1. Con nos sa uza e Oracion di Nos Tata, cu nos ta haya na Mateo 6:9 pa 13, den sirbishi?

HOPI hende sa e Oracion di Nos Tata for di cabes. Den nos trabou di predica, nos sa uza e palabranan di e oracion aki pa splica e hendenan cu e Reino di Dios di berdad ta un gobierno cu lo transforma e Tera den un paradijs. Tambe nos ta referi na e prome peticion, “bo nomber sea santifica”, pa mustra nan cu Dios tin un nomber cu mester ser “trata como santo.”—Mat. 6:9, nota.

2. Con nos por sa cu Hesus su intencion no tabata pa nos ripiti e oracion aki palabra pa palabra cada biaha cu nos ta resa?

² Hesus a siña nos e oracion modelo aki pa cada biaha cu nos kier resa nos ripitie palabra pa palabra, manera e hendenan di otro religion ta haci? No, pasobra Hesus mes a bisa un poco prome cu esey pa “no keda ripiti e mesun palabranan” ora di haci oracion. (Mat. 6:7) Mas despues el a bolbe ripiti e oracion ey pero cu otro palabra. (Luc. 11:1-4) Su intencion tabata pa nos uz’e como un modelo. E tabata kier pa nos sa kico nos por pidi y kico ta mas importante. Pesey, hopi hende ta yama e Oracion di Nos Tata e “oracion modelo.”

3. Ki preguntanan nos por haci nos mes segun cu nos ta analisa e Oracion Nos Tata?

³ Den e articulo aki y esun siguiente, nos lo analisa loke e Oracion di Nos Tata ta bisa. Segun cu nos ta haci esey, puntra bo mes: Con e oracion aki por yuda mi mehora mi oracionnan? Y mas importante ainda: Mi ta biba na harmonia cu e oracion aki?

“NOS TATA CU TA DEN CIELO”

4. (a) Kico e palabranan “nos Tata” ta corda nos? (b) Den ki sentido Jehova ta “Tata” di e cristiannan cu lo biba riba Tera?

⁴ E oracion ta cuminsa cu “nos Tata”, no “mi Tata.” Esey ta corda nos cu nos ta pertenece na un “hermandad”, un famia mundial di rumannan cu di berdad ta stima otro. Esta un gran honor esey ta! (1 Ped. 2:17) Cristiannan ungi, cu tin e speransa di bay cielo, ta yama Jehova “Tata”, ya cu nan di berdad ta su yiunan; el a adopta nan. (Rom. 8:15-17) Cristiannan cu lo biba riba Tera pa semper tambe por yama Jehova “Tata”, pasobra t’e a duna nan bida y ta percura pa tur nan necesidadnan. Pero ta despues cu nan bira perfecto y demostra nan lealtad durante e prueba final, nan lo bira “yiunan di Dios” den e pleno sentido di palabra.—Rom. 8:21; Rev. 20:7, 8.

5, 6. (a) Kico ta e mihor regalo cu mayornan por duna nan yiunan? (b) Kico cada yiu mester haci cu e regalo aki? (Wak e prome plachi.)

⁵ E mihor regalo cu mayornan por duna nan yiunan ta di siña nan haci oracion y yuda nan mira Jehova como un tata cu stima nan y cu ta preocupa pa nan. Un ruman homber cu awor ta sirbi como superintendente di circuito na Sur Africa ta corda: “For di dia cu mi yiu muhernan a nace, mi tabata resa tur anochi cu nan, a menos cu mi tabata biahando. Mi yiu muhernan ta bisa cu nan no ta corda e palabranan precies cu mi tabata uza. Loke si nan ta corda ta cu e momentonan ey tabata hopi special y sagrado. Nan tabata momentonan cu nos tabata comunica cu nos Tata y cu tabata pone nan sinti nan trankil y sigur. Asina cu nan mes por a haci oracion, mi a cuminsa pidi nan pa haci esaki na bos halto pa mi por a sa kico nan tabata pensa di Jehova y sinti p’e. Esey tabata un bon chens pa mi haya sa kico tabatin den nan curason. Ademas, pocopoco mi a guia nan pa inclui ideanan importante di e Oracion di Nos Tata den nan oracionnan. Di e manera ey mi por a haci sigur cu nan tabata sa kico pa pidi Dios.”

