Un persona corupto ta un persona cu ta haci mal uzo di su poder—specialmente den politica—pa su mes beneficio. Esaki no ta nada nobo, pasobra Bijbel ta contene un ley cu ta prohibi soborno den casonan hudicial. Pues, for di un 3.500 aña pasa tabata existi corupcion. (Exodo 23:8) Claro cu corupcion ta encera mas cu djis acepta placa bou di mesa. Funcionarionan corupto sa haci uzo di servicio- y propiedadnan publico cu nan no ta autorisa pa uza. Nan sa hasta horta placa y uza nan puesto den gobierno pa faborece nan famia y amigonan.

Corupcion ta un problema cu por existi den cualkier organisacion, pero ta parce cu esaki ta mas comun den organonan gubernamental. Na aña 2013, Transparency International a publica un articulo titula Global Corruption Barometer cu a bisa cu hende rond mundo ta pensa cu e cinco entidadnan di mas corupto na mundo ta partidonan politico, cuerpo policial, empleado publico (of, ambtenaar), podernan legislativo y hudicial. Wak e siguiente ehempelnan cu ta mustra esaki:

• AFRICA: Na 2013, un 22.000 empleado publico di Sur Africa a ser acusa di corupcion.

• SUR AMERICA: Na 2012, nan a sentencia 25 hende na Brazil cu a uza placa di gobierno pa haya apoyo politico. Un di esnan cu a ser sentencia tabata e ex-lider di e gabinete di e presidente di Brazil cu tabata e di dos persona mas poderoso di e pais.

• ASIA: Na Seul, Sur Korea, 502 hende a muri ora cu un pacus grandi a basha den otro na 1995. Investigadornan a haya sa cu empleadonan publico a acepta placa bou di mesa y a laga e contratistanan uza beton di calidad inferior y asina viola normanan di siguridad.

• EUROPA: Cecilia Malmström, comisario di Asuntonan Interno di e Comision Europeo, a bisa cu “corupcion ta un problema serio na Europa.” El a sigui bisa: “Pa caba cu corupcion, nos mester di apoyo politico, pero ta parce cu esey ta algo imposibel.”

Corupcion ta un problema cu tin raiz profundo. Profesora Susan Rose-Ackerman, un experto riba tereno di combatimento di corupcion, a skirbi cu pa drecha e situacion ta necesario pa gobiernonan cambia nan sistema di goberna. Aunke ta parce cu e situacion no tin solucion, Bijbel ta sigura nos cu tin solucion y cu cambionan grandi ta na caminda.

Si nos sociedad ta corupto, cualkier gobierno cu ta bin di dje tambe lo ta corupto, no ta berdad? Pesey, pa un gobierno por ta liber di corupcion, e mester bin di un otro fuente. Bijbel ta papia di un gobierno asina, esta, e Reino di Dios. Esaki ta e gobierno cu Hesus a siña su siguidornan pa pidi p’e den oracion.—Mateo 6:9, 10.

E Reino di Dios ta un gobierno real cu ta goberna for di cielo. Pronto e gobierno aki lo reemplasa tur gobierno riba Tera. (Salmo 2:8, 9; Revelacion 16:14; 19:19-21) Si, e lo caba cu tur gobierno corupto. Esey sigur lo ta un bendicion pa humanidad. Awor, laga nos trata seis aspecto di e Reino di Dios cu ta mustra bon cla cu e Reino aki si por caba cu corupcion.

1. PODER

PROBLEMA: Gobiernonan ta haya nan fondo principalmente for di placa di belasting cu ciudadanonan ta paga. Funcionarionan ta anda cu asina tanto placa cu algun di nan ta cay den tentacion y ta horta for di esaki. Otronan ta acepta placa bou di mesa di personanan cu kier evadi belasting of paga menos pa cierto servicionan di gobierno. Esaki na su turno por crea un circulo vicioso: gobierno ta subi belasting pa compensa su perdida di placa y esaki na su turno ta crea mas corupcion. Y esnan cu mas ta sufri den un caso asina ta hende honesto.

