Kico abo ta pensa? Bo ta kere cu Dios ta aproba guera? Y si esey ta e caso, na ken su banda Dios ta? E contesta riba e preguntanan aki por yuda bo analisa bo punto di bista tocante guera. Por ehempel, si bo sa cu Dios ta aproba guera y ta apoya bo banda den un conflicto, lo bo sinti bo bon pasobra bo tin sigur cu boso lo gana e guera. Pero awor, con lo bo sinti si bo haya sa cu Dios no ta apoya bo banda den e conflicto? Siguramente lo bo cambia di opinion di biaha.

Pero tin algo mas importante ainda. Ora bo haya sa kico Dios ta pensa di guera, esaki por cambia bo opinion tocante Dios. Si abo ta un di e miyones di hendenan cu a sufri hopi pa motibo di guera, sin duda lo bo kier haya sa e contesta riba e siguiente preguntanan: Bo ta kere cu Dios ta instiga guera y ta causa asina tanto sufrimento? Of acaso e no tin sintimento y no ta worry ora hende sufri?

Kisas lo bo keda sorprendi ora bo haya sa e contesta cu Bijbel ta duna. Dicon? Pasobra loke Bijbel ta bisa tocante e asunto ey ta completamente diferente for di loke mayoria di hende ta pensa. Ademas, Dios su manera di pensa tocante guera nunca a cambia. Laga nos analisa Dios su punto di bista tocante guera den antiguedad y den e prome siglo ora Hesus tabata riba Tera. Esaki lo yuda nos haya sa kico Dios ta pensa di guera den nos tempo y si guera lo caba algun dia.

E echo cu Dios mes a bringa contra e Egipcionan ta mustra cu e no ta contra tur guera. Na varios ocasion, el a duna su pueblo Israel permiso pa bay guera. Por ehempel, Dios a manda nan bringa contra e Cananeonan, kendenan tabata sumamente malbado. (Deuteronomio 9:5; 20:17, 18) Tambe el a duna ordo na Rey David pa bay bringa contra e Filisteonan, kendenan tabata hopi cruel. Dios hasta a bisa David ki strategia pa uza pa nan gana e bataya.—2 Samuel 5:17-25.

E relatonan biblico aki ta mustra cu Dios a aproba guera ora otro nacion tabata oprimi y maltrata e Israelitanan. Pakico el a haci esey? Pa proteha su pueblo y pa proteha adoracion berdadero. Pero tin tres punto importante cu nos tin cu tene na mente ora Dios autorisa un guera. Kico nan ta?

1. DIOS SO TABATA DETERMINA KEN LO BAY GUERA. Na un ocasion, Dios a bisa e Israelitanan: “Boso no tin mester di bringa den e bataya aki.” Dicon no? Pasobra Dios mes lo a bringa pa nan. (2 Cronicanan 20:17; 32:7, 8) Y el a haci esey hopi biaha, manera nos a menciona na principio di e articulo aki. Pero na otro ocasionnan, Dios a duna ordo pa su pueblo mes bringa den guera. Jehova Dios a laga nan haci esey pa nan conkista y defende e Tera Priminti.—Deuteronomio 7:1, 2; Josue 10:40.

2. DIOS SO TABATA DETERMINA KI ORA UN GUERA ASINA LO TUMA LUGA. E sirbidornan di Dios mester a warda cu pasenshi te ora Dios duna nan ordo pa bringa contra e nacionnan malbado cu tabata rond di nan. Esey kiermen cu nan no tabatin mag di bay den bataya sin Dios su permiso. Si nan a haci esey toch, nan lo a perde Dios su aprobacion. En realidad, Bijbel ta mustra cu ora e Israelitanan a tribi di bay guera sin Dios su autorisacion, e consecuencia tabata desastroso.a

3. 

   DIOS NO TA DESEA PA NIUN HENDE MURI, NI SIKIERA HENDE MALBADO. Jehova Dios ta e Fuente di bida y Esun cu a crea hende. (Salmo 36:9) Pesey, e no ta desea pa niun hende muri. Lamentablemente, tin hende cu ta traha complot pa maltrata y hasta mata otro hende. (Salmo 37:12, 14) Pa stop maldad, tin biaha Dios a autorisa su sirbidornan pa bringa contra e malbadonan. Sinembargo, tur biaha cu el a manda su sirbidornan bay bringa den guera, el a mustra misericordia y pasenshi na e enemigonan di Israel. (Salmo 86:15) Por ehempel, prome cu e Israelitanan declara guera contra un nacion, nan mester a “ofrec’e paz.” Pakico? Pa duna nan un oportunidad pa cambia nan pensamento y evita un conflicto. (Deuteronomio 20:10-13) Di e manera aki, Dios a demostra cu e “no tin placer den e morto di e malbado, ma mas bien cu e malbado bira for di su caminda y biba.”—Ezekiel 33:11, 14-16.b

Manera nos a caba di wak, den pasado Dios a considera guera como un medio valido pa caba cu opresion y maldad. Pero tabata Dios—y no hende—kende tabata determina ken lo bay guera y ki ora un guera asina lo tuma luga. Acaso e gueranan ey tabata cruel y sangriento? Absolutamente cu no! En realidad Dios ta odia violencia. (Salmo 11:5) Pero e pregunta ta, Dios su punto di bista tocante guera a cambia ora su Yiu, Hesucristo, a cuminsa su sirbishi den e prome siglo?