⁶ No ta un sorpresa cu e yiu muhernan di e ruman ey a sigui haci bon progreso spiritual. Awe, nan ta felizmente casa y ta sirbi Jehova den sirbishi di tempo completo hunto cu nan casa. Pues, e mihor regalo cu mayornan por duna nan yiunan ta di yuda nan bira amigo di Dios. Claro cu ta keda na cada yiu pa cuida e bunita relacion ey. Pa logra esaki, e mester siña stima e nomber di Dios y trat’e cu gran respet.—Sal. 5:11, 12; 91:14.

“BO NOMBER SEA SANTIFICA”

7. (a) Ki privilegio nos tin como parti di e pueblo di Dios? (b) Ki responsabilidad cada un di nos tin?

⁷ Ta un gran privilegio di por conoce e nomber di Dios y di pertenece na e “pueblo [cu ta] carga su nomber.” (Echo. 15:14; Isa. 43:10) Nos prome peticion na nos Tata celestial ta: “Bo nomber sea santifica.” Si nos ta pidie esey, logicamente nos mester pidie tambe yuda nos pa nos no haci ni bisa nada cu lo por susha su nomber santo. Nos no kier ta manera algun cristian di e prome siglo cu tabata predica un cos y haci otro. Apostel Pablo a bisa nan: “Pa boso motibo e nomber di Dios ta ser blasfema den e nacionnan.”—Rom. 2:21-24.

8, 9. Menciona un ehempel cu ta demostra cu Jehova ta bendiciona personanan cu ta haci esfuerso pa santifica su nomber.

⁸ Nos tur kier santifica e nomber di Dios, manera e ehempel di un ruman muher di Noruega ta demostra. Su casa a muri bay lag’e cu un yiu homber di dos aña. E ruman a conta: “Tabata un etapa hopi dificil di mi bida. Mi tabata haci oracion tur dia—casi cada ora—pidiendo Jehova pa duna mi forsa y yuda mi controla mi emocionnan. Mi no tabata kier pa Satanas haya chens di reprocha Jehova pa motibo di un mal decision cu ami lo a tuma ni mi no kier a bira infiel na mi Dios. Mi kier a santifica su nomber, y mi tabata kier pa mi yiu mira su tata atrobe den Paradijs.”—Prov. 27:11.

⁹ Jehova a scucha e oracionnan sincero aki? Si. E ruman muher semper tabata den compania di otro rumannan, y esey a dun’e e forsa pa resisti. Cinco aña despues el a casa cu un anciano. Y su yiu homber, cu awor tin 20 aña, ta un cristian batisa. E ruman muher a bisa: “Mi ta hopi contento cu mi casa por a yuda mi lanta mi yiu.”

10. Con Dios lo santifica su nomber completamente?

¹⁰ Pa Jehova su nomber ser completamente santifica y libra di tur reproche, e tin cu elimina tur cu ta rechas’e como nan Rey. (Lesa Ezekiel 38:22, 23.) Den Paradijs, humanidad pocopoco lo bira perfecto. Lo yega un dia cu tur persona den cielo y riba Tera ta adora Jehova y trata su nomber santo cu respet. Nos ta anhela pa e dia ey yega. E ora ey, porfin, nos Tata celestial lo “ta tur cos pa tur hende.”—1 Cor. 15:28.

“LAGA BO REINO BIN”

11, 12. Na final di siglo 19, kico cristiannan berdadero a compronde cu yudansa di Jehova?

¹¹ Prome cu Hesus a bay bek cielo, su apostelnan a puntr’e: “Señor, ta aworaki bo ta bay restaura e Reino pa Israel?” Hesus su contesta a laga nan compronde cu no tabata e momento pa nan sa e informacion ey, sino mas bien, pa nan concentra riba e trabou importante di predica. (Lesa Echonan 1:6-8.) Loke si el a bisa nan ta pa nan keda pendiente di e yegada di e Reino di Dios. Pesey, te ainda nos ta pidi pa e Reino bin.

