ehempel, entretenimento violento y hasta noticianan teribel cu nos ta mira ta ansha nos y nos yiunan mas ainda. Pesey lo ta bon pa nos evita di expone nos mes innecesariamente na e cosnan ey. Pero esey no kiermen cu nos ta sconde pa realidad. Nunca no tabata Dios su intencion pa nos yena nos mente cu e cosnan malo ey. Mas bien, e kier pa nos yena nos mente cu “tur loke ta berdadero, ... husto, ... puro, [y] tur loke ta promove stimacion.” Si nos haci esey, “e Dios di paz” lo duna nos paz mental.—Filipensenan 4:8, 9.

ORACION TA IMPORTANTE

Bijbel ta bisa nos pa “no neglisha oracion.” (1 Pedro 4:7) Nos por pidi Dios pa yuda nos y pa duna nos sabiduria y curashi pa trata cu un situacion lo mihor posibel. Claro cu nos mester tin berdadero fe, esta, confianza cu “[Dios] ta tende kico cu nos pidie.” (1 Juan 5:15) Esey ta loke ta yuda nos ora nos tin ansiedad.

Bijbel ta splica cu ta Satanas, y no Dios, ta “e gobernante di e mundo aki” y cu “henter mundo ta den poder di e Malbado.” (Juan 12:31; 1 Juan 5:19) Pesey, ora Hesus a siña nos con pa haci oracion, el a bisa cla y raspa: “Libra nos di e Malbado.” (Mateo 6:13) Alona a sigui conta: “Cada biaha cu e alarma cuminsa zona, mi ta pidi Jehova yuda mi domina mi sintimentonan. Ademas, mi esposo stima ta yama mi y ta haci oracion hunto cu mi. Oracion ta echt yuda.” Ta manera Bijbel ta bisa, Jehova “ta serka esnan ku t’invok’É serka tur ku ta yam’É di kurason.”—Salmo 145:18, BPK.

NOS SPERANSA PA FUTURO

Den su Sermon Riba Sero, Hesus a siña su discipelnan pa haci oracion na e siguiente manera: “Laga bo Reino bin.” (Mateo 6:10) E Reino di Dios lo elimina tur ansiedad cu ta causa sufrimento pa semper. Mediante Hesus, e “Prins di Paz”, Dios lo pone “gueranan stop te na e fin di Tera.” (Isaias 9:6; Salmo 46:9) “[Dios] lo husga entre hopi pueblo ... Nacion lo no lanta spada contra nacion, y nunca mas nan lo no train pa guera ... Y ningun hende lo no spanta nan.” (Mikeas 4:3, 4) Famianan feliz “lo traha cas y biba den nan; tambe nan lo planta cunucunan di wendruif y come nan fruta.” (Isaias 65:21) “Y ningun habitante lo no bisa: ‘Mi ta malo.’”—Isaias 33:24.

Awe, a pesar di tur medida cu un persona tuma, no ta tur ora ta posibel pa evita “suceso imprevisto” of pa evita di ta na e luga robes y na e momento robes. (Eclesiastes 9:11, NW) Manera ta e caso pa siglonan caba, guera, violencia y maleza ta sigui causa morto di bon hende. Ki speransa tin pa e hendenan ey?

Un cantidad incontabel di hende lo bolbe biba. Pa awor, nan ta den Dios su memoria perfecto te dia cu “tur esnan cu ta den graf ... lo sali afo.” (Juan 5:28, 29) Papiando tocante resureccion, Bijbel ta sigura nos: “Nos tin e speransa aki manera un anker pa nos alma; e ta sigur y tambe firme.” (Hebreonan 6:19) Ademas, Dios “a duna tur hende un garantia di esaki ya cu el a [lanta Hesus] for di morto.”—Echonan 17:31.

Por lo pronto, hasta esnan cu ta purba di agrada Dios lo enfrenta situacionnan cu lo causa ansiedad. Loke a yuda Paul, Janet y Alona ta e echo cu nan a aplica consehonan practico, a hala cerca Dios pa medio di oracion y a fortalece nan fe den e speransa cu Bijbel ta duna pa futuro. Laga “e Dios cu ta duna speransa yena boso cu pleno goso y paz pa medio di boso confianza den dje” mescos cu el a haci den caso di Paul, Janet y Alona.—Romanonan 15:13.