Bo a yega di puntra bo mes: Kico ta pasa realmente ora un hende muri? Nos sernan keri cu a muri ta sufriendo? Nos lo mira nan algun dia? Con nos por ta sigur? Laga nos wak kico Bijbel ta siña realmente tocante: (1) e estado di e mortonan y (2) e speransa cu Bijbel ta duna.

Den ki estado e mortonan ta?

WAK KICO BIJBEL TA BISA: “E bibonan sa cu nan lo muri, ma e mortonan no sa nada, ni nan no tin recompensa mas, pasobra ningun hende no ta corda mas riba nan. Tur loke bo man haya pa haci, hacie cu tur bo forsa; pasobra no tin ni actividad ni planificacion ni sabiduria den Seol,a caminda bo ta bay.”—Eclesiastes 9:5, 10.

Cu poco palabra, Graf ta unda hende ta bay ora nan muri; esaki ta un luga simbolico of estado den cua un hende no por haci nada mas. Nan no por corda, sinti, tende ni mira. Kico Job tabata pensa cu e Graf ta? Den un dia el a perde tur su cosnan material, tur su yiunan y despues el a haya blufein na henter su curpa, locual tabata hopi doloroso. El a suplica Dios: “O cu bo lo a sconde mi den Seol [“Fierno”, Catholic Douay Version].” (Job 1:13-19; 2:7; 14:13) Bo ta mira claramente cu Job no a pensa cu e Graf ta un fierno di candela caminda e lo sufri mas ainda. Mas bien, el a pensa cu lo e haya alivio eyden.

Un otro manera cu nos por haya sa e estado di e mortonan ta door di lesa tocante e ocho resureccionnan cu nos ta haya den Bijbel.—Wak e cuadro “Ocho Resureccion Cu A Tuma Luga den Tempo Biblico.”

Ora e personanan ey a resucita, ningun di nan no a bisa cu nan a bay cielo ni un luga di tormento. Si esey tabata e caso, bo no ta kere cu nan lo a conta hende loke nan a experencia? Y bo no ta kere cu e relatonan ey lo ta skirbi den Bijbel pa tur hende lesa? Pero e echo cu Bijbel no ta menciona nada di esey ta mustra cu e ocho personanan ey no tabatin nada di conta ora nan a resucita. Dicon no? Pasobra nan tabata inconsciente, comosifuera morto na soño. Si, Bijbel tin biaha ta compara morto cu soño pa yuda nos compronde den ki estado e mortonan ta. Por ehempel, Bijbel ta bisa cu tanto David como Esteban, kendenan tabata sirbidornan fiel di Dios, “a bay sosega.”—Echonan 7:60; 13:36.

Ki speransa tin anto pa e mortonan? Nan por lanta for di morto?

Nan por biba atrobe?

WAK KICO BIJBEL TA BISA: “Lo yega e ora cu tur esnan cu ta den graf lo tende [Hesus] su stem y lo sali afo.”—Juan 5:28, 29.

Pues, Hesus a profetisa cu bou di su reinado tur Graf lo bira bashi. Fernando, kende nos a menciona den e articulo anterior, a bisa: “E prome biaha cu mi a lesa Juan 5:28 y 29, mi a keda hopi impresiona. Esaki a duna mi berdadero speransa, y pesey mi a cuminsa wak futuro na un manera positivo.”

Job, un homber fiel, tabata sa cu si e muri, Dios lo resucit’e. Ta pesey el a bisa: “Si hende por bolbe biba despues di morto ami ta dispuesto pa warda [den Graf], maske kon mizerabel mi bida ta. E dia ei lo Bo yama mi i lo mi rospondé.”—Job 14:14, 15, BPK.

