Ora bo tende cu “E fin ta cerca”, kico ta bin na bo mente? Bo ta pensa riba un meteoriet grandi cu ta dal den Tera y ta mata tur cos riba dje? Of bo ta kere cu e fin ta un desaster ecologico of un tercer guera mundial? Ora algun hende pensa riba e escenanan aki, nan ta bira hopi preocupa; otronan no ta worry mes y tin hende hasta ta haci bofon di nan.

Bijbel ta bisa na Mateo 24:14 cu “e fin lo yega.” E suceso aki ta ser yama tambe “e gran dia di Dios” y “Armagedon.” (Revelacion 16:14, 16) Ta berdad cu tin hopi confusion den e religionnan tocante kico e fin ta. Y tin hopi ideanan straño of spantoso tocante e tema aki. Sinembargo, Bijbel mes ta splica bon cla kico e fin ta y kico e no ta, y e ta yuda nos mira si e fin ta cerca of no. Mas importante ainda, e ta siña nos con pa sobrevivi e fin. Pero prome, laga nos clarifica algun idea robes tocante e fin y analisa kico e ta realmente. Pues, segun Bijbel, kico e fin ta nifica?

ALGUN IDEA ROBES TOCANTE E FIN

1. E FIN TA UN DESASTER DEN CUA TERA TA CABA NA CANDELA.

   Bijbel ta bisa bon cla cu “[Dios] a establece Tera riba su fundeshinan, pa asina esey no kita for di su luga nunca mas.” (Salmo 104:5) E texto aki ta sigura nos cu Dios lo no destrui Tera y cu hamas lo e lag’e caba na nada.—Eclesiastes 1:4; Isaias 45:18.

2. E FIN LO NO YEGA NUNCA.

   Al contrario, Bijbel ta bisa cu Dios a pone un fecha caba pa e fin. Marco 13:32 y 33 ta bisa: “Pa loke ta e dia ey of e ora, ningun hende no sa, ni e angelnan den cielo ni e Yiu, sino e Tata so. Keda alerta, keda lanta, pasobra boso no sa ki ora e tempo stipula ta.” Claramente anto, Dios (“e Tata”) a “stipula” e dia y ora exacto pa e fin yega.

3. E FIN LO SER CAUSA PA HENDE OF METEORIET CU TA BIN DAL DEN TERA.

   Bijbel no ta apoya e ideanan ey. Kico si lo causa e fin anto? Revelacion 19:11 ta bisa: “Mi a mira cielo habri, y ata un cabay blanco. Y esun sinta riba dje yama Fiel y Berdadero.” Y versiculo 19 ta sigui bisa: “Mi a mira e bestia salbahe y e reynan di Tera y nan ehercitonan cu a bin hunto pa bringa contra esun sinta riba e cabay y contra su ehercito.” (Revelacion 19:11-21) Aunke gran parti di e palabranan aki ta simbolico, nos por compronde si cu Dios lo manda un ehercito di angel pa caba cu su enemigonan.

LOKE E FIN TA NIFICA

1. FIN DI TUR GOBIERNO HUMANO.

   Bijbel ta bisa: “E Dios di cielo lo lanta un reino [gobierno] cu nunca lo no wordo destrui, y e reino ey lo no pasa pa ningun otro pueblo; e lo garna y pone un fin na tur e reinonan aki, ma e mes lo dura pa semper.” (Daniel 2:44) Manera punto 3 a trece padilanti, “e reynan di Tera y nan ehercitonan” cu ta “bin hunto pa bringa contra esun sinta riba e cabay y contra su ehercito” lo ser destrui.—Revelacion 19:19.

2. FIN DI GUERA, VIOLENCIA Y INHUSTICIA.

   Salmo 46:9 ta bisa: “[Dios] ta haci gueranan stop te na e fin di Tera.” Na Proverbionan 2:21 y 22 tin para skirbi: “E rectonan lo biba den e Tera, y e perfectonan lo keda den dje; ma e malbadonan lo wordo corta kita for di Tera, y e traidornan lo wordo ranca for di dje cu raiz cu tur.” Anto e buki di Revelacion ta bisa: “Tende! Mi ta traha tur cos nobo.”—Revelacion 21:4, 5.