¹² Ora e momento pa Hesus cuminsa goberna den cielo tabata acerca, Jehova a yuda su pueblo compronde na ki aña esey lo a tuma luga. Na aña 1876 a sali un articulo skirbi pa Charles Taze Russell den e revista Bible Examiner. E articulo—titula “Ki Ora e Tempo di e Paganonan Ta Termina?”—a indica cu 1914 lo ta un aña special. Tambe e articulo a conecta e “shete periodo di tempo” di e profecia di Daniel cu “e tempo stipula di e nacionnan” cu Hesus a papia di dje.a—Dan. 4:16; Luc. 21:24.

13. (a) Kico a sosode na aña 1914? (b) Kico e sucesonan mundial cu a tuma luga desde 1914 ta confirma?

¹³ Na 1914 a cuminsa un guera entre varios nacion di Europa, un guera cu a bira un conflicto mundial. Na 1918, ora e guera a termina, hopi hende tabata sufri di hamber. Tambe tabata reina un epidemia di griep cu a mata mas hende cu e guera mes. Tur e cosnan aki tabata parti di “e señal” cu Hesus a duna pa identifica su presencia invisibel como e Rey nobo di Tera. (Mat. 24:3-8; Luc. 21:10, 11) Tin basta prueba cu ta indica cu 1914 tabata e aña cu Dios a duna Señor Hesucristo “un corona.” Mesora, “el a sali bay, venciendo su enemigonan y pa completa su victoria.” (Rev. 6:2) Pa cuminsa, el a limpia cielo. El a bringa contra Satanas cu su demoñonan y a benta nan riba Tera. For di e momento ey, humanidad a mira cu su mes wowo e cumplimento di e palabranan inspira aki: “Ay di tera y di lama, ya cu Diabel a baha bin cerca boso yen di rabia, pasobra e sa cu a ked’e masha poco tempo.”—Rev. 12:7-12.

14. (a) Dicon ta importante pa nos sigui pidi pa e Reino di Dios bin? (b) Ki gran privilegio nos tin?

¹⁴ E profecia di Revelacion 12:7 pa 12 ta yuda nos compronde dicon den e mesun tempo cu e Reino di Dios a nace un epoca yen di desaster y problema a cuminsa pa humanidad. E motibo tabata cu aunke Hesus, e Rey di e Reino di Dios, a cuminsa goberna den cielo, Satanas keto bay tabata goberna e Tera. Tanten cu e dia no yega pa Hesus vence su enemigonan por completo y elimina maldad for di riba Tera, nos lo sigui pidi pa e Reino di Dios bin. Pero alabes nos mester biba na harmonia cu e peticion ey. Con nos ta haci esaki? Nos ta haci nos best pa coopera cu cumplimento di un di e aspectonan mas importante di “e señal” cu Hesus a duna, esta: “E bon noticia aki di e Reino lo ser predica den henter e Tera habita, como testimonio pa tur nacion, anto e fin lo yega.”—Mat. 24:14.

“LAGA BO BOLUNTAD SOSODE ... RIBA TERA”

15, 16. Con nos por biba na harmonia cu e peticion pa laga e boluntad di Dios sosode riba Tera?

¹⁵ Un 6.000 aña pasa, humanidad tabatin un cuminsamento perfecto y e boluntad di Dios tabata sosode riba Tera. Pesey Jehova por a bisa cu “tur cos tabata masha bon.” (Gen. 1:31) Pero Satanas a rebeldia, y for di e dia ey, masha poco hende a haci e boluntad di Dios riba Tera. Pero nos tin e privilegio di biba den un tempo cu rond di ocho miyon testigo di Jehova no solamente ta pidi pa e boluntad di Dios sosode riba Tera, sino tambe ta haci nan best pa cumpli cu ne. Nan ta biba na harmonia cu e peticion ey door di hiba un bida cu ta agrada Dios y door di siña hende tocante e Reino di Dios cu entusiasmo.

¹⁶ Por ehempel, un ruman muher cu a batisa na 1948 y cu a sirbi como misionero na Africa a comenta: “Hopi biaha mi ta pidi den oracion pa tur hende di bon curason por siña conoce Jehova prome cu ta laat. Y ora mi ta bay predica na un hende, mi ta pidi Jehova yuda mi haya un manera pa yega na su curason. Tambe mi ta pidie bendiciona nos esfuerso pa cuida tur e hendenan manera carne cu a acepta e mensahe caba.” No ta nada straño anto cu e ruman muher aki di 80 aña tabatin asina tanto exito den e trabou di predica. Cu sosten di otro rumannan, el a yuda hopi hende bira testigo di Jehova. Casi sigur bo tambe conoce otro rumannan cu ta haci e boluntad di Dios cu hopi entusiasmo a pesar di e limitacionnan di biehes.—Lesa Filipensenan 2:17.

