For di hopi tempo pasa hende ta soña con dushi lo ta pa keda jong y saludabel pa semper. Pero lamentablemente, nos tur ta muri. Pues, e palabranan cu Job a bisa mas cu tres mil aña pasa, cita ariba, ainda ta berdad awe.

Tur hende kier biba pa semper. Bijbel ta bisa cu Dios a pone tanto e deseo pa biba pa semper como e deseo di compronde kico esaki ta nifica den nos curason. (Eclesiastes 3:11) Awor, pensa un rato; lo ta logico pa un Dios di amor pone den hende un deseo cu no por bira realidad? Si bo contesta ta “no”, bo tin rason. E Palabra di Dios ta yama morto nos enemigo y ta priminti cu Dios lo “caba cu ne.”—1 Corintionan 15:26.

Sin duda, tur hende ta di acuerdo cu morto ta un enemigo. Ningun hende cu sano huicio ta desea di muri. Ora nos mira peliger nos ta haci nos maximo esfuerso pa huy p’e. Y ora nos bira malo, nos ta busca tur manera pa bira bon. Nos ta haci tur loke ta na nos alcance pa evita cualkier cos cu por causa nos morto.

Di berdad nos tin motibo pa kere cu Dios lo caba cu e enemigo aki? Claro cu si. E Creador, Jehova Dios, no a crea hende pa biba djis un par di aña y despues muri. Morto no tabata parti di Dios su proposito original. Su intencion tabata pa hende biba pa semper riba Tera, y e lo cumpli cu tur loke el a priminti.— Isaias 55:11.

Con Dios lo caba cu morto? A traves di historia hende a dedica hopi tempo y energia na purba elimina morto, pero sin resultado. Te awe hende ta sigui busca un solucion pa e problema ey. Cientificonan a traha vacuna y remedi pa tene algun maleza bou di control. Nan a hasta investiga e genetica di sernan bibo. Awendia na hopi luga, compara cu un 100 aña pasa, hende ta biba mas largo. Pero a pesar di tur nan esfuerso, nan no a logra caba cu morto. Ta manera Bijbel ta bisa: “Tur ta bolbe na stof.”—Eclesiastes 3:20.

E bon noticia ta cu nos no tin nodi warda riba inteligencia humano pa elimina morto. Jehova ya caba a percura un medio pa libra nos di morto. E persona cu el a scoge pa haci esey ta Hesucristo.

Dios no a crea hende pa muri

“SEÑOR Dios a coge e homber y a pon’e den e Hofi di Eden pa cultiv’e y cuid’e. Y SEÑOR Dios a ordena e homber, bisando: ‘Di tur palo di e hofi bo mag come libremente, ma di e palo di conocemento di bon y malo lo bo no come, pasobra e dia cu bo come di dje, lo bo muri sigur.’”—Genesis 2:15-17.

Dios a pone e prome homber, Adam, den e Hofi di Eden, un paradijs riba Tera cu tabata yen di bestia y mata bunita. Adam por a come libremente di e palonan di fruta. Pero Jehova Dios a bis’e claramente cu ta di un palo so e no tabatin mag di come, y el a spiert’e cu si e come di dje lo e muri.

Kico Adam a compronde cu e spiertamento ey? Wel, e tabata sa kico morto ta pasobra el a mira bestia muri. Si Dios a crea Adam pa e muri despues di tempo, e spiertamento cu Dios a dun’e lo no tabatin sentido. Al contrario, Adam a compronde cu si e obedece Dios y no come for di e palo ey, lo e biba pa semper, pues lo e no a muri nunca.