SOLUCION: E Reino di Dios ta ricibi su poder di Jehova,a e Dios Todopoderoso. (Revelacion 11:15) Jehova no tin nodi cobra belasting pa su Reino por funciona. Al contrario, Dios ta generoso y e tin tur “poder” pa percura abundantemente pa e necesidadnan di tur su subditonan.—Isaias 40:26; Salmo 145:16.

2. E GOBERNANTE

PROBLEMA: Susan Rose-Ackerman, cu a ser menciona den e articulo anterior, a bisa cu pa caba cu corupcion, nos “mester cuminsa di ariba.” Por ehempel, si un gobierno ta purba di caba cu corupcion den cuerpo policial y den duana pero ta tolera funcionarionan corupto den puestonan halto, e ta perde confianza di su pueblo. Pero, den e mundo aki, hasta e gobernante di mas honesto ta pecador. Ta manera Bijbel ta bisa: “No tin hende husto riba Tera cu continuamente ta haci bon y nunca ta peca.”​—Eclesiastes 7:20.

SOLUCION: Contrario na hende imperfecto, Hesucristo, esun cu Dios a scoge pa ta Gobernante di Su Reino, no por cay den tentacion pa haci malo. Hesus a demostra esaki bon cla ora el a rechasa e soborno di mas grandi den historia: “tur e reinonan di mundo y nan gloria.” Esey ta loke Satanas, e gobernante di e mundo aki, a ofrec’e a cambio di un acto di adoracion. (Mateo 4:8-10; Juan 14:30) Pero Hesus tabata determina pa keda fiel na Dios. Hasta na ora di su morto, ora nan tabata tortur’e, el a nenga di bebe un substancia cu lo a alivia su dolor pero cu lo a strob’e di pensa bon. (Mateo 27:34) Si, Hesus, kende awor ta den cielo, sin duda a duna prueba cu e ta perfectamente cualifica pa ta Gobernante di e Reino di Dios.​—Filipensenan 2:8-11.

3. STABILIDAD

PROBLEMA: Hopi pais ta tene eleccion regularmente. Nan ta haci esaki pa duna hende chens di uza nan derecho di vota pa, entre otro, saca funcionarionan corupto for di gobierno. Pero en realidad, hasta den paisnan supuestamente desaroya, hopi di e eleccion- y campañanan aki ta pesta cu corupcion. Algun hende rico ta sostene campañanan politico, dunando por ehempel contribucionnan generoso, pa nan por influencia funcionarionan di e gobierno existente of di esun entrante.

John Paul Stevens, hues y miembro di e Corte Supremo di Merca, a skirbi cu e tipo di influencia ey por pone hende “cuminsa duda den e legitimidad y calidad di e gobierno y perde confianza den dje.” Pues, no ta nada straño cu hopi hende rond mundo ta pensa cu partidonan politico ta e entidad di mas corupto cu ta existi.

SOLUCION: Durante gobernacion di e Reino di Dios lo no tin corupcion, campaña ni eleccion, pasobra e Reino di Dios ta un gobierno stabiel cu lo dura pa semper. (Daniel 7:13, 14) Ademas, no ta hende ta vota pa scoge e Gobernante di e Reino aki. Ta Dios a scog’e. Pues, e gobernante aki no por ser reemplasa. Si, e Reino di Dios ta un gobierno stabiel y tur loke cu e haci semper lo ta na bienestar di su pueblo.

4. E LEYNAN

PROBLEMA: Na prome instante, kisas bo ta pensa cu mester traha mas ley pa caba cu corupcion. Pero, expertonan a ripara cu hopi biaha esaki ta crea mas oportunidad pa hende bira corupto. Ademas, ta costa hopi placa pa implementa leynan contra corupcion, y toch esaki no ta duna mucho resultado.