17. Kico bo ta pensa di loke Jehova lo haci den futuro como contesta riba nos peticion pa su boluntad sosode riba Tera?

¹⁷ Nos lo sigui pidi pa e boluntad di Dios sosode riba Tera te ora cu e enemigonan di e Reino ser elimina. E ora ey e Tera lo ser transforma den un paradijs, e mortonan lo ser resucita y lo tin miles di miyones di hende cu ta haci e boluntad di Dios. Hesus a bisa: “No keda asombra pa loke mi a caba di bisa, pasobra lo yega e ora cu tur esnan cu ta den graf lo tende [mi] stem y lo sali afo.” (Juan 5:28, 29) Esta feliz nos lo ta di por yama bonbini na nos sernan keri cu a fayece! Dios lo “seca tur lagrima for di [nos] wowo.” (Rev. 21:4) Mayoria di hende resucita lo ta hende “inhusto”, es decir, hende cu a muri sin conoce e berdad tocante Jehova Dios y su Yiu. Lo ta un berdadero honor di por siña nan kico ta Jehova su boluntad y proposito ya asina nan tambe por haya “bida eterno.”—Echo. 24:15; Juan 17:3.

18. Kico ta loke mas humanidad tin mester di dje?

¹⁸ Ora Jehova contesta e prome tres peticionnan di e Oracion di Nos Tata, e ta duna humanidad loke hende tin mas mester di dje: paz y harmonia. Dicon nos ta bisa esaki? Pasobra paz y harmonia lo por bolbe reina den universo solamente ora e nomber di Jehova ser santifica, ora cu su Reino bin y ora cu su boluntad sosode riba Tera. Pero mientrastanto, tin otro cosnan cu nos tin mester di dje cu urgencia y cu ta ser menciona den e di dos parti di Hesus su oracion modelo. Den e siguiente articulo, nos lo trata e cuater peticionnan ey.

1-3. Dicon Lana ta convenci cu Jehova sa kico nos tin mester?

LANA, un pionero regular, hamas lo lubida loke a sosode cu ne na Alemania na aña 2012. E ta convenci cu Jehova a contesta dos oracion hopi specifico cu el a haci. E prome oracion tabata den trein riba caminda pa aeropuerto. El a pidi Jehova yud’e haya un hende pa predica na dje. El a haci e di dos oracion ora el a yega aeropuerto y nan a bis’e cu su vuelo tabatin retraso y lo a sali e siguiente dia. El a pidi Jehova yud’e pasobra el a uza casi tur su euronan y e no tabatin caminda pa pasa anochi.

² Lana no a ni caba di haci e di dos oracion cu el a tende un hende bis’e: “Hey Lana, kico bo ta haci akinan?” Tabata un mucha homber cu el a bay scol cu ne y cu tabata bayendo Sur Africa. E tabata hunto cu su mama y su wela, cu a bin bis’e ayo. Ora e mucha homber su mama, Elke, a tende di Lana su situacion, el a invita Lana pa bin keda cerca nan. Elke y su mama tabata hopi hospitalario, y nan a haci Lana hopi pregunta tocante su creencianan y su trabou di predica.

³ E siguiente mainta, despues di un bon desayuno, Lana a contesta mas pregunta cu nan tabatin, y nan a dun’e nan datonan pa un Testigo por a sigui bishita nan. Lana a regresa cas sano y salvo, y ainda e ta traha pionero. E ta sigur cu Jehova a scucha su oracionnan, tabata sa kico e tabatin mester y a yud’e na e ocasion ey.—Sal. 65:2.

