SIGUI BUSCA COMPRONDEMENTO

Robert: Frank, mi ta gusta nos combersacionnan tocante Bijbel.a Ultimo biaha cu nos a papia, bo a haci un pregunta tocante e Reino di Dios. Bo a puntra mi dicon testigonan di Jehova ta kere cu e Reino a cuminsa goberna na aña 1914.

Frank: Si, mi a lesa esey den un di boso publicacionnan, esta, cu e Reino di Dios a cuminsa goberna na 1914. Esey a haci mi curioso pasobra boso ta bisa cu tur boso creencianan ta basa riba Bijbel.

Robert: Si, ta asina mes.

Frank: Wel, mi a lesa Bijbel completo. Pero mi no por corda cu mi a yega di mira e aña ey skirbi niun caminda. Pesey mi a bay busca “1914” den un Bijbel riba Internet y, net manera mi a pensa, mi no a haya niun resultado.

Robert: Mi tin cu duna bo un compliment pa dos motibo, Frank. Na prome luga, pasobra bo a lesa Bijbel completo. Esey ta nifica cu bo ta stima e Palabra di Dios.

Frank: Si, no tin niun buki manera Bijbel.

Robert: Bo tin rason. Na di dos luga, mi kier elogia bo pasobra bo a bay busca e contesta pa bo pregunta den Bijbel. Bo a haci precies loke Bijbel mes ta anima nos pa haci: pa nos sigui busca comprondemento.b E tipo di esfuerso ey ta bale la pena.

Frank: Danki, Robert. Bo sa, mi tin gana di sigui siña mas. Pesey, mi a haci mas investigacion y mi a haya algun informacion tocante 1914 den e buki cu nos ta lesando aki. E ta menciona loke un rey a soña. Segun mi, tabata trata di un palo grandi cu a ser gekap y despues a crece bek, of algo asina.

Robert: Aha, esey ta e profecia skirbi na Daniel capitulo 4. E ta papia di un soño cu Rey Nabucodonosor di Babilonia tabatin.

Frank: Si, esey mes. Mi a lesa e profecia ey varios biaha caba. Pero pa ta franco cu bo, ainda mi no por compronde kico e tin di haber cu e Reino di Dios of cu e aña 1914.

Robert: Bo sa Frank, ni profeta Daniel mes no a compronde completamente loke el a ser inspira pa skirbi.

Frank: Berdad?

Robert: Si. Aki na Daniel 12:8, e ta bisa: “Pa loke ta ami, mi a tende, ma no por a compronde.”

Frank: Kiermen no ta mi so no ta compronde anto. Ta bon mes.

Robert: En realidad, Daniel no a compronde pasobra, pa Dios, ainda no tabata tempo pa hende haya sa kico e profecianan den e buki di Daniel ta nifica. Pero, awor den nos tempo, nos si por compronde e profecianan aki mas mihor.

Frank: Dicon bo ta bisa esey?

Robert: Wel, wak kico e siguiente versiculo, Daniel 12:9, ta bisa: “E palabranan aki ta keda scondi y seya te na e tempo di e fin.” Pues, hende lo a compronde e profecianan aki hopi mas despues, durante “e tempo di e fin.” Y manera nos lo trata pronto den nos curso di Bijbel, tur cos ta indica cu aworaki nos ta bibando den e tempo ey.c

Frank: Awor, bo por splica mi kico e profecia di Daniel ta nifica?

Robert: Mi ta bay haci mi best.

E SOÑO DI NABUCODONOSOR

Robert: Pa cuminsa, laga mi resumi un rato kico Rey Nabucodonosor a soña. Despues nos por sigui papia tocante loke e ta nifica.

Frank: Okay, ta bon.

Robert: Den su soño, Nabucodonosor a mira un palo grandi cu tabata yega te den cielo. Despues el a tende un mensahero di Dios duna ordo pa kap e palo. Pero Dios a bisa pa laga su raiznan y un pida troncon keda den tera. Despues di “shete periodo di tempo”, e palo lo a crece bek.d Na prome instante, e profecia aki a aplica na Nabucodonosor mes. Aunke e tabata un Rey prominente, mescos cu e palo cu a yega te den cielo, el a ser corta pa “shete periodo di tempo.” Bo ta corda kico a pasa?

Frank: Hmm, no, mi no ta corda.

