Loke Samuel, Teresa y Magdalena a bisa ta mustra cu hende ta haci oracion pa diferente motibo; algun ta mas noble cu otro. Tin hende ta haci oracion di curason, pero otronan ta haci oracion sin ningun sintimento. No obstante, sea cu nan ta haci oracion pa pasa examen na scol, pa nan team faborito gana, pa Dios yuda nan famia of pa cualkier otro motibo, miyones di hende ta sinti cu nan mester haci oracion. En realidad, tin encuesta ta mustra cu hasta algun hende cu no tin un religion ta resa regularmente.

Abo ta haci oracion? Si esey ta e caso, kico bo ta pidi den oracion? Sea cu bo tin custumber di haci oracion of no, kisas bo ta puntra bo mes: Ta bale la pena pa haci oracion? Tin un persona cu ta scucha nos oracionnan? Un escritor a bisa cu oracion ta “un tipo di terapia ... Esaki ta mescos cu ora bo tin un pisca den un aquarium y bo ta papia cu ne.” Algun dokter tambe ta pensa asina; nan ta considera oracion como un forma di “medicina alternativo.” Kico abo ta pensa? Hende ta haci oracion simplemente como parti di nan rutina? Of, esaki ta djis un tipo di terapia cu ta trece beneficio pa nan?

Wel, Bijbel ta siña nos algo diferente, esta cu oracion no ta simplemente un tipo di terapia. Bijbel ta sigura nos cu tin un persona cu ta scucha nos oracionnan ora nos haci esey na e manera corecto y pa e motibonan corecto. Esey ta berdad? Laga nos ban wak.

Tin hende ta pensa cu no ta bale la pena pa haci oracion. Dicon? Pasobra nan ta pensa cu nan oracionnan no ta ser scucha. Otronan a haci oracion, pero nan ta sinti cu nan no a haya contesta. Un hende cu no ta kere den Dios a purba di imagina con Dios ta, y despues el a bis’e den oracion: “Djis bisa mi algo.” Pero el a bisa cu Dios a keda “keto keto.”

Sinembargo, Bijbel ta sigura nos cu tin un Dios cu ta scucha nos oracionnan. E siguiente palabranan cu tin den Bijbel ta comproba esey: “Siguramente [Dios] lo ta misericordioso cu bo ora cu e tende e zonido di bo yoramento; ora cu e tende esaki, e lo contesta bo.” (Isaias 30:19) Un otro texto di Bijbel ta bisa: “Oracion di e rectonan ta su delicia.”—Proverbionan 15:8.

Tambe, Bijbel ta menciona algun ehempel di hendenan cu nan oracionnan a ser scucha. Un texto ta bisa cu Hesus a haci “peticion ... na Esun cu por a salb’e” y cu “el a ser scucha.” (Hebreonan 5:7) Nos por haya mas ehempel di hendenan cu nan oracionnan a ser scucha na Daniel 9:21 y 2 Cronicanan 7:1.

Pakico anto algun hende ta sinti cu nan oracionnan no ta ser scucha? Wel, si nos kier pa Jehova,a e Dios cu Bijbel ta papia di dje, scucha nos oracionnan, nos tin cu cumpli cu algun rekisito. Na prome luga, nos mester resa solamente na dje y no na ningun otro dios ni na nos antepasadonan. Ademas, loke nos ta pidi Dios mester ta “di acuerdo cu su boluntad.” Dios ta sigura nos cu si nos haci oracion di e manera aki, “e ta tende nos.” (1 Juan 5:14) Pues, si nos kier pa Dios scucha nos oracionnan, nos mester siña conoc’e y haya sa kico ta su boluntad.

Hopi hende ta convenci cu oracion no ta djis un custumber religioso, sino cu Dios realmente ta scucha y contesta nan oracionnan. Isaac, di Kenia, a bisa: “Mi a pidi Dios pa yuda mi compronde Bijbel. Un poco despues, un hende a acerca mi y a ofrece mi e yudansa cu mi tabatin mester.” Hilda, kende ta biba na Filipinas, kier a stop di huma. El a purba varios biaha, pero e no a logra. Pesey su esposo a bis’e: “Pakico bo no ta pidi Dios yuda bo?” Hilda a sigui su conseho. Kico tabata e resultado? Hilda a bisa: “Dios a yuda mi asina bon cu mi a keda sorprendi. Tabata comosifuera mi gana di huma a cuminsa kita. Y mi a logra stop.”