Marta, e ruman muher di Lazaro, tabata sa cu si un hende muri e por resucita. Dicon nos sa esey? Pasobra despues cu Lazaro a muri, Hesus a bis’ele: “Bo ruman lo lanta for di morto”, y Marta a contest’e: “Mi sa cu lo e lanta den e resureccion riba e ultimo dia.” Despues Hesus a bis’e: “Ami ta e resureccion y e bida. Esun cu pone fe den mi, maske e muri, lo bolbe biba.” (Juan 11:23-25) Ora el a caba di bisa esey, el a resucita Lazaro di biaha. E relato emocionante ey ta duna nos un idea con maraviyoso lo ta ora miyones di hende resucita den futuro.

Tin hende cu lo haya resureccion pa bay cielo?

WAK KICO BIJBEL TA BISA: E Palabra di Dios ta mustra cu tin un diferencia entre e resureccion di Hesus y e ocho otro resureccionnan. E ocho personanan cu a haya resureccion no a bay niun caminda; nan a keda aki riba Tera. Pero Bijbel ta bisa tocante e resureccion di Hesus: “Hesucristo ... a bay cielo y awor e ta na man drechi di Dios.” (1 Pedro 3:21, 22) Pero Hesus ta e unico persona cu lo a haya resureccion pa biba den cielo? Dado momento, Hesus a bisa su apostelnan: “Ora mi bay y prepara un luga pa boso, lo mi bin bek y ricibi boso cerca mi, pa caminda mi ta, boso tambe por ta.”—Juan 14:3.

Ora Cristo a bay cielo, el a prepara un luga pa su discipelnan. Cuanto persona lo bay cielo? Revelacion 14:1 y 3 ta bisa cu ta 144.000 hende. Pero kico nan lo bay haci eynan?

Nan lo bay tin hopi trabou. Bijbel ta bisa nos: “Feliz y santo ta esnan cu tin parti den e prome resureccion; e di dos morto no tin autoridad riba nan, ma nan lo ta sacerdote di Dios y di Cristo, y nan lo reina como rey hunto cu ne pa e 1.000 añanan.” (Revelacion 20:6) Esnan cu haya resureccion pa biba den cielo lo ta rey y sacerdote hunto cu Cristo, y nan lo goberna e Tera.

Ken mas lo haya resureccion?

WAK KICO BIJBEL TA BISA: Nos por lesa e siguiente palabranan di apostel Pablo: “Mi tin e speransa aki den Dios, e mesun speransa cu e hendenan aki tambe tin, esta, cu lo bay tin un resureccion di tanto hende husto como inhusto.”—Echonan 24:15.

Ken e hendenan “husto” cu Pablo a papia di dje ta? Laga nos wak un ehempel. Na fin di Daniel su bida, un angel a bis’e: “Lo bo bay sosega y lo lanta pa ricibi e parti cu ta toca bo na e fin di dianan.” (Daniel 12:13) Pero na unda Daniel lo lanta for di morto? “E hustonan lo hereda e Tera, y lo biba den dje pa semper.” (Salmo 37:29) Y Hesus a profetisa: “[Feliz] ta esnan humilde, pasobra nan lo hereda e Tera.” (Mateo 5:5, BS) Pues, Daniel y otro sirbidornan fiel lo haya resureccion pa biba riba Tera pa semper.

Awor, ken e hendenan “inhusto” cu Pablo a papia di dje ta? E grupo aki ta e miles di miyones di hende cu a muri sin cu nan a haya oportunidad pa compronde y aplica loke Bijbel ta siña. Despues cu nan resucita, nan lo haya un chens pa siña conoce y stima Jehovaa y Hesus. (Juan 17:3) Tur esnan cu scoge pa sirbi Dios lo tin e speransa pa biba mesun largo cu Jehova, esta, pa semper.

Con bida riba Tera lo ta?

WAK KICO BIJBEL TA BISA: Dios “lo ... seca tur lagrima for di nan wowo, y lo no tin morto mas; ni tristeza ni sclamacion ni dolor lo no tin mas.” (Revelacion 21:4) “Nan lo traha cas y biba den nan; tambe nan lo planta cunucunan di wendruif y come nan fruta.”—Isaias 65:21.

Djis imagina con dushi lo ta pa biba cu bo sernan keri cu a resucita. Pero con nos por ta sigur cu e resureccion lo tuma luga?