SOLUCION: E leynan di e Reino di Dios ta hopi mas superior cu esnan di hende. Por ehempel, en bes di traha un lista largo di regla, Hesus a duna su discipelnan un principio cu hopi biaha ta ser yama e Regla di Oro. El a bisa nan: “Pesey, tur loke boso kier pa hende haci cu boso, boso tambe mester haci cu nan.” (Mateo 7:12) E leynan di e Reino di Dios no solamente ta motiva un persona pa haci loke ta bon sino tambe pa e haci esey cu e motivacion corecto. Hesus a bisa: “Stima bo prohimo mescos cu bo mes.” (Mateo 22:39) Y ta claro cu Dios, kende por lesa curason, por haci sigur si su subditonan ta cumpli cu su leynan.​—1 Samuel 16:7.

5. MOTIVACION

PROBLEMA: Golosidad y egoismo ta pone hende bira corupto. Hopi biaha, funcionarionan y ciudadanonan ta bira corupto debi na e mal cualidadnan aki. Den e caso di e pacus grandi cu a basha den otro na Seul cu e articulo anterior ta menciona, funcionarionan di gobierno a acepta placa bou di mesa for di contratistanan cu tabata sa cu esaki lo a sali nan mas barata cu uza material di construccion di bon calidad y cumpli cu reglanan di siguridad.

Pues, pa caba cu corupcion, mester siña hende con pa domina e mal cualidadnan cu ta profundamente hancra, manera golosidad y egoismo. Pero e gobiernonan actual no tin ni e deseo ni capacidad pa introduci tal programanan di educacion.

SOLUCION: E Reino di Dios si ta ataca e problema di corupcion na su raiz. E Reino tin un programa educacional cu ta siña hende norma- y balornan halto pa yuda nan domina mal cualidadnan.b E programa aki ta yuda hende cambia nan actitud y manera di pensa. (Efesionan 4:23) Nan ta siña con pa domina golosidad y egoismo, keda satisfecho cu loke nan tin y mustra interes den otro hende.​—Filipensenan 2:4; 1 Timoteo 6:6.

6. E CIUDADANONAN

PROBLEMA: Hasta hende den e ambiente di mas sano y cu tin e mihor educacion por scoge pa ta deshonesto y corupto. Expertonan ta admiti cu esey ta e motibo pakico gobiernonan humano no por caba cu corupcion. Toch gobiernonan ta spera cu nan por sikiera limita e daño cu esaki ta causa.

SOLUCION: Un Tratado Contra Corupcion cu Nacionnan Uni a emiti ta bisa cu pa combati corupcion, gobiernonan mester promove “integridad, honestidad y un sentido di responsabilidad.” Aunke esaki ta un bunita meta, e Reino di Dios ta haci mas cu djis promove e bon cualidadnan aki. E ta rekeri pa su ciudadanonan tin e cualidadnan aki. Bijbel ta bisa cu “hende golos” y “gañado” lo no ricibi e Reino di Dios.​—1 Corintionan 6:9-11; Revelacion 21:8.

Manera e prome cristiannan a demostra, tur hende por siña cumpli cu e normanan moral halto di e Reino di Dios. Ora cu un discipel cu yama Simon a ofrece e apostelnan placa pa e por a haya spirito santo, nan a nenga esaki y a bis’e: “Arepenti di bo maldad.” Ora Simon a ripara cu loke el a haci tabata malo, el a pidi e apostelnan pa haci oracion p’e pa yud’e vence su mal deseo.​—Echonan 8:18-24.

ABO TAMBE POR BIRA CIUDADANO DI E REINO

Sea cual sea bo nacionalidad, abo tambe por bira ciudadano di e Reino di Dios. (Echonan 10:34, 35) E programa di educacion cu e Reino ta ofrece ta disponibel na tur parti di mundo y lo siña bo kico ta Dios su rekisitonan. Gustosamente, testigonan di Jehova lo kier mustra bo con un curso di Bijbel ta bay; e curso aki ta gratis y e lo tuma solamente algun minuut pa siman. Lo bo siña, entre otro, tocante “e bon noticia di e Reino di Dios” y con e Reino lo elimina corupcion. (Lucas 4:43) Nos ta invita bo pa tuma contacto cu un Testigo den bo area of bishita nos website jw.org/jw-paa.