Robert: No ta problema. Bijbel ta mustra cu Nabucodonosor a bira loco, aparentemente pa shete aña. Durante e tempo ey, e no por a goberna como rey. Pero na final di e shete periodonan di tempo, Nabucodonosor a recobra su sano huicio y a cuminsa goberna atrobe.e

Frank: Okay, mi ta compronde loke bo a splica mi te asina leu, pero kico tur esey tin di haber cu e Reino di Dios y e aña 1914?

Robert: Den poco palabra, e profecia aki ta cumpli den dos manera. El a cumpli prome biaha ora cu e gobernacion di Rey Nabucodonosor a keda interumpi. El a cumpli e di dos biaha ora e gobernacion di Dios a keda interumpi. Pues, ta e di dos cumplimento tin di haber cu e Reino di Dios.

Frank: Con bo por sa cu e profecia tin un di dos cumplimento cu tin di haber cu e Reino di Dios?

Robert: Wel, pa cuminsa, e profecia mes ta bisa esey. Segun Daniel 4:17, Dios a duna e profecia aki ‘pa e bibonan por sa cu ta e Haltisimo ta goberna e reino di hende, y cu e ta duna esaki na esun cu e kier.’ Bo a ripara cu e texto ta menciona “e reino di hende”?

Frank: Si, e ta bisa cu “e Haltisimo ta goberna e reino di hende.”

Robert: Hopi bon! Awor, ken bo ta kere ta “e Haltisimo”?

Frank: Segun mi, aki e ta papiando di Dios.

Robert: Corecto. Pues esaki ta laga nos compronde cu no ta di Nabucodonosor so e profecia aki ta papia. E ta referi tambe na “e reino di hende”, esta, Dios su gobernacion riba hende. Y esaki ta zona logico ora nos wak e contexto di e profecia.

Frank: Con bo kiermen?

E TEMA PRINCIPAL DI E BUKI DI DANIEL

Robert: E buki di Daniel ta referi bes tras bes na e mesun tema. E ta mustra cu e Reino di Dios a cuminsa goberna cu Hesus como Rey. Por ehempel, laga nos ban un par di capitulo mas prome. Bo por lesa Daniel 2:44?

Frank: Okay. E ta bisa: “Den e dianan di e reynan ey e Dios di cielo lo lanta un reino cu nunca lo no wordo destrui, y e reino ey lo no pasa pa ningun otro pueblo; e lo garna y pone un fin na tur e reinonan aki, ma e mes lo dura pa semper.”

Robert: Danki. Bo no ta kere cu e versiculo aki ta referi na e Reino di Dios?

Frank: Hmm. Mi no ta sigur.

Robert: Wel, ripara cu e ta bisa cu e Reino aki “lo dura pa semper.” Esaki ta algo cu ta conta sigur pa e Reino di Dios pero nos por bisa mescos di gobiernonan humano?

Frank: Mi ta kere cu no.

Robert: Ata aki un otro profecia den e buki di Daniel cu ta referi na e Reino di Dios. E ta para na Daniel 7:13 y 14 y ta papia tocante un futuro gobernante. E ta bisa: “Na dje a wordo duna dominio, gloria y un reino, pa tur pueblo, nacion y hende di tur idioma por sirbie. Su dominio ta un dominio eterno cu lo no pasa nunca, y su reino ta un cu lo no wordo destrui.” Tin algo den e profecia aki cu ta zona conoci?

Frank: E ta menciona un reino.

Robert: Asina mes, pero no cualkier reino. Ripara cu e ta bisa cu e Reino aki lo goberna “tur pueblo, nacion y hende di tur idioma.” Cu otro palabra, e Reino aki lo goberna henter mundo.

Frank: Mi no a mira esey mes, pero bo tin rason. Ta asina e ta bisa berdad.

Robert: Wak tambe kico mas e profecia ta bisa: “Su dominio ta un dominio eterno cu lo no pasa nunca, y su reino ta un cu lo no wordo destrui.” E profecia aki parce esun cu nos a caba di lesa na Daniel 2:44, no ta berdad?

Frank: Si, berdad.

Robert: Laga nos resumi un rato asina loke nos a papia te asina leu. E profecia di Daniel capitulo 4 a ser skirbi pa hende por sa cu “e Haltisimo ta goberna e reino di hende.” Esaki riba su mes caba ta mustra bon cla cu e profecia aki tin un cumplimento mas grandi cu djis e parti cu tin di haber cu Nabucodonosor. Y den henter e buki di Daniel nos por haya profecia tocante e Reino di Dios cu a keda estableci bou di e gobernacion di su Yiu, Hesus. Awor, bo no ta kere cu ta rasonabel pa conclui cu e profecia di Daniel capitulo 4 tambe tin algo di haber cu e Reino di Dios?