Tin hende ta pensa cu e fruta di e palo tabata simbolisa relacion sexual. Pero esey no ta logico pasobra Jehova tabata kier pa Adam cu su casa, Eva, ser “fructifero y multiplica, y yena e Tera y haci esaki somete na [nan].” (Genesis 1:28) Pues, ta for di un palo di fruta literal nan no tabatin mag di come. Jehova a yam’e “e palo di conocemento di bon y malo” pasobra el a representa e derecho cu Dios tabatin di dicidi kico ta bon y kico ta malo pa hende. Si Adam lo a keda sin come e fruta di e palo ey, lo el a demostra obediencia na Dios y aprecio pa tur loke su Creador a dun’e y haci p’e.

Adam a muri pasobra el a desobedece Dios

“[Dios] a bisa Adam: ‘Pasobra bo a ... come for di e palo di cual mi a ordena bo, bisando: ‘Lo bo no come di dje’, ... cu sodo di bo frenta lo bo come pan, te ora bo bolbe na tera, pasobra for di dje bo a wordo tuma; pasobra stof bo ta, y na stof lo bo bolbe.’”—Genesis 3:17, 19.

Adam a come di e palo cu Dios a prohibie di come di dje. E acto di desobediencia aki tabata algo hopi serio. En realidad, cu e acto di rebeldia aki, Adam a mustra un gran falta di respet y a menosprecia tur loke Jehova a haci p’e. Ora Adam a come e fruta prohibi, el a rechasa Jehova y a scoge pa ta independiente di Dios. Esaki a trece consecuencianan desastroso.

Cu tempo, Adam a muri exactamente manera Jehova a bisa. Dios a forma Adam “di e stof di tera” y a bis’e cu e lo “bolbe na tera.” Adam no a sigui biba den un otro forma of region. Ora el a muri, el a bira mescos cu e stof cu Dios a uza pa form’e.—Genesis 2:7; Eclesiastes 9:5, 10.

Nos ta muri pasobra nos ta descendiente di Adam

“Pa medio di un hende pica a drenta mundo, y morto pa medio di pica, y asina morto a pasa pa tur hende pasobra nan tur a peca.”—Romanonan 5:12.

E desobediencia of pica di Adam a trece consecuencianan teribel. Ora Adam a peca, el a perde no djis un bida cortico di 70 of 80 aña sino e posibilidad di biba pa semper. Ademas, el a perde un bida perfecto, y tur su descendientenan a hereda imperfeccion.

Nos tur ta descendiente di Adam. Y ta pa su falta nos a hereda un curpa imperfecto sin cu nos tabata kier. Pesey nos ta haci pica y cu tempo nos ta muri. Apostel Pablo a describi e situacion lamentabel aki ora el a bisa: “Ami ta carnal, bendi como esclavo di pica. Pober di mi! Ken lo libra mi di e curpa cu ta hiba mi na e morto aki?” Pablo mes a contesta su pregunta: “Mi ta gradici Dios cu lo e haci esaki pa medio di Hesucristo, nos Señor!”—Romanonan 7:14, 24, 25.

Hesus a muri pa nos por biba pa semper

“E Tata a manda su Yiu como Salbador di mundo.”—1 Juan 4:14.

Jehova a percura un medio pa caba cu e efectonan di pica y libra nos di e castigo di morto eterno. Kico el a haci? Jehova a manda su Yiu stima for di cielo p’e nace riba Tera como un homber perfecto, mescos cu Adam. Contrario na Adam, Hesus “no a comete pica.” (1 Pedro 2:22) Pesey e no a hereda e castigo di morto, y como un hende perfecto lo e por a biba pa semper.

Pero en bes di esey, Jehova a permiti Hesus su enemigonan pa mat’e. Despues di tres dia, Jehova a resucita Hesus como un criatura spiritual pa e por a bay cielo bek. Den cielo, Hesus a presenta e balor di su bida humano perfecto na Dios. Asina Hesus por a haya bek loke Adam a perde pa su mes y su descendientenan. Jehova a acepta e sacrificio ey, y esey a haci posibel pa tur hende cu pone fe den Hesus por biba pa semper.—Romanonan 3:23, 24; 1 Juan 2:2.

