“Keda den e Amor di Dios”
1. Cu ki proposito a publica e buki “Keda den e Amor di Dios”?
1 E siman di 5 di november nos lo cuminsa studia e buki “Keda den e Amor di Dios” na e Estudio di Bijbel di Congregacion. Bo ta ansioso pa e dia yega? E carta cu Cuerpo Gobernante a skirbi na tur esnan cu stima Jehova ta bisa na final: “Nos ta spera sinceramente cu e buki aki lo yuda bo sigui aplica e berdad den bo bida y asina ‘keda den e amor di Dios . . . cu bida eterno na bista.’—Judas 21.”
2. Den ki aspecto di bida e buki aki lo yuda nos?
2 Kico Nos Por Spera: Con nos por aplica principionan biblico den asuntonan manera asociacion, entretenimento, respet pa autoridad, custumbernan personal, matrimonio, habla y tradicion? E publicacion aki lo yuda moldea nos consenshi di acuerdo cu e normanan halto di husticia cu nos por haya den e Palabra di Dios. (Sal. 19:7, 8) Segun cu nos ta haya un mihor comprondemento di Jehova su manera di pensa, nos deseo pa agrad’e lo motiva nos pa obedec’e den tur aspecto di nos bida.—Pro. 27:11; 1 Juan 5:3.
3. Dicon nos tin cu haci esfuerso pa comenta tur siman na e estudio?
3 No Keda sin Participa: Prepara cu e meta pa alaba Dios meymey di su pueblo congrega. (Heb. 13:15) Henter e congregacion lo studia y considera e publicacion aki hunto. E echo cu lo no abarca hopi material lo duna nos chens pa ta mihor prepara pa asina nos por comparti cu confianza loke nos a siña. Nos comentarionan bon prepara y al caso lo stimula otro pa mustra amor y haci bon obra, y lo contribui pa e estudio ta animante y beneficioso. (Heb. 10:24) Ademas, ora nos comenta tocante nos fe, nos ta sinti nos feliz.
4. Dicon ta asina importante pa nos cumpli cu e mandamentonan di Jehova?
4 Riba e ultimo anochi prome cu Hesus a muri, el a mustra e relacion cu tin entre cumpli cu e mandamentonan di Jehova y keda den e amor di Dios. (Juan 15:10) E buki “Amor di Dios” lo yuda nos pa ta mas determina cu nunca pa aplica principionan biblico den nos bida diario y pa “keda den e amor di Dios.”—Judas 21.