Wak pa Bo Golpinan Ta Bon Dirigi

1. Con e palabranan di 1 Corintionan 9:⁠26 ta aplica na nos trabou di predica?

¹ Apostel Pablo a skirbi: “E forma cu mi ta core no ta manera cos cu mi no sa unda mi ta bay; e manera cu mi ta dirigi mi golpinan no ta pa dal den bashi.” (1 Cor. 9:⁠26) Cu e palabranan aki, Pablo a indica cu su mente tabata fiha riba metanan spiritual. E no a laga nada distra’ele. Ma loke Pablo a bisa ta aplica tambe na nos trabou di predica. Nos lo haya mihor resultado den sirbishi ora nos “golpinan”, of esfuersonan, ta bon dirigi. Con nos por logra esaki?

2. Con nos por imita Pablo y su compañeronan di prome siglo ora di scoge sitionan y momentonan pa predica?

² Bay Caminda Tin Hende: Pablo y su compañeronan di prome siglo a bay caminda nan a spera di haya hende. (Echo. 5:⁠42; 16:⁠13; 17:⁠17) Pues si mayoria di hende den nos teritorio ta na cas parti atardi, esaki lo ta e mihor momento pa bay di cas pa cas. Tin mas tanto hende mainta trempan y atardi laat ta para warda bus na borchi? Ki ora nos ta haya mas hende den e areanan comercial den teritorio? Si nos predica riba caya na e momentonan ey, nos lo haya mihor resultado.

3. Con e forma cu nos ta traha nos teritorio ta mustra cu nos golpinan ta bon dirigi?

³ Traha e Teritorio Bon: E forma cu nos ta traha nos teritorio tambe ta mustra si nos ta dirigiendo nos golpinan bon. Por ehempel, na luga di bay cu un grupo grandi den e mesun area, locual ta exigi hopi tempo y esfuerso pa organisa y dirigi, lo ta sabi pa split e grupo. Mescos ta conta tambe ora nos ta bay traha un teritorio caminda e casnan ta keda leu for di otro. Si e grupo ta chikito, nos lo traha e teritorio mas lihe y lo haya mas oportunidad di predica. Otro cos cu nos por haci ta di pidi pa haya un teritorio personal banda di nos cas y asina reduci e tempo pa yega teritorio.

4. Con nos por bira bon “piscado di hende”?

⁴ Hesus a compara su discipelnan cu “piscado di hende.” (Mar. 1:⁠17) Meta di un piscado ta pa coy pisca, no djis tira liña. Pesey, un bon piscado ta bay na e momento y na e sitio cu e sa cu tin pisca, y e ta cuminsa pisca di biaha. Si, e ta percura pa su esfuersonan ta bon dirigi. Laga nos tambe mustra e mesun diligencia den nos trabou di predica.​—⁠Heb. 6:⁠11.