Di e manera ey, Hesus a cumpra bek loke Adam a perde. Hesus a muri pa nos por haya bida eterno. Bijbel ta bisa: “Hesus ... a sufri te na morto. Pa medio di e bondad inmereci di Dios el a experencia morto pa tur hende.”—Hebreonan 2:9.

Loke Jehova a percura ta siña nos hopi tocante dje. Pa motibo cu su norma di husticia ta asina halto, ta imposibel pa hende imperfecto libra nan mes. Sinembargo, su amor y misericordia a motiv’e pa cumpli cu e norma di husticia cu e mes a stipula, maske esaki a nifica cu e mester a duna su propio Yiu como prijs di rescate.—Romanonan 5:6-8.

Mescos cu Hesus, otro hende tambe lo resucita

“Cristo a ser lanta for di morto, e prome fruta di esnan cu a bay sosega. Pasobra ya cu morto a bin pa medio di un hende, resureccion di e mortonan tambe ta bin pa medio di un hende. Mescos cu den Adam tur ta muri, asina tambe den Cristo tur lo haya bida.”—1 Corintionan 15:20-22.

No tin duda cu Hesus a biba y muri riba Tera. Pero ki evidencia tin cu el a resucita? Un prueba palpabel ta cu, despues cu el a resucita, hopi hende a mir’e na varios ocasion y na diferente luga. Un biaha el a aparece na mas cu 500 hende. Apostel Pablo a skirbi tocante esey den su prome carta na e cristiannan di Corinto. El a bisa cu algun di e hendenan ey tabata na bida ainda, indicando asina cu nan por a duna testimonio di loke nan a mira y tende.—1 Corintionan 15:3-8.

Ora Pablo a skirbi cu Cristo tabata “e prome fruta” di esnan cu a resucita, el a indica cu otro hende tambe lo lanta for di morto. Hesus mes a bisa cu lo yega e tempo cu “tur esnan cu ta den graf ... lo sali afo.”—Juan 5:28, 29.

Pa nos por biba pa semper, nos mester pone fe den Hesus

“Dios a stima mundo asina tanto cu el a duna su Yiu unigenito, pa tur cu pone fe den dje no bay perdi, ma haya bida eterno.”—Juan 3:16.

E prome capitulonan di Bijbel ta conta nos con hende a cuminsa muri y con Paradijs a bay perdi. E ultimo capitulonan di Bijbel ta conta di e tempo cu morto lo disparce y con Dios lo restaura Paradijs riba Tera. Ora e dia ey yega, hende lo por disfruta pa semper di un bida feliz y productivo. Revelacion 21:4 ta bisa cu “lo no tin morto mas.” Pa garantisa nos cu nos por confia den e promesa ey, versiculo 5 ta bisa: “E palabranan aki ta digno di confianza y berdad.” Jehova ta capaz pa cumpli cu tur loke e priminti.

Abo ta kere cu “e palabranan aki ta digno di confianza y berdad”? Si bo contesta ta si, siña mas tocante Hesucristo y pone fe den dje. Si bo haci esey, lo bo haya Dios su aprobacion. Dios no solamente lo bendiciona bo ricamente awor, pero lo bo tin e speransa tambe di biba pa semper den un paradijs riba Tera caminda lo no tin morto mas, “ni tristeza ni sclamacion ni dolor lo no tin mas.”

Riba e anochi prome cu Hesus a muri, el a instrui su discipelnan pa recorda of conmemora e sacrificio cu lo el a bay haci. El a bisa nan: “Sigui haci esaki na mi memoria.”—Lucas 22:19.

E aña aki, e Conmemoracion di e morto di Hesus ta cay riba diabierna 3 di april, despues cu solo baha. Testigonan di Jehova ta invita abo y bo famia pa bin scucha un discurso cu lo splica dicon e morto di Hesus ta asina importante y con abo por beneficia di dje.