4. Di ki tipo di necesidad nos lo bay papia awor?

⁴ Ora surgi un problema inespera, nos no ta duda pa pidi Jehova yudansa, y e ta gusta scucha e oracionnan ey di su sirbidornan leal. (Sal. 34:15; Prov. 15:8) Pero e Oracion di Nos Tata ta siña nos cu tin necesidadnan mas importante cu kisas nos ta pasa por halto. Den e articulo aki nos lo papia di e ultimo cuater peticionnan di e oracion modelo. Tres di nan ta enfatisa nos necesidadnan spiritual y e di cuater, “duna nos awe nos pan di cada dia”, ta siña nos lesnan importante cu ta yuda nos biba na harmonia cu e oracion ey.—Lesa Mateo 6:11-13.

“DUNA NOS AWE NOS PAN DI CADA DIA”

5, 6. Dicon nos mester pidi pa “nos pan” di cada dia aunke nos tin suficiente cuminda?

⁵ Ta bon pa nota cu Hesus a siña nos pidi pa nos pan di cada dia, no djis mi pan di cada dia. Victor, un superintendente di circuito na Africa, a splica: “Hopi biaha mi ta gradici Jehova cu ami cu mi casa no tin nodi kibra cabes tocante kico nos ta bay come ni con nos ta bay paga huur. Nos rumannan stima ta percura pa nos tur dia. Pero mi ta pidi Jehova pa yuda nos rumannan sigui padilanti a pesar di e problemanan economico di e mundo aki.”

⁶ Kisas nos tin suficiente di come, pero hopi di nos rumannan ta pober of ta sufri di e consecuencianan di un of otro desaster. Nos mester haci oracion p’e rumannan ey, pero no djis resa pa nan y keda sin haci nada; nos mester actua na harmonia cu nos oracion. Por ehempel, nos por comparti loke nos tin cu e rumannan den necesidad. Tambe nos por apoya e obra mundial cu nos donacionnan regular, pasobra nos sa cu nos placa lo ser bon uza.—1 Juan 3:17.

7. Ki ilustracion Hesus a uza pa splica cu nos no mester ta “ansha pa e dia di mañan”?

⁷ Ora cu Hesus a menciona nos pan di cada dia, e tabata referi sin duda na nos necesidadnan basico en general. Pasobra poco despues el a splica cu Dios ta percura pa e flornan, anto el a puntra: “Cuanto mas lo e no bisti boso, hende di poco fe? Pesey, no sea nunca ansha y puntra: ... ‘Kico nos lo bisti?’” Na final, el a ripiti e conseho importante aki: “No sea nunca ansha pa e dia di mañan.” (Mat. 6:30-34) E palabranan ey ta siña nos pa no bira materialista, sino mas bien, pa keda contento cu nos por satisface nos necesidadnan basico di tur dia, entre otro, un cas digno, un trabou pa cuida nos famia y e sabiduria pa trata cu problemanan di salud. Pero si nos ta pidi Dios pa satisface solamente nos necesidadnan fisico, esey ta indica cu nos prioridadnan no ta bon. Nos tin necesidadnan spiritual cu ta hopi mas importante.

8. E peticion tocante nos pan di cada dia ta laga nos corda riba kico? (Wak e prome plachi.)

⁸ E peticion tocante nos pan di cada dia ta laga nos corda riba un otro cos cu Hesus a bisa: “Hende no mester biba di pan so, sino tambe di tur palabra cu ta sali for di boca di Jehova.” (Mat. 4:4) Kiermen, nos tin mester di cuminda spiritual tambe. Pesey mes nos tin cu sigui pidi Jehova pa keda duna nos cuminda spiritual na e debido tempo.

“PORDONA NOS NOS DEBENAN”

9. Den ki sentido nos picanan ta manera debe?

⁹ Dicon Hesus a bisa akinan “pordona nos nos debenan”, mientras cu mas despues el a bisa “pordona nos nos picanan”? (Mat. 6:12; Luc. 11:4) Mas cu 60 aña pasa, E Toren di Vigilancia a splica cu ora nos peca, ta comosifuera nos ta crea un debe cerca Jehova. Nos debe Jehova nos amor y obediencia. Pues, ora nos peca contra dje, ta comosifuera nos no a pag’e e amor cu nos deb’e. Si e tabata kier, lo e por a kibra su amistad cu nos. E Toren di Vigilancia a agrega: “Pica ta un falta di amor pa Dios.”—1 Juan 5:3.