Bo ta kere cu Dios lo scucha bo oracionnan cu ta na harmonia cu su boluntad?

Dios ta ofrece nos su amistad.

Pa amigonan tin un bon amistad cu otro, nan mester comunica. Pesey mes, Dios ta anima nos pa papia cu ne pa nos por bira bon amigo di dje. Dios a bisa: “Boso lo sclama na mi y bin haci oracion na mi, y lo mi scucha boso.” (Jeremias 29:12) Si bo papia cu Dios, lo bo “hala cerca [dje], y lo e hala cerca [bo].” (Santiago 4:8) Bijbel ta bisa: “SEÑOR ta cerca di tur esnan cu ta sclama na dje.” (Salmo 145:18) Mas nos resa na dje, mas mihor nos relacion cu ne lo bira.

Dios kier yuda bo.

Hesus a bisa: “Acaso tin un di boso cu si su yiu pidie pan, e ta dun’e un piedra? Of si e pidie un pisca, e ta dun’e un colebra? Pesey, si boso ... sa di duna boso yiunan bon regalo, cuanto mas boso Tata cu ta den cielo! E sigur lo duna cos bon na esnan cu pidie.” (Mateo 7:9-11) Si, Dios ta anima bo pa haci oracion na dje pasobra “e ta interesa den [bo]” y e kier yuda bo. (1 Pedro 5:7) E ta hasta anima bo pa cont’e tur bo problemanan. Bijbel ta bisa: “No sea ansha tocante nada; mas bien, den tur cos, pa medio di oracion y suplica hunto cu gradicimento, laga Dios sa kico ta boso peticionnan.”—Filipensenan 4:6.

Hende tin mester di Dios.

Expertonan cu ta studia comportacion di hende a ripara cu miyones di hende ta sinti e necesidad di haci oracion. Hasta algun ateo y agnostico ta sinti esey.a Esaki ta un prueba cu Dios a crea hende cu un necesidad spiritual. Hesus a bisa: “Feliz ta esnan cu ta consciente di nan necesidad spiritual.” (Mateo 5:3) Un manera cu nos por satisface e necesidad ey ta door di papia regularmente cu Dios.

Pues, si bo haci oracion na Dios, ki beneficio lo bo por haya?

Prome cu bo cuminsa cu cualkier proyecto, kisas bo ta puntra bo mes: Con ami lo beneficia? Pero bo ta egoista si bo haci bo mes e pregunta aki tocante oracion? No necesariamente. Ta normal cu nos kier sa si ta bale la pena pa haci oracion.

Den e articulonan anterior, nos por a mira claramente cu oracion ta hopi mas cu un custumber religioso of un tipo di terapia. E Dios berdadero ta scucha oracion. Si nos haci oracion na e manera corecto y pa e motibonan corecto, e lo scucha nos. Es mas, Dios ta anima nos pa hala cerca dje. (Santiago 4:8) Pero, kico ta algun beneficio cu nos por haya si nos haci oracion regularmente? Laga nos ban wak.

Paz mental.

Bo a yega di tin asina hopi problema y dificultad cu bo a sinti cu bo no por mas? Na momentonan asina, Bijbel ta anima nos pa “haci oracion constantemente” y pa “laga Dios sa kico ta [nos] peticionnan.” (1 Tesalonicensenan 5:17; Filipensenan 4:6) Bijbel ta sigura nos cu si nos haci oracion, “e paz di Dios cu ta surpasa tur comprondemento lo proteha [nos] curason y [nos] mente.” (Filipensenan 4:7) Si nos desahoga nos mes cu Jehova den oracion, nos lo por sinti nos mas trankil. En realidad, Dios ta anima nos pa haci esey. Salmo 55:22 ta bisa: “Tira bo carga riba SEÑOR, y e lo sostene bo.”

Miyones di hende rond mundo a experencia e paz ey. Hee Ran di Sur Korea a bisa: “Aunke mi tin problema serio, ora mi haci oracion, mi ta haya alivio y forsa pa sigui.” Cecilia, cu ta biba na Filipinas, a conta: “Como mama, mi ta preocupa hopi pa mi yiunan muher. Tambe mi ta preocupa pa mi mama cu tin Alzheimer y no ta reconoce mi mas. Pero door di haci oracion, mi por sigui cu mi actividadnan diario cu menos preocupacion pasobra mi sa cu Jehova lo yuda mi.”