3. FIN DI RELIGION CU A DECEPCIONA DIOS Y HENDE.

   Jeremias 5:31 ta bisa: “E profetanan ta profetisa cu engaño, y e sacerdotenan ta goberna manera nan ta haya ta bon ... Ma kico boso lo haci na fin di esaki?” Anto Hesus a bisa: “Hopi hende lo bisa mi riba e dia ey: ‘Señor, Señor, nos no a profetisa den bo nomber, saca demoño den bo nomber y haci hopi obra poderoso den bo nomber?’ Sinembargo, lo mi bisa nan publicamente e ora ey: ‘Mi no conoce boso! Bay for di mi, hacidonan di maldad!’”—Mateo 7:21-23.

4. FIN DI HENDE CU TA STIMA MALDAD Y CU TA APOYA INHUSTICIA.

   Hesucristo a bisa: “Awor bon, esaki ta e base pa huicio: E luz a bin na mundo; ma hende a stima scuridad en bes di luz, pasobra nan obranan tabata malo.” (Juan 3:19) Bijbel ta conta di un destruccion mundial cu a tuma luga den e tempo di e homber fiel Noe. Bijbel ta bisa: “E mundo di e tempo ey a ser destrui ora el a keda inunda cu awa. Pero pa medio di e mesun palabra, e cielo y tera cu ta existi awor ta reserva pa candela y ta warda pa e dia di huicio y di destruccion di hende malbado.”—2 Pedro 3:5-7.

Tuma nota cu Bijbel ta compara e binidero “dia di huicio y di destruccion” cu e destruccion di “e mundo” den tempo di Noe. Cua mundo a ser destrui? Ta “hende malbado”, esta, e enemigonan di Dios “a ser destrui”, no nos planeta. Asina tambe, durante e binidero “dia di huicio” di Dios, lo e destrui tur hende cu scoge pa ta su enemigo. Pero e amigonan di Dios si lo sobrevivi, mescos cu Noe y su famia.—Mateo 24:37-42.

Esta dushi lo ta pa biba riba e Tera aki despues cu Dios caba cu tur influencia malbado! Ta bisto anto cu e mensahe di Bijbel tocante e fin ta un bon noticia. Pero kisas ainda bo ta puntra bo mes: Bijbel ta bisa na ki tempo e fin lo bin? E ta cerca? Con mi por sobrevivi?

Dios lo permiti hende sigui goberna y pone e futuro di humanidad na peliger? Esey sigur cu no. Manera nos a mira, Dios lo tuma accion y pone fin na cientos di aña di opresion y miseria. E Creador di hende y Tera kier pa bo sa cu su tempo pa tuma accion ta yegando cerca. Con e ta revela e detaye importante aki na nos?

Wel, imagina bo cu bo kier biaha di un pais pa otro cu auto. Probablemente, prome cu bo bay, bo ta busca informacion tocante e ruta riba Internet, wak mapa y check otro fuentenan. Anto, mientras cu bo ta stuur, bo ta mira borchi- y luganan cu ta duna bo e siguransa cu bo ta casi yega bo destinacion. Mescos cu un mapa, Dios a duna nos su Palabra, Bijbel, y e ta menciona un serie di sucesonan mundial impactante. Y e sucesonan historico ey cu ta tumando luga ta convence nos cu nos ta bibando den e tempo di fin.

Segun Bijbel, lo tin un periodo crucial den historia di humanidad cu lo culmina den e fin. Den e tempo ey, hende rond mundo lo experencia un combinacion nunca bisto di suceso y circunstancia. Laga nos wak algun di e suceso- y circunstancianan aki cu Bijbel ta papia di dje.

1. PROBLEMANAN MUNDIAL E profecia na Mateo capitulo 24 ta menciona sucesonan cu lo tuma luga riba Tera cu ta forma parti di un señal. E señal ey lo mustra cu nos ta bibando den e “conclusion di e era aki” cu lo hiba na “e fin.” (Versiculo 3,14) Algun di e sucesonan aki ta guera, scarsedad di cuminda, temblor den un luga tras di otro, aumento di maldad, falta di amor y tambe astucia di lidernan religioso pa gaña hende. (Versiculo 6-26) Ta berdad cu e cosnan aki tin hopi siglo ta tumando luga, pero segun cu e fin ta acerca, nan tur lo sosode pareu den e mesun periodo di tempo. Ademas di e sucesonan aki, lo tin tambe e siguiente tres profecianan cu lo indica cu e fin ta cerca.