Kico a pasa? Pakico Dios no a libra e Hudiunan manera el a haci den pasado? Of dicon e no a autorisa nan pa bay bringa den guera pa libra nan mes for di opresion? Acaso Dios su punto di bista tocante guera a cambia? No. Mas bien, algo otro a cambia. Kico asina? Wel, e Hudiunan a rechasa Hesus, e Yiu di Dios, como e Mesias. (Echonan 2:36) Pesey, como pueblo, nan a perde e relacion special cu nan tabatin cu Dios.—Mateo 23:37, 38.

Tanto e nacion Hudiu como e Tera Priminti a perde Dios su proteccion. Y nunca mas nan no por a bisa cu nan gueranan tabatin e apoyo di Dios. Manera Hesus a profetisa, e nacion di Israel a perde e aprobacion y e bendicion di Dios, y un otro nacion a haya Dios su fabor. Ken nan ta? Nan ta un grupo di cristian cu Dios a scoge. Nan ta un nacion spiritual cu Bijbel ta yama “e Israel di Dios.” (Galationan 6:16; Mateo 21:43) Den e prome siglo a ser bisa na nan: “Awor boso ta e pueblo di Dios.”—1 Pedro 2:9, 10.

Ya cu e cristiannan di prome siglo tabata “e pueblo di Dios”, nos por puntra nos mes: Acaso Dios a bringa pa libra nan di e opresornan Romano? Of, el a autorisa nan pa bay bringa den guera contra esnan cu tabata oprimi nan? No, Dios no a haci esey. Dicon no? Pasobra manera nos a mira den e articulo anterior, ora Dios autorisa un guera, ta e so ta determina ki ora esey lo tuma luga. Dios no a bringa den bataya pa e cristiannan di prome siglo, ni tampoco el a autorisa nan pa bay bringa den guera. Claramente, no tabata Dios su tempo pa caba cu maldad y opresion den e prome siglo.

Pues, mescos cu e sirbidornan di Dios den antiguedad, e cristiannan di prome siglo tambe mester a warda te ora Dios dicidi di caba cu maldad y opresion. Mientrastanto, nan no tabatin autorisacion di Dios pa bringa contra nan enemigonan. Hesucristo a siña su siguidornan esey na un manera hopi cla. Por ehempel, e no a manda su discipelnan pa bay bringa den guera, mas bien, el a bisa nan: “Sigui stima boso enemigonan y haci oracion pa esnan cu ta persigui boso.” (Mateo 5:44) Ora Hesus a profetisa cu e Romanonan lo bay ataca Jerusalem den e prome siglo, el a instrui su discipelnan pa huy y no bringa. Y esey ta loke nan a haci.—Lucas 21:20, 21.

Ademas, bou di direccion di Dios, apostel Pablo a skirbi: “No tuma venganza ... pasobra ta para skirbi: ‘Venganza ta di mi; ami lo paga bek, Jehova ta bisa.’” (Romanonan 12:19) Pablo a cita loke Dios a bisa hopi siglo prome na Levitico 19:18 y na Deuteronomio 32:35. Manera nos a trata den e articulo anterior, un manera cu Dios a tuma venganza pa su pueblo den antiguedad ta door di yuda nan bringa contra nan enemigonan. Pues, loke Pablo a bisa ta mustra cu Dios su punto di bista tocante guera no a cambia. Den e prome siglo, Dios ainda tabata considera guera como un medio valido pa defende su sirbidornan y pa caba cu opresion y maldad. Pero mescos cu den pasado, Dios so tabata determina ken lo bay guera y ki ora un guera asina lo tuma luga.

Ta bisto cu Dios no a autorisa e cristiannan di prome siglo pa bay guera. Pero kico di nos tempo? Bo ta kere cu Dios ta duna su bendicion na cierto grupo di hende pa bay bringa den guera? Of kisas ta tempo pa Dios tuma accion na fabor di su sirbidornan? Kico ta Dios su punto di bista tocante guera den nos tempo? E siguiente articulo lo contesta e preguntanan aki.

Un cos ta sigur: Dios ta mira e sufrimento cu tin den mundo, y e ta bay trece un cambio. (Salmo 72:13, 14) Den Bijbel, Dios ta priminti cu lo e “duna alivio na [esnan] cu ta wordo afligi.” Na ki tempo? “Ora Señor Hesus wordo manifesta for di cielo cu su angelnan poderoso ... pa duna pago mereci na esnan cu no conoce Dios y na esnan cu no ta obedece e evangelio di nos Señor Hesus.” (2 Tesalonicensenan 1:7, 8, BS) E manifestacion of revelacion ey di Hesus lo sosode den futuro. Bijbel ta yama e revelacion aki “e guera ... [di] e gran dia di Dios, e Todopoderoso”, of Armagedon.—Revelacion 16:14, 16.