Consuelo y forsa pa enfrenta prueba.

Bo ta bou di hopi presion? Kisas hasta bo ta pasando den un tragedia of den un situacion cu ta pone bo bida na peliger? Wel, si nos haci oracion na e “Dios di tur consuelo”, nos por haya un gran alivio. Bijbel ta bisa cu e “ta consola nos den tur nos tribulacionnan.” (2 Corintionan 1:3, 4) Por ehempel, na un ocasion ora Hesus tabata sumamente afligi, el a “hinca rudia y cuminsa haci oracion.” Kico tabata e resultado? “Un angel for di cielo a aparece na dje y a fortalec’e.” (Lucas 22:41, 43) Un otro ehempel ta di e homber fiel Nehemias. Algun hende malbado a purba intimid’e pa e stop di haci Dios su trabou. Pesey el a pidi Dios den oracion: “Ma awor, o Dios, fortalece mi mannan.” Loke a sosode despues ta mustra cu Dios a yud’e vence su miedo y a yud’e cumpli cu su trabou. (Nehemias 6:9-16) Y Reginald di Ghana a conta: “Ora mi haci oracion, principalmente si mi ta pasando den situacionnan hopi dificil, mi ta sinti cu mi ta contando mi problemanan na un persona cu por yuda mi y kende ta sigura mi cu mi no mester preocupa.” Si, Dios por consola nos ora nos haci oracion na dje.

Sabiduria di Dios.

Algun decision cu nos tuma por tin consecuencia permanente tanto pa nos mes como pa nos sernan keri. Kico por yuda nos tuma bon decision? Bijbel ta bisa: “Si cualkier di boso falta sabiduria [specialmente ora di enfrenta prueba], lag’e pidi Dios, kende ta duna na tur hende generosamente y sin reproche, y esaki lo wordo duna na dje.” (Santiago 1:5, BS) Si nos pidi Dios sabiduria, e por uza su spirito santo pa yuda nos tuma bon decision. En realidad, nos por pidi specificamente pa Dios su spirito santo den oracion, pasobra Hesus a bisa bon cla cu “e Tata cu ta den cielo lo duna spirito santo na esnan cu pidie!”—Lucas 11:13.

Hasta Hesus a sinti e necesidad pa pidi su Tata yudansa ora e mester a tuma decision importante. Bijbel ta bisa cu ora e mester a scoge su 12 apostelnan, el “a pasa henter anochi ta haci oracion na Dios.”—Lucas 6:12.

Mescos cu Hesus, hopi hende awe a haya mas confianza ora nan a mira con Dios ta contesta nan oracionnan y con e ta yuda nan tuma bon decision. Regina, kende ta biba na Filipinas, ta conta nos di varios problema cu e mester a enfrenta. E mester a traha pa cria su famia despues di e morto di su esposo, y na dado momento el a perde su trabou. Ademas, e mester a lanta su yiunan su so. Kico a yud’e tuma bon decision? El a bisa: “Mi ta haci oracion na Jehova y ta confia cu e lo yuda mi.” Kwabena di Ghana ta conta pakico el a haci oracion na Dios: “Mi a perde mi trabou di construccion cu tabata paga bon.” Kico Kwabena a haci ora e tabata considera su opcionnan? El a bisa: “Constantemente mi tabata pidi Jehova den oracion pa e yuda mi tuma un bon decision.” El a sigui bisa: “Mi ta echt sinti cu Jehova a yuda mi scoge un trabou cu ta permiti mi percura pa mi necesidadnan spiritual y fisico.” Abo tambe por haci oracion na Dios pa e yuda bo den asuntonan cu por afecta bo relacion cu ne.

Nos a menciona djis algun beneficio di oracion. (Si bo kier mas ehempel, wak e cuadro “Beneficionan di Oracion.”) Pero pa bo por ricibi e beneficionan aki, primeramente bo tin cu siña conoce Dios y haya sa kico ta su boluntad. Si bo ta desea esey, nos ta anima bo pa puntra un testigo di Jehova pa yuda bo conoce Bijbel.a Esaki por ta e prome paso cu bo ta tuma pa hala cerca di e “Skuchador di orashon.”—Salmo 65:2, BPK.