Frank: Si, e ta parce rasonabel. Pero ainda mi no ta mira ki conexion e tin cu 1914.

‘LAGA SHETE TEMPO PASA’

Robert: Wel, laga nos bay bek na Rey Nabucodonosor. Corda cu e palo den e prome cumplimento di e profecia a representa Rey Nabucodonosor. Su gobernacion a keda interumpi pa un tempo cortico ora cu e palo a ser gekap y a keda bandona pa shete tempo. Esaki ta e periodo di tempo cu Nabucodonosor a bira loco. E periodo ey di shete tempo a caba ora cu Nabucodonosor a recobra su sano huicio y a bolbe cuminsa goberna. Den e di dos cumplimento di e profecia, Dios su gobernacion lo a stop pa un periodo di tempo, pero no pasobra Dios a fracasa.

Frank: Con bo kiermen?

Robert: Den temponan biblico, e reynan Israelita cu a goberna na Jerusalem, na moda di papia, tabata sinta riba e “trono di SEÑOR.”f Nan tabata goberna e pueblo di Dios como su representante. Pues, e gobernacion di e reynan ey tabata realmente un refleho di Dios su gobernacion. Pero, cu tempo mayoria di e reynan ey a bira desobediente na Dios y gran parti di e pueblo a sigui nan mal ehempel. Pa motibo di e desobediencia di e Israelitanan, Dios a permiti e Babilonionan captura nan na aña 607 prome cu Cristo. For di e tempo ey padilanti, no tabatin niun otro rey mas cu a representa Jehova na Jerusalem. Den e sentido ey, anto, Dios su gobernacion a keda interumpi. Bo a compronde te asina leu?

Frank: Mi ta kere cu si.

Robert: Pues aña 607 a marca e cuminsamento di e shete tempo of e periodo cu Dios su gobernacion a keda interumpi. Na final di e shete tempo Dios lo a nombra un gobernante nobo pa represent’e, pero e biaha aki un persona den cielo. Esey ta e momento cu e otro profecianan cu nos ta lesa di dje den e buki di Daniel a cumpli. Pues e pregunta importante cu ta lanta ta: Na ki tempo e shete tempo a yega na su fin? Si nos por contesta e pregunta aki, nos lo por sa na ki tempo e Reino di Dios a cuminsa goberna.

Frank: Warda mi. Laga mi wak si mi sa. E shete tempo a caba na 1914?

Robert: Exactamente! Bo a capta e punto.

Frank: Pero con nos por sa esey?

Robert: Wel, durante Hesus su sirbishi aki riba Tera, el a bisa cu e shete tempo no a yega na su fin ainda.g Pues lo mester ta trata aki di un periodo basta largo. E shete tempo a cuminsa cientos di aña prome cu Hesus a bin na Tera y a sigui pa hopi siglo despues cu el a bay cielo bek. Corda tambe cu hende lo no por a compronde nificacion di e profecianan di Daniel sino te na “e tempo di e fin.”h Ta interesante pa sa cu na final di siglo 19 studiantenan sincero di Bijbel a sinti nan motiva pa analisa e profecia aki y tambe otro profecianan a fondo. Nan a cuminsa compronde cu e shete tempo lo a caba na aña 1914. Y acontecimentonan mundial impactante for di aña 1914 a confirma cu en berdad e Reino di Dios a cuminsa goberna den cielo. Tabata e aña cu e mundo aki a drenta su ultimo dianan, esta, e tempo di fin. Mi sa cu esaki kisas ta un poco pisa.

Frank: Si, lo mi tin cu bay repasa esaki pa mi por comprond’e mihor.

Robert: No worry pasobra a tuma ami tambe un poco tempo pa mi por a compronde. Pero mi ta echt spera cu nos combersacion a yuda bo mira cu testigonan di Jehova ta basa nan creencianan tocante e Reino riba Bijbel.

Frank: Si, sigur. Un cos cu semper a impresiona mi ta e confianza cu boso tin den Bijbel.