2. ACTITUD DI HENDE Bijbel ta bisa cu den “e ultimo dianan”, esta, e tempo cu lo hiba na e fin, actitud di hende lo bay di malo pa pio. E ta bisa: “Hende lo stima nan mes, stima placa; nan lo ta bromado, arogante, blasfemado, desobediente na mayornan, malagradecido, desleal, sin cariño; nan lo no ta dispuesto pa cera ningun acuerdo; nan lo ta calumniador, sin dominio propio, feroz, sin amor pa loke ta bon, traidor, cabesura, hincha di orguyo, cu ta stima placer en bes di stima Dios.” (2 Timoteo 3:1-4) Ta berdad cu pa hopi tempo caba hende ta falta otro respet, pero ta solamente den “e ultimo dianan” aki nan actitud lo bira asina malo. Pesey mes nos por describi e periodo aki como “temponan critico, dificil pa trata cu ne.” Abo a ripara cu actitud di hende a bira pio?

3. HENDE TA RUINA NOS PLANETA Segun Bijbel, Dios lo “caba cu esnan cu ta caba cu e Tera.” (Revelacion 11:18) Den ki manera hende ta ruinando of cabando cu e Tera aki? Wel, mescos cu nan a haci den tempo di Noe: “Tera tabata corumpi [of, ruina] den bista di Dios y Tera tabata yen di violencia. Anto Dios a tira un bista riba Tera, y mira, e tabata corupto [of, ruina].” Pesey, Dios a bisa di e hendenan malbado di e tempo ey: “Mi ta bay destrui nan.” (Genesis 6:11-13) Bo ta mira cu tur dia tin mas y mas violencia den e mundo aki? Ademas, awe hende tin asina tanto arma disponibel cu nan tin e capacidad di caba cu bida di tur hende. Fuera di esey, hende ta ruinando e Tera na un otro manera tambe. Mal maneho di hende ta pone cu pocopoco nan ta caba cu e aire cu nos ta inhala, e oceannan, y e mata- y bestianan.

Puntra bo mes: Un poco mas cu shen aña pasa, hende tabatin e capacidad pa caba cu nan mes? No, pero awendia si. Hende ta uza e capacidad ey pa acumula armanan potente y pa caba cu e medioambiente. Ademas, ta parce cu hende no por compronde e consecuencianan di avancenan tecnologico ni tene esakinan bou di control. Sinembargo, e futuro di nos planeta no ta den man di hende. Dios ta priminti cu prome cu hende yega asina leu di caba cu bida riba Tera, lo e tuma accion y destrui nan.

4. E TRABOU MUNDIAL DI PREDICA Un otro parti di e profecia na Mateo ta cu un trabou sin precedente lo a tuma luga. Mateo 24:14 ta bisa: “E bon noticia aki di e Reino lo ser predica den henter e Tera habita, como testimonio pa tur nacion, anto e fin lo yega.” E trabou mundial di predica aki lo ta totalmente diferente for di cualkier otro trabou di predica cu mayoria di religion a haci den pasado. Durante e ultimo dianan, un mensahe specifico lo a ser enfatisa, esta, “e bon noticia ... di e Reino.” Abo sa di un grupo religioso cu ta enfatisa e mensahe aki? Y si acaso nan ta predica e mensahe aki, ta un grupo local nan ta of ta “den henter e Tera habita” nan ta plama e mensahe aki “como testimonio pa tur nacion”?

E website www.jw.org ta enfoca riba “e bon noticia ... di e Reino.” E website tin publicacion cu ta splica e mensahe ey den mas cu 700 idioma. Cua otro organisacion ta haci asina tanto esfuerso pa pone enfasis riba e bon noticia di e Reino rond mundo? Hopi tempo prome cu Internet a existi, ya caba testigonan di Jehova tabata bon conoci pa nan esfuersonan di plama e mensahe di e Reino di Dios. For di 1939, e palabranan “Anunciando e Reino di Jehova Dios” ta aparece riba portada di E Toren di Vigilancia. Un buki tocante religion ta comenta cu ta testigonan di Jehova so ta alcansa asina tanto hende cu nan trabou di predica. E obra aki ta enfatisa e bon noticia cu pronto e Reino di Dios lo trece e fin.