Acaso ta irealistico pa pensa cu e mortonan lo biba atrobe? Wel, apostel Pablo no a pensa asina pasobra el a skirbi bou di inspiracion: “Si ta den e bida aki so nos ta spera den Cristo, nos ta esnan cu hende mester tin mas duele di dje. Ma echo ta cu Cristo a ser lanta for di morto, e prome fruta di esnan cu a bay sosega.” (1 Corintionan 15:19, 20) Pues como cu Dios a resucita Hesus,a Pablo tabata sigur cu e resureccion lo tuma luga den futuro. (Echonan 17:31) E echo cu Pablo a bisa cu Hesus ta “e prome fruta”, esta, e prome cu a haya resureccion pa biba pa semper, ta indica cu lo tin mas hende cu lo lanta for di morto pa haya bida eterno.

Un otro motibo cu bo por ta sigur cu tin speransa pa esnan cu a muri ta cu Jehova ta un Dios “kende no por gaña.” (Tito 1:2) Nunca Jehova a gaña y nunca e lo haci esey tampoco. Bo ta kere cu Dios lo priminti hende cu lo bay tin un resureccion, hasta duna prueba cu e por resucita hende, anto despues gewoon keda sin cumpli cu su palabra? Esey no ta logico, toch?

Dicon Jehova a percura pa hende haya resureccion den futuro? Pasobra e tin amor pa hende. Job a puntra: “Si un hende muri, lo e bolbe biba?” Y Job mes a contesta: “Abo lo yama, y ami lo contesta bo; lo bo anhela na e obra di bo mannan.” (Job 14:14, 15) Job tabata convenci cu su amoroso Tata den cielo lo ta ansioso pa resucit’e. Acaso Dios a cambia? “Ami, [Jehova], no ta cambia.” (Malakias 3:6) Ainda Dios ta anhela pa mira e mortonan lanta y biba cu yen di salud y felicidad. Esaki ta exactamente loke un mayor amoroso ta desea ora e perde un yiu den morto. Pero e diferencia entre un mayor y Dios ta cu Dios si tin poder pa haci loke e ta desea.—Salmo 135:6.

Jehova lo duna su Yiu poder pa trece felicidad pa tur esnan cu a perde un ser keri den morto. Y con Hesus mes ta sinti tocante resureccion? Prome cu Hesus a resucita Lazaro, el a mira e tristeza di Lazaro su ruman muhernan y amigonan, y pesey “awa [a cuminsa] basha for di Hesus su wowo.” (Juan 11:35) Na un otro ocasion, Hesus a topa cu e viuda di Nain cu a perde su unico yiu homber. Hesus “a haya duele di dje y a bis’e: ‘No yora mas.’” Y mesora el a resucita su yiu homber. (Lucas 7:13) Pues, Hesus ta sintie hopi malo ora e mira cuanto dolor morto ta causa. E lo ta hopi contento ora e duna tur esnan rond mundo cu ta tristo un motibo pa alegra.

Abo a yega di sinti e dolor cu morto ta causa? Kisas bo ta pensa cu morto no tin solucion, pero esey no ta berdad. Pasobra mediante Hesus, Dios lo resucita hende. Corda cu Dios kier pa abo ta eynan pa wak e resureccion tuma luga, y pa bo brasa bo sernan keri atrobe. Imagina bo con dushi lo ta pa plania hunto cu nan pa un futuro unda bo no mester bisa ayo nunca mas.

Lionel, kende nos a menciona den e articulo anterior, a bisa: “Cu tempo mi a siña tocante e resureccion. Na principio tabata dificil pa mi kere den resureccion, y mi no tabata confia e persona cu tabata papia cu mi tocante esey. Pero mi a bay busca loke el a bisa mi den mi mes Bijbel, y mi a mira cu ta berdad. Awor mi ta pura pa wak mi opa atrobe.”

Lo bo kier haya sa mas tocante e topico aki? Testigonan di Jehova lo ta contento pa mustra bo den bo mes Bijbel dicon nan ta convenci cu lo tin un resureccion.b