Robert: Y mi a ripara cu abo tambe lo kier tin e mesun confianza aki. Manera mi a bisa bo caba, mi sa cu tur esaki ta duro pa bo compronde den un solo biaha. Y probablemente lo bo tin mas pregunta ainda. Por ehempel, nos a mira bon cla cu e shete tempo tin di haber cu e Reino di Dios y cu esaki a cuminsa na aña 607 prome cu Cristo. Pero con nos por sa cu e shete tempo a caba na aña 1914?i

Frank: Si, esey mes mi tabata puntra mi mes.

Robert: Bijbel mes ta yuda nos saca afo con largo e shete tempo a dura. Lo bo kier pa nos combersa tocante esey e siguiente biaha cu mi bin?j

Frank: Okay, esey ta un bon idea.

UN RESUMEN DI E SOÑO DI NABUCODONOSOR

Robert: Frank, mi ta contento di mira bo atrobe. Con a bay?

Frank: Ami ta bon, danki.

Robert: Contento di tende esey. Mi ta disfruta di nos combersacionnan semanal tocante Bijbel.a Biaha pasa cu nos a combersa, nos a papia tocante dicon testigonan di Jehova ta bisa cu e Reino di Dios a cuminsa goberna na aña 1914.b Nos a mira cu e profecia den Daniel capitulo 4 ta duna nos un indicacion importante. Bo ta corda tocante kico e capitulo ey ta papia?

Frank: Si. Nos a lesa cu Rey Nabucodonosor a soña tocante un palo grandi.

Robert: Si, asina mes. Nabucodonosor a soña cu un palo grandi cu tabata yega te den cielo. Despues el a tende un angel di Dios duna ordo pa basha e palo abou. Pero Dios a bisa pa laga e troncon cu su raiznan keda den tera. Despues di “shete periodo di tempo”, e palo lo a crece bek.c Tambe nos a papia tocante dicon e profecia tin dos cumplimento. Bo ta corda cua tabata e prome biaha cu el a cumpli?

Frank: Ta algo cu a pasa cu Nabucodonosor mes, toch? El a bira loco pa shete aña largo.

Robert: Corecto. Ora Nabucodonosor a bira loco, e no por a goberna pa un tempo. Pero e cumplimento principal di e profecia tabata ora cu Dios su gobernacion riba Tera a keda interumpi pa shete periodo di tempo. Manera nos a mira, e periodo ey a cuminsa ora cu Jerusalem a ser destrui na aña 607 prome cu Cristo. For di e tempo ey en adelante, no tabatin niun rey mas riba Tera cu a representa Jehova Dios pa goberna su pueblo. Pero, na fin di e shete tempo, Dios lo a nombra un rey nobo pa goberna su pueblo, pero e biaha aki un persona den cielo. Cu otro palabra, fin di e shete tempo lo a marca comienso di e gobernacion di Dios su Reino celestial. Biaha pasa, nos a trata ki tempo e shete periodonan di tempo a cuminsa. Pues, si nos por determina cuanto esey a dura, nos lo sa na ki aña e Reino di Dios a cuminsa goberna. Bo a compronde loke nos a trata te cu awor?

Frank: Si. Loke bo a caba di bisa a yuda mi refresca mi memoria.

Robert: Hopi bon. Laga nos ban wak awor con largo e shete periodonan di tempo a dura. Mi mes tambe mester a repasa e informacion aki prome cu mi a bin cerca bo pa mi por corda tur e detayenan. Lo mi purba di splica bo lo mihor cu mi por.

Frank: Okay.

E SHETE PERIODONAN DI TEMPO TA TERMINA, Y E ULTIMO DIANAN TA CUMINSA

Robert: Den e prome cumplimento di e profecia, esun relaciona cu Nabucodonosor, e shete periodo di tempo tabata literalmente shete aña. Pero den e di dos cumplimento, relaciona cu e Reino di Dios, e shete tempo mester ta mas largo cu shete aña literal.

Frank: Con bo por sa esey?

Robert: Wel pa cuminsa, corda cu e shete periodo di tempo a cuminsa ora cu Jerusalem a ser destrui na aña 607 prome cu Cristo. Si nos cuminsa conta for di e aña ey, shete aña literal lo yega na aña 600. Pero nada significante no a pasa den e aña ey relaciona cu e gobernacion di Dios. Ademas, manera nos a trata mas prome, siglonan despues ora cu Hesus tabata aki riba Tera, el a indica cu e shete tempo no a caba ainda.

Frank: Ahn si. Awor mi ta corda.