UN PERIODO CRUCIAL DEN HISTORIA DI MUNDO

Bo a ripara cu tur e cuater profecianan aki cu Bijbel ta duna como parti di e señal ta tumando luga den nos tempo? Pa un poco mas cu 100 aña caba e revista aki ta informando su lectornan tocante sucesonan mundial pa yuda nan compronde cu e fin ta cerca. Di mes, tin hende cu ainda ta duda den esaki y ta haya cu hende ta exagera. Nan ta kere cu cada persona mester dicidi pa nan mes kico e sucesonan aki ta nifica. Nan ta pretende tambe cu ta pa motibo di e avancenan den medionan di comunicacion, e problemanan mundial ta parce mas grave. Sinembargo, tin mas y mas prueba cu nos ta yegando na final di un periodo crucial den historia di humanidad.

Algun experto ta pensa cu tin cambionan drastico na caminda pa nos planeta. Por ehempel, na 2014, e Science and Security Board di e revista Bulletin of the Atomic Scientists a spierta e Conseho di Siguridad di Nacionnan Uni tocante e peligernan di mas grandi pa humanidad. Nan a bisa: “Despues di analisa tur e peligernan aki, nos a yega na e conclusion cu ainda tin un riesgo grandi cu avancenan riba tereno di tecnologia por causa un catastrofe cu por caba cu henter humanidad.” Hopi hende ta mas convenci cu nunca cu nos ta den un periodo crucial den historia di mundo. Pesey tanto e editornan como e lectornan di e revista aki ta convenci cu e tempo cu nos ta biba aden sin duda ta e ultimo dianan y cu e fin ta cerca. Pero en bes di tin miedo di futuro, bo por ta optimista. Dicon? Pasobra bo tambe lo por sobrevivi e fin.

Bijbel ta bisa cu na e fin lo tin un destruccion. E ta bisa: “Lo tin un tribulacion grandi manera no a yega di sosode nunca, for di principio di mundo te awor ... De echo, a menos cu Dios haci e dianan ey cortico, ningun hende lo ser salba.” (Mateo 24:21, 22) Pero Dios ta priminti cu hopi hende lo sobrevivi. Bijbel ta bisa: “Mundo ta pasa bay ..., ma esun cu ta haci e boluntad di Dios ta keda pa semper.”—1 Juan 2:17.

Kico bo mester haci si bo kier sobrevivi e fin di e mundo aki y “keda pa semper”? Bo ta pensa cu bo mester cuminsa stock bo cas cu productonan di prome necesidad of haci otro preparacion? No. Bijbel ta urgi nos pa pone otro prioridad. E ta bisa: “Como cu ta di e manera aki tur e cosnan ey lo larga caba na nada, pensa riba ki sorto di hende boso mester ta. Boso mester ta hende di conducta santo y mester haci obranan cu ta demostra devocion na Dios, segun cu boso ta spera y corda semper riba e binida di e dia di Jehova!” (2 Pedro 3:10-12) E contexto di e versiculonan aki ta mustra cu “tur e cosnan ey” cu ta bay caba na nada ta inclui e gobiernonan di e mundo corupto aki y tur esnan cu ta apoya nan gobernacion en bes di apoya e Reino di Dios. Claramente anto, cos material lo no yuda nos sobrevivi e destruccion ey.

Pues, pa nos sobrevivi, nos mester ta devoto na Jehova Dios y siña kico nos tin cu haci y con nos tin cu comporta nos mes pa agrad’e. (Sofonias 2:3) Awendia, mayoria di hende ta ignora e señalnan cu ta mustra bon cla cu nos ta bibando den e ultimo dianan. En bes di sigui nan tras, nos mester “corda semper riba e binida di e dia di Jehova.” Testigonan di Jehova por mustra bo for di Bijbel kico bo tin cu haci pa bo por sobrevivi.