Bo a yega di haci bo mes e preguntanan aki? Si ta asina, bo no ta e unico persona. Hende rond mundo ta pensa riba preguntanan importante di bida. Bo ta kere cu bo por haya contesta pa nan?

Miyones di hende lo bisa: “Si!” Dicon? Pasobra nan a haya contesta satisfactorio pa nan preguntanan den Bijbel. Abo lo kier sa kico Bijbel ta bisa? E ora ey, kisas lo bo tin gana di sigui un curso di Bijbel cu testigonan di Jehova ta ofrece.a

Kisas no ta tur hende ta gusta e idea di analisa Bijbel. Algun lo bisa: “Mi no tin tempo.” “E ta mucho complica.” “Mi no kier compromete mi mes cu nada.” Pero otronan tin un punto di bista diferente, y nan si kier analisa kico Bijbel ta bisa. Laga nos wak algun ehempel:

• “Mi tabata bay misa catolico y protestant, un tempel sikh y un monasterio budista, y mi a studia teologia na universidad. Toch mi no tabata haya contesta pa mi preguntanan. Pero un dia un testigo di Jehova a yama na mi cas. Su contestanan basa riba Bijbel a impresiona mi asina tanto cu mi a dicidi di acepta un curso di Bijbel.”—Gill, Inglatera.

• “Mi tabatin hopi pregunta tocante bida, pero e contestanan cu mi pastoor a duna mi no tabata convence mi. Pero, un testigo di Jehova a uza Bijbel so pa contesta mi preguntanan. Ora el a puntra mi si mi kier siña mas, mi a acepta gustosamente.”—Koffi, Benin.

• “Mi tabatin hopi gana di sa kico e condicion di e mortonan ta. Mi tabata kere cu e mortonan por haci hende daño, pesey mi tabata kier sa kico Bijbel ta bisa tocante esey. Pues mi a cuminsa analisa Bijbel cu un amigo cu ta testigo di Jehova.”—José, Brazil.

• “Mi a cuminsa lesa Bijbel, pero mi no por a comprond’e. Anto un dia testigonan di Jehova a bin cerca mi y a duna mi un bon splicacion di varios profecia di Bijbel. Mi kier a mira kico mas mi por a siña.”—Dennize, Mexico.

• “Mi tabata puntra mi mes si Dios berdaderamente ta interesa den mi. Pesey mi a dicidi di resa na e Dios cu Bijbel ta papia di dje. E siguiente dia, testigonan di Jehova a bati na mi porta y mi a acepta un curso di Bijbel.”—Anju, Nepal.

E experencianan ey ta pone nos corda riba e palabranan di Hesus: “Feliz ta esnan cu ta consciente di nan necesidad spiritual.” (Mateo 5:3) Si, di naturaleza hende tin e necesidad di conoce Dios. Y ta Dios so por satisface e necesidad ey. E ta haci esey pa medio di su Palabra, Bijbel.

Pues, kico un curso di Bijbel ta encera? Con e por yuda bo? E siguiente articulo lo contesta e preguntanan aki.

Testigonan di Jehova ta bon conoci pa nan trabou di predica. Pero bo tabata sa cu nos ta duna curso di Bijbel na tur parti di mundo tambe?

Na 2014, mas cu 8.000.000 Testigo den 240 pais a dirigi casi 9.500.000 curso di Bijbel tur luna.a Si, e cantidad di hende cu ta siguiendo un curso di Bijbel cu nos ta mas cu e cantidad di habitante cu mas o menos 140 pais tin.

Pa cumpli cu e trabou mundial di siña hende, tur aña testigonan di Jehova ta publica casi 1,5 mil miyon Bijbel, buki, revista y otro publicacionnan pa yuda hende analisa Bijbel. Tur e publicacionnan aki ta disponibel den mas o menos 700 idioma. Tur e esfuerso aki ta pa yuda hende analisa Bijbel den e idioma cu nan ta prefera.

CONTESTA RIBA PREGUNTA CU HOPI HENDE SA HACI TOCANTE NOS CURSO DI BIJBEL

Con un curso di Bijbel ta bay?

Nos ta scoge varios topico di Bijbel y analisa textonan di Bijbel cu tin di haber cu e topico. Por ehempel, Bijbel ta duna contesta riba preguntanan manera: Ken Dios ta? Con e ta? Dios tin un nomber? Unda e ta biba? Nos por hala cerca dje? E contestanan ta den Bijbel, pero no ta semper facil pa haya nan.

Pa yuda hende haya contesta riba e preguntanan aki, por lo general nos ta uza e buki di 224 pagina titula Kico Bijbel Ta Siña Realmente?b Meta di e buki aki ta pa yuda hende compronde e siñansanan basico di Bijbel. E ta contene lesnan tocante Dios, Hesucristo, sufrimento di hende, resureccion, oracion y hopi topico mas.

Na unda y ki ora e curso por tuma luga?

E curso por tuma luga na un ora y luga cu ta cumbiniente pa bo.

Cuanto tempo cada sesion di e curso ta dura?

Hopi hende ta dedica mas o menos un ora tur siman pa ricibi un curso di Bijbel. Pero, nos por adapta na bo schedule. Algun hende ta dedica 10 of 15 minuut pa siman na e curso.

Cuanto e curso ta costa?

E curso y e material ta gratis. Esaki ta di acuerdo cu loke Hesus a instrui su discipelnan: “Boso a ricibi pornada, duna pornada.”—Mateo 10:8.

Cuanto tempo e curso ta dura?

Esey ta depende riba loke abo ta desea. E buki Kico Bijbel Ta Siña Realmente? tin 19 les. Nos por trata sea algun of tur e lesnan aki cu bo na e speed cu abo ta desea.

Mi tin cu bira testigo di Jehova?

No. Nos ta respeta cada hende su derecho di scoge loke e kier kere. Sinembargo, e conocemento di Bijbel cu un persona ta haya por yud’e dicidi mihor kico e mes lo scoge.

Unda mi por haya mas informacion?

E website jw.org ta duna informacion exacto tocante e creencia- y actividadnan di testigonan di Jehova.

Con mi por pidi un curso di Bijbel?

• 

  Yena e formulario riba www.jw.org.

• Bay na pagina dos di e revista aki, scoge e adres cu ta mas cerca di bo y manda bo peticion.

• Tuma contacto cu testigonan di Jehova den bo area.