Uza Tratado pa Plama e Bon Noticia
1. Con e pueblo di Dios a uza tratado?
1 Pa hopi tempo caba, e pueblo di Jehova a bin ta uza tratado biblico pa plama e bon noticia. Na 1880, C. T. Russell y su compañeronan a cuminsa publica tratado pa e lesadonan di E Toren di Vigilancia parti pa otro hende. Tratado tabata asina importante cu na 1884 ora C. T. Russell a registra un corporacion legal no comercial pa promove interesnan di Reino, el a inclui e palabra Ingles “tract” (tratado) den e nomber di e corporacion: Zion’s Watch Tower Tract Society (awor conoci como Watch Tower Bible and Tract Society of Pennsylvania). Pa aña 1918, e Studiantenan di Bijbel a laga mas cu 300 miyon tratado. Te awe tratado ta un herment practico pa predica cu ne.
2. Dicon e tratadonan ta practico?
2 Nan Ta Practico: E tratadonan ta colorido y yamativo, y nan mensahe ta breve, informativo y fascinante. Nan ta atrae e doñonan di cas cu ta haya cu un revista of buki ta mucho pa lesa. Nan ta facil pa hasta publicador nobo y mucha ofrece. Ademas, como cu nan ta chikito, ta facil pa nos tin nan hunto cu nos tur ora.
3. Conta un experencia personal of un cu a sali den nos publicacionnan cu ta mustra e balor di tratado.
3 Hopi hende a haya e berdad pa medio di un tratado. Por ehempel, un señora na Haiti a haya un di nos tratadonan abou na suela. El a coy e tratado, les’e y bisa: “Mi a haya e berdad!” Cu tempo, el a bay Salon di Reino, a cuminsa studia Bijbel y a batisa. Tur esaki debi na e poder di e Palabra di Dios cu tin den un tratado.
4. Kico ta nos meta ora nos tin tratado como oferta di luna?
4 Di Cas pa Cas: Ya cu tratado ta un herment masha util pa duna testimonio, cuminsando na november, de bes en cuando nan lo ta nos oferta di luna. Claro, nos meta no ta pa djis duna e doño di cas un tratado, sino pa uza esaki pa cuminsa un combersacion. Si na e prome bishita of rebishita nos mira cu e persona tin interes, nos por splic’e con nos ta studia Bijbel cu hende uzando e buki Bijbel Ta Siña of un otro publicacion di estudio. Con nos por ofrece tratado? Como cu tin diferente tratado, lo ta bon pa nos conoce contenido di esnan cu nos ta bay ofrec’e.
5. Con nos por ofrece tratado di cas pa cas?
5 Nos mester adapta nos presentacion na e tratado cu nos ta uza y na e teritorio. Nos por cuminsa e combersacion dunando e doño di cas e tratado. Kisas e parti dilanti cu ta yamativo por lanta su interes. Of nos por mustra e doño di cas diferente tratado y lag’e scoge esun cu e ta haya interesante. Si nos ta den un teritorio unda hende tin miedo di habri porta, nos por tene e tratado di tal manera cu e doño di cas por mira e tema, of nos por puntr’e si nos por pasa e tratado bou di su porta y haya su opinion tocante e tema. Si e tema di e tratado ta den forma di un pregunta, nos por pidie su opinion tocante dje. Of nos mes por haci un pregunta cu ta lanta interes y cu ta hiba na combersacion. E ora ey nos por lesa parti di e tratado cu e doño di cas, y caminda tin pregunta nos por para un rato pa puntra e doño di cas su opinion. Lo ta bon pa lesa e textonan clave for di Bijbel. Despues di trata un parti di e informacion, nos por conclui e combersacion y traha un afspraak pa bin bek. Si nos congregacion tin custumber di laga literatura ora no tin hende na cas, nos por laga un tratado na un luga cu no ta den pleno bista.
6. Con nos por uza tratado pa predica riba caya?
6 Riba Caya: Bo a yega di uza tratado ora di predica riba caya? Tin hende tin pura y no ta dispuesto pa para combersa cu nos. Pesey no ta facil pa determina cuanto interes nan tin. Den un caso asina, ta mihor duna nan un tratado y no e ultimo revistanan, ya cu nos no sa si nan lo lesa e revistanan. Debi cu e parti dilanti di e tratado ta yamativo y su mensahe ta breve, e por lanta hende su curiosidad y motiva nan pa lesa e tratado ora nan ta mas trankil. Claro, si nan no tin pura, nos por considera un parti di e tratado cu nan.
7. Conta algun experencia cu ta mustra con pa ofrece tratado ora di duna testimonio informal.
7 Testimonio Informal: Ta facil pa duna testimonio informal cu tratado. Un ruman homber ta hinca un par den su saco ki ora cu e sali. Ora e topa un hende, manera un trahado den un tienda, e ta ofrec’e un tratado. Un pareha cu a bay keiro na New York tabata sa cu nan lo a topa hende di diferente pais. Pesey nan a dicidi di bay cu e foyeto Bon Nobo pa Hende di Tur Nacion y varios tratado den diferente idioma. Anto ora nan a topa un hende cu tabata papia un otro idioma ta bende cos riba caya, sinta banda di nan den un parke of den un restaurant, nan tabata ofrec’e un tratado den su idioma.
8. Dicon por compara tratado cu simia?
8 “Sembra Bo Simia”: Por compara tratado cu simia. Un sembrado ta strooi hopi simia pasobra e no sa cua ta bay spruit. Eclesiastes 11:6 ta bisa: “Sembra bo simia mainta, y no keda sin haci nada atardi; pasobra bo no sa si sembramento di mainta of di atardi lo tin exito, of si nan tur dos lo ta bon.” Pues laga nos sigui “plama conocemento” pa medio di e herment practico aki pa duna testimonio.—Prov. 15:7.
[Comentario na pagina 3]
Ya cu tratado ta un herment masha util pa duna testimonio, cuminsando na november, de bes en cuando nan lo ta nos oferta di luna