10. (a) Dicon Jehova por pordona nos picanan? (b) Kico nos mester haci pa mustra nos aprecio pa e amor di Jehova?

¹⁰ Tur dia nos tin mester di pordon pa nos picanan. Pesey, nos ta agradecido cu Jehova a percura e sacrificio di rescate di Hesus. Sin e rescate ey nos lo no por haya pordon. Aunke Hesus a paga e rescate ey casi 2.000 aña pasa, nos mester apreci’e comosifuera ta awe el a duna nos e regalo ey. En realidad, e prijs di e rescate pa nos bida tabata asina halto cu niun ser humano imperfecto lo por a pag’e. (Lesa Salmo 49:7-9; 1 Pedro 1:18, 19.) Ademas, e oracion modelo ta papia di “nos picanan”, no di “mi picanan”, y esey ta corda nos cu tur cristian tin mester di e areglo misericordioso aki. Jehova kier pa nos preocupa no solamente pa nos salud spiritual, sino tambe pa e salud spiritual di nos rumannan, si, hasta di esnan cu a comete un pica contra nos. Por lo general, e tipo di picanan ey no ta grave, y nan ta duna nos e oportunidad di demostra cu di berdad nos ta stima nos rumannan y ta dispuesto pa pordona nan, mescos cu Dios ta pordona nos.—Col. 3:13.

11. Dicon ta importante pa nos ta dispuesto pa pordona otro?

¹¹ Lamentablemente, nos ta imperfecto, y pesey tin biaha ta dificil pa nos pordona nos rumannan. (Lev. 19:18) Si nos cuminsa papia cu otro hende tocante e problema, kisas algun ruman ta tuma parti pa nos y esey por causa division den e congregacion. Si nos no resolve e conflicto, nos ta mustra cu nos no ta aprecia e compasion di Dios ni e rescate. Y nos Tata lo no pordona nos tanten cu nos no ta pordona otro. (Mat. 18:35) Hesus a papia di esaki poco despues cu el a siña su discipelnan con pa haci oracion. (Lesa Mateo 6:14, 15.) Ademas, pa nos ricibi Jehova su pordon, nos tin cu haci nos best pa nos no comete picanan grave, y esaki ta hiba nos na e siguiente peticion.—1 Juan 3:4, 6.

“NO LAGA NOS CAY DEN TENTACION”

12, 13. (a) Kico a pasa cu Hesus poco despues di su bautismo? (b) Dicon nos no mester culpa un otro persona si nos cay den tentacion? (c) Kico Hesus a demostra cu su fieldad te na morto?

¹² Loke a pasa cu Hesus poco despues di su bautismo por yuda nos compronde dicon nos tin cu pidi: “No laga nos cay den tentacion.” E spirito di Dios a hiba Hesus den desierto. Kico a pasa eynan? “Diabel a purba di hinc’e den tentacion.” (Mat. 4:1; 6:13) Dicon Jehova a permiti esaki sosode? Wel, e motibo principal pakico Jehova a manda su Yiu na Tera tabata pa resolve unabes pa semper e dudanan cu a surgi ora cu Adam cu Eva a rechasa su autoridad. Nan rebelion a lanta e siguiente preguntanan: Jehova a crea hende cu defecto? Un hende perfecto lo por a keda leal na Dios a pesar di e presionnan di “e Malbado”, Satanas? Hende su situacion lo tabata mihor si nan a goberna nan mes, independiente di Dios, manera Satanas a insinua? (Gen. 3:4, 5) Tabatin mester di tempo pa contesta e preguntanan ey, pero al final tur persona den cielo y riba Tera lo mira bon cla cu e manera di goberna di Jehova ta esun mihor.

¹³ Jehova ta santo, y e sigur no ta tenta niun hende pa haci malo. Ta Satanas, e Diabel, ta “e Tentador.” E ta esun cu ta crea situacionnan pa purba di laga nos cay den tentacion. (Mat. 4:3) Sinembargo, nos tin e poder di dicidi si nos lo cay den e tentacion of no. (Lesa Santiago 1:13-15.) Den caso di Hesus, el a rechasa cada un di e tentacionnan di Diabel mesora door di cita for di e Palabra di Dios, y asina el a defende Dios su derecho di goberna su creacion. Pero Satanas no a entrega. El a warda “te na un otro momento oportuno.” (Luc. 4:13) Hesus a sigui resisti tur Satanas su atakenan pa kibra su integridad. Asina el a demostra cu Dios su manera di goberna ta husto y cu un ser humano perfecto por keda fiel a pesar di e pruebanan di mas dificil. Pero no lubida cu te awe Satanas ta sigui purba di laga e discipelnan di Hesus cay den tentacion, y esey ta inclui abo.