Den e guera di Armagedon, Dios lo no uza hende pa bringa contra e malbadonan. Mas bien, e lo uza su Yiu Hesucristo hunto cu otro criaturanan spiritual poderoso. E ehercito celestial aki lo pone un fin na tur maltrato y sufrimento.—Isaias 11:4; Revelacion 19:11-16.

Pues, Dios su punto di bista tocante guera no a cambia. Dios ainda ta considera guera como un medio valido pa defende su sirbidornan y pa caba cu opresion y maldad. Pero mescos cu den pasado, Dios so ta determina ken lo bay guera y ki ora un guera asina lo tuma luga. Manera nos a mira, Dios a dicidi cu den futuro e lo caba cu maldad y sufrimento den e guera di Armagedon. Y tambe el a determina ken ta bay bringa den e guera aki: su Yiu Hesucristo. Esey kiermen cu e gueranan di awendia no tin Dios su aprobacion ni maske con bon e motibonan por parce.

Laga nos wak un ehempel: Imagina cu dos ruman homber ta cuminsa pleita ora nan tata no ta na cas. Nan ta stop di pleita pa un rato y ta yama nan tata na telefon. Un di nan ta bisa cu e otro a cuminsa, y e otro ta keha cu su ruman a trat’e malo. Tur dos kier pa nan tata tuma parti pa nan. Sinembargo, despues di tende tur dos banda di medaya, e tata ta bisa nan pa stop di pleita y pa nan warda te ora e yega cas pa resolve e asunto. Nan ta obedec’e pa un rato. Pero despues, nan ta cuminsa pleita atrobe. Ora e tata yega cas, e ta rabia cu tur dos y ta straf nan pasobra nan a desobedec’e.

Den nos tempo, e nacionnan cu ta den guera cu otro regularmente ta pidi Dios pa yudansa. Pero Dios no ta tuma parti pa ningun di nan pasobra Bijbel ta bisa bon cla: “No paga malo cu malo” y “No tuma venganza.” (Romanonan 12:17, 19) Ademas, el a duna nos instruccion pa “warda cu pasenshi riba dje” pa e tuma accion den e guera di Armagedon. (Salmo 37:7) E nacionnan cu ta dicidi di bay guera en bes di warda pa Dios tuma accion ta desobedec’e y ta ofend’e. E ta mira e gueranan ey como un falta di respet. Pesey, den e guera di Armagedon, Dios lo expresa su rabia y caba cu tur conflicto cu tin na mundo pa semper. Bijbel ta bisa cu e lo “kaba ku guera tur kaminda riba mundu.” (Salmo 46:9, BPK; Isaias 34:2) Si, Dios su guera di Armagedon lo pone un fin na tur guera.

E Reino di Dios lo caba cu tur guera. Hesus a papia di e gobierno aki den e oracion di Nos Tata: “Laga bo Reino bini. Laga bo boluntad sosode, mescos cu den cielo, tambe riba Tera.” (Mateo 6:10) E Reino di Dios lo no caba solamente cu guera sino tambe cu loke ta causa guera: maldad.a (Salmo 37:9, 10, 14, 15) Pesey Hesus su siguidornan ta spera ansiosamente riba e tantisimo bendicionnan cu e Reino di Dios lo trece.—2 Pedro 3:13.

Pero cuanto tempo mas nos lo mester warda pa Dios pone un fin na tur sufrimento, maltrato y maldad? E echo cu profecia di Bijbel ta cumpliendo ta mustra cu nos ta bibando “den e ultimo dianan” di e mundo malbado aki. (2 Timoteo 3:1-5)b Kiermen pronto e Reino di Dios lo pone un fin na e mundo malbado mediante e guera di Armagedon.

Manera nos a bisa anteriormente, esnan cu muri den Armagedon ta esnan cu no ta “obedece e bon noticia tocante nos Señor Hesus.” (2 Tesalonicensenan 1:8) Pero no lubida, Dios no ta desea pa ningun hende muri, ni hende malbado. (Ezekiel 33:11) Y door cu “e no ta desea pa ningun hende ser destrui” den Armagedon, e ta haci sigur cu prome cu e fin yega e bon noticia tocante nos Señor Hesus “lo ser predica den henter e Tera habita, como testimonio pa tur nacion.” (2 Pedro 3:8, 9; Mateo 24:14; 1 Timoteo 2:3, 4) Si, como cu testigonan di Jehova ta predica rond mundo, hende ta haya e oportunidad pa siña conoce Dios, pa obedece e bon noticia tocante nos Señor Hesus y pa biba den un mundo caminda lo no tin guera mas.