Robert: Pues, en bes di ta shete aña literal, e shete periodo di tempo mester ta un periodo mas largo.

Frank: Con largo anto?

Robert: E buki di Revelacion tin un profecia cu ta hopi liga cu esun den e buki di Daniel, y e ta yuda nos determina exactamente con largo e shete periodo di tempo a dura. E profecia ey ta laga nos compronde cu un periodo di tres tempo y mey ta igual cu 1.260 dia.d Pues, shete tempo, cu ta dos biaha tres tempo y mey, ta igual cu 2.520 dia. Bo a compronde te asina leu?

Frank: Si, pero ainda mi no ta mira con esaki ta mustra cu e Reino di Dios a cuminsa goberna na 1914.

Robert: Wel, awor mi ta bay mustra bo. Tin biaha den profecia di Bijbel, un dia ta simbolisa un aña.e Si nos aplica e regla di un dia pa cada aña, e shete periodo di tempo lo suma un total di 2.520 aña. Y si nos conta 2.520 aña for di aña 607 prome cu Cristo, ora cu e shete periodo di tempo a cuminsa, nos ta yega na aña 1914.f Asina nos ta yega na e aña cu e shete tempo a termina y cu Hesus a cuminsa goberna como Rey di e Reino di Dios. Anto ta remarcabel cu for di aña 1914 padilanti, sucesonan mundial cu Bijbel a profetisa pa e ultimo dianan a cuminsa tuma luga.

Frank: Ki sorto di sucesonan?

Robert: Wak kico Hesus a profetisa na Mateo 24:7 cu lo sosode ora e cuminsa goberna den cielo. El a bisa: “Nacion lo lanta contra nacion y reino contra reino, y lo tin scarsedad di cuminda y temblor den un luga tras di otro.” Bo a nota cu Hesus a profetisa cu lo tin scarsedad di cuminda y temblor durante e periodo ey? Bo no ta haya cu nos mundo sigur a experencia hopi di e tipo di problemanan ey durante e siglo cu a pasa?

Frank: Esey ta berdad.

Robert: Den e versiculo aki Hesus a profetisa tambe cu lo tin guera durante su presencia como Rey di e Reino di Dios. Y e buki di Revelacion a profetisa cu e gueranan den e tempo di fin lo no tabata solamente conflictonan local, sino tambe gueranan internacional cu lo a afecta henter mundo.g Bo ta corda na ki aña Prome Guera Mundial a cuminsa?

Frank: Esey tabata na aña 1914. E mesun aña cu bo ta bisa cu Hesus a cuminsa goberna. Nunca mi no a conecta nan cu otro.

Robert: Ora cu nos pone tur esakinan hunto, esta, e profecia tocante e shete periodo di tempo y e otro profecianan den Bijbel relaciona cu e tempo di fin, tur ta cuadra cu otro. Testigonan di Jehova ta convenci cu Hesus a cuminsa goberna como Rey di e Reino di Dios na 1914 y cu e ultimo dianan a cuminsa e aña ey tambe.h

Frank: Te ainda mi ta purba di compronde tur esaki.

Robert: Mi ta compronde loke bo ta sinti. Ami tampoco no a comprond’e mesora ora nan a splica mi esaki. Pero mi ta spera cu por lo menos nos combersacion a yuda bo mira cu aunke Bijbel no ta menciona aña 1914 specificamente, testigonan di Jehova tin motibo pa kere cu Hesus a cuminsa goberna e aña ey y cu tur loke nos ta kere ta basa riba Bijbel.

Frank: Si. Esey ta loke semper a impresiona mi di boso. Tur cos cu boso ta bisa, boso ta basa riba Bijbel. Boso nunca no ta bisa “mi ta kere” of “mi ta pensa.” Semper boso ta uza Bijbel. Pero mi ta puntra mi mes dicon tur esaki mester ta asina complica. Dicon Dios no por a djis bisa nos den Bijbel cu 1914 lo ta e aña cu Hesus lo a cuminsa goberna den cielo?

Robert: Frank, esey ta un bon pregunta. Tin hopi cos cu Bijbel no ta bisa na un manera directo. Pues, hende mester haci esfuerso pa comprond’e. Pero dicon Dios a laga skirbi Bijbel asina? Kisas nos por papia tocante esey e proximo biaha cu mi bin.

Frank: Esey ta un bon idea. Mi ta warda bo.