14. Kico nos tin cu haci pa nos no cay den tentacion?

¹⁴ E acusacionnan cu Diabel a lansa contra Jehova no a ser contesta completamente ainda. Pesey Jehova ta permitie sigui uza e mundo pa purba di laga nos cay den tentacion. Pues, no ta Jehova ta laga nos cay den tentacion. Al contrario, e tin e confianza cu nos por keda fiel y e kier yuda nos. Pero e ta respeta nos libertad di scoge, y pesey nunca lo e no obliga nos di haci loke ta corecto. Pues, e ta lag’e na nos pa dicidi si nos lo keda fiel of no. Pa nos no cay den tentacion, nos tin cu haci dos cos: keda spiritualmente fuerte y persevera den oracion. Pero con Jehova ta contesta nos oracionnan?

15, 16. (a) Menciona algun tentacion cu nos tin cu resisti. (b) Si un ruman cay den tentacion, ta ken su falta?

¹⁵ Jehova ta duna nos su poderoso spirito santo, y esey por duna nos e forsa pa resisti tentacion. Anto pa medio di su Palabra y su organisacion e ta spierta nos pa situacionnan cu ta peligroso. Por ehempel, e ta spierta nos pa no malgasta nos tempo, placa y energia na cosnan cu no ta necesario. Espen y Janne ta biba den un pais rico na Europa. Pa hopi aña, nan a sirbi como pionero regular den un area di e pais caminda tabatin mester di yudansa. Pero ora nan prome yiu a nace, nan mester a stop di traha pionero. Despues nan a haya un yiu mas. Espen a bisa: “Hopi biaha nos ta pidi Jehova yuda nos pa nos no cay den tentacion awor cu nos no por participa dje tanto ey mas den actividadnan cristian manera antes. Nos ta pidie yuda nos pa mantene nos amistad cu ne fuerte y pa sigui predica cu entusiasmo.”

¹⁶ Un otro tentacion cu a bira hopi popular ta wakmento di pornografia. Si nos entrega na e tentacion ey, nos no por culpa Satanas. Dicon no? Pasobra ni Satanas ni e mundo no por obliga nos di haci malo. Echo ta cu algun ruman a cuminsa wak pornografia pasobra nan a keda pensa riba cosnan cu ta malo. Pero miles di otro rumannan si a resisti e tentacion aki, y nos tambe por.—1 Cor. 10:12, 13.

“LIBRA NOS DI E MALBADO”

17. (a) Kico nos mester haci pa biba na harmonia cu e peticion “libra nos di e Malbado”? (b) Ki alivio nos lo sinti pronto?

¹⁷ Pa nos biba na harmonia cu e peticion “libra nos di e Malbado”, nos mester haci esfuerso pa no ta “parti di [e] mundo” di Satanas. Nos no mester “stima mundo ni e cosnan cu tin den mundo.” (Juan 15:19; 1 Juan 2:15-17) Esaki ta un lucha constante, pero pronto Jehova lo contesta nos peticion y elimina Satanas y su mundo. Pero nos no tin cu lubida cu ora Satanas a ser benta abou for di cielo, e tabata sa cu su dianan ta conta. Pesey e ta hopi rabia y ta purba tur manera pa pone nos stop di sirbi Jehova. Pues, nos tin cu sigui pidi Dios pa libra nos di dje.—Rev. 12:12, 17.

18. Si nos kier sobrevivi e fin di e mundo di Satanas, kico nos tin cu sigui haci?

¹⁸ Si bo kier biba pa semper den un mundo sin Satanas, sigui pidi Dios pa laga su Reino bin, pa su nomber ser santifica y pa su boluntad sosode riba Tera. Depende riba Jehova pa bo necesidadnan spiritual y fisico. Si, haci tur loke ta na bo alcance pa biba na harmonia cu e Oracion di Nos Tata.