Tuma e Profetanan Como Ehempel: Joel
1. Con nos por imita Joel su humildad ora nos ta predica?
1 Ken e profeta Joel tabata? Wel, e unico cos cu el a bisa di su mes ta cu e tabata “yiu homber di Petuel.” (Joel 1:1) E humilde profeta aki a hala atencion na Jehova su mensahe, y no na su mes como e mensahero. Asina tambe, den sirbishi, en bes di busca gloria of reconocemento pa nos mes, nos ta hala atencion di e hendenan na Jehova y na su Palabra, Bijbel. (1 Cor. 9:16; 2 Cor. 3:5) Ademas, e mensahe cu nos ta proclama ta fortalece nos. Cua ta e aspectonan di Joel su profecia cu por duna nos mas celo y speransa?
2. E echo cu e dia di Jehova ta cerca mester motiva nos pa haci kico?
2 ‘E Dia di Jehova Ta Cerca.’ (Joel 1:15): Aunke Joel a skirbi e palabranan aki miles di aña pasa, nos ta bibando den e tempo cu nan lo cumpli den nan totalidad. E condicion mundial cu ta sigui empeora y e indiferencia y bofon cu nos ta haya den teritorio ta prueba convencente di cu e era malbado aki ta den su ultimo dianan. (2 Tim. 3:1-5; 2 Ped. 3:3, 4) Ora nos para keto y realisa con cerca e fin ta, nos ta haya mas motibo pa duna e trabou di predica prioridad den nos bida.—2 Ped. 3:11, 12.
3. Dicon e trabou di predica ta asina importante awor cu e tribulacion grandi ta cerca?
3 ‘Jehova Ta un Refugio pa Su Pueblo.’ (Joel 3:16): E temblamento describi den e versiculo aki lo tuma luga ora Jehova ehecuta su huicio durante e tribulacion grandi. Ta un consuelo pa sa cu Jehova lo libra su fiel sirbidornan durante e tempo ey. (Rev. 7:9, 14) Segun cu nos ta participa den e trabou di predica y ta experencia con Jehova ta sostene y fortalece nos, nos ta desaroya e fe y awante cu lo yuda nos enfrenta e tribulacion grandi cu ta na caminda.
4. Dicon nos por regociha y enfrenta futuro cu confianza?
4 Aunke algun hende a describi e profecia di Joel como un mensahe di calamidad, e ta ofrece e pueblo di Dios e glorioso speransa di liberacion. (Joel 2:32) Pues laga nos enfrenta futuro cu confianza y proclama cu celo e bon noticia di e Reino di Dios segun cu nos ta haci caso di e palabranan di Joel 2:23: ‘Regociha y sea contento den Jehova boso Dios.’